EKYAMA EKITUUSA KU KIWUMMULO EKY'OMU GGULU

Emyaka mitono egyakayita abantu abamu baalanga nti mu kiseera ekitali ky'ewala tujja kubeera n'ekiseera eky'eggandaalo kinene nga tetumanyi na ngeri ki gyetunakikozesa. Baalina ensonga ennungi okukola okulangirira okwo okw'obwesige. Mu bibuga eby'ensi, omuli ebyuma bikalimagezi (Kompyuta) byali nga bigayagaya omulimu ogukolebwa mu mwezi omulamu mu kaseera ka dakiika ntono nyo. Era n'ebyuma (roboti), zaali zitandise okukola emirimu egikooya agy'amakolero amanene.

Naye nga Kompyuta zikola era n'ebyuma ebyekozesa byokka bikola emirimu, abantu beeyongera kuba nga tebalina w'ebassiza mukka n'okusinga nga bwe kyali kibadde. Ennaku zino abantu tebalina biseera. Ekisinga byonna, n'amaka nago tegalina kiseera. Abasajja abafumbo ne bakyala baabwe bakisanga nga kizibu okufuna "ekiseera ekirungi" okubeera n'abaana baabwe, ng'ojjeko obutabeera na kyabwe bennyini.

Okuyiga okumu, mu bantu abamu abatono, kwalaga nti ekiseera ekya buli lunaku omusajja omuzadde ky'asobola okubeera ne batabani be zaali sekendisi 37 zokka. Amaka tegakyalina kiseera era tebakyasobola kusisinkana.

Tusobola tutya okuddirizamu era tusobola okusisinkana?

1. EDDAGALA ERY'OKUVUMULA OBULAMU OBULIMU OKUKAKALUKANA

Yesu yamanya obuzibu bw'amaka agalina okunyigirizibwa era ayagala tutegeere nti ekiwummulo eky'Omwoyo kyekimu ku bitundu ebikola obulamu obulungi. Agamba bw'ati:

"MUJJE GYE NDI, mmwe mmwenna abakoze ne mukoowa n'abazitoowereddwa, NZE NNABAWUMMUZA… era MUYIGIRE KU NZE, kubanga ndi muteefu era mwetoowaze mu mwoyo, MULIZUULIRA EMYOYO GYAMMWE EKIWUMMULO." - Matayo 11:28,29.

Bayibuli etuwa amagezi okufuna ekiwummulo eky'ekika kino mu ngeri bbiri, okujja eri Yesu BULI LUNAKU era ana BULI WIIKI.

2. OKWEGATTA NE YESU BULI LUNAKU

Ebibiina by'abantu buli kaseera byali byetaaga okubeerawo kwa Yesu. Era Yesu mu mwoyo ogw'eddembe yakolagana na buli muntu eyamwetooloolanga. Yakikola atya? Yafunanga ekiseera buli lunaku eky'okwogera nga ne Kitaawe ow'omu ggulu. Yesu yeesigamanga ku Kitaawe buli kaseera olw'okufuna amaanyi olw'ebizibu obw'obulamu (Yokana 6:57).

Singa nga tunabeera n'obulamu obukkakkamu, obulamu obuteefu nga ye bwe yalina tuteekwa okwesigama ku Yesu bulijjo - ka tukkirize ekigambo kye n'Omwoyo we ajjule muffe era bituwunde ebirpwoozo. Ekkubo erisingako obulungi ery'okulwanyisa amaanyi agasiiriza buli kinnomu era ne gatukutulakuturamu ng'amaka kwe kugatta obulamu bwaffe awamu n'obwa Kristo. Atugamba bw'ati:

"MUBEERE MU NZE, nange mbeere mu mmwe… kubanga NZE WE SIRI, TEMULIIKO KYE MUYINZA KUKOLA." - Yokana 15:4,5.

Obwetaavu obusingira ddala obunene obw'ekiseera kyaffe bwe bw'abantu okufuna amaanyi ag'Omwoyo okuyita mu kuteekawo enkolagana eya buli lunaku ne Yesu. Ensonga emu enkulu ennyo eteekwa okussibwako essira ku nkolagana yaffe ne Kristo gwe mulimu gwe gwe yakola n'agumaliriza ku musaalaba. Kiwummulo eky'amazima, obwekweko obw'amazima, busobola okubeerawo lwa nsonga emu yokka, kubanga Yesu bwe yali ng'amaliriza omulimu yakaaba ng'afa ng'agamba nti, "Kiwedde" (Yokana 19:30). Mu bigambo ebirala yali agamba nti omulimu gwe ogw'okutununula gwali guwedde.

"Naye kaakano OMULUNDI GUMU ku nkomerero ey'emirembe (Kristo) ALABISE OKUGGYAWO EBIBI olw'okwewaayo yennyini." - Abebbulaniya 9:26.

Kristo bwe yafa "yaggyawo ebibi." Eno y'ensonga ky'avudde lwaki kigambibwa nti abakkiriza abo abeenenyezza ebibi byabwe (kabe musajja oba mukazi), asobola "okuwummulira" mu mulimu ogwa Yesu ogwamalirizibwa. Twakkirizibwa.

Omusango guli mu buli kigere kye tutambula mu bulamu bwaffe kaakano. Naye Yesu ku musaalaba, yamalawo omutawaana ogw'okusalirwa omusango omulundi gumu ku lw'abantu bonna. Okukaaba kwa Yesu nti, "Kiwedde," kyateeka akaboneero akakakasa ensonga ey'ekisuubizo kye nti, "nange nnabawummuza." Kristo yamaliriza omulimu ogw'okutununula ku musaalaba (Tito 2:14). Olwo n'awummulira mu ntaana ku Ssabbiiti ate n'azuukira okuva mu ntaana enkya ku Sunday ng'awangudde ekibi awamu n'okufa. Abakristayo tebasobola kubeera na bukakafu obusinga awo obw'okuwummulira mu mulimu gwa Yesu ogwamalirizibwa.

"Kale tusembere eri Katonda n'Omwoyo OGUTALIMU BUKUUSA, OGUJJUDDE OKUKKIRIZA… Tunyweze essubi lye tulina tuleme kulivaako kubanga KATONDA EYASUUBIZA MWESIGWA." - Abebbulaniya 10:22,23.

Olw'okubanga "eyatusuubiza mwesigwa" tusobola okuyingira mu kiwummulo eky'obulokozi bwa Yesu kwe yatusuubiza. Obuwombeefu, emirembe era n'ekiwummulo kye tufuna mu Yesu buli lunaku tebiva mu kintu kyonna ffe kye tukola, naye biva mu ekyo Kristo kye yakola ku musaalaba.

Tusobola okuwummulira mu Kristo kubanga obulokozi bwaffe bwakakasibwa. Obukakafu obwo, butuleetera naffe okubeera ne Kristo buli lunaku nga tulya ku Kigambo kye era nga tussa omukka ogw'eggulu okuyita mu kusaba. Okusisinkana ne Yesu kituyamba okufuula obulamu obunyigirizibwa okuba obw'emirembe era obulina ekigendererwa.

3. OBWEGAFFU NE YESU OBWA BULI WIIKI

Kristo ng'amaze okutonda ensi mu nnaku omukaaga (Abakolosayi 1:16-17). Yateekawo ekiwummulo ekya Ssabbiiti. Gwe mukisa gwaffe ogwa buli wiiki okuteekawo obwegaffu naye.

"Katonda n'alaba buli ky'akoze, era laba kirungi nyo. Ne buba akawungeezi ne buba enkya, olwo lwe lunaku olw'omukaaga. Ne bigwa okukola eggulu n'ensi n'eggye lyabyo lyonna, Katonda n'amalira ku lunaku olw'omusanvu emirimu gye gye yakola; n'awummulira ku lunaku olw'omusanvu mu mirimu gye gyonna gye yakola. Katonda n'awa omukisa olunaku olw'omusanvu n'alutukuza, kubanga olwo lwe yawummuliramu mu mirimu gye gyonna Katonda gye yatonda gye yakola." - Luberyeberye 1:31-2:3.

Nga omutonzi waabwe, Yesu "yawummula" ku lunaku olwa Ssabbiiti olwasooka awamu ne Adamu ne Kaawa, era "N'awa omukisa" olunaku olwa Ssabbiiti era "n'alutukuza." Katonda ye yaateekawo enkola eya wiiki ey'ennaku omusanvu si lwa bulungi bwe, naye lwa Adamu ne Kaawa era ne ku lwaffe mu kiseera kino. Olw'okubanga yalowooza kinene olw'abantu be be yali amaze okutonda, yabatekerawo buli lunaku olw'omusanvu okuyita mu bulamu bwabwe okubeera nga luweereddwayo olw'okunoonya amaaso ge. Buli Ssabbiiti, nga bwe yalutuuma, lwali lwa kubeera lunaku olw'okuwummulirako mu byombi eby'omubiri n'okudda obuggya mu by'Omwoyo. Okuyingira kw'ekibi mu nsi yaffe kyafuula ekiwummulo ekya Ssabbiiti okuba ekyetaagibwa ennyo.

Omulokozi omu oyo eyasuubiza Adamu ne Kaawa "ekiwummulo," nga wayisewo emyaka nga enkumi bbiri yawa Musa amateeka ku lusozi Sinaayi (1 Bakolinso 10:1-4). Yesu yalondawo okuteeka ekiwummulo ekya Ssabbiiti mu mutima gwe nnyini ogw'Amateeka Ekkumi. Etteeka ery'okuna lisoma bwe liti:

"JJUKIRA OLUNAKU OLWA SSABBIITI OKULUTUKUZANGA. Ennaku omukaaga okolanga emirimu gyo gyonna; naye olunaku olw'omusanvu ye Ssabbiiti eri MUKAMA KATONDA WO: Olunaku olwo tolukolerangamu mirimu gyonna gyonna, so naawe weeka, newankubadde omwana wo omulenzi, newankubadde muwala wo, newankubadde omuddu wo, newankubadde omuzaana wo, newankubadde ebisolo byo, newankubadde munnaggwanga ali omumwo, kubanga mu nnaku omukaaga MUKAMA mweyakolera eggulu n'ensi, ennyanja, n'ebintu byonna ebirimu, n'awummulira ku lunaku olw'omusanvu; MUKAMA kyeyava ALUWA OMUKISA olunaku olwa Ssabbiiti, N'ALUTUKUZA." - Kuva. 20:8-11.

Katonda yateekawo olunaku olwa Ssabbiiti olunaku "olw'okujjukira" Mukama "eyatonda eggulu n'ensi." Ekiwummulo ekya Ssabbiiti buli wiiki kitugatta n'omutonzi waffe eyawa omukisa olunaku luno era n'alwawuula ku nnaku endala.

Yesu bwe yali ku nsi eno, yeefuniranga omukisa ogwa buli ngeri yonna ogw'okunyweza obwegaffu ne Kitaawe. Yafuna omukisa okuva mu kiwummulo ekya Ssabbiiti ng'asinza ku lunaku olwa Ssabbiiti, nga Luka bw'atutegeeza nti:

"Najja Ennazalesi gye yakulira KU LUNAKU OLWA SSABBIITI nayimirira mu kung'aniro NGA BWE YALI EMPISA YE, n'ayimirira okusoma." - Luka 4:16.

Oba nga Yesu Katonda - omuntu yeetaaga okuwummula mu maaso ga Kitaawe ku lunaku olwa Ssabbiiti, ffe ng'abantu obuntu mu butuufu ate ffe tusingawo nyo okukyetaaga. Yesu bwe yajja enkuuma ya Ssabbiiti ey'e Kiyudaaya ey'amateeka gye baali bagitaddeko, (Matayo 12:1-12), yakiraga nti Ssabbitti Katonda yagiteekawo lwa kugasa muntu.

"N'abagamba nti Ssabbiiti yabaawo ku lwa muntu so si omuntu ku lwa Ssabbiiti bwe kityo Omwana w'Omuntu ye Mukama wa Ssabbiiti nayo." - Mako 2:27, 28.

Mu kufa kwe Yesu yalaga obukulu bwa Ssabbiiti. Yafa ku Friday, "olunaku olw'okuteekateka, nga Ssabbiiti enneetera okutandika." (Luka 23:54). Ku lunaku olwo kwe yalangirira nti "Kiwedde," ekitegeeza nti omulimu gwe ogw'okujja ku nsi kuno okufa mu kifo ky'olulyo olw'omuntu gwali guwedde (Yokana 19:30; 4:34; 5:30). Bwe kityo olw'okussaamu ekitiibwa omulimu gwe gwe yali amaze okukola, kyeyava awummulira mu ntaana ku lunaku olwa Ssabbiiti.

Mu ngeri y'emu, nga Kristo bwe yamaliriza emirimu gye egy'obutonzi ku lunaku olw'omukaaga n'awummulira ku lunaku olw'omusanvu, bwe kityo okuyita mu kufa kwe ku musaalaba Yesu yamaliriza omulimu gwe ogw'okununula omuntu ku lunaku olw'omukaaga era n'awummulira ku lunaku olwa Ssabbiiti.

Ku lunaku olwa Sunday ku makya Yesu yava mu ntaana, omulokozi omuwanguzi (Luka 24:1-7). Yali amaze okutegeeza abayigirizwa be okusisinkana naye ku Ssabbiiti ng'amaze okuzuukizibwa. Ng'ayogera ku kuzikirizibwa kwa Yerusalemi, ekyo okwaliiwo emyaka nga ana ng'amaze okufa, yabalagira bw'ati:

"Nammwe musabe ekiddukiro kyammwe kireme okuba mu biro eby'empewo newankubadde ku Ssabbiiti." - Matayo 24:20.

Omulokozi waffe yayagala Abatume be awamu n'abagobereezi baabwe okusigala nga bassa mu nkola ebyo byonna bye yabayigirizanga (Yokana 15:15,16). Yayagala bafune ebiwummulo byombi, ekiwummulo eky'obulokozi, era ekya Ssabbiiti. Era nabo tebamuswaza. Abatume, nga Yesu amaze okufa baagenda mu maao n'okukuuma Ssabbiiti. (Soma Luka 23:54-56; Bikolwa 13:14; 16:13; 17:2; 18:1-4).

Omutume omwagalwa Yokana yakuumanga obwegaffu bwe ne Kristo ku lunaku olwa Ssabbiiti, mu bbaluwa ye gye yawandiika mu myaka gye egy'oluvannyuma yagamba bw'ati: "Nnali mu Mwoyo ku lunaku lwa Mukama" (Kubikkulirwa 1:10). Okusinziira ku kuyigiriza kwa Yesu "olunaku lwa Mukama" ye Ssabbiiti, "kubanga Omwana w'Omuntu ye Mukama wa Ssabbiiti" (Matayo 12:8).

Ku lunaku olwa Ssabbiiti tujjaguza olw'ebikolwa ebibiri ebisinga obukulu eby'okukola kwa Mukama waffe ku lwaffe. Olw'okututonda era n'okutununula. Okukuuma Ssabbiiti kuno ne mu ggulu kugenda kubeerayo:

"Kubanga eggulu eriggya n'ensi empya bye ndikola bwe birisigala mu maaso gange bw'ayogera MUKAMA… okuva ku Ssabbiiti okutuuka ku Ssabbiiti, bonna abalina omubiri banajjanga okusinza mu maaso gange bw'ayogera MUKAMA." - Isaaya 66:22,23.

4. EMIGASO GY'EKIWUMMULO KYA SSABBIITI

Ennaku zino abantu balinnya ku bannabwe mu bulamu bwabwe obujjudde emitawaana. Abamu basiriira. Amaka gakutukamu olw'okunyigirizibwa. Naye Katonda atuwa Ssabbiiti ng'ekkubo erisingako obulungi olw'okubeera n'obulamu obulungi.

Leeka twetegereze ekimu ku mikisa egy'enjawulo egy'ekiwummulo ekya Ssabbiiti.

(1) SSABBIITI KIJJUKIZO KYA BUTONZI ERA OKUGIKUUMA NGA NTUKUVU, TUZIMBA EKIJJUKIZO KY'OMUTONZI WAFFE. Essawa za Ssabbiiti entukuvu zituwa omukisa ogw'enjawulo ogw'okwegatta mu nsibuko yaffe ey'obutonzi obw'ensi obwa Katonda. Omulundi gwo ogwasembayo gwaliiwo di, ggwe n'abantu ab'omu maka go lwe mwafuna ekiseera ne mukyalako mu kibira ekisirifu ekirungi oba ku mugga oguliko ebiyiriro? Ssabbiiti etuwa ekiseera okubeera ko ne Yesu era ne tulaba eby'amagero bye yatukolera.

(2) KU SSABBIITI TUFUNA ESSANYU ERY'OKUSINZA ERA N'OKUKUNG'ANA N'ABAKRISTAYO ABALALA. Waliwo emigaso egiva mu kuteendereza Katonda nga tuli wamu ng'ekibiina eky'abantu abasinza. Ssabbiiti etuwa ekiseera eky'enjawulo okusisinkana awamu ng'ekkanisa okuzza obuggya amaanyi g'emyoyo gyaffe.

(3) SSABBIITI ETUWA EMIKISA OKUKOLA EBIKOLWA EBY'OKULOWOOZA EBY'EKISA. Muliraanwa wo wakati mu wiiki abadde mulwaadde ng'ate tolina kiseera kumukyalira? Mukwano gwo bwe yafiirwa omwami we nga yeetaaga okusaasira n'okukubagizibwa era okunyigirizibwa okw'emirimu eggya buli lunaku gyakuziyiza okumukyalira? Yesu atuwa amagezi nti: "Kale kirungi okukola obulungi ku Ssabbiiti" (Matayo 12:12).

(4) KU LUNAKU OLWA SSABBIITI LWE LUNAKU OLW'OKUZZAAMU AMAANYI EBIGATTA AMAKA. Yesu bwe yalagira nti, "Ku lunaku olwa Ssabbiiti tokolanga mulimu gwonna" (Kuva 20:10). Teyandisobodde kuwa kunnyonnyola okusingako awo eri ba Ttaata abafa emirimu n'eri ba Mmaama bannyigirizibwa. Ssabbiiti kye kipande ekinene ekisoma nti, YIMIRIRA eri amaka. Yimirira ojjemu ebintu ebisinga okwetaagibwa mu ebyo ebisinga obukulu. Ssabbiiti lunaku lumu lwe tusobola okuteeka okusaba mu kifo ky'okunnyigirizibwa, okuseka mu kifo ky'okukola, okulowooza okw'akasirise mu kifo ky'oluseregende olw'emirimu egy'okukola. Ekiwummulo kya Ssabbiiti kiwa abantu ab'omu maka bonna okwegatta ne Kristo era n'okufuna amaanyi ge ag'omwoyo.

(5) SSABBIITI KISEERA KYA KUSEMBERERA YESU MU NGERI EY'ENJAWULO. Enkolagana yonna yeetaaga ekiseera ekirungi, n'enkolagana yaffe ne Yesu teyawukana n'ekyo. Okuwaayo olunaku olulamba eri Yesu buli wiiki ly'ekkubo eddene ery'okukuuma omukwana gwaffe ne Yesu nga mulamu ate nga gusanyusa. Ssabbiiti etuwa ekiseera ekinene olw'okuyiga Bayibuli n'okusaba ekiseera ekinene ekitalimu mitawaana nga tuli ne Yesu yekka mu kifo eky'akasirise nga tumuwuliriza.

Yesu "yawa omukisa olunaku olwa Ssabbiiti era n'alutukuza" n'ekisuubizo eky'okubeerawo kwe (Luberyeberye 2:3). Osobola okukitegeera nti okukuuma olunaku olwa Saturday, olunaku olw'omusanvu mu wiiki nga Ssabbiiti lwa kubanga Yesu lwe yayawula okuva ku nnaku endala ku kutondebwa kw'ensi, olw'okukolagananga naffe mu ngeri ey'enjawulo.

Yesu bwe yateeka wo Ssabbiiti kirabikira ddala nti omulembe gwaffe guno gwamuli mu biroowozo. Ekiwummulo kino tukyetaagira ddala mu mbeera yaffe gye tulimu ey'okunyigirizibwa: Olunaku olutuggira ddala ku bintu byonna ebirala. Olunaku olw'okusinza Katonda, tuyingire mu kutondebwa obuggya, era tolowooze ku nkolagana yaffe ne Katonda okusinga okulowooza ku bintu.

5. OKULEGA KU KIWUMMULO EKY'OMU GGULU

Tusobola okuwumbawumba emikisa egy'okwegatta ne Yesu ejja "buli lunaku" n'ejja "buli wiiki" mu kigambo kimu - okuwummula. Ekigambo "Ssabbiiti" kiva mu lulimi Olwebbulaniya ekitegeeza okuwummula, n'olw'ekyo tekyewuunyisa ebyawandiikibwa ebitukuvu bwe biyita olunaku olw'omusanvu "Ssabbiiti ey'okuwummula." (Balevi 23:3).

"Kubanga olunaku olw'omusanvu lulina (Katonda) w'alwogererako awagamba nti: 'Katonda n'awummulira emirimu gye gyonna ku lunaku olw'omusanvu.'… N'OLW'EKYO ABANTU BA KATONDA BAKYALINAWO EKIWUUMULO EKY'OKU LUNAKU OLW'OMUSANVU… Kale tufubenga okuyingira mu kiwummulo ekyo." - Abebbulaniya 4:4-11.

Okufuna "ekiwummulo ekya Ssabbiiti" ekya buli wiiki kituwa okulega ku sanyu liri lye tufuna mu kiwummulo ekitukiridde eky'omu ggulu. Ekiwummulo kino si kya butakola kyokka, kikwata ku bukuumi bwe, emirembe, era n'okubeera obulungi nga biva mu nsibuko y'obulamu obungi obw'amazima. Ekiwuumulo eky'omwoyo eky'ekika kino tuyinza okukisanyukira nga tukissa mu nkola. Obujjulirwa bw'abo abafunye ekiwummulo eky'obulokozi era n'ekiwummulo ekya Ssabbiiti buli mu nsi yonna: "singa ng'oyingira mu kiwummulo eky'okwegatta ne Yesu buli lunaku na buli wiiki, ojja kuzuula essanyu erisingira ddala mu bulamu."

Wandyagadde okwebaza Yesu olw'ekirabo kye eky'ekiwummulo? Wandyagadde okumwebaza olw'ekisuubizo ky'ekiwummulo eky'obukolozi ekya buli lunaku olw'okusobola okusisinkana n'ebintu ebisomooza obulamu era n'okumwebaza olw'ekisuubizo eky'ekiwumulo ekya Ssabbiiti buli wiiki olw'okukakasa enkolagana yo naye? Obanga tokikolanga, wandyagadde okukkiriza ekirabo ekyo bulokozi ky'akuwa? Wandyagadde okumutegeeza nti oyagala okukuuma Ssabbiiti ye buli wiiki. Wandyagadde okumugamba nti "Nzikiriza Mukama! Njagala okuzuula essanyu mu lunaku lwe wassaawo." Lwaki tosobola kwewaayo mu kiseera kino?

(Okyasobola okwewuunya: ani eyakyusa Ssabbiiti okugijja ku Saturday, olunaku olw'omusanvu mu wiiki ne baluzza ku Sunday, olunaku olusooka mu wiiki? Okukyusa kuno kwaliiwo di? Katonda ye yalagira okukyusa kuno? Ebibuuzo bino byonna bijja kuddibwamu mu Omulagirizi owa No.21.)