GO INSAIT LONG KRISTEN LAIP

Mi kisim wanpela leta long wanpela bilong ol lain i go pas long skul bilong Vois of Propesi long Africa.

Man hia i tok olsem, faivpela krismas i go pinis ol lain bilong Vois bilong Propesi i bin salim tok long em i go na lukim wanpela sumatin i stap long haus kalabus. Mi go lukim dispela kalabus man we bin salim tok na ol woda i bin larim mi i go insait. Dispela sumatin i bin i gat bikpela laik tru long stadi-im buk tambu. Dispela i opim rot long Pasta long visitim olgeta taim.

Bihain long 6 pela mun long stadi-im Buk Tambu, dispela yangpela man i bin askim sapos em i nap baptais. Ol lain bilong haus kalabus i bin tok orait long yangpela i kisim baptais. Pasta husat i bin baptaisim yangpela ya, i tok: Em i bin no lukim wanpela baptais tasim lewa bilong em olsem bipo.

I long taim bihain tasol long em i bin baptais, yangpela hia i bin lusim haus kalabus, maski em i bin i gat yet sampela krismas i stap yet. Taim Pasta i askim ol lain bilong haus kalabus: Bilong wanem tru na yupela i lusim em i kam aut long kalabus? Ol i tok olsem, pasin bilong em I senis olgeta.

Dispela man i kam sindaun gut wantaim meri na ol pikinini bilong em na nau em wanpela lida insait long wanpela bikpela sios long ples bilong em.

1. WANEM TRU EM MINING BILONG BAPTAIS?

Taim dispela kalabus i bin kamap wanpela Kristen na laip bilong em i senis, bilong wanem tru em impotan tru long em i mas baptais?

Taim Nicodimus i bin toktok wantaim Jisas long wanpela nait, Jisas i bin mekim klia tru mining bilong baptais:

"Jisas i bekim tok bilong en olsem, olsem Sapos man i no kamap nupela gen em i no nap lukim kingdom bilong God……. Jisas i bekim tok olsem tru tumas mi tokim yu,Sapos man I no kamap nupela long wara na long Spirit, em i no inap i go insait long kingdom bilong God." (Jon 3:3, 5)

Bihainim tok bilong Jisas, yumi mas bon long wara na Spirit". "Bon long Spirit" i soim klia tru olsem yumi go insait long nupela laip, long strong bilong Spirit yumi i nap senisim pasin na tingting bilong yumi. Long wanem long go long heven, Jisas i laik yumi mas senis.
Baptais long wara i soim aut tasol long ol man olsem yumi senis trutru insait long lewa na tingting bilong yumi.

Taim wanpela man o meri i baptais, em i soim olsem em i bin painim Jisas pinis na Holi Spirit i bin senisim laip bilong em pinis, olsem na em i soim long kisim baptais.

2. BILONG WANEM BAI MI BAPTAIS?

Kisim bek bilong yumi i hangamap long 3 pela samting Jisas i bin wokim:

"Bikpela tok tru mi bin givim long yupela , em dispela tok mi yet mi bin kisim bipo. Em i olsem. Krais i bin DAI bilong tekewe olgeta sin bilong yumi olsem tok i stap long buk bilong God.Na ol i putim em long MATMAT, na namba 3 de em i KIRAP BEK Olsem tok i stap long buk bilong God." (1 Korin 15:3, 4)

Krais i mekim wok bilong kisim yumi bek long sin i kamap isi taim em i bin Dai, em silip long MATMAT na bihain em KIRAP BEK gen.
Paul i bin tok olsem:

"Yumi bin pas wantaim Krais Jisas na kisim baptais, na long dispela pasin yumi olgeta i bin pas wantaim dai bilong em. Ating yupela i no save long dispela a? Long baptais yumi bin pas wantaim dai bilong Krais na God I planim yumi wantaim Krais long matmat. Na long bikpela strong bilong em yet, Papa i bin kirapim Krais long matmat. Olsem bai yumi tu i ken wokabaut long nupela laip." (Rom 6:3, 4)

Jisas i bin dai long kisim bek yumi long olgeta sin bilong yumi na taim em kisim em i givim yumi nupela laip bilong stretpela pasin. Taim yumi baptais, yumi dai olsem Krais, go insait long matmat olsem Jisas na kirap bek, aut long wara. Dispela i soim tu olsem yumi bin i dai pinis long pasin bilong sin, i wankain dai bilong Jisas. Em bai mekim yumi kisim long strong bilong Holi Spirit olsem tru man i kirap long matmat olsem Jisas.

Baptais i go insait long wara i trutru soim mining bilong dai, planti long matmat na kirap bek bilong Jisas. Baptais long sios wantaim liklik kap wara i no mekim mining na trupela baptais insait long Jisas.

Wanem tru em mining bilong dai insait long Jisas?

"Yumi save, olpela bel bilong yumi em i dai pinis long diwai kros wantaim krais, bilong pinisim strong bilong sin i save wok long bodi bilong yumi. Olsem na yumi no ken i stap wokboi bilong sin moa." (Rom 6:6)

Baptais i soim klia tru olsem yumi senis olgeta insait long lewa bilong yumi. Sapos yumi kirap gen na haitim sampela sin insait long yumi dispela bai daunim yumi gen, yumi bai kamap gen wokboi bilong sin gen. Taim yumi larim laip bilong yumi i go long God, pawa bilong em bai i wok insait long laip bilong yumi na trupela senis i kisim ples.

Husat tru i kamapim senis insait long laip bilong yumi?

"Na mi kisim nupela laip. Tasol dispela laip em i no laip bilong mi yet. Nogat. Krais em i stap laip insait long mi. Na nau olgeta pasin na wok mi mekim long dispela graun, em mi mekim long rot bilong bilip. Mi bilip long Pikinini Bilong God em i bin laikim mi tru na em i lusim laip bilong em yet bilong helpim mi." (Galesia 2:20)

Taim yumi lukluk long Jisas na luk save long dai bilong em antap long diwai kros, dispela i mas mekim yumi askim God long kam insait long laip bilong yumi na givim pawa long laip bilong yumi. Noken lukluk long sin we i laik daunim yu, noken lukluk long ol sin we i bin daunim yu bipo, lukluk tasol long Jisas.

Taim yumi pas wantaim pawa bilong dai na kirap bilong Jisas, yumi bai lukim moa na moa yet long gutpela pasin bilong em na dispela ol pasin bilong em bai i senisim ol pasin nogut bilong yumi.

"Olsem na sapos wanpela man i pas wantaim Krais, orait God i mekim em i kamap nupela man tru. Harim gut. Nau olpela pasin i pinis olgeta na nupela pasin i kamap pinis." (2 Korin 5:17)

Taim yumi baptais yumi soim laik bilong yumi long pas wantaim Jisas na stap bihainim nupela laip em i givim yumi, " insait long Krais." Jisas bai kamapim insait long yumi wanem yumi yet i no nap kamapim insait long laip bilong yumi. Yumi kamaut long wara wantaim nupela laip na em bai givim yumi pawa long stap strong long nupela laip yumi i gat insait long Jisas.

3. BILONG WANEM TRU JISAS I BIN BAPTAIS?

Long taim bilong Pentikos Pita i bin kirap na tokim ol manmeri olsem yupela i mas kirap na "tanim bel na baptais", na Jisas bai fogivim sin bilong yupela (Aposel 2:38). Jisas i no bin mekim wanpela sin, Bilong wanem tru na Jisas i bin baptais?

"Long dispela taim Jisas i lusim Galili na i go long wara Jordan. Em i go long Jon, na i laik kisim baptais long han bilong Jon. Tasol Jisas i bekim tok bilong em olsem, Maski, nau yum as mekim olsem mi tok.Long dispela pasin bai yumi inapim olgeta samting God i laik bai yumi mas mekim. Olsem na Jon i bihainim tok bilong em." (Matyu 3:13, 15).

Tru, Jisas i no gat sin tasol baptais bilong em i gat narapela as bilong em. Em bilong "kamapim tru olgeta tok na pasin bilong God." Jisas i kamapim wanpela piksa we yumi sin manmeri i mas bihainim. Jisas i no askim olgeta manmeri i bihainim em bai i go long olgeta hap em i go, nogat. Olsem na taim yumi baptais na go aninit long wara, yumi mas bihainim Jisas taim yumi kamaut long wara.

Jisas i dai pinis long sin bilong yumi, olsem na em i nap givim yumi tu stretpela pasin bilong em.

"Krais i no save mekim sin, tasol God i laik helpim yumi, olsem na em i bin bungim olgeta sin biong yumi antap long em, na Krais i kamap olsem man bilong mekim sin tru. God i mekim olsem bai yumi ken i stap long Krais, na long strong bilong em yumi ken kamap stretpela manmeri bilong God." (2 Korin 5:21)

Taim God i senisim yumi olsem ol manmeri bilong sin i kamap stretpela manmeri pinis, yumi nau i mas stap gut na stret insait long nupela laip, insait long Jisas.

4. BILONG WANPELA TRU BAI MI BAPTAIS?

Taim Jisas i bin baptais, Em i bin go aninit stret long wara Jordan. Jon i bin baptaisim em long Jordan na i bin igat "planti wara" (Jon 3:23). Taim Jon i baptaisim Jisas em i bin "kamaut long wara" (Matyu 3:16)

Sapos yumi klia gut tru long mining bilong baptais, yumi i no nap tru paul. Dispela hap tok i kam long Greek tokples "Baptizo" em min olsem, " putim aninit"

Jon Wesley i bin go long Amerika long 1737 ol lain sos memba bilong sios bilong em I bin askim, bilong wanem tru yu no laik long baptaisim pikinini bilong Parker long rot bilong kapsaitim wara antap long em. I luk olsem, man husat i kamapim Methodist sios i bin save baptaisim ol lain bilong long kain baptais bilong Jisas - go aninit long wara.

Jon Calvin i tok: "Em klia tru olsem baptais na go aninit long wara em kain baptais bilong ol lain bilong sios bilong bipo." -

Sapos yu raun long planti ol olpela sios long Rom, Asia na Baibel lan, yu bai lukim planti ples bilong baptais long banis bilong sios. Dispela i soim stret olsem, ol lain bilong sios bilong bipo i save baptais - go aninit long wara. Sios katolik bipo i save baptaisim ol manmeri olsem Jisas i bin go aninit long wara. Bihain liklik long wanpela bikpela kibung bilong sios, ol i bin hamamas long baptaisim ol liklik pikinini - tromoi wara long ol. Tasol mi laik tokim yumi olsem, yumi noken bihainim laik na tingting bilong man, yumi mas bihainim tingting na laik bilong Jisas i bin soim yumi.

Baibel i tok klia tru olsem, yumi mas kisim skul long buk tambu pastaim bihain orait yumi ken baptais. Sapos yumi baptaisim wanpela pikinini we i tupela o 6 pela mun, dispela pikinini i no save long Jisas na i no bilip long em tu. Olsem na moa gut long yumi bihainim wanem Baibel i tokim na i no man i tokim (Aposel 8:35-38). Na wanpela man i mas tanim bel na tokautim sin bilong em bipo em bai baptais (Aposel 2:38). Ol pikinini i no nap long bilip, tokautim sin, tanim bel na kisim baptais tu.

5. BILONG WANEM TRU NA EM I IMPOTAN LONG BAPTAIS?

Bihainim kain baptais bilong Jisas, em gutpela long ol lain i laik long go long heven i mas baptais:

"Tru tumas mi tokim yu, sapos man i no kamap nupela long wara na long Holi Spirit, em i no inap i go insait long kingdom bilong God." (Jon 3:5)

Jisas i bin larim wanpela man tasol i bin no baptais tasol em bai stap long heven, em stil man long diwai kros wantaim Jisas. Dispela man i no gat taim long kam daun long kros na baptais, em i nidim senis long lewa tasol. Na Jisas i bin promisim em olsem em bai go tu long heven (Luk 23:42, 43).

Jisas i bin givim yumi dispela woning:
"Man i bilip na i kisim baptais, God bai i kisim bek em. Tasol man i no bilip, em bai lus long kot." (Mak 16:16)

Jisas i bin dai long yumi long diwai kros na dispela dai i soim lav bilong Jisas. Olsem na yumi ol manmeri nau i mas bekim singaut bilong em. Yumi noken sem long tokautim tingting bilong yumi long baptais. Olsem wanem yu stat pinis long nupela laip insait long Jisas? Yu baptais pinis o nogat? I nap yu redi long baptais long sampela taim bihain?

6. BAPTAIS EM STAT TASOL

Baptisim em soim strongpela tingting bilong wanpela man o meri long bihainim kain laip bilong Kristen. Tasol dispela baptisim em i stat tasol long Kristen laip, yumi mas dai long sin olgeta de long laip bilong yumi.

Taim wanpela pikinini i bon, em gutpela long man i mas hamamasim pikinini tasol yumi mas tingim, em stat bilong planti wok papa na mama bai wokim long helpim dispela pikinini. Tupela I mas lukautim em gut tru. Wasim em olgeta de, givim em kaikai olgeta de na soim olsem tupela i hamamas long em olgeta de.

Dispela i wankain tru long man o meri we i baptais. Yu husat i lida bilong sios i mas lukautim gut ol dispela lain Kristen. Tokim ol long lukautim ol gut insait long Kristen laip. Sapos yu baptais pinis yu mas kaikaim toktok bilong God olgeta de, yu nid long kam long Jisas olgeta de na askim em long wasim yu long klin long ol pasin bilong sin. Na sios i mas soim olsem ol i konsen long gutpela bilong em. Olsem Paul i tok: " Mi dai olgeta de" (1 Korin 15:31). Taim yu tanim long kain pasin bilong tingim yu yet na askim na bihainim toktok bilong God moa long laip bilong yu, yu soim olsem yu dai long bihainim sin na laik bihainim laik bilong God tasol.

Wankain marit, baptisim i soim olsem yu kamap wanpela poroman o meri bilong Jisas. Tasol dispela poroman i mas gro. Long mekim dispela poroman bilong yu wantaim Jisas i kamap strong, yu mas prea, lotu na witness long ol narapela man olgeta taim, olgeta de.

7. BAPTISIM I MAS MEKIM YUMI HAMAMAS

Baptisim em i taim bilong hamamas, long wanem ol lain we i larim laip bilong ol long han bilong Jisas, em promisim ol etenal laip. "Man i bilip na kisim baptais God bai kisim em bek." (Mak 16:16)

Yu save wanem taim yu baptais yumi wok long go antap long laip bilong yumi we bai lidim yumi kamap long heven na Jisas.

Baptisim tu i soim klia olsem yumi i gat bikpela hamamas wantaim Jisas long nau yet. Dispela i kamap tru long wok bilong Holi Spirit we em promisim long ol lain i baptais (Aposel 2:38). Taim Holi Spirit i stap insait long laip, yumi bai kisim frut bilong Holi spirit - Lav, amamas, bel isi na igo (Galesia 5:22, 23).

Taim yumi i gat tu Holi Spirit insait long bel bilong yumi, Em i givim yumi strongpela tingting olsem yumi nau pikinini man na meri bilong God (Rom 8:15, 16).

Taim yumi kamap pikinini bilong God, dispela tingting i givim yumi planti blesings tasol em i no havirisim yumi long ol hevi. Yumi bai bungim moa hevi taim yumi pas wantaim Jisas na kamap Pikinini man na meri bilong God. Taim Satan i save olsem yumi nau kamap Kristen em bai traim daunim yumi long givim tingting olsem Jisas i no stap wantaim yumi, yumi sin man meri na God i no hamamas long yumi, olsem na yumi bungim planti hevi. Tasol mi laik toksave long yumi olsem, dispela i no tru. Taim yumi stap long han bilong God em bai tanim olgeta samting I no gutpela i kamap gutpela, long helpim yumi gro na kamap strongpela Kristen (Rom 8:28).

Wanpela yangpela meri i bin baptasi na lotu long sios bilong Sevende. Man bilong em i no bin hamamas taim em i baptais na tokim em olsem mitupela bai brukim marit. Man tu i mekim laip insait long haus i hat moa long dispela meri tasol meri hia i mekim strongpela tingting bilong em olsem, em bai kamap gutpela meri bilong dispela man. Pasin bilong meri ya i senisim tingting bilong man na i no long taim bihain man tu i bin baptais.

Yu save wanem taim yu bin pas wantaim Jisas maski yu bungim hevi na wari, yu bai kamap olsem wanpela bainet long han bilong Jisas. Yu ken kirap long larim laip bilong yu i go long han bilong Jisas, long wanem em tu i bin komitim laip bilong em long kisim bek yu long han na banis bilong sin na Seten. Em bai gutpela samting long larim laip bilong yu i go long han bilong Jisas na kamap witnes bilong em long ai bilong olgeta manmeri. Sapos yu no bin wokim olsem yet, inap yu givim laip bilong yu i go long Jisas nau? Askim em long kamapim nupela laip insait long yu long strong bilong Holi Spirit, na baptais i go insait long Krais na sios bilong em.