JESU AAKULONDA NDIWE

Nokwaamana kupenzegwa kwa myaka minji Armando Valldares wakacaazya mafuwa Kukoka. Wakali muntolongo imwi ya Castro nkaambo wakajanika mucikombelo mubuzuba bwa jilisimunzi. Bakali kubalanga muntolongo bakamupenzya kapati, pesi kunyina naakaleka kusyoma pe.

Nkocili cakali kumuyumya -yumya cisyomyo ncaakapa musimbi wazina lya Maata. Ooyu Maata bakabonana kwamana basyabana kacili muntolongo. Lusyomo lwa Valladares lwakamukwelelezya Maata. Nokwakamana ciindi cisyoonto Maata wakasinikizigwa kulongela ku Miami. Ooku kwaandaana kwakabacisa kapati.

Pesi Armando wakakonzya kusisikizya cisyomyo kumusimbi wakwe ngwaakali kuyanda. Wakalembalemba akapepa kakasowedwe akusyomya kuti njakukujana. Kunyina makani naa masumo naciba cili buti cinga candiyoosya. Ooyu mwaange wakasyoma kuti nakuba kuti ciyume buti bumwi buzuba walo amusimbi wakwe Maata bayakwiima kumbele lya Leza mucikombelo kabaamba zisyomyo zyabo zyakukwatana. Bumwi buzuba bayakuswaangana cakumaninina. "Lyoonse ulaandime," mumoyo Armando mbwaakamwaambila musimbi wakwe.

Eeci cisyomyo Armando cakumupa camba munyaka yoonse yakupenzegwa basankwa banji nobakali kutyompokelwa kapati. Awalo Maata wakajatilila kucisyomyo eeci. Wakasola mbwaakali kukonzya kwambila bantu boonse mapenzi aamulumi wakwe. Kunyina naakaleka pe.

1. ICISYOMYO

Cimwi ciindi inga twatalika kudonaika kuti, hena Klisto uyakuseluka ncobeni bumwi buzuba kuzwa mumakumbi kuti tukaswaangane anguwe? Twalaandeene anguwe kwaciindi cilamfu kapati.

Kuyeeya buyo kuti kumamanino eeyi nyika yamapenzi ikamane, cilakankamanisya. Pesi kuli cintu icitupa lusyomyo mumyoyo yesu. Eeci ncisyomyo kuti Jesu uyakuboola alimwi. Jesu katana basiya basiciiya bakwe kaya kujulu wakabasyomya kuti.:

"Myoyo yenu itapengi. Amusyome muli Leza, musyome mulindime. Mung'anda yataata kuli maanda manjimanji. Nikwatali boobu nindamwaambila. Ndaunka kuyakumubambila masena. Naa ndaunka kuya kumubambila masena Njakuboola Alimwi akumutola kutegwa nkwenjakuba anywebo mukabe nkukona." - Johane 14:1-3.

Jesu katana uunka kujulu, wakabasyomezya basiciiya bakwe kuti," NJAKUBOOLA ALIMWI". Wakasyomya kuboola alimwi kutola baabo bamusyoma kucilawo ciluleme ncaakatubambila. Alo mangwalo mbwaamba ziindi zili zyuulu zyobile amyaanda yosanwe kuti Jesu uyakuboola kunyika eeyi cabili cili masimpe mbubona mbocili masimpe kuti wakaliko, wakapona munyika eeyi myaka iili zyuulu zyobile yainda.

Kaindii Leza wakasyomya kuti Messiah uyakuboola, Munununi uuyakubweza zinyonyoono zyesu akulekelela zinyonyoono zyanyika yoonse. Eeci cisyomyo cakali cibotu mbuli kulota biya kubanjibanji bakali kupona mazuba aayo nibakali kupona akucita milimo miyumu. Pesi walo Jesu wakaboola akufwa aciingano. Cisyomyo cakacitika masimpe munzila yabulemu bantu mbobatakali kuyeeyela. Cisyomyo cakuti uyakuboola cili masimpe. Tuleelede kumusyoma utuyanda, kuboola kutola ndiswe mbaakanununa amuulo uutaambiki.

Kuciindi coonse Armando naakali muntolongo wakali kutuma tugwalogwalo amilumbelumbe kuli Maata. Walo Maata imwi milumbe eeyi wakimwaya kubantu kuti bamvwe mapenzi aakwe. Bamwi bantu bakamvwa mapenzi aaya. Amwi malelo naafulumende zyakatalika kukombelezya Castro kuti amwaangulule ooyu mwaange nkaambo kalusyomyo. Muleli wacisi ca France wakaanjila makani cakuti mu mwezi wa October, 1982 Armando wakazwa muntolongo akutansikwa mundeke iiya ku Paris. Ndeke noikkala mu Paris walo cakali mbuli kuti nkulota. Nokwakamana myaka iili makumi obile aakupenga akulindila, nguuya Armando wabalika akuya kukukwantana a Maata.

Myezi misyoonto noyakamana bakacada mucikombelo ciitwa kuti St. Kieran Church mu Miami kabaindulula zisyomyo zyakukwatana. Kumamanino bakaswaangana cakumanininina. Cisyomyo cakazuzika. "Njakuboola alimwi kulindiwe".

Sena ulakonzya kuyeeya kuti kuyakuba kuswaangana kukankamanisya kuli buti kumamanino twaakukonzya kumubona klistu busyu-a-busyu? Aakulibonya mubulemu boonse, koonse kuusa amakatazyo aakucisa nkutusisa mumyoyo yesu zyoonse ziya kumenwa. Kuboola kwa Jesu kuya kuleta kukkomana kutaambiki nkotwali kulindila. Eelyo tuyakkukala kukabe kutamani akukkala cakuswaangana amuntu wakandeene munyika yoonse.
Jesu ulaboola cakufwambana! Sena ulayandisisya kumucinga?

2. INO JESU UYAKUBOOLA BUTI?

(1) Hena uyakuboola cakusisikizya?
"Kamubona mebo (nde Jesu) ndamwaambila ciindi kacitanasika. Naa umwi wamwaambila kuti nkwali mulukula mutakaunki, naa nkwali kuzyuli mutakasyomi. Nkaambo MBULI LULABO luzwa kujwe LULABONEKA akumbo, akwalo kuboola kwa Mwnaamuntu mbokuya kuba." - Mateyo 24:25-27.

Lulabo lulalibonya kulekule. Inzya kuboola kwa Jesu takukabi kwakusisikizya.

(2) Sena Jesu uyakuboola alimwi mbuli muntu?
"Balo (basiciiya ba Jesu) baali kulungumanisya kujulu mbuli Jesu naakabwezegwa kuya kujulu, kufwambaana bakabona balombwana bobile basamide zituba munsi lyabo. Balombwana aaba bakaamba kuti Nobalombwana baku Galilaya nkaambo nzi muliimvwi aawo akulanga kujulu? OOYU NGUWENA JESU WATOLWA KUJULU kuzwa kulindinywe UYAKUBOOLA MBUBONA MBUMWAMUBONA KAYA KUJULU." - Ncito 1:10-11.

Mubuzuba mbwaakaunka kuzwa munyika yesu eeyi bangele bakabasyomezya basiciiya bakwe "nguwena Jesu" wakatolwa kujulu,uutali umbi, uyakuboola lwakwe mwini mbuli Mwami wa bami. Jesu nguwena wakaponya baciswa alimwi wakajalula boofu. Jesu wakakanana calubomba kumukaintu simamambe. Jesu nguwena wakasinda misozi yabakalikulila alimwi wakatambula bana mumaanza aakwe. Nguwena Jesu wakafwa a ciciingano ca kalivali, wakazikkwa mucuumbwe, alimwi wakabuka mubuzuba bwatatu.

(3) Sena uyakuboola kutegwa tukamubone?
"Amubone, ulaboola mumakumbi, meso oonse ayakumubona." - Cizubuluzyo 1:7. (kabazu kakutaanguna).

Boonse baya kujanika balapona Jesu aakuboola alimwi, baluleme ababisyi baya kukubona kuboola kwakwe.

Bongaye Jesu mwini mbaakaamba kuti baya kukubona kuboola kwakwe?

"Kuciindi eeco cibonisyo ca mwanaMuntu ciyakulibonya mujulu, MALELO OONSE MUNYIKA aya koomoka. Baya kumubona mwanaamuntu kaboola mumakumbi akujulu, anguzu abulemu bupati." - Mateyo 24:30.

Muntu oonse upona anyika yesu eeyi uyakumubona Jesu aakuboola.

(4) Mbabani baya kuboola a Jesu?
"MwanaaMuntu aakuboola mubulemu bwakwe, abangelo boonse, uyakukkala acuuno cakwe cabulemu bwa kujulu." - Mateyo 25:31.

Koyeeya mbociya kuba Jesu aakuboola abubotu bwakwe boonse kazingulukidwe "abangele boonse."

(5) Sena inga twakonzya kuziba ciindi cakuboola kwa Jesu?
"Kunyina uubuzyi buzuba naboola, nababa bangele kujulu, naba Mwana, pele Usyi. Kaambo kaako kamukkede kamulibambide, nkaambo MwanaaMuntu uyakuboola mu oola ndyomutayeyeli." - Mateyo 24:36, 44.

Boonse baya kukubona kuboola kwa Jesu mubulemu, pesi bamwi bayakujanika tabalibambide. Sena webo lwako omwini ulilibambide kumuchinga Jesu?

3. INO JESU UYAKUCITA NZI AAKUBOOLA ALIMWI

(1) Jesu uyakubungika boonse baya kufutulwa.
"Uyakutuma bangele bakwe amukunga mupati wa mpeta, bayakubungika basale bakwe kuzwa kuzyooko zyone zyanyika. Kuzwa kumamanino akujulu koonse koonse." - Mateyo 24:31.

Kuti wakamuzumizya Jesu kukubamba mumoyo alimwi amubuumi, uyakumwaanzya cakukkomana mbuli mufutuli wako.

(2) Jesu uyakubusya baluleme bafwide.
"Nkaambo Mwami lwakwe mwini uyakuseluka kuzwa kujulu, amoompoompo mupati,ajwi lya mungele mupati, akwiita kupati kwa mpeta ya Leza. BAFWIDE MULI KLISTU BAYAKUBUKA KUTAANGUNA." - Ba Tesolonika bakuntaanguna 4:16.

"Jesu waseluka kuzwa kujulu amoompoompo. Ijwi lyakwe lipati lyamvwika munyika yoonse. Lyajalula zyuumbwe zyoonse munamaumbwe oonse akubusya zyuulu zyuulu zyabantu zyabakamutambula Jesu munyika yoonse. Kuya kuba kukkomana kuli buti buzuba oobo!

(3) Jesu uya kubasandula boonse baluleme aakuboola, batali buyo baluleme baafwide, pesi abaluleme bapona.
"Kwaakumana boobo, swebo notucipona twakucaala TUYA KUKWEMPWA ANTOOMWE AMBABO mumakumbi akuya kumuswanganya mwami mumakumbi. Tukakkale anguwe Mwami kukabe kutamani." - Cisyoonto ca 17.

Kutubamba kuti tukanjile mubuumi butamani. Jesu ulasandula mibili eeyi iifwa kuti ibe mibili mibotu iitafwi.

"Amuteelele, mwaambile maseseke ! tatukooni toonse, pesi TUYA KUSANDULWA kufwambaana, mukulaba kwaliso KUMWEEMBO WAMAMANINO. Mweembo uyakulila, bafwide baya kubusigwa kukutabola, alimwi baya kusandulwa. Nkaambo cimana ciyakusamikwa kutamana, calo cifwa ciya kusamikwa kutafwa.

Jesu aakuboola "tuya kusandulwa toonse." Koyeeya: kunyina kulebauka kwa mibili, malwazi aatasilikiki, zibbadela , amaanda aakulilila bafu zyajalwa, Klistu waboola!

(4) Jesu uya kubatola kujulu boonse bantu baluleme.
Walo lwakwe mwini Jesu wakasyomya kuti
"Njakuboola kuzikumutola kuti mukakkale andime" mung'anda ya Taata." - Johane 14:1-3.

Petulo awalo ulakanana cikono cibambidwe kujulu cabaabo bakanununwa. (1 Pita 1:4). Tulakonzya kulangila kuya kwendeenda akubona munzi wa Leza uukankamanisya, Jelusalema Mupya alimwi Taata wesu wa kujulu.

(5) Jesu uyakuzimanizya zibi akupenga kukabe kutamani.
Babisyi bakakaka luse lwa Jesu bakalibeteka lwabo beni. Mbuli mbobalanga busyu bwa Jesu kaboola mumakumbi, cakufwambaana bamvwa kucisa kwa cinyonyoono cabo, balilila malundu amandomba aamabwe kuti,
"kamutulimba mutusise kuzwa ku busyu bwa yooyo uukede acuuno alimwi kuzwa kubukali bwa Mwaana Mbelele." - Cizubuluzyo 6:16.

Cababotela kufwa kwiinda kwiima kumbele aabusyu bwa Jesu uubonesesya. Balizi ino kuti ijwi lyamuzuzumina kuzwa kujulu kaindi lyakali kubakombelezya kuti batambule luse lwa kujulu. Balo aabo bakaliwaaliila akusweeka mukusondoka kwakuyandaula mali naa kulikkomanisya. Naa kuyandaula zyuuno zisumpukide, baziba kuti baka ciyambaalila cintu cinicini mubuumi.

Ncizubuluzyo ciyoosya. Nakuba boobo, kunyina naba omwe wakaelede kuti asoweke. "Leza lwakwe mwini,, takkomani mulufu lwa mubisyi" (Ezekieli 33:11). "Tayandi kuti naba omwe afwidilile, pesi kuti boonse basanduke" (2 Petulo 3:9). Jesu ulaita "amuboole kulindime nyoonse nomukatede alimwi a nomulemedwe, njakumupa kulyookezya" (Mateyo 11:28). Pesi, mukubula coolwe, bamwi bakakukaka ooku kutamba kwa luse.

4. SENA ULILIBAMBIDE KUMUTAMBULA JESU ABOOLA?

Cakamutolela zyoonse kuti Jesu atubambile buumi bwabulemu kukkala anguwe "mung'anda ya Taata." Cakamutolela buumi bwakwe! "KLISTU WAKALUMBULWA LOMWE kubweza zinyonyoono zyabantu banji, UYAKULIBONYA CIINDI CABILI, kutali kubweza zyinyonyoono; pele kuleta lufutuko kuli baabo bamulindila" (Ba Hebulayo 9:28).

Mufutuli wakafwa aciingano kubweza zinyonyoono zyako, uyakulibonya "ciindi cabili,"alimwi "uyakuleta lufutuko kuli baabo bamulindila." Jesu wakalisungula lwakwe mwini kupa lufutuko kuli umwi wesu. Naa tabooli ciindi cabili, ciingano inga caba cabuyo. Jesu uyanda kutupa munzi wakukala kukabe kutamani anguwe. Kutegwa eeci cibe boobu, tuleelede kumuzuminzya kuti alele mumyoyo yesu mbuli mufutuli alimwi mwami wesu lino.

Mafumofumo mu mwezi wa itwi 16 mu mwaka wa 1945 (August 16, 1945), kaana kasankwa kakaompolala mu komponi ya Shantung mu chisyi cha China kwali ku nyika kati wabona ndeke mujulu. Bantu boonse baumbulu bakazwa anzee kuti balange. Aba basankwa a bamakaintu bakapenga myaka minji-minji kabaangidwe, ama Japanese mbuli basicisi bamasi ngobakali kulwana. Bunji bwambabo cintu coomwe cakabacita kuti babe baumi mumuuya mbulangizi bwakuti bumwi buzuba inkondo iyakumana.

Inguzu zyamagezi zyakayinda akati kankamu ili cuulu comwe amyaanda yosanwe bakasyaala mbaange, bakaendeenda nobakaziba kuti ndeke yakali kulonda mbabo. Muzuzumina wandeke mbuli mbuwaali kuyabukomena, umwi wakaamba kuti "amulange njiiya ndembela ya cisi ca America ililembedwe ku lubazu lwa ndeke."

Mpoona awa cakutasyoma umwi wakavwiila kuti bona batambaika kuli ndiswe. Balizi kuti ndiswe bani? Baboola kututola. Kuciindi eeci aba bantu bakasamide malwendulwendu,bakatede alimwi baciswa biya kuyeeya nkobakali kuzwa, tiibaakonzya kulijata pe.

Kwakaba kunyongana. Bantu bakalikwiide kuzinguluka akuyobeka akunyamuna maanza aabo mujulu alimwi akulila. Mpoona bakaide kulanga alimwi baumuna kuti zii.Kunsi kwa ndeke kwajaluka, bantu batalika kuloka kabasamide zintu zyakuti batalicisi (ma palachuti).

Lino teesi kuti babavuna bayakuboola bumwi buzuba pe, sunu baboola, ino akati kabo! Njiiya mbunga yabantu Yoonse yacicima kuya kumulyango wa munzi. Kunyina wakayeeya ntobolo zyakali kutondekwa kuli mbabo. Nokwaamana myaka yabuumba akupenga, bakamwaya mulyango wa munzi akubalikila kooko basikalumamba bakaboola kubavuna nkobali kuselukila.

Kufwambaana aaya mabunga mabunga aabantu bakapilukila mu minzi mobakali kukala kabababwezede basikalumamba alwezo. Sikalumamba mupati wakali kulanga munzi wa baange wakazumina kuti bakomwa kakunyina akulwana pe. Nkondo yamana. Lwanguluko lwasika. Nyika yakaba impya alimwi.

Cakufwambaana Leza wesu, mufutuli wesu , uyakuseluka kuzwa mumakumbi kuzikutuvuna makani mabi aalunya lwa bantu kubeenzinyina asika kumamanino. Kuya kuba kukomana buzuba oobo, akuyobayoba kwakusekelela twaakuziba kuti: "waswena; ndakonzya kubabona bangele kabasiba mpeta zyabo. Kuyobayoba kuyaakukomena, kuyaakukomena limwi matwi asinka. Pesi tatukonzyi kuleka kulangisha nkaambo twatalika kuyeeya kuti: "wandibona. waziba kuti ndime ni." Tuya kumuziba akutangala kutaambiki; "ooyu ngo Leza waboolela ndime, butali buzuba bumbi pe, sunu buya, ino."

Sena ulilibambide kumucinga mwami mubulemu bwakwe? Naa peepe, walombwa kuti umutambule Jesu lwako omwini mubuumi bwako ino. Mbuli kuboola kwa Jesu kunyika eeyi mbokuya kumana mapenzi aanyika, akwalo kubool kwakwe mumoyo wako kuya kukugwasya kwaajanina nzila mapenzi aabuzuba abuzuba. Walo ooyo uuyumuna ulakonzya kukunununa kuzwa kumikuli ya cinyonyoono alimwi akukupa buumi butamani. Ulakozya kumushyoma Jesu. Ulakonzya kukugwasya kuti akajane ulilibambide aakuboola alimwi akukusyomya buumi wakukomana kukabe kutamani.

Kuboola kwa Jesu mubuumi kukonkya kubusandula kukabe kutamani mbuli kuboola kwa Jesu munyika yesu mbokuya kusandamuna. Ulakonkya kuli besya Jesu. Uyakukubambilila kuboola kwakwe akukupa camba cikankanisya ca buumi butakamani bwalutangalo.



copyright © 2003 by the Voice of Prophecy