MUNZI WAKO KU JULU

Marco Polo na kapilukila ku munzi wakwabo wa Venice nikwakainda myaka minji kali ku masi a kujwe, ibenzinyina bakamuyeyela kuti musinzo mulamfu ngwakeenda wakamusondosya. Wakalijisi twaano tukankamanisya kwaana.

Marco wakeenda kudolopo lizwide insiliva a ngolide. Waka bona mabwe asyiya akapya, pele taku naba omwe wakalizyi mukuba wa nsizi. Waka bona mulembo watakalikukonzya kupya nakuba kuti wawalilwa abbibi lyamulilo, pele taku naba omwe wakalizyi malata. Wakaluula makani anzoka izyipati zyisika kuntamu izyili kkumi kulampa amyeebo ikwazeme ikonzya kumena muntu, inyemu izyipati mbuli mutwe wamuntu izyituba mbuli mukupa mukati azyintu zizwa ansi izyikonzya kuyasya malambe. Pele taku naba omwe wakabwene kale ciwena, inyemu zyamakunka, nauba mungwimba utana bambwa. Bakalikwile kuseka kutwaano twamusyobo oyu. Myaka yakatobela, Marco nakalilede kaciswa, muntu umwi ukondwa wakali ambali abulo bwakwe wakamukulwaizya kuti aleke twaano ntwaakali kwaana. Pele Marco wakakaka: "masimpe buya onse. Alimwi tindamwaambila acisela zyazyintu zyindakabona."

Balembi ba Bbaibbele ibatupa muzezo wakujulu balazumina amuzezo wa Marco Polo. Mbuli muciloto bakabona ibusena bumwekesya, ibubotu cakuti bakasandulula buyo cibela cakooko nkubakabona. Andiswe tuli mbuli benzinyina a Marco Polo. Twelede kuyeyela ba "ciwena a nyemu izya makunka" ezyo zyitutana bona nkaambo muzezo ngutujana mu Bbaibbele ututondezya kuti ijulu lilainda kwide kukkala amakumbi akulizya tuntimbwa.

1. HENA IJULU MBUSENA BWINI?

Jesu ubamba busena bwini-bwini ibwesu lino kujulu kwini.

"Myoyo yanu itapengi: kamusyoma Leza, kamundisyoma ambebo (Jesu). Munganda ya-Taata mwaali makalilo manji: nekwatali boobo, nendamwaambila. NKAAMBO NDIYA KUKUMUBAMBILA BUSENA. Kuti na ndainka kuyoomubambila busena, NDIYOOBOOLA ALIMWI, nzoomutolele, kuti oko nkwembele, anywebo mukabe nkuko." - Johane 14:1-3.

Jesu ulaboola kunyika yesu iciindi cabili kuzotutola kumasena abambidwe muntu omwe-omwe mumunzi wakujulu umwekamweka abulemu kwiinda mizezo yesu: Jerusalemu mupya. Twaakumana kukkala okuya, kwamyaka ili cuulu, Klistu uya kuleta ooyu munzi wakujulu kunyika eyi yaansi. Mbuli munzi ooyu wa Jerusalemu mupya mbuuseluka, mulilo uyakusalazya inyika yoonse. Inyika eyi yabambululwa unooli ngumunzi utakamani wa bafutulwe. (Cizubuluzyo 20:7-15. Makaani amwi ali muciiyo 22).

Hena Johane, wakalemba cizubuluzyo ncifanikiso nzi ncatutondezya citobela?

"Lino ndakabona ijulu lipya anyika impya, nkaambo ijulu lyakusanguna anyika yakusaanguna zyoonse zyakamaninina, alwalo lwizi talukooyoobako limbi. Nkabela ndakabona munzi mulemu, Jerusalemu mupya, uuza buseluka kuzwa kujulu kwa-Leza, ulibambidwe mbuli nabwiinga mbwalisakatizizya mulumi wakwe. Elyo ndakamvwa ijwi ipati lizwa kucuuno caBwami, lyakati, amubone, bukkale bwa-Leza mpobuli akati kabantu, uzookkala akati kabo. Bazooba Bantu bakwe, alakwe Leza mwini uzookkala kulimbabo, azoobe Leza wabo," - Cizubuluzyo 21:1-3.

Niyamana kubambululwa inyika amulilo, hena nguni Jesu ngwaakasyomezya kuti uyo kkala munyika eyi impya? "Bali acoolwe abo balibombya: nkaambo bazoovuba nyika." - Matayo 5:5 (Amulange alimwi ku Ciyubunuzyo 21:7).

Klistu ulasyomezya kubambulula bupya inyika yaakwe yakali mbotu kumatalikilo kwipilula ku bubotu bwa Edeni, alimwi babombe "baya kukona nyika."

2. HENA TUYA KUBA AMIBILI YENI KUJULU?

Jesu nakalibonya kuli basiciiya baakwe amubili wakabusyigwa wabulemu, hena wakausandulula buti?

"Amubone maaza aangu amatende aangu. Ndime ndemwini! amundijate mundibone; nkaambo munsangu tajisi nyama azifuwa, mbuli mbomundibona ndili azyo." - Luka 24:39.

Jesu wakali jisi mubili wini; wakaita Tomasi kuti amujate (Johane 20:27). Muciindi eci Jesu wakeenda kunjila mung'anda yeeni, akwambaula abantu beni, akulya cakulya ceni (Luka 24:43).

Ijulu talikkalwi munsangu, pele Bantu beni bakkomana mubuumi bwa Muuya alimwi balijisi mibili "milemu."

"Pele iswe munzi wesu uli kujulu. Nkukonya nkutulangila Mufutuli, nkukuti Mwami wesu Jesu Klistu, Oyo, uzoosandula mibili yesu iisampaukide, kuti ikozyanisigwe amubili wakwe mulemu. Eci cizooba nkaambo kanguzu zyayooyo uukonzya kumubombezezya zintu zyoonse." - Ba Filipo 3:20-21.

Inga twasyomezegwa kuti mibili yesu yakujulu inooli miyumu alimwi yamasimpe mbuli mubili wa Jesu wakabusyigwa.

Hena tuya kubazyiba bamukwasyi besu abeenzuma kujulu?

"Nkaambo makani ngetubona sunu ali mbuli zintu zyamucimboniboni; pele tuzoobonana meso kumeso. Luzibo ndujisi sunu nduce-luce buyo, pele kuciindi eco nzoozibisya mbubonya mbundazibwa." - 1 Ba Korinto 13:12.

Kujulu tuya "kuba luzyibo lwini." Tuya kutelelesya akuyandana kapati omwe-aumwi kwinda munyika eyi.

Basiciiya ba Jesu bakamuzyiba (Jesu) mumubili wakwe wakujulu, nkaambo kabube bwakwe buzibilwe (Luka 24:36-43). Maliya wakazyiba (Jesu) aa cuumbwe nkaambo kajwi lyakwe lyakazyibidwe ciindi nakamwiita izyina lyakwe Maliya (Johane 20:14-16). Basiciiya bobile ku-Emausi bakamuzyiba Jesu nkaambo kakutondeka-tondeka mbuli mbwakazyibide. Nibazyiba mbuli mbwaka leleka cakulya, baka muzyiba kuti ngu Mwami kwiinda mucilengwa caakwe (Luka 24:13-35).

Bafutulwe balabulangizi bubotu bwakuswangana "busyu-a-busyu" kuswangana alimwi kujulu. Amuyeyele kutangala kunga kulaba ciindi nimwazyiba kumweta-mweta kwa mulumi wenu na mukaintu wenu, na izwi lizyibidwe liita lyamwana wenu ngumwazika ciindi cilamfu cainda, nakwebeka kubotu kwamwenzyinyoko uyandika kapati. Tunooli aciindi citeeli cakuswaanganya maumi esu alimwi akukulwaizya izyiloongwe abantu bebelwa kujulu.

3. HENA NCINZI NCITUYOO CITA KUJULU?

Tuno jisi milimo minjanji kujulu. Hena mbuti kuti mwabaa a ng'anda yamakanze yenu?

"Amulange, ndalenga ijulu lipya anyika impya.... Njoosekelela Jerusalemu akukondelwa Bantu bangu.... Lino bayooyaka maanda akukkala mulingao; bayoobyala myuunda yami saansa akulya micelo yayo.... Abantu mbensalide bayoongozya milimo yamaanza aabo." - Isaya 65:17-22.

Jesu wakamba kale maanda esu atugamide mumunzi uusetekene wa Jerusalemu mupya (Johane 14:1-3; CiZubuLuzyo 21). Kubala ooku kutupa muzeezo wakuti tuya kubamba akuyaka maanda aamwi na impulasi izyamuminzi akubyala izyisyango zyaandeene zyabuumi bwazisamu zyakujulu. Hena nguni uzyi lwiiyo lupati lutulindila mubukkale busumpukide bwa Leza? Ikuzwidilila kwaba haabupampu besu akuzyiba zyamajulu kuyolibonya mbuli kuti ncisobaano cabaana twakutalika kubona "ing'anda ya Taata".

Hena ulayanda bubotu bwaku hwuuma meenda akunka, macelelo, imasaaka augwa imvula lyoonse amaluba-luba mabotu?

"Nkaambo Jehova uyooumbulizya Zioni;... Inkanda yakwe uyooisandula kuti ibe mbuli Edeni, amabuwa aakwe ayooba mbuli muunda wa-Jehova. Mumonya omo muyoojanwa kukondwa akusekelela, kulumba amajwi aakutembaula." - Isaya 51:3.

Leza uyoobambulula inyika muciimo ca muunda wa Edeni wakusanguna. Takunooli kutikaika kwamungwimba na muuya wabusi mubyaabi na ciyuma-yuma; lwiizyi lunoyootuba buu, masamu mapati a malundu.

Takuli kubota buyo kulike, pele inguzu zyitutaakapegwe ikuti tuzyibile busena obu. Kunooli mbuli buzuba butaanzi bwakkweendeenda anze kumuntu waciswa kwa ciindi cilamfu.

Hena mulakondwa kuzyiba izyintu zyipya? Kwiiya? Kulenga?

"Ookuya, mizezo ilafwa iyoozyiba akukondwa munguzu izyikankamanisya zyabulengi, amaleele a luyando lufutusya... izyibeela zyamubili ziyookomezegwa, kujana luzyibo tacinolemyi mizeezo nakuba kumana nguzu. Ookuya bwendelezyi bwamilimo bulakonzya kuya kumbele, akusika kumbakani izyiyandika; alimwi ookuya kunooli imbakani zyipya, maleele mapya ayeebelwa, masimpe aakwiiya izyiiyo izyipya izyiita inguzu zyamizezo, buumi amubili. Lubono loonse lwajulu lunooli antangalala kuti bafutulwe ba Leza baiyee." - Ellen G White, Kulwana Kupati (Great Controversy) (Nampa, Idaho; Pacific Press Publishing Association, 1950), ipepa 677.

4. HENA CIBYAABI CIYOOYOSYA JULU ALIMWI?

"Lino omo mumunzi tamukooyonjila cintu niciba comwe cisofwaazya, nibaba bantu bacita zisesemyo nanka kubeja, pele abo balikke balembedwe mazina aabo mubbuku lyabuumi lya-Mwanambelele." - Cizubuluzyo 21:27.

Leza uyakugusya cinyonyono alubole lwancico; tazyikalibonyi kabili alimwi. Jesu aakulibonya, "tunooli mbuli nguwe" (1 Johane 3:2). Mucilawo cakukazyanya akukwelelezegwa kuti tu jaye, tubbe, tubeje nakuba kujata mukaintu cakusinikizya, tuyo ccilila luzyalo lwakujulu.

"[Leza] Nkabela uyoosindula misozi yoonse kumeso aabo. Takukooyooba limbi lufu, nikuba koomoka nikuba kulila nikuba kuciswa, nkaambo zintu zyakale zyamaninina" - Cizubuluzo 21:4.

Naaba sinkondo, naa lufu, talukabiko. Kujulu bafutulwe "tabakafwi" nakuba kucembala (1 Kolinto 15:53). Ijulu talijayi buyo lubole lwacinyonyono. Amuyeeye mbucitikabe kuli baabo ibapenga abulema mubuumi bwabo:

"Lino meso aaboofu ayoobona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya." - Isaya 35:5, 6.

5. MBUBOTU NZI BWAJULU BUPATI

Amuyeeye kubonana busyu a busyu a Jehova Mulengi wajulu.

"Amubone, bukkale bwa-Leza mpobuli akati kabantu, uzookkala akati kabo. Bazooba Bantu bakwe, alakwe Leza mwini uzookkala kulimbabo, azoobe Leza wabo." - Cizubuluzyo 21:3.

Leza singuzu ulasyomezya kuba mwenzuma alimwi Mwiiyi. Nkukkomana kuli buti kukkala ansi amatende akwe!

Amuyeeye mwiimbi ncanga ulapa kuti akkale kwaciindi cisyonto a Beethoven naba Mozart. Amuyeeye mbwaanga musilisi wabasondokede ulakkomana kubaa ciindi cakukkala a Albert Einstein, na inga camba nzi kumuntu ubeleka mulimo wa ku peinta mwanga wabadika a Michelangelo na a Rembrandt.

Amuyeeye buyo, bafutulwe baya kuba acoolwe cipati citeeli. Baya kubandika a mulembi wanyiimbo zyoonse, bahabupampu abasongo boonse. Bayooswaanganya mizeezo yabo asyimizeezo mupati amoyo mupati wamujulu. Aboobo eci cilongwe ciiya kukulwaizya kukomba.

"Nkabela kuzwa kumwezi mupya akusikila kulyuumwi mupya, akuzwa kubuzuba bwa-Nsabata akusikila kulibumwi bwa-Nsabata, bantu boonse bayoosika kuzookomba kubusyu bwangu, mbwaamba Jehova." - Isaya 66:23.

Akati-kati amunzi wakujulu kwiimvwi cuuno cipati cituba ca Leza. Cizingulukidwe fulicoongo ya smaragido (emerald), ibusyu bwaakwe bulamweka mbuli zuba lyasyikati. Aansi amatende aakwe ilwiizyi lunyengemanyengema mbuli ciboniboni kumbazu zyoonse. Kubalangala ooku ikutondezya bulemu bwa Leza, bafutulwe babungana kupa kulumbaizya kupati.

"Nkabela banunudwe ba-Jehova bayooboola akuza bwiimba kusikila ku-Zion; Bayooba alukondo lutamani amitwe yabo. Bayoojana lukondo abusekelezi, elyo buusu akutongela zyoonse ziyootija". - Isaya 35:10.

Ngooyo umwi uula bubotu butaimpwi naaceya. Kusyomeka kwaakwe akubikkilila alwengelelo lwaakwe lulazumanana. Alilumbaizyigwe izina lyaakwe lisetekene!

6. TWELEDE KUBA NKUKO!

Jesu ulayandisyisya uulya muswangano wabusyu-abusyu. Nkikaambo kaako ncakazuminina kuku nununa kuzwa kucinyonyono amuulo mupati. Ulelede kubweza cipego eci cacigaminina. Ulelede kulyaaba kuli Klistu mbuli Mwami a Munununi. Uyandika lwengelelo luzwa kucicingano, nkaambo:

"Lino omo mumunzi tamukooyoonjila cintu niciba comwe cisofwaazya, nibaba Bantu zisesemyo nanka kubeja, pele abo balikke balembedwe mazina aabo mubbuku lyabuumi lya Mwanambelele." - Cizubuluzyo 21:27.

Jesu ulatugusya kuzwa mucibi, kutali mucibi. Tweelede kuboola kuli nguwe kwiinda munguzu zyaakwe muli ndiswe akuzandulwa kuzwa kuli basyizibi abatasetekene. Jesu ncecijulilo kunjila mubulelo bwaakwe buboola.

Aboobo bulelo oobu bulakozya kuba amatalisyo mumyoyo yenu oono. Jesu natugwisya kuzwa mucibi, ubamba ijulu lisyoonto mulindiswe. Ulakozya kutugwasya kuti tuzyibe bwakulanganya kulibilika, kunyema, ikuyoowa alimwi akuzulwa kutupenzya. Bulangizi bwajulu taacili cilikwabilizyo kuzwa kumapenzi abuumi; butugwasya kulenga majulu ano ansi.

Mibuzyo yakabuzyigwa Bantu yakatondezya kuti "aabo basyooma kuti kuli buumi kunze alufu balapona buumi bwakutangala akusyoma bantu kwiinda baabo batasyomi."

Kwiina ciinga cilaba akukwelelezya mubuumi bwenu lino kwiinda cilongwe akusyooma Jesu Klistu. Amuteelele Petro mbwasandulula kukwelelezya kwa lusyoomo lupona:

"Walo tamunamubwene pe nekubaboobo mulamuyandisya, nkabela nomutamuboni suni MULAMUSYOMA, ABOOBO MULAKONDWA ALUKONDO LUTAAMBIKI LULI ABULEMU, alimwi mulalijanina cintu eco nceluleta lusyomo lwanu, nkokuti lufutuko lwamyuuya yanu." - 1 Petro 1:8, 9.

Eezyi zyoonse ajulu. Hena mwakajana kale buumi Jesu Klistu mbwayanda kuti muzyibe? Mutakaki lwiito lwaakwe lwaluzyalo.

"Lino Muuya anabwiinga balaamba kuti "boola!" ayooyo uuswiilila alakwe aambe kuti, "boola!" Ayooyo uufwide nyota, aboole; Amuntu woonse uuyanda, anywe cabuyo maanzi aabuumi." - Ciyubunuzyo 22:17.

Jesu ulandinywe lino, ulambaula kumoyo wenu mbuli mbumubala mabala aya. Ulamwiita kuti "muboole!" "muboole!" "muboole!" Nataaba akuyandisyisya boobu na kuzumanana. Naa tamuna ciita oku, ncecino ciindi kwiinda zyiindi zyoonse nciindi ceenu celede kutambula lwiito lwaakwe.

Nkaambo nzi nciinga tamumwaambili kuti mwazumina cipego caluzyalo lwaakwe akuti mukakkale buumi bwamoongole anguwe? A mumwambile ikuti mulamuyanda. Amumulumbe nkwamucitila aankwakanza kumucitila. Naa kuli ciimwi cintu akati kanu aa Leza, amumubuzye kuti muzumine kuti acigusye. Sunu, mbuli mbumutelela izwi lyaakwe imoyo wanu nucikozya kwingula, amulisungule kuli nguwe kakunyina kweenkela. Amukotamike mutwe akwamba kuti "Jesu, Mwami wangu ndaboola. Ndakupa koonse kuli ndiwe. Ndinooli wako lyoonse."

 

copyright © 2003 by the Voice of Prophecy