EKYAMA KY'OKUSABA OKUDDIBWAMU

Anatoli Levitim, omuwandiisi omurussia era omuyizi w'ebyafaayo yamala emyaka mingi mu Sayiberia Gulag eyo okusaba Katonda gye kwali kuweeddewo. Naye yagenda okuvaayo ngali bulungi mu by'Omwoyo. Yawandiika bwati: "Eky'amagero esingira ddala byonna kwe kusaba." Kye nina kyokka kwe kukyukira Katonda mu birowoozo byange era mu kiseera ekyo mpulira amaanyi agava awantu agafukibwa mu nze, mu mwoyo gwange, mu nze nzenna. Kiki ekyo? Ludda wa nze, omusajja omukadde ataliimu ka buntu, akooye obulamu, gye nnandifunye amaanyi agazza obuggya era agandokola, ne gansitula waggulu w'ensi? Gaali gava bweru - era tewali maanyi mu nsi yonna agasobola okugaziyiza."

Mu "Mulagirizi" ono tujja kulaba engeri okusaba gye kusobola enkolagana ey'amaanyi ne Katonda era n'obulamu obukristayo obugumu.

1. OKWOGERA NE KATONDA

Tusobola tutya okubeera abakakafu nti Katonda awulira okusaba kwaffe?

"Era mulinkaabira, era muligenda ne munsaba, NANGE NDIBAWULIRA. Era mulinnoonya ne mundaba, bwe mulinkennenya n'omutima gwammwe gwonna." - Yeremiya 29:12,13.

Kisuubizo ki Yesu kye yatuwa ekikakasa nti ajja kuwuliranga era n'okuddamu okusaba kwaffe?

"Nange mbagamba mmwe nti, musabe, muliweebwa; munoonye, mulilaba; mweyanjule, muliggulirwawo." - Luka 11:9.

Okusaba y'emboozi eyabantu ababiri. Ekyo Yesu ky'atusuubiza:

"Laba nnyimiridde ku luggi, nneeyanjula; omuntu yenna bw'awulira eddoboozi lyange n'aggulawo oluggi nnaayingira gyali, era nnaaliira wamu naye, naye nange." - Kubikkulirwa 3:20.

Kisoboka kitya okutuula wansi era n'ofuna akawungeezi akalungi n'emboozi awamu ne Yesu? Ekisooka, olw'okumutegeeza buli kantu konna akali mu mitima gyaffe mu kusaba. Eky'okubiri; olw'okuwuliriza n'obwegendereza. Bwe tuba nga tufumintiriza mu kusaba, Katonda ayinza okwogera naffe butereevu. Bwe tuba nga tusoma ekigambo kya Katonda nga twewaddeyo, Katonda aba ayogera naffe okuyita mu mpapula zaakyo.
Okusaba kusobola okufuuka ekkubo ery'obulamu eri Omukristayo.

"MUSABENGA OBUTAYOSA; mwebazenga mu kigambo kyonna kyonna; kubanga ekyo Katonda ky'ayagala mu Kristo Yesu gye tuli." - 1 Abasesolonika 5:16-18.

Tusobola tutya "okusaba buli kaseera?" Tulina kufukamira ku mavvivi ekiseera kyonna, oba buli kaseera okwogera ebigambo ebitendereza oba okwegayirila? Mu butuufu si bwe kiri. Naye tulina okubeera n'enkolagana ey'okumpi ne Yesu era nga tuwulira eddembe okwogera gyali ekiseera kyonna, mu kifo kyonna wetuli.

"Bwe tuba mu nguuddo mu bibiina by'abantu, bwe tuba ku mirimu gyaffe tuyinza okuwaayo okusaba kwaffe eri Katonda, nga tumusaba okutulunga'mya… kitusaanira buli kaseera konna okuggulawo oluggi lw'omutima gwaffe, ne tusaba Yesu ajje abeere mu mwoyo gwaffe ng'omugenyi waffe omwagalwa," - Omusaale waffe, P.III.

Erimu ku makubo erisinga obulungi okubeera n'enkola ey'ekika kino, ey'enkolagana ey'omukwano kwe kuyiga okufumitiriza nga tusaba.

"Okulowooza kwange kumusanyusenga, Nnasanyukiranga mu Mukama." - Zabbuli 104:34.

Bw'oba ng'osaba toyanguyiriza n'oyita mu lukalala olw'eby'okusaba. Lindirira ate lowooza. Okusaba okuttono okulimu okufumintiriza kusobola okuwa omukisa mungi enkolagana yo ne Katonda.

"Musemberere Katonda naye anaabasemberera." - Yakobo 4:8.

Gye tukoma okusemberera okumpi ne Yesu, gye tukoma okuwulira okubeerawo kwe. N'olw'ekyo beera kumpi ne Yesu, era teweeralikirira bigambo ki ebituufu by'oyogera. Gwe yogera n'obwesigwa mu mwoyo ogw'eddembe. Yogera ku buli kintu kyonna. Ye yayita mu bulumi bwonna obw'okufa asobole okufuuka mukwano gwo ow'omu nda.

2. TUSABA TUTYA

Bwe tuba nga tusaba twandyagadde okugobeerera enkola y'okusaba kwa Mukama waffe, eky'okulabirako eky'okusaba Yesu kye yayigiriza abayigirizwa be ng'adda mu kusaba kwabwe nti: "Tuyigirize okusaba."

"Kitaffe ali mu ggulu, erinnya lyo litukuzibwe. Obwakabaka bwo bujje. By'oyagala babikole mu nsi, nga bwe babikola mu ggulu. Otuwe leero emmere yaffe eya leero. Otusonnyiwe amabanja gaffe nga ffe bwe tusonnyiwa abatwewolako. Totutwala mu kukemebwa, naye otulokole eri omubi. Kubanga obwa kabaka, n'obuyinza, n'ekitiibwa bibyo. Emirembe n'emirenbe-Ammiina." - Matayo 6:9-13.

Okusinziira ku ky'okulabirako Yesu kye yatuwa mu kusaba kwe, tugenda eri Katonda nga Kitaffe owo mu ggulu. Nga tusaba by'ayagara bifuge emitima gyaffe mu ngeri y'emu nga bwe kiri mu ggulu lyonna. Tumusaba olw'ebyetaago byaffe eby'omubiri. Okusonyiyibwa, era n'olw'empisa ey'okusonyiwa (abalala). Jjukira nti obuyinza bwaffe okulwana n'ekibi gava eri Katonda. Okusaba kwa Kristo kumalirizibwa n'okutendereza.

Ku mukolo omulala ogumu, Yesu yayigiriza abayigirizwa be okusaba Kitaffe okuyita "mu linnya lye" (Yokana 16:23). OKwo kwe kusaba ng'etteeka lya Yesu. Eno y'ensonga lwaki bulijjo abakristayo okusaba kwabwe bakukkomekereza n'ebigambo nti: "Mu linnya Yesu, Amiina!" Amiina kigambo kya Lwebbulaniya ekitegeeza nti "kibeere bwe kityo!"

Newankubadde ng'okusaba kwa Mukama waffe kutuwa eky'okulabirako eky'ebyo ebisaanidde okusaba era n'engeri gye tusobola okuteekawo okusaba, enkolagana yaffe ne Katonda esingawo okuba ennungi bwe tubeera n'okusaba okuviira ddala mu mutima.

Tusobola okusaba ku buli kintu kyonna. Katonda atuyita tusabe okusonyiyibwa ebibi byaffe (1 Yokana 1:9), okubeera n'okukkiriza okunene (Mako 9:24), ebyetaago eby'obulamu, (Matayo 6:11), okuwonyezzebwa okuva mu ndwadde ne mu kubonaabona (Yakobo 5:15), n'okufukibwako Omwoyo (Zakaliya 10:1). Yesu atukakasa nti tusobola okutwala okwetaaga kwaffe kwonna n'okweralikirira kwaffe gyali; tewaliiwo kintu kitono nnyo kye tutateekwa kusaba.

"Mumukwaseenga byonna ebibeerarikiriza, kubanga ya abalabirira." - 1 Petro 5:7.

Omulokozi waffe asanyukiira nnyo (okumanya) kalonda yenna ow'ebyo byonna ebiri ku bulamu bwaffe. Omutima gwe gusanyuka singa emitima gyaffe gyekwata ku ye mu kwagala ne mu kukkiriza.

3. OKUSABA OKWA SSEKINNOOMU

Abasinga obungi kuffe tulina ebintu eby'ekyama bye tutasobola kubuulirako yadde mukwano gwaffe asingira ddala okuba ow'okumpi. Katonda atuyita okweggyako emigigu ng'ejo mu kusaba okwo omu: ggwe ng'oli omu awamu naye yekka. Tekitegeeza nti yeetaaga amawulire okuva gye tuli. Katonda ayinza byonna amanyi bulungi nnyo, ebyama byaffe, okutya kwaffe, ebirowoozo ebikweke, obusungu obukweke n'okusinga kye tumanyi. Naye twetaaga okuggulawo emitima gyaffe eri oyo atumanyi ekigenda ewala, era atwagala n'okwagala okutaggwaawo. Okuwonyezebwa kuyinza okutandika Yesu bw'anaakwata ku biwundu byaffe.

Bwe tusaba, Yesu, Kabona waffe asinga obukulu aba kumpi okutuyamba.

"Kubanga tetulina Kabona asinga obukulu atayinza kulumirwa wamu naffe bunafu bwaffe; NAYE EYAKEMEBWA MU BYONNA BUMU nga ffe; so nga ye talina kibi. Kale tusemberenga n'obuvumu eri entebe ey'ekisa, tulyoke tuweebwe okusasirwa era tufune ekisa olw'okubeerwa bwe, tukwetaaga." - Abebbulaniya 4:15,16.

Owulira mu nda yo nga weeralikiridde ozitoweereddwa, oba owulira omusango? Biteeke mu maaso ga Mukama. Asobola okukuwa ng'obwetaavu bwo bwe buli.

Tugwanidde okubeera n'ekifo eky'enjawulo olw'okusaba okw'omuntu omu?

"Naye ggwe bw'osabanga, yingiranga mu kisenge mu nda, omalanga kuggalawo luggi, n'olyoka osaba Kitaawo ali mu kyama, kale Kitaawo alaba mu kyama, alikuwa empeera." - Matayo 6:6.

Ng'ogasseko okusaba ng'otambula mu nguudo, ng'okola ku mulimu, ng'oli mu ssanyu musanyuka, buli mukristayo ateekwa okubeera ne kiseera eky'okusaba n'okuyiga Bayibuli. Funa ekiseera eky'okusisinkana ne Katonda ekya buli lunaku, mu kiseera lw'owulira ngoli bulungi, mu kiseera era ng'olowooza bulungi.

4. OKUSABA OKWA BANGI

Okwegattira awamu n'abantu abalala mu kusaba tuteekawo oluganda olw'enjawulo era ne kuyita amaanyi ga Katonda mu ngeri ey'enjawulo.

"Kubanga ababiri oba abasattu we baba nga bakung'anye ku lwange, nange mbaawo wamu nabo." - Matayo 18:20.

Ekimu ku bintu ebisinga obukulu kye tusobola okukola ng'amaka kwe kubeera n'obulamu obw'okusabira awamu. Laga abaana bo nti tusobola okutwala okwetaaga kwaffe gy'ali buterevu. Bajja kuba basanyufu eri Katonda bwe banamulaba ng'adda mu kusaba ku bintu byonna eby'omu bulamu. Ekiseera eky'okusaba eky'amaka kifuule eky'okugabana essanyu n'emirembe.

5. EBYAMA 7 EBY'OKUSABA OKUDDIBWAMU

Musa yasaba ennyanja emyufu n'eyawukanamu. Eriya yasaba omuliro ne guva mu ggulu ne gukka ku nsi. Danieri yasaba Malayika n'aziba obumwa bw'empologoma. Bayibuli etulaga emirundi mingi egy'okusaba okwaddibwamu. Era etukubiriza okusabanga ng'ekkubo ery'okufuna amaanyi ag'obuyinza bwa Katonda. Yesu yasuubiza nti.

"Bwe munasabanga ekintu mu linnya lyange, nnaakikolanga." - Yokana 14:14.

Naye okusaba okumu kulabika ng'okugenda nga tekuddibwamu. Lwaki? Gano ge mateeka omusaanvu agajja okutuyamba okusaba kwo okuddibwamu.

(1) SEMBEERA KUMPI NE KRISTO.
"Bwe mubeera mu nze, n'ebigambo byange ne bibeera mu mmwe, musabenga kyonna kye mwagala, kinabakolerwanga." - Yokana 15:7.

Singa tunafuula enkolagana yaffe ne Katonda okuba ekintu ekikulembera era ne twekuuma nga twegasse naye, tujja kuba nga tuwuliriza era nga tulindirira okuddibwamu kw'okusaba kwaffe bwe kitaba bwe kityo kujja kugenda nga tekufiiriddwako.

(2) WEESIGE KATONDA.
"Ne byonna byonna bye munaayagalanga nga musaba, NGA MUKKIRIZA munaabiweebwanga." - Matayo 21:22.

Okukkiriza oba okubeera n'okukkiriza, kitegeeza nti tutunuulidde Kitaffe ow'omu ggulu okutuwa eby'etaago byaffe. Singa nga obutakkiriza bukutawanya jjukira nti omulokozi yakolera eky'amagero eri omusajja eyasaba nti:

"Nzikiriza, wabula nnyamba; okukkiriza kwange kuggweemu okubuusabuusa." - Mako 9:24.

Ssaayo essira okuteeka mu nkola okukkiriza KW'OLINA, teweralikiriranga. Olw'okukkiriza OKWO kw'otalina.

(3) MU BUKAKKAMU JEMULUKIKIRA KATONDA KY'AYAGALA.
"Era buno bwe bugumu bwe tulina eri ye, nti, bwe tusaba ekintu nga bw'ayagala, atuwulira." - 1 Yokana 5:14.

Jjukira nti Katonda ayagala okutuyigiriza mu ngeri y'emu nga bw'ayagala okutuwa ebintu, okuyita mu kusaba. Bwe kityo emirundi egimu agamba nti "Nnedda" ate ebiseera ebimu naddamu mu ngeri endala. Okusaba ly'ekkubo ery'okufuna engeri y'okweyongerayongera okwegatta ku Katonda by'ayagala. Tulina okussaayo omwoyo ku kuddamu kwa Katonda era n'okuyiga okuva mu kwo. Okukuuma olukalala lw'eby'okusaba n'ebyo ebiva mu byo kiyamba kinene.

Omwoyo Omutukuvu ajja kukuyamba okutandika okutambulira mu kkubo etuufu: "Kubanga mwoyo awolereza abantu ba Katonda, nga Katonda bw'ayagala" (Balumi 8:27). Jjukira nti bulijjo okwagala kwaffe kuteekwa kubeera bumu ne Katonda by'ayagala, singa nga tunasobola okulaba byakola.

(4) LINDIRIRA KATONDA N'OKUGUMIKIRIZA.
"Nalindirira Mukama n'okugumikiriza; N'antegera okutu, n'ampulira okukaaba kwange." - Zabbuli 40:1.

Ensonga enkulu wano kwe kuteeka amaaso go ku Katonda, olw'okumalawo omutawaana. Togezangako omulundi ogumu okusaba obuyambi bwa Katonda olwo ate mu kiseera ekirala n'ossa emitawaana gyo mu kunoonya amasanyu. Katonda mulindirire n'okugumikiriza; empisa eno nno tugyetaaga nnyo.

(5) TEWEKWATA KU KIBI.
"Bwe mba ndowooza obutali butuukirivu mu mutima gwange, Mukama tawulira." - Zabbuli 66:18.

Ekibi ekimanyiddwa kikendeeza amaanyi ga Katonda mu bulamu bwaffe, kitwawukanya okuva ku Katonda (Isaaya 59:1-2). Tosobola kuddira mukono ogumu okwekwata ku kibi ate mu kiseera ky'ekimu omukono omulala n'ogwekwata ku buyambi bwa Katonda. Okwatula okw'amazima era n'okwenenya ebyo bimalawo omutawaana guno. Singa nga tetuli beeteefuteefu okukkiriza Katonda okutugya mu birowoozo eby'ekibi, n'ebigambo awamu n'ebikolawa eby'ekibi, okusaba kwaffe tekujja kukola.

"Musaba ne mutaweebwa, kubanga musaba bubi, mulyoke mubikozese okwegomba kwammwe." - Yakobo 4:3.

Katonda tagenda kuddamu ng'akkiriza eri okusaba okw'okwerowoozako. Amatu go gaggulewo okuwulira amateeka ga Katonda, n'eri okwagala kwe, naye ajja kuggulawo amatu ge eri okusaba kwo.

"Akyusa okutu kwe obutawulira mateeka, N'OKUSABA KWE KWA MUZIZO." - Ngero 28:9.

(6) KIWULIRE NTI WEETAAGA KATONDA
Katonda addamu abantu abo abasaba okubeerawo kwe n'amaanyi ge mu bulamu bwabwe.

"Balina omukisa abalummwa enjala n'ennyonta olw'obutukirivu; kubanga abo balikkusibwa." - Matayo 5:6.

(7) NYWERERA MU KUSABA
Yesu yannyonnyola nga bwe tugwanidde okunywerera mu kusaba, ng'atutegeeza olugero lwa Nnamwandu eyajjanga eri omulamuzi buli lunaku olw'okumwegayirira. Era ku nkomerero Omulamuzi yayogera nti; "Naye olw'okunteganya Nnamwandu ono kw'anteganya nnaamulamula, aleme okuntengezza ng'ajja olutata." Era Yesu yamaliriza ng'agamba nti" "Kale ne Katonda taliramula abaronde be abamukaabirira emisana n'ekiro? Alirwaawo nga tanabayamba?" (Luka 18:5-7).

Yogera ebyetaago byo byonna, essuubi lyo n'entekateekazo eri Katonda, saba emikisa egy'enjawulo egy'obuyambi mu kiseera eky'obwetaavu sigala ng'okyanoonya, era sigala ng'okyawuliriza, okutuusa lw'onoyiga ekintu kyonna okuva eri okuddamu kwa Katonda.

6. BAMALAYIKA BAWEEREZA OLW'EBYETAAGO BY'ABO ABASABA

Omuwandiisi wa Zabbuli okuyita mu kuweereza kwa bamalayika ba Mukama yasanyuka olw'okuddamu okusaba kwe:

"Nanoonya Mukama n'anziramu n'andokola mu kutya kwange kwonna… Malayika wa Mukama asiisira okwetooloola abo abamutya, n'abalokola." - Zabbuli 34:4-7.

"Bwe tusaba, Katonda aweereza bamalayika olw'okuddamu okusaba kwaffe (Abebbulaniya 1:14). Buli muntu Omukristayo alina malayika amukuuma amuwerekera.

"Mulabe temunyoomanga omu ku abo abato bano; kubanga mbagamba nti mu ggulu bamalayika baabwe batunuulira ennaku zonna amaaso ga Kitange ali mu ggulu" - Matayo 18:10.

"Kubanga olw'okusaba kwaffe; Mukama waffe ali kumpi. Temweralikiriranga kigambo kyonna kyonna; naye mu bigambo byonna mu kusabanga n'okwegayiriranga bye mwagala bitegeezebwenga eri Katonda. N'emirembe gya Katonda, egisinga okutegeerwa kwonna ginabakuumanga emitima gyammwe n'ebirowoozo byammwe mu Kristo Yesu." - 2 Abafiripi 4:5-7.

7. ENNEYISA EY'OBULAMU OBUKRISTAAYO

Bayibuli ennyonyola ku mpisa ez'enjawulo ez'obukristaayo. Okusinziira ku kyawandiikibwa ekya Abaefeso 4:22-24, Omukristaayo ateekwa "okweggyako" enneeyisa ey'obulamu obw'edda obuva mu "kwegomba okw'obulimba" era "n'okwambala" obulamu obuggya obwo obw'atondebwa mu kifaananyi kya Katonda" Mu ky'okuyiga OMULAGIRIZI ekyo 6, mu kifaannanyi kino, twakizuula nti mu kuzaalibwa obuggya "tuddibwamu okutondebwa nate" okubeera abantu ab'enjawulo mu Kristo.

Omulagirizi ono, era n'a- balagirizi abalala 6 abagobeerera, balaga enneeyisa y'obulamu obukristayo; bulaga ebyama by'obulamu obukristayo obusanyufu. Bijja kukuyamba okuzimba enkolagana ey'amaanyi ne Kristo, eyo ejja okuvaamu empisa ez'enjawulo ez'obulamu obukristaayo. N'olwekyo amaaso go gateeke ku Yesu leero, era emirembe gya Kristo bwe ginafuga obulamu obulambalamba, ojja kusobola okubeera ekitundu eky'abawanguzi nga basanyuka.