GEYEENA KYEKI? ERA ERI LUDDA WA?

Omuyizi w'essomero omu awatali kufaayo yayingira mu ssomero n'akuba amasasi era n'atta bayizi banne bangi be yali asoma nabo. Ng'ajjukidde obusungu omusajja eyali agobeddwa okuva ku mulimu, yayingira mu kifo kye yali akoleramu n'akuba emmundu mukama we eyali abakulira ku mulimu. Omukyala omuzadde yateeka abaana be babiri mu motoka n'agisindika mu nnyanja n'esaanawo.

Abantu nkumi na nkumi abattibwa mu mikolo egy'okulongoosa egy'ebika ku nsi. Ensonga ettisa abantu bano z'entalo ez'edda ezimaze emyaka n'ebisiibo ez'enjawukana wakati w'amawanga. Abasajja, n'abakyala awamu n'abaana n'amabuje battibwa, basalibwamu, bakubibwa era ne basobezebwako olw'empaka.

Okubonereza abantu ng'obawa ekibonerezo eky'okufa olw'emisango gino egy'ekikafiiri, egy'okutugumbula abantu, abantu bangi bakivumirira. Abantu bangi abawakanya ekibonereza eky'okuttibwa boogerera waggulu nga bakiyita ekikolwa ekitali kya buntu, "omukolo ogw'ekikafiiri." Beebuuza nti abantu bano abatta abantu baba bassusse okulokolebwa?

Nkola ki ey'obuntu esingira ddala obulungi ey'okutta abasingiddwa emisango egy'obutemu? Kutuula ku ntebbe ey'amasannyalaze? Abantu abamu balowooza nti okumuyingiza akaayiso akalimu eddagala ery'obutwa ke kataluma nnyo. Abalala bagamba nti omuntu afa mangu nnyo bw'omutuga obutuzi.

Naye mu kukubaganya ebirowoozo kuno kwonna okw'okusaasira ku kibonerezo eky'okufa, naye waliwo okubonaabona okulala okusigaddewo okutafiibwako muntu yenna. Tewali n'omu awa ekirowoozo nti abatemu abo, abatta obulamu bwa bannabwe mu bukambwe bateekwa nabo babonyaabonyezebwe mu bulumi nga bookebwa n'omuliro okutuusa okufa. Tewali n'omu aleeta ekirowoozo nti omutemu ateekwa ayokebwe mpola okutuusa okufa.

Naye abakristayo abeesigwa bangi bagamba nti Kitaffe ow'omu ggulu ajja kukola n'ekisinga ekyo obubi. Bagamba nti; aboonoonyi bateekwa okubonyaabonyezebwa, basobole okusasula ebibi byabwe.
Ekirala ekisingako awo, balaga ekifaanayi eky'ekifo Katonda w'asalira omusango okuba ekifo eky'okubonyaabonya okutakoma.

Bwe kiba bwe kityo olwo bwenkanya ki Katonda bwalina eri ababi? Omusango gw'okufa kwabwe kuyingira kutya mu butuukirivu ne mu kwagala kwa Katonda? Leka tunoonye eky'okuddamu mu Bayibuli:

1. ENNAKU YA YESU ESEMBAYO ESINGIRA DDALA OBUBI

Okumala emyaka nga 6,000, Katonda abadde nga yeegayirira abasajja n'abakazi nti:

"Nga bwe ndi omulamu, bw'ayogera MUKAMA Katonda, sirina ssanyu lye nsanyukira okufa kw'omubi; wabula omubi akyuke ave mu kkubo lye abeere omulamu." - Ezeekyeri 33:11.

Omusaalaba gwa Yesu gwalaga okwagala bwe kwenkana Katonda ky'ayagala okulokola omuntu. Yesu bwe yakaabira ku musaalaba nti:

"Kitange, basonyiwe; kubanga tebamanyi kye bakola," 'abikkula obulumi obwali mu mutima gwe (Luka 23:34). Ekyaddirira mu bwangu ddala, n'afa era abantu abamu bakkiriza nti, yakutuka omutima n'afa (Yokana 19:30,34).

Naye awamu n'okulaga okwagala kwa Katonda kuno okw'amaanyi abantu tebagenda kukyukira Yesu. Ekiseera ekibi kye kinamala nga kifuga ensi eno gye kinaakoma, okugenda nga kyongera ku nnaku y'omuntu. N'olwekyo ekibi kiteekwa okuzikirizibwa. Katonda ateekateeka atya okukomya ekibi?

"Naye olunaku lwa Mukama waffe lulijja nga mubbi; eggulu lwe lirivaawo n'olw'okuwuuma okunene n'ebintu eby'obuwangwa birisaanuuka olw'okwokebwa okungi, N'ENSI N'EBIKOLWA EBIGIRIMU BIRISIRIKKA." - 2 Petero 3:10.

Eky'enkomerero, Katonda ateekwa okulongoosa ensi yonna okugiggya mu bubi era ekibi akikomye. Abantu abo abeesibye ku kibi, ekirivaamu bagenda kuzikirizibwa n'omuliro ogwo ogwateekerwateekerwa okwokya Setaani ne bamalayika be n'ekibi okukiggya ku nsi eno. Nga kiriba kiseera kya bulumi eri Yesu okulaba ng'omuliro gwokya abantu abo be yajja okufiirira abalokole.

2. GEYEENA ERYAKIRA LUDDAWA ERA MU KISEERA KI?

Kino kikonagana n'endowooza eri mu bantu abamu, abagamba nti mu kiseera kino Katonda alina ekifo ekiyitibwa Geyeena ekyaka omuliro abantu aboonoonyi gye bagenda nga bamaze okufa. Geyeena egenda kubeerawo ensi eno bw'erifuulibwa ennyanja ey'omuliro. Katonda akyalinze okuwa abantu ababi ekibonerezo okutuusa ku lunaku olw'omusango ogw'enkomerero ogugenda okubeerawo ku nkomerero y'emyaka 1,000 (Kubikkulirwa 20:9-15).

"Mukama waffe amaanyi okulokola abatya Katonda mu kukemebwa, n'okukuuma abatali batuukirivu okutuusa KU LUNAKU OLW'OKUSALIRWAKO omusango, babonerezebwa." - 2 Petero 2:9.

Mu kiseera ky'ekimu alirongoosa ensi yaffe eno n'omuliro ogulongoosa.

"Eggulu n'ensi ebiriwo kaakano, bikuumibwa okutuusa ku LUNAKU OLW'OKUSALA OMUSANGO N'OKUZIKIRIZA kw'abantu abatatya Katonda." - 2 Petero 3:7.

Katonda tateekerateekeranga muntu yenna okukkomekereza obulamu bwe mu nnyanja ey'omuliro. Naye abantu bwe bagaana okwawuukana ne Setaani era ne beenywereza ku bibi byabwe, eky'enkomerero bateekwa okufuna ekyo ekiriva mu kulondawo kwabwe.

"Awo aligamba n'abo abali ku mukono gwe ogwa kkono nti: muve wo wendi mmwe abaakolimirwa mugende mu muliro ogutaggwaawo OGWATEEKERWATEEKERWA SETAANI NE BAMALAYIKA BE." - Matayo 25:41.

Okusinziira ku njigiriza ya Yesu Geyeena eribaawo ddi?

"Kale ng'engano ey'omu nsiko bw'ekung'anyizibwa bw'eyookebwa mu muliro; bwe kityo bwe kiriba KU NKOMERERO Y'ENSI. Omwana w'omuntu alituma bamalayika be, nabo BALIGGYAMU mu bwakabaka bwe EBINTU BYONNA EBISITTAZA N'ABO ABAKOLA OBUBI, BALIBASUULA MU KIKOOMI EKY'O MULIRO: mwe muliba okukaaba amaziga n'okuluma obujiji." - Matayo 13:40-42.

Eng'ano ey'omu nsiko, abakozi b'obubi, tebagenda kwokebwa okutuusa ng'enkomerero y'ensi emaze okutuuka. Ng'omusango guno tegunaba kusalibwa, ensi yonna, n'eggulu biteekwa okumala okukakasibwa nti Katonda yali mwenkanya mu nkolagana ye na buli muntu. Nga bwe kinnyonnyolwa mu Mulagirizi No. 22, olutalo olunene wakati wa Kristo ne Setaani. Setaani abadde agezako okukakasa eggulu lyonna n'ensi yonna nti ekkubo ery'ekibi ly'ekkubo erisingiko obulungi; nga ne Yesu abadde akiraga nti ekkubo ery'obuwuulize ky'ekisumuluzo ekituusa ku bulamu obumatiza.

Ku nkomerero y'emyaka 1,000, okulaga kuno kugenda kukomekkerezebwa mu kusala omusango gwa Setaani, ne bamalayika be, gattako n'abantu aboonoonyi. Ng'ebitabo bimaze okubikkulibwa ebiraga ekitundu buli muntu kye yakola mu muzannyo guno omunene, Katonda agenda kusuula Setaani, okufa, amagombe, awamu n'abo bonna "amannya gaabwe agatasangibwa nga gawandiikiddwa mu kitabo eky'obulamu… mu nnyanja ey'omuliro" (Kubikkulirwa 20:14-15). Okusinziira ku lunyiriri oluddirira olwa Kubikkulirwa 21:1, nga Katonda amaze okulongoosa ensi okuva mu kibi n'omuliro, agenda kutonda "eggulu eriggya n'ensi empya."

3. GEYEENA EGENDA KUMALA KISEERA KI NG'EYAKA?

Abakkiriza bangi abalina ekirowoozo ekigamba nti omuliro gwa Geyeena gwa kubeerawo emirembe gyonna, era ne guvaamu okubonaabona okw'emirembe gyonna. Leka tutunuulire n'obwegendereza ku kyawandiikibwa ekinnyonnyola engeri Katonda gy'ayisaamu ekibi n'aboonoonyi:

"Ng'awalana eggwanga abatamanyi Katonda, n'abo abatagondera njiri ya Mukama waffe Yesu, ABALIBONEREZEBWA, KWE KUZIKIRIRA EMIREMBE N'EMIREMBE okuva mu maaso ga Mukama waffe ne mu kitiibwa ky'amaanyi ge." - 2 Abasessalonika 1:8,9.

Nsaba weetegereze ekigambo "okuzikirira okw'emirembe n'emirembe." Amakulu gaakyo si ge gamu n'ekigambo "okubonabona okw'emirembe gyonna." Mu bwangu, kino kitegeeza ekikolwa eky'okuzikiriza kwakyo kwa mirembe n'amirembe. Ekikolwa kya kufa mirembe gyonna, Petero yayogera ku lunaku olw'omusango "n'okuzikirira kw'abantu abatatya Katonda" (2 Petero 3:7).

Okusinziira ku Yesu, "Omwoyo n'omubiri, byombi byakuzikirizibwa mu Geyeena" (Matayo 10:28). Mu kubuulira kwe Yesu ku lusozi, yayogera ku mulyango omufunda "ogutwala abantu mu bulamu," era ne ku kkubo eggazi "eritwala abantu mu kuzikirira" (Mataayo 7:13,14). Mu Yokana 3:16, Yesu annyonnyola nti Katonda "yawaayo omwana we omu yekka," abo abamukkiriza baleme "okubula, naye babeere n'obulamu obutaggwaawo." Yesu atulaga enkomerero za mirundi ebiri, obulamu obutaggwaawo oba okuzikirira - so si okwokebwa emirembe gyonna. Tusobola okukubira nti Geyeena erivaako okufa era n'okuzikirira kw'ababi eriko ekikomo.
Okuyita mu byawandiikibwa byonna mulimu obubaka obutegeerekeka obulungi obututegeeza nti ababi balizikirizibwa.

"Naye ezzadde ly'omubi lirizikirizibwa" (Zabbuli 37:28), "Balizikirizibwa" (2 Petero 2:12), "Baribula; balibulira ddala mu mukka" (Zabuli 37:20). Omuliro gugenda kubafuula vvu (Malaki 4:1-3). "Empeera y'ekibi kwe kufa," so si bulamu obutaggwaawo mu muliro gwa Geyeena; so nga "ekirabo kya Katonda bwe bulamu obutaggwaawo" (Abaruumi 6:23).

Ekigendererwa ky'ekibonerezo ekisembayo mu muliro gwa Geyeena kwe kuggyawo ekibi mu ggulu lyonna n'ensi, so si kukuuma kibi emirembe gyonna. Kizibu ddala okuteebereza nti Kristo oyo y'omu yakaabira okufa kwa Yerusaalemu eyali ey'omutawaana era n'asonyiwa abo abaamukomerera okutuusa okufa, yandisobodde okumala ekiseera kye eky'emirembe n'emirembe ng'atunuulira okubonaabona kw'abantu abazikirizibwa.

Geyeena awatali kubuusabuusa aliko enkomerero. Ku nkomerero y'emyaka 1,000, Katonda agenda kutonyesa omuliro okuva mu bire, era aggyewo Setaani, ne bamalayika be, era n'abantu ababi abaguggubira mu bibi byabwe. "Omuliro" ne guva "mu ggulu okukka wansi ne gubazikiriza" (Kubikkulirwa 20:9).

Okusinziira ku njigiriza ya Yesu, omuliro guno "teguzikira" (Matayo 3:12). Tewali muntu muzikiriza wa muliro alisobola okuguggyawo okutuusa nga gumaze okukola omulimu gwagwo ogw'okuzikiriza.

Katonda asuubiza nti; okuva mu muliro guno ogulongoosa, agenda "kutonda ensi empya" omwo, "emitawaana egy'oluberyeberye tegirijjukirwa era nga gyerabiddwa" era nga "so n'eddoboozi ery'okukaaba nga terikyawulirwa omwo" (Isaaya 65:16-19).

Ng'olunaku luno luliba lwa kitalo nnyo! Buli kintu kyonna ekireeta okweralikirira kigenda kuvaawo. Katonda aliggyawo ebiwundu eby'ekibi okuva mu mutima era olwo essanyu lyaffe liriba lijjuvu.

4. EKIGAMBO "EMIREMBE N'EMIREMBE" MU BYAWANDIIKIBWA EBITUKUVU

Mu Matayo 25:41 Yesu ayogera ku "muliro ogutaggwaawo ogwateekerwateekerwa Setani ne bamalayika be." Ekigambo "ogutaggwaawo" wano kitegeeza nti Geyeena ya mirembe ne mirembe? Yuda 7 alaga Sodoma ne Gomola "nga byateekebwawo okuba eky'okulabirako, nga bibonerezebwa n'omusango ogw'omuliro ogutaggwaawo." Kitegeerekeka bulungi nti ebibuga ebyo tebikyayaka mu kiseera kino. Naye omuliro ogwabyokya GWALI ogutaggwaawo ekitegeeza nti ekyava mu muliro ogwo kyali ekikolwa eky'enkomeredde.

Mu 2 Petero 2:6, omulundi omulala, nga tuddamu okusoma ku muliro ogutaggwaawo. Naye mu kyawandiikibwa kino nate kiraga bulungi nti Katonda "bwe yasirissa ekibuga Sodomu ne Gomola n'abisalira omusango ng'abizikiriza ng'assaawo eky'okulabirako eri abo abagenda obutatya Katonda." Abantu abatatya Katonda ab'omu Sodoma ne Gomola tebakyali mu bulumi, baafuuka dda vvu ebbanga ddene eriyisewo. Naye era omuliro ogwo ogwabookya gwali "ogutaggwaawo" nga kitegeeza nti ekikolwa ekyavaamu - kyali okuzikirira okutagenda kuvaawo.

Olw'okubanga ekitabo kya Kubikkulirwa kikozesa olulimi olutegeerekeka olw'obubonero, ebitundu byakyo ebimu tebitegeerwa bulungi. Eky'okulabirako: Kubikkulirwa 14:11, kyogera ku bantu abagenda okuzikirizibwa nti: "N'omukka ogw'okubonyaabonyezebwa kwabwe gunyooka emirembe n'emirembe." Kino kiwulikikanga okubonaabona okutakoma. Naye era ka tuleke Ebyawandiikibwa binnyonnyole byawandiikibwa binnabyo.

Kuva 21:6, Kyogera ku muddu okuwummulibwa okutu ng'akabonero akalaga nti yalina okuweereza Mukama we "emirembe n'emirembe." Mu nsonga eno, "emirembe n'emirembe," kiba kitegeeza ekiseera eky'omuddu eky'omu maaso ky'anaawangaala. Yona, eyamala ennaku essatu zokka, n'ebiro bisatu mu lubuto lwa lukwata (Matayo 12:40) kimwogerwako nti yalubeeramu "emirembe gyonna" (Yona 2:6). Tewali kubuusabuusa ennaku esatu ze yamala mu kizikiza eky'olubuto lw'eky'ennyanja kyamufaananira nga emirembe gyonna.

N'olw'ekyo tuteekwa okubeera abeegendereza engeri ebyawandiikibwa ebitukuvu gye bikozesa olulimi olw'obubonero era n'olw'ebitontome. Omukka ogunyooka emirembe gyonna okuva mu nnyanja ey'omuliro y'engeri etegeerekeka okunnyonnyola okuzikirira okw'emirembe gyonna. Kubikkulirwa 21:8, kitutegeeza bulungi nti ennyanja eyaka n'omuliro n'ekibiriti "kwe kufa okw'okubiri." Geyeena aliko enkomerero ye. Abantu ababi ba kwokeebwa; era bazikirizibwe.

5. LWAKI WATEEKWA OKUBEERAWO GEYEENA

Ku luberyeberye Katonda yatonda ensi nga etuukiridde. Naye ekibi bwe kyayingira ne kireeta okuzikiriza, okuvunda awamu n'okufa. Singa olw'eggulo olumu okomawo awaka n'osanga nga ennyumba yo bagibbye era ng'eyonooneddwa, nawe onogireka ng'efaanana bw'etyo emirembe gyonna? Mu butuufu si bwe wandikoze. Wandijeeze n'oggyawo obujama n'ebisasiro, n'oginaaza yonna era n'ossuula ebweru ebintu byonna bye baayoonoonye. Ne Katonda ajja kukola ekintu kyekimu. Ajja kukola ku bubi bwonna era n'obwonoonefu bwonna obw'ekibi omulundi gumu, era atonde ensi empya mu kifo ky'enkadde.

Ekigendererwa kya Katonda okulongoosa ensi eno n'omuliro, kwe kuteekateeka ekkubo ery'ensi etuukiridde eyo abatukuvu mwe banaabeera.
Naye Katonda alina obuzibu bungi, kubanga ekibi tekyayonoona nsi yokka, naye kyayonoona n'abantu bennyini. Ekibi kyayonoona enkolagana yaffe ne Katonda ate era n'eri bantu banaffe. Olulyo lw'omuntu lugenda mu maaso n'endwadde ey'okwonoona abaana abato, obutemu, okuyita obukunya awamu n'endwadde endala nnyingi ez'Omwoyo. Katonda ateekwa olunaku olumu okuzikiriza ekibi; kubanga ekibi kyonoona abantu. Obuzibu bwa Katonda buli nti: asobola atya okuggyawo endwadde enzibu ey'ekibi okuva mu nsi ate n'atazikiriza bantu bonna abayonoonebwa ekibi? Okumalawo omutawaana guno ye kwe kuteeka endwadde ey'ekibi ku mubiri gwe; n'akkiriza obulwadde obw'ekibi okumuzikiriza ye ku musaalaba. Nga n'ebyavaamu bye bino:

"Bwe twatula ebibi byaffe ye wa mazima era mutuukirivu okutusonyiwa ebibi byaffe, N'OKUTUNAAZAKO BYONNA EBITALI BYA BUTUUKIRIVU." - 1 Yokana 1:9.

Omutawaana ogw'okumalawo ekibi, ekyo Katonda agaba kya bwerere eri abantu bonna. Naye ekinakuwaza kye kino abantu bakyekutte ku ndwadde ey'ekibi. Era Katonda tagenda kuwaliriza muntu yenna okulonda ekkubo lye ery'obulamu obutaggwaawo. Abo abagaana ekkubo lye ery'obulamu ery'okumalawo omutawaana gw'ekibi, eky'enkomerero bagenda kuzikirizibwa ne ndwadde eyo. Ensonga ey'amazima ebeezesawo Geyeena y'eno nti:

"Kubanga bwe nnayita temwayitaba, bwe nnayogera temwawulira; naye ne mukola ekyali ekibi mu maaso gange ne mulonda ekyo kyesasanyukira." - Isaaya 65:12.

Abo aboonoonyi abalondawo okwejja ku Yesu, bagenda kukizuula nti eky'okukola kyokka ekirala kye balina kwe kufa.

6. OKUZIKIRIRA KIRIKUFIIRIZA KI?

Newankubadde ng'ebyawandiikibwa tebiyigiriza nti omuliro gwa Geyeena guvaamu okubonaabona okutakoma. Naye bituwa ekifaananyi nti kintu kya ntiisa okuzikirira. Aboonoonyi bagenda kufiirwa obulamu obutaggwaawo. Nga kiriba kigambo kya ntiisa ya kitalo, okukitegeera nti essanyu ery'obulamu obutaggwaawo nga bali wamu ne Katonda bibavudde mu ngalo era nti tebagenda kuddayo kufuna essanyu ery'okwagala okw'oluganda okutuukiridde okuyita mu myaka, emirembe gyonna.

Kristo bwe yali awanikiddwa ku musaalaba ng'ebibi by'ensi bimwawudde ne Kitaawe, yawulira obulumi obw'okubula emirembe n'emirembe. Ng'aboonoonyi batunuulidde ekizikiza ekikutte ekiri ku mitwe gyabwe nga balaba kuzikirira kwerere okw'emirembe gyonna. Bateekwa okufa nga tebalina ssuubi ery'okuzuukira okw'okubiri. Ate mu kiseera kyekimu ne balaba engeri gye baasindikanga eri Kristo, buli kaseera bwe yasemberanga gye bali okubalaga okwagala kwe. N'ekyenkomerero ne bafukamira ku mavviivi gaabwe era ne bakakasa obwenkanya n'okwagala kwe (Abafiripi 2:10,11).

Tekyewuunyisa abawandiisi ba Bayibuli batukubiriza okwanguwa okulonda Kristo era n'okumukaayanira: Agamba bwati:

"Tubeegayirira muleme okugayaalirira kisa. Katonda kye yabakwatirwa. Kubanga agamba nti: 'Nakuwuliriza mu kiseera eky'okusaasirirwamu, ne nkuyamba ku lunaku olw'okulokokerako.' Laba kaakano ky'ekiseera eky'okusaasirirwa mu, era lwe lunaku olw'okulokolorako." - 2 Ab'ekkolinso 6:1-2.

Ndowooza nti teri mutawaana ogusinga obunene omuntu okwonoona ssaddaaka ya Yesu etegula sente, olw'okulondawo okuzikirira. Ebintu ebibiri ebituli mu maaso gaffe eby'enjawulo bitegerekeka bulungi: Okuzikirira okw'emirembe gyonna - emyaka egy'emirembe gyonna ng'oggyiddwa mu maaso ga Katonda, oba omukwano ogw'emirembe gyonna awamu ne Kristo, omukwano ogwo ogumatiza okwegomba kwaffe kwonna okugenda ewala. Ggwe weerondeddewo ki? Lwaki olwa leero tozuula nkomerero y'obulamu bwo mu Kristo?