OKUYINGIRA MU OBULAMU OBUKRISTAYO

Ebbaluwa eno esanyusa eva mu omu ku babaka baffe ab'essomero lya Bayibuli mu Africa:

"Emyaka etaano egiyise nafuna ebbaluwa okuva mu EDDOBOOZI LY'OBUNNABBI, ng'ensaba okukyalira omusibe eyali omuyizi w'essomero lya Bayibuli. Okusaba kuno bwe nnakulaga eri ab'obuyinza abaali bafuga ekkomera, bankwatirwa ekisa ne banzikiriza. Olw'okubanga omuyizi oyo yali yeetaaga nnyo okuyiga Bayibuli; nnamukyaliranga buli kaseera.

Nga wayiseewo emyezi mukaaga okuva ku kukyala kwange okwasooka, omuyizi yansaba okubatizibwa, era yeegatta ku kkanisa. Ab'obuyinza bakkiriza okutuwa ebintu eby'okukozesa olw'okubatiza omuntu mu kkomera. Abakuumi b'ekkomera awamu n'abasibe abalala baakung'ana, okulaba omukolo ogw'okubatiza ogukyasingidde ddala okuba ogw'ekitalo gyendi.

Mangu ddala nga kino kimaze okubaawo owooluganda oyo yateebwa okuva mu kkomera newankubadde nga yali akyalina yo ekiseera kiwanvu kye yali ateekwa okubeera nga musibe mu kkomera. Bwe nnabuuza ensonga lwaki, yateebwa nnategezebwa nti obulamu bwe bwali bukyukidde ddala kinene, era bwali obujulirwa eri omulokozi n'eri eddiini ye bw'atyo n'aba nga takyasaana kulowoozebwa, wadde okuyisibwa ng'omusibe. Omusajja ono yaddayo eka ne yeegatta n'abantu ab'omu maka ge, era kati y'omu ku bakulambeze mu kkanisa yaffe emu ennene mu Africa."

1. AMAKULU G'OKUBATIZIBWA KYE KI?

Omusajja ono omusibe bwe yafuuka omukristayo obulamu bwe ne bukyukira ddala, lwaki kyali kikulu era nga kimwetaagisa okubatizibwa? Ng'ali mu mboozi ne Nikoddeemu omukulembeze w'abantu, eyajja eri Yesu ekiro, Yesu yatangaaza obukulu n'amakulu agali mu kubatizibwa:

"Omuntu bw'atazaalibwa mulundi gwa kubiri tayinza kulaba bwakabaka bwa Katonda… Omuntu bw'atazaalibwa mazzi na Mwoyo Omutukuvu, tayinza kuyingira bwakabaka bwa Katonda." - Yokana 3:3,5.

Okusinziira ku kuyigiriza kwa Yesu tuteekwa okuzaalibwa "amazzi n'oMwoyo Omutukuvu." Okuzaalibwa Omwoyo kitegeeza okuyingira obulamu obuggya olw'okukyusibwa ebirowoozo n'omutima. Olw'okubanga okuyingira obwakabaka bwa Katonda kyetagiisa obulamu obuggya, so si kuddabiriza obulamu obukadde, ekyo kiyitibwa okuzaalibwa obuggya. Okubatizibwa n'amazzi ke kabonero ak'okungulu akalaga okukyuka okw'omu nda. Omubaka waffe yabatiza omusibe nga ke kabonero akakasa okwewaayo kwe eri Kristo era akabonero ak'obukyufu mu mpisa ze.

2. LWAKI NTEEKWA OKUBATIZIBWA?

Obulokozi bwaffe bwetoloorera ku bikolwa bisatu ebikulu ebya Kristo:

"KRISTO YAFA olw'ebibi byaffe, ng'ebyawandiikibwa bwe bigamba, era nti YAZIIKIBWA, N'AZUUKIRA ku lunaku olw'okusatu ng'ebyawandiikibwa bwe bigamba." - 1 Bakolinso 15:3,4.

Kristo yasobozesa obulokozi okubeerawo okuyita mu KUFA KWE, mu KUZIIKIBWA kwe ne mu KUZUUKIRA KWE.

"Oba temumanyi nga ffe ffena, abaabatizibwa okuyingira mu Kristo Yesu, nga TWABATIZIBWA KUYINGIRA MU KUFA KWE? Kyetwava TUZIIKIBWA AWAMU NAYE MU KUBATIZIBWA okuyingira mu kufa: NGA KRISTO BWE YAZUUKIZIBWA MU BAFU olw'ekitiibwa kya KITAAWE, BWE TUTYO NAFFE TUTAMBULIRENGA MU BULAMU OBUGGYA." - Abaruumi 6:3,4.

Kristo yafa olw'ebibi byaffe, yaziikibwa, ate n'azuukira okuva mu ntaana olw'okutuwa obulamu obuggya obw'obutuukirivu. Naffe bwe tubatizibwa tuyingira mu kufa kwe, mu kuziikibwa kwe, ne mu kuzuukira kwe. Okubatiza kitegeeza nti twafa mu bibi byaffe awamu ne Kristo, ne tuziika obulamu bwaffe obw'edda obw'ekibi awamu ne Kristo, era ne tuzuukira eri "obulamu obuggya" mu Kristo. Okufa kwa Kristo era n'okuzuukira kwe, bifuuka okufa kwaffe awamu n'okuzuukira kwaffe. Katonda asobola okututta ng'atujja mu kibi, nga tufaanana nga ffe twakomererwa. Asobola okutufuula abalamu mu bintu eby'Omwoyo, nga tuli nga ffe abaazuukira okuva mu kufa.

Ekikolwa eky'omubiri eky'okubatizibwa kiraga amaddala ag'okukyuka. Okusooka byonna, twannyikibwa mu mazzi ne tusaanawo mu ngeri y'emu nga abantu abafa bwe bassibwa mu ntaana era ne baziikibwa.
Kino kiba kitegeeza tuli beeteefuteefu okufiira awamu ne Kristo era n'okuziika obulamu obw'edda. Okubatizibwa mukolo gwa kuziika, omukolo ogw'okungulu ogw'okusiibuula obulamu ekibi mwe kibadde kifugira. Olwo nate ne tusitulibwa okuva mu mazzi olw'okubatizibwa okumu, mu ngeri y'emu ng'omuntu azuukiziddwa okuva mu ntaana. Kino kiba kitegeeza nti tufuuse "bitonde biggya," nga tweweereddeyo ddala eri obulamu obuggya, Katonda bw'atuwa.

Okubatiza okw'okunnyika kwokka kwe kunnyonnyola amakulu ag'amazima ag'okubatizibwa - kwe kufa, n'okuziikibwa, n'okuzaalibwa obuggya. "Okubatizibwa" okw'okuyiwako amazzi si kabonero akategeeza okuzaalibwa obuggya.

Okufiira awamu ne Kristo mu butuufu ddala kitegeeza ki?

"Bwe tumanya kino ng'omuntu waffe ow'edda yakomererwa wamu naye, omubiri ogw'ekibi gulyoke guggyibwewo, tuleme okubeeranga nate abaddu ab'ekibi." - Abaruumi 6:6.

Okubatizibwa kulaga kungulu ekyo omuntu ky'akola mu nda: okujeemulukukira bulambalamba Kristo. Singa twesigaliza ekintu kyonna ne tutakiwaayo eri Katonda olwo tujja kusigala nga tukyali "baddu eri ekibi." Bwe tujeemulukukira bulambalamba Kristo, okwegomba kwaffe okw'okukola ekibi, "kuggwaamu amaanyi" era okukyuka kwaffe olwo ne kutandika.

Ani avunaanyizibwa olw'okukyuka okwo okujja?

"Nakomererwa wamu ne Kristo, naye ndi mulamu; si ku bwange nate, naye KRISTO YE MULAMU MU NZE; era obulamu bwe nina kaakano mu mubiri, MBULINA LWA KUKKIRIZA OMWANA WA KATONDA eyanjagala ne yeewaayo ku lwange." - Abagalatiya 2:20.

Bwe nneegatta mu kukomererwa kwa Kristo okuyita mu kubatizibwa, mba mpise amaanyi ag'obuyinza mu bulamu bwange - "Kristo ye mulamu mu nze." Ng'oyagala okuteeka mu bujjuvu obulamu bwo mu mikono gya Kristo, sooka otunule ku kufa kwa Yesu ku musaalaba. Totunuuliira ku kibi ekyo ekikutiisatiisa, totunula ku bikolwa byo ebyayita olwo okaabe, naye tunula ku Kristo. Ng'otunuulidde ekisa kya Kristo era n'okufa kwe okw'obuzira ku musaalaba, okyasobola okwatula obwegaffu bwo naye nti: "olw'amaanyi ag'omusaalaba, njatula nti ndi mufu mu mpisa zange ez'edda era nnyanukula Katonda. Nnyimiridde wamu ne Kristo, okuva leero n'okweyongerayo, nja kubeera nga mulamu 'olw'okukkiriza Omwana wa Katonda eyanjagala era ne yeewaayo ku lwange.'"

Bwe twegatta mu maanyi ag'okufa era n'okuzuukira kwa Kristo, tujja kweyongera okulaba ng'empisa ze ennungi nga zigenda zitwala ekifo ky'empisa zaffe embi ez'edda.

"Omuntu yenna bw'aba MU KRISTO kyava abeera EKITONDE EKIGYA; eby'edda nga biweddewo; laba, nga bifuuse bigya." - 2 Abalolinso 5:17.

Mu maaso ga Katonda aba akyusiddwa okuva mu boonoonyi okudda mu batuukirivu, tukulira mu butuukirivu obwo, era bwe tutyo bwe tubeera mu bulamu obugya mu Kristo.

3. LWAKI YESU YABATIZIBWA?

Ku lunaku olwa Pentikote Petero yagamba abo abaali banoonya okusumululwa okuva mu kusingibwa omusango nti, "mwenenye era mubatizibwe" olwo Kristo asobole okubasonyiwa "ebibi byamwe" (Bikolwa 2:38). Okuva nga Yesu bw'atakola kibi yadde ekimu, ate lwaki yeewaayo ye yennyini okubatizibwa?

"Awo Yesu n'ava e Galilaya n'atuuka ku Yoludaani eri Yokana amubatize… okutuukiriza obutuukirivu bwonna." - Matayo 3:13,15.

Yesu teyakola kibi. Yali teyeetaaga kwenenya kibi kyonna. Yabatizibwa lwa nsonga ndala: "okutuukiriza obutuukirivu bwonna." Yesu okubatizibwa, yali atuteekerawo eky'okulabirako ekirungi eri ffe abantu abanafu, era boonoonyi. Kristo tasabanga bagooberezi be okugenda mu kifo kyonna ye gy'atabeeranga. N'olw'ekyo abakkiriza bwe bannyikibwa mu mazzi mu kubatizibwa, baba bagooberera ebigere bya Mukama waabwe.

Kubanga Kristo yafa ol'ebibi byaffe, asobola okutuwa obutuukirivu.

"Atamanya kibi Katonda yamufuula ekibi ku lwaffe, ffe nga tuli mu ye tulyoke tufune obutuukirivu bwa Katonda." - 2 Abakkolinso 5:21.

Nga tumaze okukyusibwa mu Maaso ga Katonda, okuva mu bwonoonyi okufuulibwa abatukuuvu, tukkulira mu "butuukirivu" obwo era ne tubeera mu bulamu obuggya mu Kristo.

4. LWAKI NTEEKWA OKUNNYIKIBWA?

Mu kubatizibwa kwe, Yesu yannyikibwa teyamansirwako mazzi. Yokana ye yamubatiza mu mugga Yoluddani "kubanga eyo ye yali amazzi mangi" (Yokana 3:23). Yesu bwe yabatizibwa, yakka wansi mu mazzi "Awo Yesu bwe yamala okubatizibwa (bwe yannyikibwa, oluyonaani) amangu ago n'ava mu mazzi" (Matayo 3:16).

Bwe tumala okutegeera amakulu ag'amazima ag'okubatizibwa, tuba tulina obuzibu butono okutegeera enkola ey'amazima ey'omukolo ogw'okubatiza.
Ekigambo kyennyini "okubatiza" kiva mu kigambo eky'oluyonaani "baptizo," ekitegeeza okunnyika mu mazzi (okuteeka wansi mu mazzi).

Mu mwaka 1737, John Wesley bwe yakyala mu Amerika, olukiiko lw'ekkanisa olw'abantu 34 baamuwozesa omusango ogw'enjawulo ogw'okugaana okubatiza omwana wa mwami Parker okuggyako ng'amunnyise mu mazzi. Bwe bujulirwa nti omukulembeze we kkanisa ya Bamethodist yabatizanga abantu be abakyukanga ng'abannyika mu mazzi.

Omuzza w'ekkanisa obuggya ayitibwa John Calvin yagamba bwati: "Kikakafu nti okunnyika ye yali enkola ey'ekkanisa eyasooka" - Institutes of the Christian Religion - ekitabo ekyo 4 essuula ya 15. Akatundu ake 19.

Ebyafaayo eby'ekkanisa eyasooka bikiraga bulungi nti okubatiza kyali kitegeeza kunnyika mu mazzi. Dean Stanley, ow'ekkanisa y'e Bungereza, yawandiika bwati: "Ebyasa ebyasooka ekkumi, n'ebisatu omukolo ogw'ensi yonna ogw'okubatizibwa gwali ogwo gwe tusomako mu Ndagaano Empya, era ge makulu gennyini ag'ekigambo 'okubatiza' - nti abo bonna ababatizibwanga baasuulibwanga mu mazzi, babaasanyangawo mu mazzi, bannyikibwa nga mu mazzi.'' - Christian Institutions, Olupapula olwa 21.

Amabatirizo omwannyikibwanga abantu abakyufu gasangibwa mu makanisa mangi agazimbibwa wakati w'ekyasa eky'okuna n'eky'ekkumi n'ebina mu Bulaaya, ne mu Asia; amakanisa okugeza nga mu Pisa mu Italy, era ne mu kkanisa esingira ddala obunene ey'omu Rome ey'omutukirivu Yokana.

Okutuusa ku lukiiko olw'e Ravenna bwe lwabeerawo, dda nnyo mu kyasa ek'y'ekkumi n'ebitaano, ekkanisa y'abakatuliki lwe yakkiriza okufukako amazzi mu kyenyi okuba nga kyenkana n'omukolo ogw'okunnyikibwa mu kubatizibwa. Nga twebuuza ku mikolo egy'ekkanisa egy'okubatiza, tetujja kugobeerera ekyo omuntu ky'ayigiriza, okuggyako ekya Kristo n'Abatume be kye batuyigiriza.

Abakristayo bangi abeesigwa bagaala akalombolombo ak'okubatiza abaana abato, ddala okuwaayo abaana abato eri Katonda okuviira ddala ku ntandikwa y'obulamu bwabwe kitenderezebwa. Ne bwe kiba bwe kityo, naye Bayibuli ekiraga bulungi nti omuntu ateekwa okusomesebwa ekkubo ery'obulokozi nga tannaba kubatizibwa (Matayo 28:19,20), era nti omuntu ateekwa kumala kwenenya ebibi bye era bisonyiyibwe nga tannaba kubatizibwa (Bikolwa 2:38). Omwana omuto tasobola kukkiriza, okwenenya oba okwatula so ng'ate ebyo bye biteekwa okukulembera okubatizibwa.

5. LWAKI KIKULU NNYO OKUBATIZIBWA?

Okusinziira ku kuyigiriza kwa Yesu okubatizibwa kyetaagibwa eri abo abagaala okuyingira mu ggulu, agamba nti:

"Ddala ddala nkugamba nti omuntu bw'atazaalibwa mazzi na Mwoyo, tayinza kuyingira mu bwakabaka bwa Katonda." - Yokana 3:5.

Kino ekisonyiwo Yesu yakiwa omuntu omu. Omubbi eyafiira ku musaalaba "yazaalibwa Mwoyo," newankubadde kyali tekisoboka gy'ali okuva ku musaalaba era agende annyikibwe mu mazzi ng'akabonero akalaga okukyuka kw'omu mutima gwe. Era Yesu yamusuubiza okubeera naye mu bwakabaka (Luka 23:42,43). Eri omubbi, "eby'okuzaalibwa amazzi era n'Omwoyo" kitegeeza omusaayi gwa Yesu ogwo ogwayiika okumunaazako ebibi bye. Kino omusajja Augustine kye yeetegereza: "Waliwo omulundi gumu ogwawandiikibwa ogw'omuntu eyeenenya ng'agenda okufa ogw'omubbi eyafiira ku musaalaba, omuntu yenna aleme okuggwaamu essuubi; era okwo kwokka omuntu yenna aleme okumufaanana."
Yesu kennyini yawa okulabula kuno:

"Akkiriza n'abatizibwa, alirokoka, naye atakkiriza omusango gulimusinga." - Mako 16:16.

Yesu okufa mu kifo kyaffe ku musaalaba e Gologoosa yalaga mu lwatu okwagala kwe gye tuli. Awatali kukwatibwa nsonyi, naffe tuteekwa okumuddamu mu lwatu mu ku batizibwa nga twatula okwewonga kwaffe gyali. Omaze okutandika obulamu obuggya mu Kristo? Wabatizibwa? Oba nga tonnaba kubatizibwa, lwaki toteekateeka kubatizibwa mu Kiseera ekitali ky'ewala?

6. OKUBATIZIBWA NTANDIKWA BUTANDIKWA

Okubatizibwa kulaga okwewaayo kwaffe eri, obulamu obukristayo. Naye okujeemulukuka kwaffe ku kubatizibwa tekyakola kyokka nti kujja kubeerawo ekiseera kyonna eky'obulamu.

Omwana bw'azaalibwa, kiba kituufu okujaguza. Ng'olunaku olw'okuzaalibwa luwedde n'essanyu nalyo likendera, omwana alina okuliisibwa buli lunaku, okunaaba buli lunaku, n'okulabirirwa. Bwe kityo bwe kiri ne mu kubatizibwa. Omutume Paulo yagambo bwati; ng'ayogera ku byamubeerako. "Nfa buli lunaku" (1 Abakolinso 15:31). Nga buli lunaku tukyuka okuva mu kwerowoozako, nga tweyongerayongera okujeemulukukira Kristo.

Omukolo ogw'okubatizibwa, okufaanana ng'omukolo ogw'embaga gwateekebwateekebwa okuba akabonero ak'okungulu akalaga nti enkolagana ey'ekitalo emaze okutandika. Enkolagana eno, oba oluganda luno okukula buli kiseera twetaaga okwewaayo buli lunaku eri Kristo, okufuna obulamu obuggya buli lunaku okuyita mu kusaba n'okuyiga Bayibuli.

7. EKIREETA OKUSANYUKA

Okubatizibwa kuvaamu essanyu lingi nnyo kubanga abo abateeka okukkiriza kwabwe mu Kristo balina obukakafu obw'obulamu obutaggwaawo. "Buli akkiriza n'abatizibwa alirokoka" (Mako 16:16). Bwe tuba nga tumaze okubatizibwa, tuba tukutte ekkubo erigenda waggulu okututuusa ku ssanyu ery'emirembe gyonna.

Era okubatizibwa kuleeta essanyu ery'omu kiseera kino ery'okubeera ne Kristo. Atusuubiza ekirabo ekitagulwa sente eky'Omwoyo Omutukuvu eri abo ababatiziddwa (Bikolwa 2:38). Awamu n'Omwoyo Omutukuvu tufuna "ekibala eky'Omwoyo" - "okwagala," ekijjuza obulamu, "n'okugumikiriza, ekisa, obulungi, obwesigwa, obuwombeefu era n'okwegendereza." (Abagalatiya 5:22,23).

Nga Yesu ali mu ffe okuyita mu Mwoyo Omutukuvu kituwa obukakafu obw'okutegeera okugenda ewala. Olw'okubanga "Omwoyo yennyini… ategeeza nga tuli baana ba Katonda" (Abaruumi 8:15,16).

Oluganda luno olw'okukuumibwa Katonda lutuleetera emigaso mingi, naye terutegeeza nti obulamu bwaffe tebufune bizibu. Mu mazima, omulabe emirundi mingi agezaako okukasukira ebizibu ebinene eri abo abakawaayo obulamu bwabwe eri Kristo. Ne bwe kiba kitya, bwe tubeera mu mikono gya Katonda tukimanyi nti ajja kukozesa ekintu kyonna ka kibe kirungi oba kibi okutuyamba okutuyigiriza era n'okutuyamba okukula (Abaruumi 8:28).

Omukyala omu omuvubuka yasalawo okuwaayo obulamu bwe eri Kristo era n'abatizibwa, newankubadde nga bba yali amutisizatisiza okwawukana naye. Omwami we teyayagala kwegatta mu nzikiriza ye empya, naye omukyala yeekwata ku Yesu era n'agezaako okubeera omukyala ayagala omwami we okusinga nga bwe kitabangawo. Naye ebiseera ebimu omwami ebintu yabifuulanga ebizibu mu maka gaabwe. Naye oluvannyuma yawangulwa mu mpaka ze yali tasobola kuddamu; bwe obulamu bw'amukyala we obukyufu. Omwami oyo naye yawaayo obulamu bwe eri Kristo, naye n'abatizibwa.

Weekwate kumpi ne Kristo okuyita mu mbeera yonna eriwo, ajja kutufuula eky'okulwanyisa kye eky'amaanyi mu mikono gye. Tusobola okuwaayo obulamu bwaffe gy'ali awatali bukwakurizo, kubanga ye yamala dda okwewaayo gye tuli bwe yasasula omuwendo ogw'ebibi byaffe ku musaalaba. Nga mukisa munene okumuwa okwagala kwaffe kwonna n'omukwano gwaffe mu lwatu. Bw'oba ng'ekyo tonnaba kukikola, lwaki towaayo bulamu bwo eri Kristo kaakano. Musabe atonde mu ggwe obulamu obuggya okuyita mu Mwoyo Omutukuvu olwo naawe obatizibwe okuyingira mu Kristo.