KUNJILA MUBUMI BWABUNA KLISTU

Njeyi ng-wadi mbotu izwa kuli umwi wabaiminizi ba cikolo ca Bbaibbele mu Africa:

"Myaka yosanwe yainda ndakatambula kulomba kuzwa kucikolo ca ijwi lya cisyinsyimi kuti nkaswaye sintolongo wakali mwana wacikolo wa Bbaibbele kwiinda muma ngwadi. Ndakapa kulomba oku kubapati bantolongo, balo bakandizumizya caluse. Nkaambo mwana wacikolo wakali kuyandisyisya kapati kwiiya Bbaibbele, ndakamuswaya ziindi zinji-zinji.

No kwakainda myezi yosanwe a mwezi omwe kuzwa ninda kamuswaya ciindi ca kutanguna, wakalomba kubbizigwa akunjila mucikombelo. Bapati ba ntolongo bakazumina kuti abbizigwe muntolongo mumona. Balangi bantolongo antomwe aba sintolongo bamwi bakabungana kuti babe bakamboni kukubbila oku kwiininizya nkwi nda kacita."

"Kwaciindi cisyoonto buyo, oyu mukwesu waka gusigwa muntolongo, nokuba kuti wakali jisi ciindi cilamfu cakwangwa. Ninda kabuzya kuti nkaambonzi ncalekelwa kufwambaana, ndakaambilwa kuti buumi bwakwe bwaka cinca munzila ikankamanisya, wakaba kamboni wa Mufutuli wakwe alukondo lwakwe, boobo cakuti cakabaalila kumu leka kali mu ntolongo mbuli sintolongo. Oyu muntu wakaswanganizigwa a mukwasyi wakwe, alimwi mazuba ano ngoumwi waba sololi kucikombelo cimwi cipati."

1. KUBBIZIGWA CAAMBA NZI?

Ooyu sintolongo nakaba mu Klistu abuumi bwakwe nobwaka sanduka cakumaninina, nkaambo nzi ncokwakayandika kapati kuti abbizigwe? Mumubandi ngwakajisi Jesu a Necodimus musololi wa nkamu wakaboola kuli Jesu ciindi ca masiku, Jesu wakasandulula ku bbizigwa ncocaamba alimwi anco kuyandikila kapati:

"Kunyina ukonzya kubona bulelo bwa Mwami Leza ccita wazyalwa alimwi... cita wazyalwa a meenda a muuya usalala." - Johane 3:3, 5.

Mbuli Jesu mbwaakaamba, tweelede kuzyalwa alimwi "a meenda a Muuya usalala." "Kuzyalwa a Muuya Usalala" caamba kunjila mubuumi bupya alimwi akucinca mumizeezo a mu moyo. Nkaambo kunjila mu bwami bwa Mwami Leza camba kupona a buumi busandukide bupya kutali kubikka buyo zigamba a buumi bwakaindi. Eeci ciitwa kuti nkuzyalwa kupya. Kubbizigwa mumeenda ncitondezyo caatala ciminina kusanduka kuli mukati kwa moyo wa muntu. Mwiminizi wesu waka mubbizya sintolongo kutondezya ku lyaaba kwakwe kuli Klistu alimwi akutondezya mulimo wa Muuya usalala wakatalikide kubeleka mubuumi bwakwe.

2. NKAAMBO NZI NCEELEDE KUBBIZIGWA?

Lufutuko lwesu luli swaangene amilimo mipati yotatwe ya Klistu:

"Klistu WAKAFWIDA zinyonyoono zyesu kweendelana amangwalo mbuli mbwaamba, WAKAZIKKWA,... alimwi WAKABUSIGWA mubuzuba bwatatu mbuli mangwalo mbwaamba." - Ba 1Kolinto 15:3, 4.

Klistu waka cita kuti lufutuko lukonzyeke kwiinda mu lufu lwakwe, a kuzikkwa, a bubuke bwakwe.

"Hena tamuzyi kuti nyoonse nomwaka bbizigwa kwiinda muli Jesu Klistu MWAKA BBILA KWIINDA MULUFU LWAKWE? Aboobo TULI ZIKKIDWE ANGUWE KWIINDA MULUBBABBATIZYO lwa lufu lwakwe, kutegwa mbubona MBULI MBWAAKABUSIGWA KUZWA KULUFU kwiinda mubulemu bwa Usyi, ASWEBO MBUBONA TUPONE A BUUMI BUPYA." - Ba Roma 6:3, 4.

Klistu waka fwida zinyonyoono zyesu, wakazikkwa, alimwi waka buka kuzwa mu cuumbwe kutupa buumi bupya bwa bululami. Kwiinda mukubbizigwa aswebo tulatola lubazu mu lufu, mu kuzikkwa abubuke bwa Jesu. Kubbizigwa caamba kuti aswebo twafwa kucinyonyoono a Klistu, twabuzikka buumi bwa kaindi bwacinyonyoono a Klistu, alimwi twabuka kuti "tupone buumi bupya" muli Klistu. Lufu lwa Klistu a bubuke bwakwe, lwalo lwaba ndolufu lwesu abubuke bwesu,! Mwami Leza ulakonzya kutucita kuti tufwe ku cinyonyoono, mbuli kuti aswebo twakabambulwa acicingano. Ulakonzya kutucita kuti tupone ku zyintu zya Muuya usalala, mbuli kuti twakabusyigwa kuzwa kubafwide.

Kubbizigwa ninzila itondezya caantangalala intaamu yakusanduka. Cakutaanguna, tulanjila mumeenda, twabbizigwa, cakumaninina, mbubona mbuli bantu bafwa mbobabikkwa mucuumbwe a humbilwa. Eeci caamba kuti tulilibambide kufwa a Klistu a kuzikka ziyanza zyesu zyakaindi. Kubbizigwa ndidilwe, nkulayana kwancobeni abuumi bwakazwide cinyonyoono. Elyo, twa yumunwa kuzwa mu meenda a muntu uubbizya, mbubona mbuli muntu mbwabusigwa kuzwa mu cuumbwe. Eeci caamba kuti "tuli cilengwa cipya," calo cipedwe cakumaninina "kubuumi bupya" Mwami Leza mbwatupa.

Kubbila mumeenda njenzila ilikke ikonzya kupandulula lufu - lwa kubbabatizigwa, akuzikkwa alimwi akuzyalwa kupya. "Kubbizigwa" kwakusansailwa meenda amutwe tacipandululi munzila iteleleka kuzyalwa kupya ncocaamba.

Ino caambanzi kufwa a Klistu?

"Nkaambo tulizyi kuti ibube bwesu bwa kaindi bwa kabambulwa a nguwe kutegwa mibili yesu yacinyonyoono imane, kutegwa tutabi limbi ba zike ba cinyonyoono." - Ba Roma 6:6.

Kubbizigwa ncitondezyo caatala muntu mbwaelede kuba mukati: a mulyaabe cakumaninina kuli Klistu. Kuti naatwasisa milimo yesu kuzwa ku Mwami Leza wesu, eci caamba kuti tuya kucaala katuli "bazike ba cinyonyoona." Na twalyaaba cakumaninina kuli Klistu, kuyandisyisya kwesu kwa cinyonyoono "kula bula nguzu" aboobo kusanduka kwesu kwabwini kulatalika.

Nguni ujisi lubazu mukucinca kucitika?

"Ndakabambulwa aciciingano antoomwe a Klistu alimwi nseponi lwangu ndemwini endikke, pesi KLISTU ULAPONA MULINDIME. Buumi mbwepona mumubili, NDAPONA KWIINDA MULUSYOMO MU MWANA A LEZA, waka ndiyanda akulyaaba lwakwe mwini akaambo kangu." - Ba Galatiya 2:20.

Ndaliswaanganya aku bambulwa kwa Klistu kwiinda mu kubbila, ndaita nguzu zyipati mubuumi bwangu. "Klistu ulapona mulindime."
Kutegwa mubikke maumi eenu cakumaninina mumanza a Klistu, cakutanguna mulange kuli Klistu kafwa aci ciingano. Mutalangi ku cinyonyoono calo eeco cimuyoosya, mutalangi ku milimo yenu mibyabi yakaindi akulila; pesi amulange kuli Klistu. Kulanga kulufu lwa Klistu lwa luse a busicamba aci ciingano, ulakonzya kwaamba majwi aakuli swaanganya anguwe:

"Kwiinda munguzu zya ci ciingano ndakonzya kwaamba kuti ndifwide kuziyanza zyiyabi zyakaindi pesi ndiliafwafwi a mwami Leza. Ndapa kuli salila a Klistu. Kuzwa ono ndikupona a lusyomo mu Mwanaa Leza, walo wakandiyanda a kwaaba buumi bwakwe a kaambo kandime." Mbuli mbotu jana nguzu mulufu abubuke bwa Klistu tula bona ciimo cakwe cibotu kacibweza cilawo ca tumpenda tweesu tubibi:

"Na muntu uli MULI KLISTU, Mu LENGWA MUPYA; ZYAKAINDI zyamaninina zyoonse, kwaboola ZIPYA!" - 2 Ba Kolinto 5:17.

Kwiinda mukubbizigwa tula tondezya kuyandisyisya kwesu kuti tukamantane a Klistu alimwi tupone abuumi bupya alimwi bubotu "muli Klistu." Jesu ulatucitila ezyo nzyotutakonzyi kulicitila lwesu tobeni. Tulabuka kuzwa mumeenda mbuli muntu mupya. Ula tupa nguzu kuti tupone a buumi "bupya."

3. NKAMBONZI JESU NCAKABBIZIGWA

Muciindi ca kutambula muuya, Petulo wakabaambila bakali kuyanda kulekelelwa zinyonyoono zyabo kuti "basanduke alimwi babbizigwe" kutegwa Klistu azilekelele "zinyonyoono zyenu" (Incito 2:38). Jesu kunyina nakacita cinyonyoono nociba comwe. Ino nkaambonzi ncaakalyaaba kuti abbabbatizigwe?

"Lino JESU WAKAZWA ku-Galilaya, WAKASIKA KU - JORDANI kuti Johane a mubbizye... KUZUZIKIZYA BULULAMI BONSE." - Mateyo 3:13, 15.

Jesu wakanyina cibi. Aboobo kunyina zinyonyoono nzyakeelede kulekelelwa. Kuli buyo kambi kaambo ncaakabbizigilwa: "Kuzuzikizya bululami boonse." Kwiinda mukubbizigwa, Jesu wakapa citondezyo cibotu kuli ndiswe tobantu tobateteete alimwi notuzwide zinyonyoono. Jesu kunyina nayanda baccilili bakwe kuti bakainde mwalo omo walo mwatana indide pepe.

Aboobo bakondwa babbizigwa mumeenda, baccilila muntamu mwakainda Mufutuli wabo.

Nkaambo Jesu wakafwida zinyonyoono zyesu, aboobo ulakonzya kutupa bululami bwakwe.

"Ooyo iwatakazi zibi Leza wakamucita kuti abe zibi nkaambo kandiswe kuti swebo tube bululami bwa – Leza mulinguwe." - 2 Ba Kolinto 5:21.

Twakasandulwa mu meso aMwami Leza kuzwa kuli ba sizibi kuba basaante. Tula komena "mubululami," obu akupona abuumi bupya muli Klistu.

4. NKAAMBO NZI NCENJELEDE KUBBIZIGWA?

Jesu wakabbila mumeenda naaka bbabbatizigw; Taaka sansailwa buyo meenda amutwe. Johane waka mubbizya mumulonga wa Jordani, "nkaambo kwakali MEENDA MANJI" (Johane 3:23). Jesu nakakubbizigwa wakanjila mumeenda. "Lino Jesu nakamana kubbizigwa mpawo wakazwa mumaanzi. Nkabela kujulu kwakajaluka, elyo wakabona Muuya wa Leza ulaseluka mbuli nziba, ulaza kulinguwe, Mateyo 3:16.

Na twateelelesya kabotu kubbizigwa ncocaamba, tatujisi buyumuyumu kubona nzila yalubbizyo iluleme. Ijwi lya kubbizya lizwa kumulaka wa ci Greek - liti "Baptizo" lyaamba kubbizya naakubikka kunsi a meenda.
Ciindi John Wesley naka kuswaya ku America mu mwaka wa 1737, inkamu yaba belesi bali 34 bacikombelo, bakamubeteka kumulandu mweenzu wakukaka kubbabbatizya mwana wa ba Parker munzila imbi itali yakubbizya mumeenda. Eeci citondezyo caantangalala kuti munene wakatalisya cikombelo ca Methodist waaka kubbabbatizya anzila yakubbizya bantu mumeenda.

Awalo mubelesi wa cikombelo John Calvin wakamba kuti: "cilimasimpe kuti kubbizya bantu mumeenda yakali njenzila ya ku bbabbatizya bantu cikombelo cakaindi njocakali kuccilila." - Institutes of the Christian Religion Bk. 4, chapter 15, sec. 19.

Makani aa cikombelo cakutanguna ala cisalazya kuti kubbizigwa caamba kubbila mumeenda. Awalo Bean Stanley waku cikombelo ca ku England waka lemba kuti,
"myaka yakutanguna ili myanda kkumi a myanda yotatwe, inzila yakali kuccililwa muzikombelo zyoonse yakubbabbatizya njiyeyo ilembedwe mu cizuminano cipya, yakubbizya mumeenda. Alimwi bbala lyaku kubbizya ncolyaamba kuli baabo bakali kubbizigwa nkuti bakali kunyikizigwa buya kunsi ameenda." - Christian Institutions, P. 21.

Tuzyiba twa meenda twa kubizizya bantu basanduka tula mu muzikombelo zinji zinji zyakali kuyakwa mu myaka ya fourth and fourteenth centuries kumanyika aba kuwa, ezyi zyikombelo zyilimbuli zyijanwa ku Pisa kucisi caba Ntaliana nociba cikombelo ca St. John's, cikombelo cipati kapati kwiinda zyoonse mu Rome.

Kumuswaangano wakali ku Ravenna kumatakililo a fifteenth century cikombelo ca ku Roma cakatolika no cakazumina kuti kusansaila buyo meenda a mutwe akwalo nkubbabbatizya ceelene buyo mbuli kubbizigwa mu meenda. Mumibuzyo yazilengwa zya cikombelo, tatweleelede kuccilila ezyo ziyiisya Bantu pele Klistu aba siciiya bakwe nzi ba iisya.

Banji banji bana Klistu basyomeka bacilila nzila ya kubbabbatizya bana bamvwanda, kupa bana besu banini kuli Leza kuzwa kumatakililo nciyanza cibotu kapati. Pesi Bbaibbele, lila cisalazya kapati kuti muntu uleelede kuyiisigwa nzila yalufutuko katana kubbizigwa (Mateyo 28:19, 20), kuti muntu weelede kukondwa muli Jesu katana bbila, (Incito 8:35-38), kuti muntu weleede kusanduka a kuzumina akulekelelwa zinyonyoono zyakwe katana bbila (Incito 2:38). Mwana mumvwanda tacikonzyi kusyoma, kusanduka, akuzumina zyinyonyoono zyakwe, eezyi nzyezyelede kucitika muntu katana bbila.

5. NKAAMBO NZI KUBBABBATIZWA NCOKUYANDIKA KAPATI?

Kwendelana a Jesu, kubbila cilayandika kapati kuli baabo bayanda kuya kunjila kujulu:
"kunyina ukonzya kunjila mubuleko bwakujulu cita wazyalwa ku meenda a kuMuuya." - Johane 3:5.

Jesu waka wiika ciindi comwe. Mubbi acicingano "wakazyalwa ku Muuya," nakuba kuti cakali ciyumu kuti azwe aci ciingano aku kubbizigwa mumeenda mbuli citondezyo ca kusanduka kwa moyo wakwe. Alimwi Jesu waka musyomezya kuti uya kuba anguwe mubulelo bwa ku julu (Luka 23:42, 43).

Kumubbi, "kuzyalwa a meenda a Muuya" cakali kwiiminina bulowa bwa Jesu bwakatika kumusanzya mubisyi kuzwa ku zinyonyoono zyakwe. Augustine wakabona kuti, "kuli kaambo komwe kalembedwe, nkakusanduka kwa mubbi, kuti kutabi uutyompwa; alimwi omwe buyo, kuti kutabi uyeyela." Jesu lwakwe mwini wakapa kucenjezya ooku:

"Oyo uti kasyome akubbizigwa uyoofutulwa, pele oyo utazumini [alimwi akutabbila] uyoozulwa." - Mako 16:16.

Kwiinda mukutufwida aciciingano mucilawo cesu, Jesu wakatondezya caantangalala luyando ndwajisi andiswe. Tweelede kutondezya caantangalala, a kuzumina kakunyina akuusa nsoni luyando lwesu muli Klistu kwiinda ukubbizigwa.Henawatalika kale kupona buumi bupya muli Klistu? Hena waka kubbizigwa kale?Na toninga, nkaambo nzi ncotalibambili kubbizigwa kwa mazuba masyoonto buyo aali kumbele?

6. KUBBIZIGWA MATALIKILO BUYO

Kubbizigwa ciiminina kulyaaba kubuumi bwa kupona kwa bunaKlistu. Pesi kulyaaba kwesu ciindi notubbila takukkalilili mu maumi esu lyoonse.

Mwana nazyalwa, kukkomana akutangala kuleelede. Pesi buzuba bwakuzyalwa bwainda aku tangala koonse kwamana, mwana uyanda kusaninwa mazuba oonse, aku musanzya mazuba oonse akubona kuti uli kabotu mazuba oonse. Aku kubbizigwa mbubona mbokubede. Paulu mbobu mbwaamba abuumi bwakwe: "Ndafwa kucinyonyoono mazuba oonse." (1 Ba Kolinto 15:31). Na abuzuba abuzuba twa cenguluka kuzwa kukuliyanda, tulaba bantu bateelela Jesu cabwini.

Ciyanza cakubbizigwa mbubona mbuli ciindi ca bwiinga, ncitondezyo caantangalala kuti kuswaangana kubotu alimwi kuyakumbele kwatalika. Kutegwa tukomene munzila mbotu, tweelede kulyaaba abuzuba lwesu tobeni kuli Klistu, lyoonse katu tambula bumi bupya kwinda mukupaila alimwi akwiiya Bbaibbele. Mazuba oonse tweelede kutambula buumi bupya kwiinda mukupaila a kubala Bbaibbele.

7. CINTU CIPA KUTI TUKKOMANE

Kubbizigwa kupa kukkomana kapati nkaambo abo babikka lusyomo lwabo muli Klistu balijisi masimpe abuumi butamani. "Kufumbwa ooyo ukondwa alimwi wakubbizigwa uya kufutulwa" (Mako 16:16). Twakubbizigwa, tuli mukazila kaya kujulu katusololela kukukkomana kutamani.

Kubbizigwa cipa kukkomana muli Klistu. Ulasyomya cipego cinyina muulo ca Muuya Usalala kuli baabo baka kubbizigwa, (Ncito 2:38). A Muuya kulaboola "micelo ya Muuya" - "luyando," lwalo luzuzya buumi "akubikkilila, aluse, abubotu aku syomeka, aciimo cibotu akulijata" (Ba-Galatiya 5:22, 23).

Kubaa Jesu kapona mulindiswe kwiinda mu Muuya Usalala, citupa mizezo yaku tadonaika. Nkambo "Muuya lwakwe mwini ngupa bumboni... kuti tuli bana ba Leza" (Ba Roma 8:15, 16).

Kuswaangana kwesu a Leza kwamasimpe kulatuletela bulumbu bunji pesi tabutusyomyi buumi bunyina mapenzi. Pele satani usola kuleta mapenzi mayumu kuli babo balipa kuli Klistu. Nokuba boobo, nituli mu maanza a Leza tulakonzya kuzyiba kuti Uya kubelesya kufumbwa cinga cacitika kulindiswe, cibotu alimwi a cibyabi, kutuyiisya alimwi akutugwasya kuti tukomene (Ba Roma 8:28).

Mukaintu wakalisalila kupa buumi bwakwe kuli Klistu akuti abbabbatizigwe, nokuba kuti mulumi wakwe wakamwaambila kuti ula muleka. Mulumi taakali kuyanda akasyoonto lukondo lupya lwa mukaintu. Pesi walo wakakatila kuli Klistu alimwi akusola kuba mukaintu ula luyando kwiinda lyoonse. Kwaciindi cilimbocibede mulumi wakaziyumya zyintu mung’anda. Pesi kumamanino wakasanduka kwiinda muku kazyanya nkwatakali kukonzya kuvuwa: kusanduka kwa buumi bwa mukaintu wakwe. Oyu mulombwana wakapa buumi bwakwe kuli Klistu alimwi awalo waka kubbizigwa.

Kujatilila kuli Klistu ziindi zyoonse, "muziindi zya kuusa amuziindi zyakukkomana" ciya kutucita kuti tubezibelesyo ziyumu mumaanza akwe. Tula konzya kupa maumi esu ku Mwami wesu kakunyina akutongooka, nkaambo walo wakapa kale kulyaaba kwamamanino kulindiswe naka bbadela muulo wazinyonyoono zyesu aci ciingano. Ncoolwe cibotu cilibuti ncotujisi kuti caantangalala tupe luyando akulemeka kwesu! Kuti koli tona kucita ooku, nkaambo nzi ncota pedi buumi bwako kuli Klistu ono. Umulombe kuti alengulule buumi bupya muli nduwe kwiinda mu Muuya Usalala, alimwi ubbizigwe kwiinda muli Klistu?

 

copyright © 2003 by the Voice of Prophecy