I NAP PLANTI MAN I RONG TU O NOGAT?

Long gaid 16 yumi bin painimaut olsem; malolo long Sabat em i nambawan marasin bilong kain laip nau we ol man i wok hat tru long wik na i nidim malolo. God i save long olgeta nid bilong yumi, olsem na Em kamapim olgeta Sabat de long givim yumi malolo long skin na strongim laip bilong spirit bilong yumi. Bihain long God i bin mekim kamap dispela graun em i bin malolo, blesim na mekim de kamap holi (Stat 3:1-3).

Taim God i givim 10 pela Lo long ol pipol bilong em , Israel, Em i bin putim lo bilong Sabat namel stret (Kisim bek 20:8-11). Bihainim dispela lo, Sabat em de bilong tingim olsem God i bin mekim kamap dispela graun bilong yumi. Em de yumi i nap sindaun na tingim ol gutpela samting God i bin wokim, em de we yumi i nap kisim gutpela malolo na kam klostu moa long God bilong yumi husat i bin mekim kamap dispela graun. Taim Jisas i bin stap long dispela graun, Em tu i bin malolo long Sabat ( Luk 4:16) na em tu i bin strongim dispela de Sabat, em bilong helpim yumi ol man bilong graun ( Mak 2:27, 28). I gat sampela pas long Aposel i mekim klia olsem ol lain disaipol bilong Jisas i bin lotu na malolo long Sabat bihain long Jisas i bin kirap long matmat. (Aposel 13:14; 16:13; 17:2; 18:1-4, 11).

1. ASKIM WE I NO KLIA

Planti Kristen tude i wok long askim; Bilong wanem tru na yumi i gat tupela de bilong malolo? Planti Kristen tru i lotu na malolo long Sande, dei namba 1 bilong wik, we ol i bilip olsem i helpim ol long tingim kirap bek bilong Jisas. Na yumi ol sampela Kristen gen i lotu, malolo na bilip olsem namba sevende olsem Sabat na Baibel tu i no tokim olsem bai yumi malolo na lotu long Sande.

God tru i no wari long wanem de yumi malolo na lotu long em olsem Sabat? Yumi olgeta i gutpela kristen na yumi laik bihainim tok bilong God. Em bai gutpela long yumi askim wanem tru em laik na pasin bilong Jisas we em laik yumi mas bihainim na wokim? Antap long olgeta tingting, yumi olgeta i laik bihainim tok bilong God na harim em i tokim yumi,

"Na taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela em bai i tokim yupela long rot yupela i mas bihainim." (Aisaia 3:21)

Long taim yumi laik mekim tingting bilong yumi long bihainim God, i gat sampela askim yumi mas kisim bekim bilong em pastaim: Husat i bin senisim dispela de, Sabat i go long Sande? Dispela senis Baibel i bin mekim kamap o man bilong graun? Sapos Baibel i no bin mekim kamap dispela senis, ating God, Jisas o ol Aposel i bin mekim kamap dispela senis?

Yumi bai gohet na lukluk long olgeta rot long painim aut bekim yumi askim long en:

2. GOD I BIN SENISIM SABAT?

I gat wanpela tok insait long Baibel we i tokim yumi olsem God i bin senisim dispela de holi long namba Seven i go long namba wan de bilong wik o nogat?

Planti ol Kristen i bilip olsem 10 pela lo em God yet i givim long helpim yumi stap hamamas long dispela graun. God i bin givim long Moses na ol lain bilong em, ol Israel long Maunten Sinai.
Moses i bin tokim ol Israel olsem:

"Na Moses i tok,"Taim yupela i bung long maunten, Bikpela is tap insait long paia na long bikpela blakpela klaut. Em i tokaut strong na i givim olgeta dispela lo long yupela. Na em i no givim yupela ol arapela moa. Bihain em i raitim dispela ol lo long tupela hap ston na i givim long mi." (Buk Lo 5:22)

10 pela lo tasol em toktok bilong God em yet i bin raitim na givim yumi manmeri bilong graun. Ol bikpela samting tru long wanem God yet i raitim long han bilong em antap long tupela ston. Na long namba fo lo God i tokim yumi olsem:

"Tasol de namba 7, em i bilong mi God," …… " God i BLESIM SABAT DE NA TAMBUIM" (Ridim Kisim Bek 20:8-11).

Taim God i wokim kamap dispela graun em i bin mekim 3 pela samting long dispela de long mekim em i no wankain ol narapela de. (1) God i bin MALOLO long wok bilong em, (2) God i bin BLESIM SABAT DE na (3) GOD I TAMBUIM" ( Stat 2:1-3). Long maunten Sinai God i bin tokim wankain tok long Moses long tokim ol lain bilong Israel.

Taim God i bin givim lo bilong em long ol Israel Em i bin mekim sampela tok tu olsem; Em i no laik wanpela man i ken senis o tanim nabaut ol lo Em yet i tokim long maus bilong em.

"Yupela i noken skruim wanpela nupela lo long dispela lo bilong God, Bikpela bilong yumi, nau mi givim long yupela. Na yupela i no ken rausim wanpela long en. Yupela i mas bihainim olgeta dispela lo."(Buk Lo 4:2)

God yet i tok em i no nap senisim lo bilong Em.

"Na mi no ken brukim dispela kontrak mi bin mekim wantaim em, na mi no inap senisim wanpela tok bilong mi." ( Buk Song 89:34)

Buk Baibel i klia tru olsem, God i no bin senisim Sabat i go long Sande, nambawan de bilong wik.

3. JISAS I BIN SENISIM SABAT O NOGAT?

Jisas i bin tok klia tru olsem, ol lo bilong em i stap insait long Olpela Testamen i no nap senis, na ol i mas i stap long stretim yumi ol lain bilong Em. (Ridim Matyu 5:17-19)

Jisas i bin lukautim gut tru Sabat, em nau bai yumi mas bihainim ol pasin bilong em.

"Jisas i go long Nasaret. Taim em i pikinini yet, em i stap long dispela taun, na em i bin kamap bikpela long en. Long de Sabat em i go insait long haus lotu, olsem em i save mekim oltaim. Em i sanap bilong ritim tok bilong God." (Luk 4:16)

Jisas i lukluk i go pas na lukim olsem bihain long laip bilong ol, ol bai bungim hevi na i tokim ol olsem:

"Yupela i mas beten, bai yupela i no mas ranawe long tim bilong kol o long Sabat de." (Matyu 24:20)

Jisas i wok long toktok long bikpela hevi bai i bungim Jerusalem, 40 krismas bihain long Jisas i kirap bek long matmat, long A.D.70, we ol Rom bai i kam na brukim daunim Jerusalem. Jisas i no bin sensim Sabat lo, o ol narapela lo tu. Jisas yet i tok tu olsem long yangpela moni man long bihainim lo bilong God (Matyu 19:16-22). I klia tru long ol tok, pasin na laip bilong Jisas olsem, yumi nidim yet Sabat long kisim gutpela malolo na i gat inap taim long sindaun wantaim God.

4. OL APOSEL I BIN SENISIM SABAT?

Jems husat i bin dei namba 1lida bilong sios long nupela Testamen i bin tok olsem:

"Sapos wanpela man i save bihainim olgeta lo, na em i bukim wanpela lo tasol, orait em i gat asua pinis wankain olsem man i brukim olgeta lo. Yumi save, God i bin tok olsem, " Yupela ol marit, yupela i no ken mekim pasin pamuk." Na em i bin tok tu olsem, "Yu i no ken kilim man i dai." Orait Sapos yu no mekim pasin pamuk, tasol yu kilim i dai wanpela man, orait yu kamap man bilong brukim lo." (Jems 2:10, 11)

Luk em i wanpela dokta na man bilong autim tok long sios bilong nupela testament i tok olsem:

"Na long de Sabat mipela i go autsait long dua bilong banis bilong taun, na mipela i go long wanpel wara. Mipela i ting klostu long dispela wara i gat ples bilong mekim prea. Na long dispela wara mipela lukim sampela meri ol i bung i stap, na mipela i sindaun toktok wantaim ol." (Aposel 16:13)

Paul, misinari i go long ol lain Gentail, husat i bin raitim planti pas bilong Nupela Testamen, i strongim tok:

"Long wanpela hap tok bilong buk bilong God, em i bin tok olsem long de namba 7, " Long de namba 7 God i lukim olgeta wok bilong en i pinis, na em i malolo long dispela de,"..... Olsem na yumi save, ol manmeri bilong God bai i gat malolo i stap yet, em i olsem malolo bilong de Sabat." (Hibru 4:4, 9)

Buk Aposel long Nupela Testamen, Luk i bin toktok long 84 pela Sabats ol lain Aposel i lotu long en, long 14 pela krismas bihain long kirap bek bilong Jisas long matmat.

Aposel 13:14,42,44: - 2 pela Sabat long Antioch
Aposel 16:13: - 1 pela Sabat long Filipai
Aposel 17:2: - 3 pela Sabat long Tesalonaika
Aposel 18:4, 11: - 78 pela Sabats long Korin

I kamap 84 Sabats olgeta ol lain bilong Krais i bin amamas long en.

Jon, laspela bilong ol 12pela aposel long dai, i raitim faivpela buk olgeta - Wanpela gutnius bilong Jon, 3 pela leta na 1 pela propesi - Revelesen. Em i bin dai long A.D 100, 70 pela krismas bihain long Jisas i bin kirap bek long matmat. Insait long olgeta pas em i bin raitim, em i no bin toktok liklik long dispela senis bilong Sabat i go long Sande, nambawan de bilong wik. Jon em yet tu i bin malolo na lotu long Sabat. Em rait na tok:

"Long de bilong Bikpela, Holi Spirit i kamap strong bilong mi." (Revelesen 1:10)

Jisas i tok de bilong God em Sabat:

"Pikinini bilong man em Masta bilong Sabat." (Matyu 12:8)

Taim yumi ridim Nupela Testamen, e mi no toktok liklik long senis bilong Sabat i go long Sande. Em i toktok long dei namba 1 bilong wik 8 pela taim. Tasol i nogat wanpela taim ol i tok pes de i kamap holi o em kamap de bilong lotu. Taim yumi stadi-im gut dispela dei namba 1, em tokim yumi olsem:

1. Ol meri i bin go long matmat long dei namba 1 long wik (Matyu 28:1)
2. Taim Sabat i pinis, ol meri i gohet gen long wokim wok bilong ol long pespela de long wik (Mak16: 1, 2).
3. Jisas i bin soim em long Mary Magdalene long moning tru long dei namba 1 long wik (Mak16:9)
4. Ol lain bilong bihainim Jisas i go het long wok bilong ol long dei namba 1 long wik (Luk24:1)
5. Mary i go long matmat bilong Jisas na painimaut olsem em i no silip insait long matmat long pespela de dei namba 1 long wik ( Jon 20:1)
6. Ol disaipol i bung wantaim long wanem ol i poret long ol Jews na i no long lotu ( Jon 20:19)
7. Paul i bin askim ol sios memba long bungim liklik samting long givim ol sios memba bilong Jerusalem we i bungim hevi na kisim i kam long dei namba 1long wik (1Korin 16:1, 2).
8. Long Aposel 20:7 Luk i toktok long Paul i bin autim tok i go inap moning bilong dei namba 1bilong wik. Long wanem em bai lusim ol sios memba long moning. Ol lain aposel i save brukim bret olgeta de (Aposel 2:46).

I nogat wanpela pas insait long Nupela Testamen i tokim yumi olsem, God, Jisas o ol Aposel i bin senisim Sabat i go long Sande dei namba 1long wik. I tru i gat senis i bin kamap long senisim Sabat i go long Sande dei namba 1 long wik. Tasol dispela senis i no bin kamap long taim bilong Jisas, nogat. Dispela senis i bin kamap planti krismas bihain long Jisas i bin lusim graun na go long heven pinis. Na tu olgeta disaipol bilong Jisas i dai pinis taim senis i bin kamap.

5. SANDE I KAM WE?

Ol lain Aposel i bin tok lukaot long yumi olsem sampela ol lain kristen bai i lusim trupela bilip na kamapim sampela bilip long tingting na laik bilong ol yet. Paul i bin tok olsem: (Ridim Aposel 20:29-31)

Wanem Paul i bin tokim i wok long kamap tru. Ol lain bilong raitim histori i tok olsem; planti ol kain pasin bilong man, lotu na tingting bilong man i bin kam insait long sios bilong God.

Senis bilong Sabat i go long Sande i bin kamap taim bihain long Nupela Testamen na olgeta Aposel i bin dai pinis. Histori i soim klia tru olsem ol Kristen i lusim trupela de bilong lotu na malolo long Sande, dei namba 1 long wik.

Tasol mi laik tokim olsem, i no olgeta man i lusim Sabat na lotu long Sande. I bin gat ol man i lotu long Sabat yet. Sande i bin kam insait long sios long Italy, tu handret Krismas bihain long Jisas i lusim graun. Bihain nau ol Kristen sios i bruk. Sampela i lotu long Sabat na sampela long Sande.

Long Mas. 7, A.D 321, Constantine i bin kamapim pespela Sande lo, askim ol man long malolo long Sande. Ol man bilong wok long gaden tasol bai wok yet tasol olgeta lain long siti i mas malolo na lotu long Sande. 4 handret krismas bihain long Jisas, long wanpela miting bilong katolik sios (Laodicea Council) ol i bin tambuim ol man long wok long Sande na tokim ol man long wok long Sabat.

Histori i soim klia tru oslem, lotu long Sande i no kam long God, Jisas o ol lain Aposel. Em i kam long man bilong graun. Buk Baibel i no givim yumi tok orait long dispela senis, nogat tru. Long olpela Testamen, Daniel i bin tokaut olsem bai i gat wanpela sios gavman pawa bai i senisim de bilong God na nau i kamap tru nau. Yu ken lukim long wanpela kos long mi pela long stadi-im dispela propesi gut moa.

6. HUSAT I BIN MEKIM DISPELA SENIS?

Husat tru i bin senisim Sabat long Sevende bilong wik i go long Sande, nambawan de bilong wik? Sios katolik i bin tok em mekim dispela senis. Long traim na kirapim kingdom bilong Rom, ol lida bilong sios i daunim tingting na tok emi tru long gavman lida na mekim kamap dispela senis long Sabat i go long Sande.

Wanpela buk bilong Katolik ol i kolim Katakisim i bin rid olsem:

"A. Wanem de em Sabat de?
"B. Satade em Sabat de.
"A. Bilong wanem yumi lotu long Sande na i no long Satade?
"B. Yumi lotu long Sande na i no long Satade bikos ol Katolik sios..... i bin senisim de holi long Satade i go long Sande." - Peter Geiemann, The Convert's Catechism of Catholic Doctrine (1957 edition), p. 50.

Narapela niuspepa (The Catholic Mirror of September 23, 1893,) i ripot na tok:

"Katolik sios long 1,000 krismas bipo ol protestan i kamap, long strong bilong wok God i givim ol long wokim, i bin senisim dispela de holi long Satade i go long Sande."

Tupela moa ol lain Katolik i bin mekim.

"Yu ridim Baibel long Stat i go i nap long Revelesen, nay u no nap tru painim wanpela tok it ok oraitim dispela senis long Sabat i go long Sande. Baibel it ok strong tru long yumi mas lukautim Satade, de mi pela katolik i no tambuim." - James Cardinal Gibbons, The Faith of Our Fathers, p. 89.

"Em ol lain Katolik sios, long tok orait bilong Jisas i bin senisim Satade i go long Sande long tingim kirap bek bilong Jisas. Olsem na ol narapela protestan sios i lotu long Sande i soim ol tu i wanbel na givim hona na biknem i go long Katolik sios. Ol tu i luksave long autoriti bilong Katolik." - Monsinio Louis Gaston de Segur, Plain Talk About Protestantism of Today, p. 225.

Dispela tok i klia tru. Katolik sios i tokaut olsem ol lidaman bilong sios bilong en i senisim Sabat i go long Sande.

7. WANEM TRU OL PROTESTAN SIOS I TOKIM?

Ol sios lida bilong ol narapela sios i tok klia tru olsem, Baibel i no givim yumi tok orait long lotu long Sande.

Martin Luther, papa bilong Lutheran sios i tok insait long Augusburg Confession, Article 28, lain 9:

"Ol lain Katolik i tok, senis bilong Sabat i go long Sande i no wanbel wantaim 10 pela Lo bilong God..... na ol i bin bikhet tru long tok olsem ol i gat strong long mekim dispela senis we i tanim tok bilong Lo bilong God."

Tupela Save man bilong Baibel bilong sios Methodist nem bilong tupela Amos Binney na Daniel Steele i tok oslem:

"Em tru i no tok orait long larim ol pikinini long kisim baptais….. na i nogat tu wanpela tok bilong ukaotim holi pespela de bilong wik." Theological Compend ( New York: Methodist Book Concern, 1902), pp. 180, 181.

Dr. N. Summerbell, man bilong raitim histori bilong ol disaipol bilong Krais o Kristen Sios i rait na tok:

"Katolik sios i bin tanim beksait long God….. Em senisim namba fo lo taim ol rausim Sabat bilong God, na kamapim Sande olsem de Holi." - A True History of the Christian Church, pp. 417, 418.

8. WANEM EM TRUPELA HEVI I STAP?

Wanem em trupela hevi bihain long olgeta tingting yumi bin lukim pinis? Trupela hevi em; Bilong wanem tru na planti Kristen manmeri i wok long lotu long Sande taim Baibel i tok strongim? Ating long yu wan wan bai yu askim, Wanem de tru bai mi malolo na lotu long en? Bai yu bihainim ol lain we i save tok, noken wari long wanem de long malolo na lotu, lotu long wanpela long ol seven pela de i orait tasol? O bai yu bihainim wanem God i tokim long 10 pela lo bilong Em olsem, namba 7 de em nau bai yu malolo na lotu long en - em Sevende, Sabat?

Noken ting olsem, yumi wok long toktok long wanpela liklik samting, nogat. Yumi tok long pasin bilong harim tok bilong God na bihainim wanem em tokim long Buk Baibel. Husat bai yu harim na bihainim? Bai yu harim God na Jisas o bai yu harim na bihainim man bilong graun na lukaotim de man i kamapim long laik bilong em yet?

God i no laik bai yu wokim laik bilong yu. Long taim bilong kamapim dispela graun na 10 pela lo bilong Em, God i bin i gat as tingting long askim yumi long lotu long namba 7 de bilong wik olsem Sabat (Stat 2:1-3; Kisim Bek 20:8-11). Em yet i bin malolo long Sabat na kamapim olsem de bilong tingim strong bilong em long kamapim dispela graun. God, husat i kamapim dispela graun i kamapim tu Sabat "Holi" de, em de God i laik yumi na famili i kam long em long kisim strong long bihainim God.

Sampela ol bilip manmeri i save bekim ol dispela kain tok na tok olsem, Mekim olgeta de em holi de tasol. Em tru yumi mas lotuim God olgeta de tasol God yet i bin kamapim wanpela de i narakaen na mekim dispela Holi. Em blesim dispela de wantaim blesing we i narakaen olgeta na askim yumi long givim em olgeta dispela de - Sabat.
Ating i gutpela mi mas tokim yu stret olsem, Baibel i no tok bai yumi lotu long Sande. Wanem de yumi lotu long en, em i bikpela samting olsem, em i mas de God i laik yumi mas lotu long en. Yumi bai bihainim laik bilong man o laik bilong God? Tok tok bilong man o toktok bilong God? De man i kamapim o de God yet i makim?

Propet Daniel i bin tokautim long yumi wanpela tok lukaot: "Na em bai traim senisim ol lo bilong lotu na bilong ol bikpela de bilong lotu" (Daniel 7:25).

God i wok long singautim ol trupela lain bilong em long kam na harim tok bilong em na bihainim. Em singautim yumi long lukaotim Sabat, em i mak bilong pas wantaim Jisas na soim lav yumi i gat long em. (Plis ridim Jon 15:9-11)

Yumi gat wanpela gutpela masta Jisas stret, husat i laik yumi mas traim lav bilong em insait long laip bilong yumi yet. Kain ol lain we i gat tingting na laik bilong soim lav bilong Jisas, dispela bai i opin dua bilong lav bilong Jisas stret.

Long Gethsemane Jisas i larim em yet i go long han bilong lav bilong God. Na em krai na tok olsem, "Rausim dispela kap i go long we long mi", "i no laik bilong mi tasol laik bilong yu" (Mak 14:36).

Krais i larim em yet i go long han na bihainim laik bilong God.

Jisas i laik soim yumi olsem, em i laik yumi mas larim laip, laik, save bilong yumi, tingting na yumi olgeta i go long han bilong God na larim em i wokim laik bilong em long laip bilong yumi. Sapos yu wokim olsem na bihainim laik bilong Jisas na kipim Sabat bilong em holi, amamas bilong Jisas bai i pulap insait long yu (Jon 15:11).

Planti ol manmeri we i save lukaotim sabat i bin tok olsem, "taim ol stat long kipim Sabat ol i bin painim narakain amamas, gutpela sindaun, klia tingting, gutpela helt na planti moa long wanem ol i bihainim laik bilong Jisas long laip bilong ol. Yu save wanem, yu tu i ken painim wankain samting ol i bin painim pinis. Yu laik pilim wanem ol i toktok long en o nogat? Sapos yu laik pilim, givim laip bilong yu long han bilong Jisas na larim em i stiaim laip bilong yu. Mi tokim yu bai yu pilim narakain hamamas yu no pilim yet bipo insait long laip bilong yu.

Yu ken prea long God na tok, Tenkyu long dai long mi na givim sans long kisim laip i stap oltaim oltaim. Tenkyu long tok tok bilong yu we i stretim mi long laip na painim Sabat de. Helpim mi long tru tru bihainim laik bilong yu. Helpim mi long sanap long sait bilong yu, wantaim ol lain bilong yu. Long olgeta hevi bilong mi, plis Jisas yu yet kam na sanap long sait bilong mi na helpim mi winim traim na sin. Mi prea long nem bilong Jisas, Amen.