KUPILUKA KWA JESU KULI AFWAAFWI BUTI?

Bunji bwesu tulayanda kubona naa kuziba zili kumbele aamazuba. Tuyanda kuziba zili nkotutaboni. Pele kubona kwini kwazintu zili kumbele muziindi ziji cilatukakaila.

Tulijisi mapenzi akuziba kuti ino cifumo buyakuca buti Hena kuya kuba mvula, naa mpeyo noliba zuba! Nkwali muntu, nkabela, ooyo walo zinsyinsyimi zyakwe zilacitika mbubona mbwaamba. Jesu Klistu, mumangwalo aakwe ulakonzya kutu tola kumbele aamazuba; musololi uusyomeka. Muciiyo eeci tulalanga ncaakaamba kujatikizya kuboola kwakwe kwabili. Ino nguni uunga wazyiba mamanino aanyika kunze aawakailenga kumatalikilo?

1. ZITONDEZYO KUTI KLISTU ULAPILUKA MUMAZUBA EESU

Naakamana kuba syomezya basiciiya Jesu kuti uyaku boola alimwi munyika lwabili, (Mateyo 23:39) mubuzyo nzi ngobakamubuzya?

"Utwaambile ino makani aaya azooba lili, Alimwi ncinzi cizooba citondezyo cakuboola kwako acamamanino aciindi?" - Mateyo 24:3.

Jesu wakavuwa caantagalala. Mucipati 24 ca Mateyo acipati 21 ca Luka Jesu lwakwe wakapa zitondezyo naa bumboni bwakuti tuzibe kuti kuboola kwakwe kwaswena afwaafwi. Azimwi zinsyinsyimi mu Bbaibbele zilagwasya kuti aawa tubone kabotu zintu ziya kucitika katana sika Klistu. Mbuli mbotutibone eezi zilacitika mumeso eesu; citondezya kuti kupiluka kwa Klistu ncobeni kuli afwaafwi. Lino atulange ku zikwaankwani zili kkumi zili muBbaibbele munzila iiya kujulu, katuyaa kubuzya mbuli silweendo wa mazuba aano

Cikwaankwani caku taanguna (Sign Post 1)
Kuciswa! Kupenzegwa! akunyongana mizeezo!
Myaka iinda kucuulu amyaka iili myaanda iili fuka (1900) yainda Jesu wakapa kupandulula kwa buumi bwabantu mazuba aano mbuli kuti wali kubala ku mapepa aamba makani acitika.

"Kuyooba zitondezyo kuzuba, akumwezi akunyenyenzi. ANSI AANO KUYOOBA MAPENZI KUZISI AKUKATAZIGWA NKAAMBO KAMIVUUMINO YA LWIZI AMAYUWE, ABANTU BAYOOMANA NGUZU NKAAMBO KAKUYOOWA AKULANGILA ZINTU ZICIZA ANSI, nkambo inguzu zya kujulu ziyozunganizigwa. Nkabela ELYO BAYOOBONA MWANA-A-MUNTU ULASELUKA mukumbi, anguzu abulemu, bupati. Pele zyatalika kucitika ezi zintu amulange kujulu mulungumike mitwe yanu nkaambo kunununwa kwanu kuli afwafwi." - Luka 21:25-28.

Kunyina kulemba kwiinda waawa kwaamba mazuba aano kunze a kwaamba kuti: 'bantu bayoomana nguzu nkaambo kakuyoowa akulangila aziciza' Zilwanyo zyankondo zinji zikonzya kumwaya nyika kaindi kasyoonto ziliyobwedwe. Ino kuti umwi sikulipa buleli wa zijana? Jesu watupa bulangizi muziindi eezi zyamapenzi. Aaya mapenzi aakuciswa akupenga asinizya buyo kuti tuzibe kuti kuboola kwakwe kwaswena. Bantu mazuba aano mbobalila inga balati 'amulange nyika mboyaba sunu' pele ooyo wiiya zinsyinsyimi zya mu Bbaibbele ula konzya kwaamba cakuliiba kuti "langa Nguni uboola ku nyika."

Cikwaankwani Cabili (Sign Post 2)
Mapenzi aamunyika Ino maleele aamapenzi anjila buti muzitondezyo zya mamanino aanyika?

"Kuyooba mizuzumo mipati, anzala, azilwazi mumasena aandeene, alimwi kuyooba iziyoosya, azitondezyo zipati izizwa kujulu... Mbubonya obo mwabona ezi zintu kuti zilacitika amuzibe kuti Bwami Bwa-Leza buli afwaafwi." - Luka 21:11, 31.

Yeeya mazala kaindi kasyoonto. Makani aabana bapati mada nkaambo kanzala lyoonse ntotwaambo. Hena tacigambyi kuti nyika iituma bantu kumwezi Taikonzyi kusanina bantu boonse? Jesu wakalizi kuti nzala iyakuba alimwi kuti kuliyanda kwabantu kuya kuzumanana kumamanino aanyika.

Ino mizuzumo? Mu Bbuku lya World Almanac mu 1999, kwategwa mumyaka yabu Klistu iili mwaanda kwacitika mizuzumo minji kapati. Mwaanda wamyaka wa kumi alusele mizuzumo mipati yakali cisambomwe (6) Mwaanda wamyaka wa kumi afuka mizuzumo mipati yakali ciloba (7) Myaanda yamyaka ma kumi obile mizuzumo mipati yakali kwiinda a mwaanda (100) . Aboobo bumboni buyaa kuvula mbotuswena munsimunsi aa mazuba eesu.

Eeyi myeelwe izuzikizya cinsyinsyimi ca Jesu. Mazala a mizuzumo zyasika eeni mpocibija. "Bwami bwa-Leza buli afwaafwi" Hena eeyi myaka iboola ilaleta iimbi mizuzumo naa Mwami wa bami?

Cikwaankwani Catatu (Sign Post 3)
Kubungika buvubi naa lubono.
Ino caamba nzi kuti muvubi bunjila buyo mumaanza abasyoonto kakuli bunji bwabantu bali mubucete bwini?

"... Mwalundika lubono kumazuba amamanino." - Jakobo 5:3.

Nokuba kuti bantu baiye buti makani abuvubi, bavubi bacivuba alimwi, bacete nobacetaalila limwi. Malwi aamali aajisi bantu aalo atondezya kuti 'kuboola kwa Mwami kuli afwaafwi' V8

Cikwaankwani Cane (Sign Post 4)
Bukale Bwamazwanga (Civil unrest).
Nkaambozi kutakutila akuzwangana mumilimo ncokwavula cakufwambaana?

"Amulange! bulumbu bwabasimilimo bakamutebwida mumyuunda yanu mbumwabanyanzya calweeno, buloongolola, eno kulila kwabatebuzi (babelesi) kwanjila mumatwi aa Mwami wamakamu makamu.... Anywebo amukazike myoyo yanu amuliyumye nkaambo kuboola kwa Mwami kuli afwafwi." - Jakobo 5:4, 8.

Naakamana kwaamba kubungika kwabuvubi mumazuba eesu Jakobo wabona kutakutila akuzwangana kwa babelesi batakomene. Kutanvwana "kuba jisi" "abatajisi" kuyaambele. Acimwi cikwaankwani caamba kuti 'kuboola kwa Mwami kwaswena."

Cikwaamkwani Casanu (Sign Post 5)
Kubula ciimo akutalilemeka (Moral Decay).
Nkaambo nzi bulemu mubuponi bwesu ncobuyaakumana?

"Pele koziba kuti kumazuba amamanino kuyooba ziindi zikatazya. Nkaambo bantu bayooba basikuliyanda, basikuyanda mali, basimantumbwaambwa, basikakomokomo, basikasampusampu, batanvwi bamaawisi, batalumbi, batakombi, basikancimwa, basinfudiilili, abasiluuni lwakutaminizya, batalyeendeleli, basitunyetunyetu, batayandi bubotu, basikukazyanya, basikuunya, basikulisumpula, bayandisya misalo yaansi kwiinda Leza, balijisi ciwa cabukombi pele inguzu zyambubo balazikaka. .. Bantu babi basikulibeja balainda anka kubija banooena akweenwa." - 2 Timoti 3:1-5, 13.

Hena kuli ciinda waawa kusandulula mazuba aasunu? Kufumbwa nkoolanga ubona buyo luyando lwa zintu naa buvubi. Kubona bana mboba penzegwa akutundululwa . Bana bakubusyi banyina aubalanga, mbabona baile kujaya bantu nyina. Zyoonse eezi zitondezya kuti kuboola kwa Jesu kwaswena.

Cikwaankwani Cisambomwe (Sign Post 6)
Tubunga Twabuizi bwa saatani na bwabuzangi twavula.
Nkaambo nzi ncotwabona kuvula kwatubunga twabuzangi?

"Nkaambo kaako kuzooba bakristo babeji abasyinsyimi babeji bazootondezya zitondezyo zipati amalelee, kuti kwakonzeka bakeene abalo basale." - Mateyo 24:24.

Eezi zibalo zisyinsyima kuti ciindi camamanino ciyakuleta maleele azitondezyo ziindene indene akutondezya zeezyo zicenga bantu kuti zizwa kuli Leza. Balozi abasinkondo balaletwa kuti baambaule kubantu. Aabo baliita kuti mbaabuumi bwa sunu (new agers) bazula nyika yoonse kuulisya maleele abo amyuuya ya buzangi. Maleele azimwi zigabya zilajanwa koonse. Zyoonse zilatondezya mbubona mbwakaamba Jesu. Tupona mumazuba aa 'kuboola kwa Mwanaamuntu' (V27).

Cikwaankwani Ciloba (Sign Post 7)
Nyika Iibukile.
Caamba nzi kuti Africa, Masi aakujwe, Europe nkwali kujwe babuke ku twaambo twanyika?

"Zisi zyoonse zibuke... amutole cigonsyo nkaambo maila aakutebula abizwa... nkaambo bubi bwabo mbupati. Ma! Avula makamu makamu mumumpata wakukosweda makani nkaambo buzuba bwa Jehova buliafwaafwi mumumpata." - Joeli 3:12-14.

Sunu, mu Africa, Europe nkwali kujwe, masi aakali mu Soviet Union amasi aakujwe abuka kwiinda ziindi zyoonse zilembedwe nkaambo 'buzuba bwa Mwami bwaswena."

Cikwaankwani Lusele (Sign Post 8)
Makanze aa luumuno akulibambila lumamba.
Tupona munyika njenzu. Boonse balazumina kuti atusole kuba aluumuno. Twaambaula luumuno. Nkabela nfundiilili zimwi zya myaanda ya myaka asunu zicinvwika mutwaambo. Mika a Joeli, aaba basinsimi baka sinsima kuti, ciindi masi naali kwaambaula makani akulombozya luumuno, (Mika 4:1-3) kutasyomana mbuli basimukobo nyina cipa kuti kabalibambila lumamba (Joeli 3:9-13). Kaindi eelyo Bbaibbeli lyakabona mazuba eesu alumamba-aluumuno, akwaamba kuti, luumuno lwini luyakuboola Jesu waakupiluka.

Cikwaankwani Fuka (Sign Post 9)
Lusumpuko Lwasunu.
Nkaambo nzi, kakwiindile myaanda yamyaka zyeendelo azyakukwabana mumajwi zyaleta nyika antoomwe obuya?

"...Mane kusikila kumamanino aaciindi. Bantu banji bayootuntulika, aboobo luzibo luyooyungizigwa." - Daniele 12:4.

Daniele aawa waamba kuti luzibo lwa cisinsimi cakwe luyooyungizigwa mane kusikila kumamanino aaciindi'. Pele eeci cisinsimi kuboneka kuti citondeka musela wesu wama Komputa (computer). Luzibo lwa zintu zyoonse lwa vula mukulaba kwavula myaka eeyi misyoonto yainda. Kwaba kucinca mumyaka iili makumi osanwe yainda kwiinda mu myaka iili zyuulu zyobile.

'Bantu baya kutuntulika' ku yungizya luzibo. Kautana sika mwaka wa 1850 bantu bakali kweenda aama Bbiza mbubona mbobakali kweenda kuzwa kumatalikilo aaciindi. Mazuba aano tulasika koonse kubelesya ndeke zimwi zinyina aamuntu mukati. Kuvula kwa nyendo kuvula kwaluzibo myaka yainda eeyi itondezya kuti tupona 'kumamanino aciindi'.

Cikwaankwani Kkumi (Sign Post 10)
Makani mabotu naa Mulumbe kunyika yoonse.
Jesu wakasinsima kuti kaatana sika mulumbe uyakusika kubantu boonse munyika mboizulwa:

"Nkabela aaya makani mabotu aa-Bwami azookambaukwa munyika yoonse kuti abe citondezyo kumisyobo yoonse. Eelyo mamanino azoosika." - Mateyoi 24:14.

Kwamakumi aamyaka cisela canyika cakali kukala cilike cakubula ziindi zinji zyakwaambaula abantu bambi kabataazi makani mabotu. Pele mukaindi kasyoonto, Europe nkwalikujwe wakalekwa kuzwa ku communism, bwaanda bwaku Berlin bwakawa, Soviet Union wakaandaana. Eeci cisela ca nyika cakalibambila kutambula makani mabotu. Masimpe aaya makani mabotu aunka kunyika yoonse. Mulumbe ulakambaukwa kubelesya luzibo ndobajisi bantu mbuli ma Satellite kumasena manji ciindi comwe. Tulapona ngoona mazuba Jesu ngaakaamba kuti 'aaya makani mabotu aa-Bwami azookambaukwa munyika yoonse' mpoona 'mamanino azoosika'.

2. UFWAMBAANA BUTI KUBOOLA JESU?

Naakamana kwaamba zintu ziyakucitika katana sika Jesu waka manizya kuti,
"Ncobeni ndamwaambila kuti, izyalani elino talikooyoomana mane zintu zyoonse eezi zizoobe." - Mateyo 24:34.

Aaya makani ali aatuba ooyu musela wa zikwaankwani uyakumubona Jesu kapiluka lwabili. Tacikooba ciindi katana boola kukukula cibi akupenga, kuti abike Bwami butamani. Jesu ulacenjezya, "Taakwe muntu naba omwe uuzi... buzuba oobo naanka ciindi' (36).

AlimwI Jesu Ulazumanana:
"Mbubona oobo anywebo amulibambe nkaambo kuciindi ncimutezi ncicona ncazoosika Mwana-a-Muntu." - Mateyo 24:44.

3. JESU, NKULANGILA KWANYIKA KULIKE BUYO

Klistu ngowamamanino, kulangila kwiinda kubota nkaambo nguukozya kulwana ceeco catumana-cibi. Jesu wakafwa a kalivali kuti bubi buzundwe akuti kufutula baabo bakatambula cipego cakwe calufutuko.

"Oooyo uucita zibi nguwa Saatani, nkaambo Saatani wakabisya kuzwa kumatalikilo. Nkabela kaambo nkaakayubunwidwa Mwana a-Leza nkaaka,kuti ajaye milimo ya Saatani." - 1 Johane 3:8.

Mufutuli wesu wakapanga nzila yakuti tuzwe munyika yakali kumwaika kwiinda mu kwaaba Mubili alimwi a Bulowa Bwakwe. Alimwi nguwena Jesu, ooyo bumwi buzuba uuya ponya malwazi oonse aanyika kwiinda mukujaya cibi, lino upa nduwe kuti agusye cibi mulinduwe. Utalindili kuboola kwabili kuti waanguluke kuzwa kucibi a ciimo cakulijaya. Jesu ulayanda kuti akupe luumuno lwakwe cino ciindi.

Naakali kumuswaangano wakupaila umwi mukaintu uucili mwana wakalinvwa kuti mulumbe wamunjila kabotu. Mbwaakali kuteelela mulumbe wa mufutuli uuza kuwambaana kwambwa, zyoonse zintu wakabona kuti zyakala kabotu mumizeezo yakwe. Eeci ciboneka kuti ncamaanu. Wakayeeya kuti walikuyandaula luyando, luumuno akukomana mumasena ataelede. Jesu wakali nkokwiingula. Buzuba bwakatobela muvangeli amugwasyi wakwe nobakaunka kuti bakamuswaye wakabaambila buumi bwakwe bwamapenzi mbobwakabele.

Wakali kunywa mbuli cidakwa, alimwi wakali kupona mubwaamu. Naakamana kwaambaula wakalila kati "Mwakalikwaambawila ndime masiku aainda" Pele jwi lyasika kumoyo wakwe, ndijwi lya-Leza. Alimwi Wakali kwaambaula caluyando asyoontosyoonto. Wakasala kuti asiye zyoonse. Wakamutamba Kristo kuti anjile mumoyo wakwe mbuli mufutuli a Mwami wakwe, Waka jatilila mukulangila kuku boola kwa Kristi kwabili. Mazuba aakatobela, wakabona kuti mapenzi oonse ngaakali kumana akunywa akaile kumana nkaambo ciindi coonse wakatalika kwaambaula a Jesu. Jesu waka muvuna kuzwa ku mapenzi aakali kumukatazya lyoonse mubuumi bwakwe.

Wakacita zintu zinji zyaakali kulisenda. Pele luse akulekeleka kwa Klistu kwakainda nguzu alizyoonse akulisenda nkozyakali kuleta. Makani aamubbi aciciinkano aakamukonda kapati. Mukusola kwa mamanino, wakalanga kumupenzi uunyina cibi akulomba kuti, "Ukandiyeeye Mwami waakusika mu Bwami Bwako" (Luka 23:42).

Jesu wakaingula mpoona kusyomezya mubbi busena mu-Paradaiso. (V43). Nguwena Jesu wakalekelela mubbi uuya lino ukupa lufutuko, kulekelelwa zibi zyoonse a luumuno lwa mizeezo. Libonene omwini sunu.
Ayebo inga opaila antoomwe amubbi kuti: 'Jesu ukandiyeeye Mwami waakusika mu Bwami Bwako.' Eelyo Jesu ulaingula kuti, 'Ndiyooboola alimwi, uyooba Andime mu-Paradaiso.'

copyright © 2003 by the Voice of Prophecy