NSOBOLA OKUZUULA EKKANISA YA KATONDA MU KISEERA KINO?

Katonda ebiseera ebimu awa obubaka obw'enjawulo olw'obwetaavu obw'emirembe egy'enjawulo: Yawa obubaka obw'okuyamba Adamu ne Kaawa ng'ekibi kimaze okujja okwonoona ensi yaabwe, yawa obubaka eri ensi eyali mu buzibu obw'amataba; n'obubaka eri Isiraeri Abasuuli oba Aba Babuloni bwe baali nga babalumba. Yesu yajja n'obubaka obw'enjawulo obw'omulembe gwe era Katonda alangiridde obubaka obw'enjawulo olw'ekiseera kyaffe kino. Essuula eya 12 ne 14 ez'omu kitabo kya Kubikkulirwa zituwa obubaka bwa Katonda obw'enjawulo obw'omu kiseera kino mu bufunze. Mu Mulagirizi owa zuula ono n'oyo ajja okuddirira, tujja kutunuulira obubaka obwo.

1. EKKANISA YATEEKEBWAWO YESU

Obulamu n'okuyigiriza kwa Yesu byateekawo obwegaffu obw'okukkiriza era n'oluganda olw'okumpi mu kkanisa y'Abatume gye yateekawo. Abatume baatekawo enkolagana ey'oluganda egenda ewala ne Kristo eyazuukira. Omutume Paulo yawa ekifaananyi eky'oluganda olwo, ng'alugerageranya n'enkolagana ey'obufumbo obw'omwami n'omukyala we:

"Kubanga mbakwatirwa obuggya bwa Katonda: kubanga nnabafumbiza bbammwe omu, ndyoke mbaleete eri Kristo nga omuwala omulongoofu." - 2 Abakkolinso 11:2.

Okusinziira ku mutume Paulo, ekkanisa y'Abakristayo ye mukazi omulongoofu, omugole omusajja ye Yesu, akabonero akatuufu ak'ekkanisa ye gy'ayagala.

Mu Ndagaano Enkadde ekifaananyi kyekimu ekyakozesebwa ku Israeri, abantu ba Katonda abalonde. Katonda yayogera eri Israeri nti: "Ng'omugole omukyala wanjagala" (Yeremiya 2:2) "kubanga nze bbammwe" (Yeremiya 3:14).

Ekitabo kya Kubikkulirwa nakyo kyogera ku kkanisa ng'omukazi:

"Akabonero akanene akewuunyisa ne kalabika mu ggulu, omukazi ng'ayambadde enjuba, n'omwezi nga guli wansi w'ebigere bye, ne ku mutwe gwe (nga guliko) engule ey'emmunyeenye kkumi na bbiri; era ng'ali lubuto n'akaaba ng'alumwa era ng'abalagalwa okuzaala." - Kubikkulirwa 12:1.

(1) OMUKAZI "AYAMBADDE ENJUBA": Kino kitegeeza ekkanisa emasamasa ng'enjuba, kubanga eyambaziddwa n'ekitiibwa kya Kristo. Yesu gwe "musana gw'ensi" (Yokana 8:12), amasamasa ng' ayita mu bantu b'ekkanisa ye era nabo ne bafuuka "omusana ogw'ensi" (Mayato 5:14).
(2) OMUKAZI ALINA "OMWEZI WANSI W'EBIGERE BYE": Omwezi kitegeeza ekifanaanyi ky'omusana ogw'enjiri okuyita mu Ssaddaaka ne mikolo egy'abantu ba Katonda mu Ndagaano Enkadde. Omwezi okubeera "wansi w'ebigere bye" kitegeeza ekimyanso eky'omusana ogw'enjiri okujjibwawo olw'okuwereza kwa Kristo.
(3) OMUKAZI ALINA "ENGULE EKKUMI N'EBBIRI KU MUTWE GWE": Emmunyeenye kitegeeza Abatume ekkumi n'ababiri, abasajja abeesigwa abaawa obujulirwa bwabwe ku Yesu obukyayaka n'okutuusa ekiseera kino.

Mu ngeri etegerekeka, enyinnyonnyola ey'omukazi ono, eraga nti Omutume Yokana mu birowoozo ajja ekifaananyi ky'abantu ba Katonda Isiraeli mu Ndagaano Enkadde okukizza ku kkanisa ey'omu Ndagaano Empya, eyo Yesu gye yateekawo. Enjuba, omwezi, era n'emmunyeenye bya kukuwereza olw'okwasa omusana okw'ekkanisa y'Abakristayo, mu kubunyisa Amawulire Amalungi.

2. OMUZANNYO OGW'OKUWANGULWA KWA SETAANI

Okuyingira kw'omukazi kutuwa entandikwa ey'omuzannyo omunene:

"Yali lubuto, ng'alumwa, n'aleekaana mu bulumi obw'okuzaala. Ekyewunyisa ekirala ne kirabika ku ggulu; ne wabaawo ogusota ogunene ogumyufu, nga gulina emitwe musanvu, n'amayembe kkumi, nga ku buli mutwe kuliko engule. Omukira gwagwo ne guwalula ekitundu ekimu eky'okusatu eky'memunyeenye ez'oku ggulu, ne gikisuula ku nsi. Ogusota ne guyimirira mu maaso g'omukazi eyali okumpi okuzaala, gulyoke gumire omwana we. Omukazi n'azaala omwana ow'obulenzi, agenda okufuga amawanga gonna, ng'alina omuggo ogw'ekyuma. Kyokka omwana we n'atwalibwa eri Katonda, n'eri entebe ye ey'Obwakabaka." - Kubikkulirwa 12:2-5.

Abantu basatu abakulu abeenyigira mu muzannyo guno:
(1) OMUKAZI, oyo twamaze dda okumulaga nga y'ekkanisa ya Katonda.
(2) OMWANA OW'OBULENZI eyazaalibwa omukazi ono, "nakwakkulibwa n'atwalibwa eri Katonda n'eri entebe ye." Yesu ye mwana yekka eyali azaaliddwa ku nsi kuno eyatwalibwa mu ggulu eri entebe ye era olunaku lumu agenda kufuga amawanga gonna.
(3) OGUSOTA, gutegeeza omulabe oba Setaani.
"Olwo ne wabaawo olutalo mu ggulu. Mikaeri ne bamalayika be ne balwanyisa ogusota nagwo ne gubalwanyisa ne bamalayika baagwo. Naye ogusota ne guwangulwa. Gwo ne bamalayika baagwo, ne batakkirizibwa kwongera kusigala mu ggulu. OGUSOTA OGWO OGUNENE GWE GUSOTA OGW'EDDA, OGUYITIIBWA OMUBI ERA SETAANI, alimbalimba ensi zonna, ne gusuulibwa ku nsi, awamu ne bamalayika baagwo." - Kubikkulirwa 12:7-9.

Kati ekifaananyi kitegeerekeka, kasita tutegeera amakulu ag'obubonero obwo. Setaani ne bamalayika be bwe baafiirwa ekifo kyabwe mu ggulu "baasuulibwa ku nsi." Yesu bwe yazaalibwa mu nsi eno Setaani yagezaako okutta Yesu, omwana ow'obulenzi, nga yakajja azaalibwe. Setaani yalemwa, era Yesu yatwalibwa mu ggulu eri entebe ya Katonda.

Sitaani n'atandika okuzikiriza ekkanisa y'Abakristayo Yesu gye yateekawo. Omutume Yokana, eyawandiika ekitabo kya Kubikkulirwa, yalaba ekifananyi eky'olutalo olunene wakati wa Kristo ne Sitaani nga lulwanibwa ku nsi eno. Ng'olutalo ku ntikko yaalwo, ku kukomererwa kwa Kristo, Yokana yawulira eddoboozi nga lifuluma mu ggulu nti:

"Kaakano Katonda waffe atulokodde. Alaze amaanyi ge, n'Obwakabaka bwe, n'obuyinza bwe, n'obuyinza bwa Kristo we kubanga oyo alonkoma baganda baffe, n'abaloopa emisana n'ekiro mu maaso ga Katonda waffe, agobeddwa mu ggulu." - Kubikkulirwa 12:10. (Gerageranya ne Yokana 12:31 ne Luka 10:18.)

Yesu yawangula Sitaani okuwangula kakuuse ku musaalaba. Era Yesu n'anyweeza obukakafu bw'enteekateeka "ey'obulokozi" era n'awa amaanyi olw'okuziyizanga obulimba bwa Sitaani. "Obwakabaka bwa Katonda" bwanywezebwa, "n'obuyinza" bwa Kristo okubeera Kabona waffe asinga obukulu era Kabaka waffe byakakasibwa.

"Kaakano obulokozi buzze" kirangirira nti ekikolwa eky'entikko eky'ebyafaayo kimaze okujja. Okuzaalibwa kwa Kristo, Omulokozi w'ensi, kumaze okubeerawo (Olunyiriri 5). Awamu n'okukemebwa ebikemo ebikambwe ebya Setaani, Yesu yalina obulamu obutaliiko kibi, yafa era n'azuukira ng'awangudde ekibi awamu n'okufa (Olunyiriri 10). Setaani yawangulwa emirembe gyonna (Olunyiriri 7-9). Omusaalaba gwazimbulukuka mu maanyi gaagwo amajjuvu.

Ekirangiriro kino nti "Kaakano obulokozi buzze" tekyasanyusa Yokana yekka naye kyasanyusa ne ggulu lyonna:

"Kale musanyuke mmwe eggulu n'abalirimu. Naye mmwe ensi n'ennyanja zibasanze! Kubanga Setaani asse gye muli ng'alina obusungu bungi, ng'amanyi nti alina akaseera katono." - Kubikkulirwa 12:12.

Eggulu lyonna lyajaguza olw'obuwanguzi bwa Yesu. Kristo yazikiriza okukaayana kwonna Sitaani kwe yandikaayanidde ekifo kyonna mu ggulu, era Sitaani ono eyawangulwa emirembe gyonna n'afiirwa okukaayana kw'akaayanira ensi yaffe eno.

3. EKKANISA Y'ABAKRISTAYO MU LUTALO NE SETAANI

Nga Yesu tannaba kulinnya mu ggulu yateekawo ekkanisa y'Abakristayo (eragiddwa mu kabonero ak'omukazi). Okufa kwa Yesu ku musaalaba kwawa amaanyi ekkanisa y'Abakristayo okuwangula Sitaani.

"Nabo (ekkanisa y'Abakristayo) baamuwangula olw'omusaayi gw'Omwana gw'Endiga, n'olw'ekigambo eky'okutegeeza kwabwe, ne batayagala bulamu bwabwe okutuusa okufa." - Kubikkulirwa 12:11.

Mu kiseera kino Kristo asobola okuwa amaanyi ge, ekkanisa ye ng'ebyo bye bibala ebyava mu kuwangula kwe. Ku musaalaba Kristo yawangulira ddala Setaani era mu kiseera kino yeeyongera okumuwangula okuyita mu kkanisa ye. Obubonero busatu obulaga ekkanisa empanguzi okuyita mu myaka egiyise egy'omulembe ogw'obukristayo.
(1) "NABO BAAMUWANGULA (SITAANI) OLW'OMUSAAYI GW'OMWANA GW'ENDIGA." Yesu yatwalibwa mu ggulu ku ntebe ya Katonda, bw'atyo asobole okukozesa omusaayi gwe ku bulamu bw'abagoberezi be. Yesu asobola okutunaazako ebibi byaffe, n'atulokola okuyita mu musaayi gwe ogwayiika (1 Yokana 1:7), era atuwa amaanyi aga buli lunaku okubeera n'obulamu obukristayo obulungi.
(2) "NE BAWAAYO OBULAMU BWABWE, N'OKUTUUKA NE KU KUFA." "Omusaayi gw'omwana gw'Endiga" gwa bawa obumalirivu okwewaayo okufa olw'omulimu gwa Kristo, "tebadduka kuva mu kufa." Olw'okubanga Katonda yabonaabona kinene, bwe kityo n'Abakristayo abajulizi nabo baali bamalirivu okubonaabona n'okufa. N'abaana nabo beewaayo. Olugero lwogera ku mukyala omuzadde Omukristayo eyasuulibwa mu kisaawe mu mpologoma mu Ruumi kubanga yagondera Kristo n'atagondera ggwanga. Omwana we omuwala omuto, mu kifo ky'okudduka entiisa yawulira obuzira okwewaayo n'ayingira mu nda. Empologoma bwe yalumba nnyina omuwala yayimirira n'agamba nti "Nange ndi Mukristayo." Abafuzi Abaruumi baamukwata naye ne bamusuula mu nsolo ezali zirumwa enjala.
(3) "NABO BAMUWANGULA (SETAANI) N'OLW'EKIGAMBO EKY'OKUTEGEEZA KWABWE." Si lwa bigambo bya mumwa bumwa naye olw'ebigambo eby'obujulirwa bwabwe - obujulirwa obw'obulamu bwabwe, obujulirwa obulaga amaanyi ga Yesu awamu n'ag'enjiri ye. Mu kiseera eky'ekizikiza ekyasingira ddala obubbi, eky'omu Mulembe ogw'obukristayo, - okuva ku mulembe ogwa bakitaffe abasooka, n'okutuuka ku Bazza b'Ekkanisa obuggya, eggye ly'Abakristayo - baawangula obulabe obubi Sitaani bwe yasobola okubateekako, okuyita mu bujulirwa obw'amaanyi obw'obulamu bwabwe.

Kubikkulirwa 12:11, akuba ekifaananyi ekkanisa empanguzi ng'ejjudde abawanguzi, ng'Abatume, Abajjulizi, Abazza b'Ekkanisa obuggya era n'Abakristayo abalala abeesigwa. Ekisa kyabwe, obwesigwa bwabwe, obuzira bwabwe era n'obuwanguzi bwabwe bibadde biwulikika mu byasa byonna eby'emyaka ne bukyusa ensi.

Okuva nga Sitaani bwe yalemererwa okuzikiriza Yesu bwe yali ng'ali ku nsi, mu kiseera kino anoonya okuzikiriza Kristo ali mu kkanisa ye.

"Ogusota bwe gwalaba nga gusuuliddwa ku nsi, ne guyigganya omukazi eyazaala (omwana) ow'obulenzi. Omukazi n'aweebwa ebiwawaatiro bibiri eby'empungu ennene, alyoke abuuke okutuuka mu ddungu mu kifo kye, gy'alisizibwa ekiseera n'ebiseera n'ekitundu eky'ekiseera, mu maaso g'ogusota. N'ogusota ne guwandula mu kamwa kaagwo ennyuma w'omukazi amazzi ag'omugga, gulyoke gumutwaze omugga. Ensi n'ebeera omukazi, ensi n'eyasamya akamwa kaayo, n'enywa omugga ogusota gwe gwawandula mu kamwa kaagwo." - Kubikkulirwa 12:13-16.

Mu butuufu ddala nga bwe kyalangibwa, mu kiseera eky'ekizikiza (Dark Ages) eky'omulembe Omukristayo, Sitaani yaweereza "omugga" ogw'okuyiganyizibwa okujjawo ekkanisa okugitwaza "amazzi ag'omugga." Sitaani ayagala okuzikiriza ettutumu lya Kristo olw'okusaanyawo ekkanisa ye era akozesa obutego bwonna amagezi ge amabi gasobole okukola. Ogusota gutegeeza Sitaani. Naye tukirabye nti Sitaani ku mulimu gwe akozesa ebitongole eby'abantu okulumba abantu ba Katonda. Yakozesa Kabaka omuruumi Kerode okugezaako okutta omwana Yesu amangu ago nga yakajja azalibwe. Sitaani yakola ng'ayita mu mpaka ez'obuggya eza bannaddiini okulemesa era n'okuteganya omulokozi, n'ekyenkomerero n'okumusalira omusango, ogw'okukomererwa ku musaalaba. Naye obwalabika ng'obuwanguzi bwa Sitaani bwavaamu obuwanguzi obusingira ddala obukulu obwa Kristo.

Ng'ajjudde obusungu olw'okuwangulwa kwe ku musaalaba, Sitaani obusungu bwe yabukyusiza eri ekkanisa eyo Kristo gye yatekawo. Mu makumi g'emyaka egyaddirira okukomererwa kwa Kristo, enkumi n'enkumi z'abantu baafiira mu bisaawe ebinene eby'emizannyo eby'e Ruuma; mu bifo ebigazi, mu makkati g'ebibuga ebinene, mu makomera, era ne mu bifo ebyekwekeebwamu eby'omu malungu.

Ku luberyeberye obufuzi obw'ensi bwe bwatandikiriza okuyigganya kuno, naye nga Abatume bamaze okufa, obukyufu obw'ekimpowooze bwasensera mu kkanisa. Mu kyasa eky'okubiri, eky'okusatu n'ekyokuna, abantu bangi abaali mu kkanisa baatandika okukyusa mu mazima ga Kristo n'Abatume be ge baayigiriza. Abakulembeze abamu abakyamu batandika n'okuyigganya Abakristayo abo abaguggubira ku bulungi eby'enzikiriza ez'Endagaano Empya.

Abayizi b'ebyafaayo bateebereza nti abantu abeesigwa abawera obukadde 50 baazikirizibwa. Mu kufuba kwe okunnyika ekkanisa n'okugizikiriza Setaani yaweereza "omugga" ogw'okugiyigganya alyoke agitwaze omugga. Naye ensi n'eyamba omukazi… "n'enywa omugga" ogw'okuyigganyizibwa era n'ogwenjigiriza enkyamu.

Mu kiseera ky'okuyigganyizibwa eky'emyaka egy'omu massekkaati (1100-1500) ekkanisa ey'amazima yabula okuva ku bakulembeze abawaba era ne yeekweka "mu ddungu mu kifo kye ekyateekebwateekebwa Katonda balyoke bamulisizenga eyo ennaku lukumi mu bibiri mu nkaga" (Olunyiri 6). Obunnabbi bwo bwatuukirira mu kiseera eky'emyaka 1260 egy'okuyigganyizibwa egyatandika nga AD 538 okutuusa 1798. (Olunaku olumu lutegeeza omwaka gumu mu bunnabbi bwa Bayibuli. Soma Ezek. 4:6).

Mu byasa by'emyaka gino eby'ekizikiza, Abakristayo abakkiriza mu Bayibuli baanoonyanga obuddukiro buli gye baali basobola okubusanga; eky'okulabirako, ebiwonvu bya Waldensian mu buggwanjuba bwa Italy ne mu buvanjuba bwa Bufransa, ne mu kkanisa ya Celtic eya British Isles.

4. EKKANISA YA KATONDA MU KISEERA KYAFFE

Kino kitutuusa mu kiseera kyaffe kino kyetulimu. Eky'ekkanisa ya Kristo ey'amazima okuva mu mwaka 1798. Nga bwe kiteekwa okusuubirwa, ogusota gukyalina obusungu eri abantu ba Katonda, olutalo olunene olutalabika lukyagenda mu maaso. Mu butuufu Setaani ajja kukola olulumba olusingira ddala obunene eri ekkanisa nga Kristo anatera okudda.

"Ogusota (ye Setaani) ne gusunguwalira omukazi (ekkanisa ya Katonda) ne gugenda okulwana n'abomu zzadde lye abasigalawo abo abakwata ebiragiro bya Katonda, era abalina okutegeeza kwa Yesu." - Kubikkulirwa 12:17.

Obunnabbi buno bwogera ku kiseera kyaffe. Setaani anyiize; alwana entalo n'abaasigalawo ab'omu zzadde ly'omukazi - Abantu ba Katonda ab'omu kiseera kino, nsaba weetegereze obubonero bwabwe obubaawula:

(1) ABAKKIRIZA BANO AB'OMU NNAKU EZ'ENKOMERERO "BANYWERERA KU KUTEGEEZA KWA YESU." N'obwesigwa banywerera ku njigiriza entuufu ey'ekigambo kya Katonda, bawa obujulirwa ku lwa Yesu okuyita mu maanyi ag'obulamu obw'Obukristayo.
(2) ABAKRISTAYO BANO AB'OMU KISEERA EKY'ENKOMERERO BANTU ABALINA OBUNNABBI. Olw'okufuna Omwoyo ogw'obunnabbi Yokana yasobola okuwandiika ekitabo kya Kubikkulirwa (Kubikkulilrwa 1:1-3). Ekibiina eky'enkomerero eky'abakkiriza bafuna ekirabo kyekimu: obujjulirwa obw'obunnabbi obuva obutereevu eri Katonda okuyita mu mubaka ali ku nsi. Ekirabo kyabwe eky'obunnabbi kyogera ku kubikkulwa kwa Katonda okw'omulimu gwabwe era ne ku nkomerero yabwe ey'oluvannyuma.
(3) ABAKRISTAYO BANO AB'OMUNNAKU EZ'ENKOMERERO ERA BALINA AKABONERO AKABAWULA "NGA NABO BEEBO ABAKUUMA AMATEEKA GA KATONDA." Tebalwanirira bulwanirizi bwesigwa bwa mateeka ga Katonda, naye era bagagondera. Okwagala kwa Katonda nga kuli mu mitima gyabwe kuvaamu essanyu ery'obuwulize (Abaruumi 5:5; 13:8-10).

Abakristayo bano ab'omu nnaku ez'enkomerero bagoberera eky'okulabirako kya Kristo era n'eky'ekkanisa eyasooka eky'okugondera amateeka ga Katonda. Kino kyekiviiramu ddala ogusota okubakyawa - Setaani okubakyawa. Setaani alwanyisa abaasigalawo: ab'omu zadde ly'omukazi, kubanga bawa obujjulirwa obulaga nti okwagala kwa Katonda kuvaamu Abatume abamugondera. Nga Yesu bw'atulagira nti:

"Obanga munjagala munaakwatanga ebiragiro byange." - Yokana 14:15.

Obulamu obw'abakristayo ab'omu nnaku ez'enkomerero bulaga nti kisoboka okwagala Katonda mu mitima, n'okwagala bantu bannaffe nga bwe beeyagala bokka. Okusinziira ku Yesu, empisa zino, okwagala Katonda awamu n'okwagala abantu abalala Amateeka ga Katonda ekkumi mwegasinziira (Matayo 22:35-40).

Etteeka ery'okuna ku mateeka ga Katonda litusaba okukuuma Saturday, olunaku olw'omusanvu mu wiiki, nga ye Ssabbiiti. Okuva ng'okwagala kwa Yesu bwe kwayingiza amateeka gonna ekkumi mu mitima gyabwe, Abakristayo bano ab'omu nnaku ez'enkomerero bakuumi ba Ssabbiiti.

Ssabbiiti eri mu mutima gw'obubaka bwa Katonda obukomererayo eri abantu be obuli mu Kubikkulirwa, mu ssuula eye 12 ne mu 14:6-15. Obugagga bwonna obw'eggulu buteekeddwatekeddwa Abakristayo ab'omu nnaku ez'enkomerero bunnyonnyolebwa mu ssuula ezo waggulu. Omulokozi omulamu ye mukwano gwabwe owa buli kiseera, era Omwoyo Omutukuvu akola "okubazzaamu amaanyi mu muntu ow'omu nda." Ekisuubizo kikakafu nti: Bagenda kuwangula Setaani olw'omusaayi ogw'omwana gw'endiga n'olwekigambo eky'okutegeeza kwabwe (Kubikkulirwa 12:11).

Naawe oyagala okubeera omu ku Bakristayo bano ab'omu nnaku ez'enkomerero, "abagondera Amateeka ga Katonda: era abalina obujjulirwa bwa Yesu" Lwaki naawe mu kiseera kino kyennyini tomalirira?