MASESEKE AA KUKOMENA KWIINDA
MU KUSWAANGANA

Kumatalikilo a myaka ya ma 1960, mukwesu Andileya uuzwa ku Holand, wakabba mukuli wa ma bbaibbele mumootokala wakwe wa VW, wainda amunyinza wa Romania ngooyo wainda ba malonda. Wakalyookezya muhotela mwaakakupailila kuti Leza amutondezye nkamu zya bakondwa bakonzya kubelesya kabotu mabuku a malembe.

Kumamanino amvwiki Andileya wakabuzya mulembi wamuhotela naa kwakali nkwaakali kukozya kujana cikombelo. Mulembi wakamulangisisya kapati akuvwiila, "tatujisi zyinji zyazyezyo zyozyi. Kwamana boobo tokateeleli mulaka pe".

"Hena tozyi", wakaingula Andileya, "baKlistu bakanana mulaka uunvwugwa nyika yoonse?" "Oh, ninzi eeco?"
"Ciitwa kuti Agape."
Mulembi takaningaba abuzuba wamvwa bbala eeli, pesi Andileya waka mushomezya kuti "ngomulaka wiinda kubota munyika."

Andileya wakacikonzya kujana zyikombelo zyinji zyaandeene andeene mubusena akucikonzya kuti babe amuswaangano a mulembi alimwi amusololi wa nsangano imwi. Mukubula coolwe nokuba kuti Andileya abasankwa aba bakalizyi milaka iimbi yabukuwa, bakabula mulaka omwe ngubakalikukonzya kumvwana kabotu pe. Mpoona bakakkala kabalangana buyo.

Andileya wakasakana bubi amukuli wakwe muyandisi, pele taakakonzya kuzyiba naa aba bantu bakali bakondwa benibeni naa bakali batifwi-tifwi ba mfulumende. Kumamanino wakabona Bbaibbele lyaci Romania a tebule mu ofesi. Andileya wakanjila munkomwe wafumuna Bbaibbele lya muci Dutch wajalula kuba 1 baKolinto 16:20 akuli nyamuna mujulu Bbaibbele, katondeka alembedwe izina lyabbuku, ndibakazyiba. Mpoona bakagweemuka kumeso. Bakafwambaana akuyandaula cisyoonto eeci mumabbuku aabo amuci Romania akulibalila: "Boonse bana bakwenu kuno bamwaanzya, Amumyontane nomwaanzyanya umwi-aumwi mukusetekana."

Balombwana bakamulanga awalo Andileya, Mpoona umwi wambabo wakalanga mu Bbaibbele lyakwe akujana Tusimpi 25:25. Andileya wakajana cisyoonto eeci akucibala: "mbuli meenda aatontola kumuntu uukatede mbwaabede makani aazwa kucisi cakule."

Aaba balombwana bakaambaula akuyiisyanya malembe kwacisela ca woola. Bakakondwa kapati mumubandi wabo wakanyina zyakusalaulana mibala cakuti bakaseka amisozi kayeenda kumeso. Andileya wakazyiba kuti wajana bana bokwabo. Naakabatondezya mukuli wakwe wama Bbaibbele, bana Romania aaba bakakkomana kapati cakufukatilana limwi.
Mangolezya alya ku hotela, mulembi wakaboola kuli Andileya kati, "kwaamba, ndakaliyandaula eeli bbala 'Agape' mubbuku lipandulula mabala, ndakajana kunyina mulaka uutegwa Agape pe. Eli ndibbala buyo lyamuci Gilikki lyaamba luyando."

Andileya wakaingula "mbombubo, mangolezya alya oonse ndakalikubelesya mulaka ooyu waluyando". Mwati waubona buya mulaka mubotu ooyu? Muciiyo eeci, muyakwiiya Leza mbwakonzya kutuleta muntambo yaluyando lwakwe lupati

1. CIKOMBELO CAKALENGELWAKUTI NKWAKUBUNGANINA

Jesu wakatalisya mbungano kuti akomenzye akusanina zintu ziyandika mubantu. Toonse tulaanzyotuyanda. Eeyi njencito yacikombelo. Ncotubunganina akugwasyanya. Malembe atondezya mbungano yabatumwa bazyandamene bakaleta bantu mulukkomano lwakaakusika akuli Leza singuzu:

"Twamuletela akumwaambila ncitwabona akuteelela, kutegwa andinywe MUBUNGANE ANTOOMWE ANDISWE. "KUBUNGANA KWESU KULI SANGANIDWE A TAATA ALIMWI A MWANAAKWE, Jesu Klistu. Twalemba EECI KUMANIINZYA LUKKOMANO LWESU." - 1 Johane 1:3, 4.

Kujatana kwamyoyo yaangidwe kwiinda muli Jesu ya umwi-aumwi, ijanya "LUKKOMANO" lumaniinide! Zyoonse zyaamba mulaka comwe, mulaka wa luyando.

Bakondwa babamumukwasyi mupati. Baba babunyina muli Klistu nkaambo boonse mba mukowa omwe. Mboziya bukomena nguzu zyalukamantano lwabakondwa, akujatana antoomwe kwabana Klistu mbo kukomena.
Bantu bambungano zyakatalikwa abatumwa ba Jesu zyakajatana antoomwe anguzu zya lusyomo lukonzyanya, luyando lwa Leza wabo alimwi a makanze abo aakumunyonena akutola luse lwakwe munyika. Ooku kujatana kuyumu kwakaba kamwi katwaambo twaacita kuti aba bantu banyina nguzu basikupenzegwa bongaye buyo basandamune nyika yoonse.

2. IMBUNGANO JESU NJAAKATALIKA

Hena Jesu ulaambungano, naa muzeezo oonse wakulibungabunga mulukondo nkwa mumizeezo buyo ya muntu uulya maila? Jesu ulaingula:

"Awa ABBWE ndiya kuyaka mbungano yabantu bangu amilyango yabasikufwa tiikoozoomuzunda." - Mateyo 16:18.

Jesu ndebbwe lyakuzyamya, bbwe lyakukaswi kacikombelo cakwe. Ninkamunzi iibamba lubazu lwa ntalisyo?

"Yakaba antalisyo yaba tumwa a basinsimi, Jesu lwakwe kali ndebbwe lyakukaswi." - Ba Efeso 2:20.

Mbulumbu nzi Leza mbwaakajana mulumbe niwaka kambaukwa?

"Elyo Leza wakayungizya ku MBUNGANO lyoonse aabo beelede kufutuka." - Incito 2:47, K.J.V.

Jesu naakatalika mbungano, wakasyomezya kuti "Milyango yabasikufwa tiikabazundi" (Mateyo 16:18), alimwi mbungano yabakondwa iicizumanana. Yalwanwa abasinkondo basinguzu - baci Roma alimwi aba silunya bakumasi aakujwe - pesi bulowa bwabasikufwida lusyomo lwalo bwagwasya kukomezya mbungano canguzu. Uukondwa omwe-omwe naakaumpwa kalanga naa kuwaalilwa mubalavu, abamwi bakaliwaalila kubweza masena aabasikujaigwa. Basinkondo bakabeleka anguzu mbobakonzya kujaya mbungano yabakondwa. Pesi kasimpe ka ciKlistu kayabuzundana cabulondo kwiinda lyoonse akale. mubupampupampu amubukkale buyo.

Imwi nkondo mpati yacikombelo yakaba mbucakamanina kutambulwa kuti ninkamu yalusangano kuzwa kubulelo bwa ci-Roma. Imbungano yaka komena kapati-mane yakanyonyoonwa mubumpelenge yakalibonya kufwa mumuya ciindi ca mazuba aamusinze.

Pele Leza wakasimpide nkanka zyabasicamba bakondwa basyomeka, bakamweka mbuli nyenyenzi mumudima muziindi zyamakatazyo amapenzi.

Paulu weelanya kuswaangana kwa Jesu acikombelo mbuli mwaalumi mbwacingilila caluyando mukaintu wakwe (Ba Efeso 5:23-25). Imbungano mukwasyi, muntu omwe-omwe wamukwasyi kapa akuleta lukamantano alimwi a buumi bubotu kumuntu omwe-omwe mumukwasyi (Ba Efeso 2:19).
Paulu ucileta antangalala kuti cikombelo mubili uupona, Jesu walo kali ngomutwe (Ba Kolose 1:18). Netubbizigwa tulalyaambila kulusyomo lwesu akuba zyizo "zyamubili," imbungano.

"Nkaambo TWAKABBIZYIGWA a Muuya omwe "MUMUBILI OMWE." - 1 Bakolinto 12:13.

Ibbuku lya Cizubuluzyo litondezya Jesu ubukide kaenda akati kazikombelo, katondezya kuti ulaziko belela (Cizubuluzyo 1:20, 12, 13). Klistu takwe nayootakata cikombelo cakwe alimwi tanacitakatide pe.

3. IMBUNGANO IIJISI CAKUCITA

Kunjila cikombelo ncintu ciyandika kumuntu uukondwa. Tulayanda kuyumizyigwa kuzwa kuli bamwi kutegwa lusyomo lwesu lupone alimwi lukomene.

Imbungano ilijisi zyintu zyotatwe izyimbi nzyoicita:
(1) Imbungano ilakwabilila kasimpe. Mbuli "musemo a matalisyo aakasimpe" (1 Timoti 3:15), imbungano ilasumpula akukwabilila kasimpe ka Leza kumbele a nyika. Tuyanda busongo bwabakondwa abambi kutugwasya kulanga kasimpe kamangwalo aayandika.

(2) Imbungano ncitondezyo ca luse lwa Leza mbolukonzya kubeleka kubabisyi. Kucinca cinca Jesu nkwaakacita mumaumi aabakondwa aaleta mpuwo kuli Leza wakatuleta "mumumuni wakwe uukankamanisya" (1 Pita 2:9).

(3) Bantu ba Leza mbabakamboni kunyika eeyi incete. Katana jokela kujulu, Jesu wakasyomezya basiciiya bakwe:

"Pele muya kutambula nguzu muuya usalala waakumuselukila; mpoona muya kuba bakamboni bangu mu Jerusalemu, amu Judea moonse, amu Samalia, akumamanino aanyika." - Incito 1:8.

Ncoolwe cipati kapati kucikombelo kutola mulumbe waluyando lupati kunyika yoonse.

4. KUBUNGANYIZYILWA KUTI CIBE ANGUZU

Imbungano Jesu njaakatalika yakalijisi inkamu iiliko ncobeni. Umwi inga wasanganizigwa naa kuzwisyigwa munkamu (Mateyo 18:15-18). Imbungano ya Leza yakasala basololi alimwi yakalijisi ofesi lipati munyika yoonse alimwi kaijisi amwakukombela mutukamu tukamu tuniini munyika yoonse (Incito 8:14; 14:23; 15:2; 1 Timoti 3:1-13). Nobakabbizigwa, bakondwa bakasangana nkamu zyakaliko kale (Incito 2:41, 47).

Imbungano imvwi akuyumyayumizyanya umwi aumwi.

"Atulange mbotukonzya kucita kuti umwi aumwi abone luyando abubotu. Tutaleki kubungana antoomwe, mbuli cilengwa cabamwi, pesi ATUKULWAIZYANYE - kwiindilila buya mbuli mbotubona buzuba bwa "kuboola kwa Klistu" kabulondelela." - Ba Hebulayo 10:24, 25.

Eeci, mukukosaula buyo, imbungano iipona ncoyeelede kucita. Bantu bayo balayakana mu lusyomo, balakulwaizyanya. Leza waka bunganya inkamu yakwe kuti ba yumyeyumye bantu bakwe akubelekela nyika. Tulakonzya kucita mulimo mupati kuti twabeleka mbuli nkamu mubunji kwiinda mbotukonzya kucita umwi aumwi alikke. Bweza buyo cikozyanyo: imbungano iilangila kuboola kwa Jesu (S.D.A.) Church. Kuli mulimo mupati wabasilisi ngotujisi nyika yoonse – kuzwa mumadolopo atwaanda tusyoonto kusikila kutubbadela tuniini kutunsumbu tuli kule kumusanza a lwizyi lwa Pacific. Izikolo zyesu zyayisya malele bana banji kubuumi bubotu muli Jesu kuzwa ku cikolo cipati ca Loma Linda. Mbabakasaanguna kuzwisya moyo wamuntu akuubikka mumuntu uumbi - kusikila ku tukolo twacikombelo kwiinda mu Africa yoonse mpoili akati kwiinda munkamu ya ADRA tulabona bantu balicisa muntenda abanyonyookelwa mpasya azyakulya akaambo kamakatazyo amwi. Zikombelo zilasamika akubasanina bacete ababula zilawo zyakukkala oomo mumasena manji moba swaanganina mumaleya maleya. Mpoona tubunga bunga twabakondwa ba Nsabata batola mulumbe walufutuko kumasi aasotoka kumyaanda yobile. Balikke buyo aabo bakondwa bajatene munyika eeyi mbabakonzya kubaanguzu mbuli zyeezi munyika yoonse.

Klistu alimwi abatumwa bakeelanya imbungano mbuli mubili, alimwi akuti zyizo zyoonse zyamubili zilayandika (1 BaKolinto 12:21-28). Izyizo zyamubili tazyikonzyene zyoonse, nokuba boobu zyoonse zilayandika kapati alimwi zyeelede kubelekela antoomwe. Kuti liso lyazwisigwa kumubili talikonzyi kubona. Janza lyakosolwa taliciko amulimo pe. Tube liso, janza, naa kanwe buyo, tatukonzyi kuba anguzu zya kubelekela klistu kuti twaba tolikke buyo. Kuba lubazu lwa nkamu alimwi akuswaangana antoomwe abamwi, cilatupa nguzu mbuli ba kondwa.

5. LUTANGALO LWAKUKOMBA

Mukati aamyoyo yesu kuli kuyandisisya kukomba Leza, mpoona ooku kuyanda inga kwayabaila ccita buyo kuti kwateelelwa. Ino mwiimbi wakalimvwa buti naakayeeya kuya kubusena bwa kukombela?

"NDAKAKONDWA nibakandaambila kuti, atweende kung’anda yako JEHOVA." - Intembauzyo 122:1.

Ino inyimbo zijisi mulimo nzi mukukomba kwaantangalala?

"Komukomba Mwami a lukkomano; koboola kulinguwe anyimbo zyalutangalo" - Intembauzyo 100:2.

Ibbaibbele lilatwaambila kuti kupa milumbo cilayandika kapati ciindi notukomba Leza.

"Amupe Jehova bulemu bweelede izina lyakwe, amulete cipaizyo, munjile aco mumbuwa zyakwe. Amukotamine JEHOVA mubweebesi busalalisya. Amukankamane kubusyu bwakwe, o nyika yoonse." - Intembauzyo 96:8, 9.

Mupailo awalo ulayandika kapati ciindi notukomba Mwami Leza.

"Amuboole, tumukotamine tukombe, atufugame kubusyu bwa Jehova iwakatulenga." - Intembauzyo 95:6.

Kwiiya Bbaibbele akukambauka zili aakati-kati buyo mu bukombi bwa mucizuminano cipya. Kutalikila amulumbe wa Petulo mubuzuba bwakaseluka muuya, bujanwa mu Incito 2, alimwi kuzwa muciindi ncobakakazyanya a ba Roma kusikila sunu, kukubulusigwa kupati kwa nsangano kwiimvwi a bukambausi bwa mu Bbaibbele. Nkaambonzi? Nkaambo "ijwi lya Leza lilaabuumi, lili anguzu, lilabosya kwiinda iceba ilijisi mabemba obile" (Ba Hebulayo 4:12, 13).

6. NCINZI CILULEME AMBUNGANO?

Bamwi bala toongooka akuti imbungano izwide buyo abantu batasalade. Henry Ward Beecher ncaakamba ncamasimpe "Cikombelo taasyi meebelo akutondezya ba Klistu basalala ngwaa, pele ncikolo ciiyisyilwa bantu batasalali pe."

Mbokuli kunyina naba omwe wesu uulondokede, acalo cikombelo tacikooyo londoka pe. Mumaambila mbali akwe amwi Jesu wakatuyeeyezya kuti nsaku zyikomenene antoomwe a maila (Mateyo 13:24-30). Twabala magwalo amucizuminano cipya aaka Paulu, tujana kuti inkamu yabatumwa yakali amapenzi mapati. Asunu cikombelo cicijisi tumpenda tupati-pati ciindi aciindi. Pesi atuyeeye ikuti taaku inkamu imbisyi iikonzya kunyonyoona nokuba kunyonganya Bbwe lipati lyakukaswi kacikombelo – Jesu Klistu lwakwe mwini. Mbweena mu mbungano zitasalade tweelede kulangisya kuli Jesu uutukutaukila. Nokuba kuti kuli kutasalala cikombelo cicili cakwe, nkabela atulange kuli Klistu.

"KLISTU MBWAAKAYANDA IMBUNGANO AKULYAABA NKAAMBO KANJIYO KUTI AYISALAZYE akusanzya amaanzi kunguzu zyajwi lyakwe, kuti imubede imbungano indemu iitakwe impu naanka kaimba naanka kantu kamwi kali boobo, isalale akutaba akampenda nikaba komwe." - Ba Efeso 5:25-27.

Imbungano ilayandika kapati kuli Jesu "cakuti wakaifwida" naaka tufwida swebo umwi-aumwi alimwi a mbungano yoonse mboizulwa. Mbweena abasicikombelo beelede kuti kabali bantu mboyandisisya kapati. Hena uli cizo camubili wa Jesu?

7. KUJANA IMBUNGANO

Luli longaye lusyomo lwamasimpe Jesu ndwajisi munyika?

"Kuli mubili omwe buyo, amuuya omwe,... Mwami omwe, ALUSYOMO NDUMWI alubbapatizyo ndumwi." - Ba Efeso 4:4, 5.

Nkaambo Jesu ulaa "lusyomo lomwe buyo" inga twaziba buti kuti nduli? Jesu ula tupandulwida:
"Kwanooli muntu uuyanda kucita luyando lwakwe, ulazyiba kuyiisya kuti naa kuzwa kuli Leza naa ndilalyaambila buyo ndemwini." - Johane 7:17 (Johane 8:31, 32).

Notulyaaba kuti tubelekele Leza, uyakutugwasya kuzyiba hena njiisyo izwa kuli Leza naa izwa buyo kutunsiya nsiya twamuntu. Kaambo kapati kagwasya kuti usale kuyanda kuti ulange njiisyo zilemenezya akusumpula Leza. Kuswaangana kwini kulaletwa a malembe, Kutali buyo amukambausi uulaampuwo naanka insangano mpati. Kociyaabwiiya munzila eezi, enda mumumuni ngwakupa Leza kuzwa mu Bbaibbele, uya kukuzubuluda antangalala muzeezo wakwe kuli ndiwe. Uukondwa uukomena nguulya muntu ujalula moyo wakwe, amizeezo yakwe akuti atambule kasimpe Leza mbwaya bukavumbulula.

 

copyright © 2003 by the Voice of Prophecy