I NAP MI PAINIM SIOS BILONG GOD NAU?

Roman Katolik sios na ol Protestan i bin birua long taim tru long Noten Ireland, maski tupela lain i bilip strong tru long Buk Baibel. Taim kominis i bin bruk i go daun long Isten Urop, ol lain Otodox Kristen, Katolik Kristen na Moslem i bin birua, kilim ol yet long nem bilong bilip ol i holim long en. Long Midol Ist ol lain Moslem wantaim Jews i wok long kilim ol yet is tap long wanem ol wan wan lain i bilip olsem, ol nau ol lain bilong God long Ol pela Testamen.

Long PNG tu yumi wok long lukim planti kain kain sios i wok long kamap na daunim narapela sios i stap. Dispela birua i kamapim hevi insait long ples na kantri bilong yumi. Sampela laip i lus pinis, long nem bilong lotu na bilip. Taim yumi lukim ol dispela samting i kamap, yumi laik painim gutpela sindaun. Yumi no laik tru long sindaun long wanpela ples we ol man i wokim samting i soim klia olsem ol i no tingting stret.

Yumi laki tru olsem God i rereim wanpela gutpela tok bilong yumi pinis i stap long Buk Baibel. Dispela tok i wankain tu God i bin rereim tok bilong ol lain long taim bilong Noa, Elijah, long Adam na Eve na long Israel taim ol lain bilong Assyria na Babylon i bin laik kam long mekim save long ol.

Jisas i kam wantaim wanpela kain tok long yumi stret ol lain i stap nau na Em i givim yumi wanpela tok we bai helpim yumi long painim ples na gutpela sindaun long ples yumi stap. Yumi painim dispela tok insait long Buk Baibel long ol tok profet bilong buk bilong Daniel na Kamapim Tok Hait.

Long Pas 12 na 14 long Kamapim Tok Hait, God i tokim olgeta dispela tok long Jon na em raitim is tap long dispela tupela pas. Long dispela stadi na narapela bihain, yumi bai lukluk long dispela toktok God i givim long helpim yumi long sindaun gut.

1. JISAS I SANAPIM SIOS

Laip na toktok bilong Jisas i bin strong bilip na bungim ol sios memba insait long sios Jisas yet i bin sanapim. Ol lain long dispela sios Jisas i sanapim i save ol husat na wanem ol i mas bihainim na wokim. Ol pas wantaim Jisas gut tru olsem Bikpela bilong ol.

"Mi yet mi bin makim yupela bilong kamap ol lain bilong Krais, na mi laik givim yupela long Krais olsem mi bringim yangpela meri i stap klin tru i go long man e mi laik maritim." (2 Korin 11:2)

Paul i tok olsem, sios bilong God em klin pela meri stret, meri bilong Krais. Wanpela yangpela meri we i klin yet, i no silip wantaim man yet, i makim sios bilong God - meri bilong Bikpela.

Long Olpela Testamen wankain piksa tu yumi lukim. Ol Israel, lain bilong God; Em olsem meri yu lavim mi (Jeremaia 2:2), na 'Mi man bilong yu' (Jeremaia 3:14). Maski dispela hap tok "sios" i no kamap liklik long Olpela Testamen, Nupela Testamen it ok tok long Israel olsem sios insait long bus (Aposel 7:38).

Long buk bilong Kamapim Tok Hait, Jon tu i tok tok long sios olsem Meri:

"Orait wanpela narakain mak tru i kamap long skai. Dispela mak i olsem. Wanpela meri i stap, na e mi pasim san olsem klos bilong en. Na mun i stap aninit long lek bilong en, na 12-pela sta i stap olsem hat long bilong en." (Kamapim Tok Hait 12:1)

Taim Jon i tok tok long meri, em i soim klia tru wanem i wok long senis long kru bilong Jon: Pipol bilong God, Israel long Ol pela Testamen bai i kamap sios bilong God long Nupela Testamen.

(i) "Klos bilong meri em san" - Dispela i soim olsem sios bilong God bai sain olsem san long de. Long wanem em putim pasin bilong God. Jisas lait bilong dispela graun (Jon 8:12), em sain insait long laip bilong ol sios memba na bihain ol sios memba i kamap lait bilong dispela graun (Matyu 5:14).

(ii) "Meri i sanap antap long mun" - Mun i save soim autim tasol lait bilong san. Wan kain tu toktok bilong God, Buk Baibel bai i so-autim lait long laip bilong Jisas, Bikpela bilong graun i kam long yumi ol lain bilong Em. Mun i stap aninit long lek bilong Meri i soim olsem lait long laip bilong Jisas (laip, ministri, dai, kirap) i winim lait bilong tok bilong Ol pela Testamen.

(iii) Meri i putim kraon long het - Sta i makim ol 12 pela aposel, pasin bilong ol i gutpela man na tok tru bilong ol yumi i gat nau i stap yet.

I klia tru olsem, Jon i wok long traim tokim olsem senis bilong ol pipol bilong God Israel long Ol pela Testamen i kamapim ol pipol insait long Kristen sios we Jisas yet i kamapim.

Dispela san, mun na sta, Jon i usim long tokautim pasin tru bilong wok ministri Kristen sios bai wokim long tok autim gutnius bilong Jisas.

2. GOD I DAUNIM SATAN

Taim piksa bilong meri i kamap long skai, dispela i rereim rot bilong God long daunim na pinisim Satan.

Dispela meri i gat bel, na pen bilong karim pikinini i kamkap pinis long em. Em i laik karim pikininii, na em i pilim pen nogut tru, olsem na em i singaut strong. Na narapela mak i kamap long skai. Dispela mak em i olsem. Wanpel;a traipela retpela snek i stap. Em i gat 7-pela het, na 10-pela kom i kamap long het bilong en. Na 7-pela hat olsem hat bilong king i stap long het bilong en. Tel bilong en i brumim tru bikpela lain star bilong skai na tromoi ol i go daun long graun. I olsem ol i tilim ol star long tripela lain, na wanpela lain star olgeta i pundaun. Orait dispela snek i sanap long pes bilong meri i laik karim pikinini, na em i wetim meri i karim pikinini pinis. Bai meri i karim pikinini man, em pikinini God i makim bilong holim stik ain na bosim strong olgeta lain manmeri. Meri i karim pikinini pinis, orait kwiktaim ol i kisim pikinini igo antap, na ol i bringim em igo long God na long sia king bilong em. Na dispela meri emi ranawe igo long hap i no gat man. Long dispela hap God i redim pinis ples bilong em i ken i stap long en, na ol bai i lukatim em na givim kaikai long em inap long 1,260 de. (Kamapim Tok Hait 12:2-6)

3pela ki lain i kamap insait long dispela stori.

(i) Meri - Yumi lukim pinis i makim Sios bilong God
(ii) Pikinini man: God i kisim em i go antap long Em na sia king bilong Em. Pikinini bai i bikman bilong lukautim manmeri. Jisas tasol, wanpela pikinini man husat i bin bon long dispela graun, God i bin kisim em i go antap long heven na sindaun long sia king bilong God. Na wanpela de bihain em bai lukautim dispela graun bilong yumi.
(iii) Bikpela welabus em makim Satan.

"Orait bikpela paiat i kirap long heven. Maikel wantaim ol ensel bilong en oli pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moalong heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na "Man I Save Kotim Olgeta Manmeri." Em i man bilong giamanim olgeta manmeri bilong graun. Ol i tromoi em igo daun long graun, na ol i tromoi ol ensel bilong en i go daun wantaim em." (Kamapim Tok Hait 12:7-9)

Piksa bai kamap klia moa taim yumi klia long ol tok bokis insait long propesi. Satan na ol ensel bilongen i lus na God i rausim ol long heven i kam daun long graun. Taim Jisas i bin bon long dispela graun 2,000 krismas i go pinis, Satan i bin traim long kilim em. Satan i no bin win, em i no kilim Jisas na i no daunim na bagarapim sios bilong God.

Jon i lukim liklik piksa bilong bikpela pait namel long Jisas na Satan long dispela propesi. Pait i bin kamap strong nogut tru long taim Jisas i bin dai long kros na Jon i bin harim wanpela singaut long heven it ok olsem:

"Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong. Long wanem, dispela man bilong kotim ol brata bilong yumi, em i bin kotim ol long ai bilong God bilong yumi long san na long nait, tasol nau ol ensel i tromoi em i go daun pinis." (Kamapim Tok Hait 12:10)

Jisas i winim Satan pinis. Dispela i min olsem yumi tu i nap winim Satan. Jisas bai i givim yumi pawa bilong daunim Satan ( v. 5). Maski Satan i traim olgeta stail long traim daunim Jisas, Jisas i winim em pinis. Jisas i strongim em yet long kamap King na Het Pris bilong yumi long taim em daunim Satan long traim bilong em long bus.

"Nau Jisas i kisim yumi bek pinis." - Wok bilong kisim bek manmeri i winim olgeta samting i bin kamap long dispela graun. Jisas i bon na baim bek manmeri i kamap pinis. Jisas i dai tasol e mi kirap bek pinis. Maski Satan i laik traim daunim Satan, Jisas i winim em pinis (v. 10). Jisas i winim Satan olgeta pinis (v. 7-9). Wan wan sin manmeri i ken luksave nau long gutpela bilong sanap aninit long kros, long wanem em i gat bikpela pawa ( v. 10-11).

"Olsem na yu heven, na yupela olgeta lain i stap long heven, yupela i ken hamamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap." (Kamapim Tok Hait 12:12)

Olgeta lain long heven i bin hamamas tru taim Jisas i winim Satan. Dispela win i mekim sios bilong Jisas i go het yet nau long daunim Satan na i mekim manmeri husat i win i nap long go long heven.

3. KRISTEN SIOS I BUNGIM HEVI WANTAIM SATAN

Bipo Jisas i bin go antap long heven, e mi kamapim Kristen sios. Em kapsaitim laip bilong em i go insait long en na dai long em. Dai bilong Jisas long diwai kros i givim sios pawa long winim strong bilong Satan.

"Ol brata bilong yumi ol i no laikim tumas laip bilong ol yet, na ol i no tingting strong long ol i mas i stap gut long graun. Nogat. Ol i bin kisim strong long blut bilong Pikinini Sipsip na ol i strong long autim tok bilong em, maski ol birua i kilim ol i dai. Na long dispela pasin ol i winim pait na daunim dispela birua." ( Kamapim Tok Hait 12:11)

Krais nau i nap givim pawa bilong em long Kristen sios. Yumi i nap winim ples we bipo em i ples bilong Satan long pawa bilong diwai kros. Wankain Jisas i winim Satan long kros, Em i wok long winim Satan nau tu taim ol Kristen i winim Satan.

3pela as tingting we i makim olsem sios i win long planti krismas i go pinis i kam i nap nau:

(i) "Ol winim em (Satan) long blut bilong Sipsip." God i bin kisim Jisas i go antap pinis long heven na go bilong Jisas i mekim sios bai win oltaim. Em bai rausim ol rekot bilong sin na kisim bek yumi long blut bilong Krais (1 Jon 1:7). Blut bilong Jisas Krais bai givim pawa long yumi long gat gutpela pasin Kristen. (1 Pita 1:18-20). (Sapos yu laik save moa long mining bilong blut bilong Krais, lukim Stadi Gaid 11, poen. 5)

(ii) "Ol i no bin suruk long dai long nem bilong Jisas." - Blut bilong Sipsip i mekim ol i amamas long dai long wok na nem bilong Jisas. God i bin bungim bikpela hevi long nem bilong Jisas, olsem na ol Kristen tu i no sruk long dai tu.

Ol pikinini tu i save sakrifais long bihainim Jisas: I bin wanpela stori bilong wanpela mama ol lain Rom i bin holim kalabusim em na tromoi em i go long ol laion. Taim laion i wok long kaikaim mama bilong em, yangpela gel i sanap na tokaut olsem; mi tu mi wanpela Kristen. Ol soldia i holim pasim em na tromoi em tu i go insait long laion i bin kaikaim em tu.

Tertullian, wanpela sios lida A.D. 200 i tok olsem long ol kristen: Pasin bilong lav i mekim yumi sanap ples klia. Olsem na ol haiden i save tok, hausat tru ol lavim wanpela na narapela na ken dai long helpim narapela." Taim ol Kristen i putim toktok bilong God insait long laip bilong ol long taim bilong hevi, ol bai kamap gutpela piksa tru long ai bilong ol birua

(iii) "Ol i winim pait na daunim birua" - "long tok bilong ol" - I no long tok tok bilong ol tasol, nogat. Ol winim Satan long pasin ol i soim insait long ples graun tu. Ol i kamap tru tru piksa bilong wanem Gutnius bai mekim long yu. Long taim nogut, we tudak bilong pasin nogut i bin karamapim dispela graun, ol lida na memba bilong Kristen sios i bin kamap nambawan witnes bilong Jisas long pasin bilong ol.

Kamapim Tok Hait 12:11 i givim piksa bilong sios we i win. Em soim sios we i pulap long ol win manmeri: ol lain Aposel, ol man i dai long nem bilong Jisas, ol lain ripomas na olgeta strongpela sios memba. Ol pasin bilong ol, strong bilong bihainim trupela tok bilong God na win bilong ol, yumi ken ridim na stori long en yet nau.

Taim Satan i traihat tru long kilim Pikinini bilong God na em i no nap. Yumi tu i mas kisim strong long dispela tingting o stori. Sios bilong God i kisim strong na tok lukaot wantaim:

"Dispela snek emi lukim olsem ol i tromoi em i go daun pinislong graun, na em i go ranim dispela meri i bin karim pikinini man. Tasol ol i givim tupela wing bilong bikpela tarangau long dispela meri, bai em inap flai i go long ples bilong en long graun i no gat man, na em i ken i stap longwe long dispela snek. Na long dispela hap ol bai i lukaotim em gut na givim kaikai long em, igo i nap long 3 na hap yia. Orait dispela snek i trautim wara long maus bilong en. Dispela wara i kamap olsem bikpela wara na i ran i go bihainim meri. Snek i laik bai wara i kisim dispela meri na bagarapim meri olgeta. Tasol graun i helpim meri. Graun i opim maus bilong en na i dringim dispela wara, snek i bin trautim long maus bilong en." (Kamapim Tok Hait 12:13-16)

Jisas i tokim yumi pinis: Taim satan i no kilim Jisas, em tanim bel hat bilong em i go antap long sios bilong Jisas. Taim God i givim strong bilong bikpela tarangau pisin na plai i go, Satan i mekim narapela rot gen (wara long daunim sios bilong God).

Yumi olgeta tingim, Satan i save mekim ol man long wokim wok bilong em long daunim plen bilong God na sios bilong Em. Taim Satan i kilim Jisas long diwai kros, em ting olsem em win pinis tasol nogat, God i tanim dispela dai kamap blesing bilong olgeta manmeri husat i bilip long Jisas.

Bihain long dai bilong Jisas, Satan i bin kilim planti manmeri long kain kain rot na long kainkain ples. Long A.D. 200 - 300, planti sios i senisim sampela tok insait long buk tambu. Planti ol lida bilong lotu i mekim save long planti ol Kristen manmeri bilong God long wanem ol dispela Kristen i sanap strong long trupela tok bilong Nupela Testamen.

Ol save man it ok olsem: 50 million manmeri i bin i dai long nem bilong Jisas long taim bilong tudak, propesi i toktok long en. Revelesen 12:6 i givim taim bilong mekim save - olsem 1260 yia olgeta. Dispela taim i stat long A.D 538 - 1798 (tingim lo bilong de/yia long Esekiel 4: 6). Taim dispela taim bilong mekim save i pinis, truela sios bilong God bai kamap.

4. SIOS BILONG GOD LONG TAIM BILONG YUMI

Yumi noken lus tingting welabus i kros yet long sios bilong God na pipol bilong Em. Dispela pait namel long Satan na Jisas i wok long go het yet. Satan bai i mekim save nogut tru sios bilong God klostu long nambatu kambek bilong Jisas. Lukim laspela tok bilong Kamapim Tok Hait 12, long ves. 17.

"Olsem na snek em i belhat long dispela meri, na em i go na i pait long ol arapela pikinini bilong en, em ol dispela manmeri i save bihainim ol lo biong God, na ol i save autim tok bilong Jisas na bihainim em." (Kamapim Tok hait 12:17)

Dispela propesi i toktok long de bilong yumi. Satan i kros nogut tru; na em mekim pait wantaim ol sios bilong God. Yu laik yu mas luksave gut. Laspela sios bilong God i gat mak bilong em i stap ples klia stret:

(i) Las de bilip manmeri bai "bihainim tok bilong Jisas" - Ol dispela lain bilong Jisas bai i holim pas gut tru tok tru bilong God. Ol dispela i painim aut olsem, trupela tok bilong Baibel i kirapim lav na strongim tingting bilong wanwan Kristen bilong bihainim God. Ol bai oli tilim wantaim ol narapela lain amamas ol i painim insait long Krais.
(ii) Las de Kristen, em ol lain bilong Propesi. - Taim Jon i kisim tok i kam long Jisas i helpim em long raitim propesi bilong Kamapim Tok Hait (Kamapim Tok Hait 1:1-3). Sios bilong God tu bai i kisim toksave bilong Em i kam long wanpela man insait long dispela sios bilong em. Jon i tokaut long dispela testimoni em "Spirit bilong Propesi" (Kamapim Tok Hait 19:10). Gif bilong propesi i opim ai bilong ol long lukim gut rot na pasin bilong God long bihainim na kamap long ples God i laik ol i mas kamap long en.
(iii) Las de Kristen em ol lain bilong "harim na bihainim lo bilong God." - Ol i no tokautim lo tasol long ol narapela manmeri , ol tu i bihainim gut tru ol dispela lo. God i bin kapsaitim lav bilong Em i go insait long lewa bilong ol long strong bilong Holi Spirit (Rom 5:5). Taim lav bilong God i pulap insait long lewa bilong yumi, em bai kirapim hamamas long bel bilong yumi long bihainim lo bilong God (Rom 13:3-10).

Ol sios bilong ol aposel i bin bihainim gut tru lo bilong God. Na sios bilong Jisas long las de tu bai i wokim wankain. Dispela bai i mekim snek bai i kros nogut tru. Satan bai i kirap kros na pait wantaim sios memba bilong sios bilong God. Satan i pait wantaim ol long wanem ol i bihainim gut tru lo bilong God. Na Jisas it ok tu olsem:

"Sapos yupela i laikim mi tru, orait yupela bai i gut ol tok bilong mi" (Jon 14:15).

Yu painim pinis dispela i kamap tru insait long laip bilong yu tu o nogat? Sios bilong las de insait long Krais bai i isi tru long lavim God wantaim olgeta lewa bilong yumi na ol wantok bilong yumi olsem yumi yet (Matyu 22:35-40).

Namba 4 lo i askim yumi long lukaotim dispela sabat de bilong God holi. Long wanem yu lavim God na bihainim olgeta 9 pela lo, yu mas bihainim na lukautim holi namba 7 de holi - Sabat.

Mi laik tokim yu olsem, tru tumas, God i gat wanpela sios na lain pipol bilong em long las de. Ol dispela lain bai lain manmeri bilong bilip long Jisas Krais na bihainim olgeta lo bilong God. Na Sabat i stap stret namel long olgeta dispela lo bilong God. Sabat bai i soim klia long yumi olsem, God i laik stap insait long laip bilong yumi olgeta Kristen. Sabat tu i stap namel long laspela tok lukaot bilong God long yumi manmeri i laik go long heven insait long Kamapim Tok Hait 12 na 14. Tru ol lain bilong Krais long laspela de bai stap ol yet insait long graun tasol singaut bilong ol long God bai i mekim God i salim olgeta ensel bilong heven long kam helpim ol, Jisas long stap wantaim ol olgeta taim na Holi Spirit long strongim ol bihainim God.

Promis i tru, ol bai i winim Satan long blut bilong Sipsip na long tok bilong God (Kamapim Tok Hait 12:11). Yu laik kamap wanpela bilong ol lain Kristen we bai i bihainim tok lo bilong God na holim pas tok bilong Jisas? I nap yumi mekim dispela tingting nau tasol?

Dia Papa: Mi hamamas tru olsem Baibel i tok klia long hausat tru bai mipela i ken kamap lain bilong harim na bihainim tok bilong yu long las de. Helpim mi long larim laip bilong mi long han bilong Jisas na kipim lo bilong God na fait bilong Jisas. Mi laik yu helpim mi tu long pas wantaim Jisas, trastim tu grais bilong em long mi. Mi askim long nem bilong Jisas. Amen.