OKUVA MU MWONOONYI ASINGIDDWA OMUSANGO OKUFUUKA OMUTUKUVU ASONNYIYIDDWA

Tewaali bubonero bulaga ngalo ze. Tewaaliwo kya kulwanyisa ekissi ekyazuulwa. Tewali n'omu eyalaba ng'omuntu ayingira offisi y'omusawo. Newankubadde tewali n'omu eyawulira omusinde ogw'emmundu. Naye omusawo yasangibwa ng'agudde magalabanja emabega w'emmeeza ye. Ng'alina ebiwundu eby'amasasi bitaano nga biyuzizza esaati ye.

Guno gwali musango gwennyini. Abapoolisi ku luberyeberye tebaasobola kuzuula nsonga ntuufu. Naye oluvannyuma baazuula waya entono eyali esibiddwa ku kkalaamu ku mmeeza y'omusawo.

Waya eno yali eraga ku kyuma ekiwandiika amaloboozi ekyali mu kabada ey'emmeeza. Akasaanikira k'ekkalaamu ke kaalimu akuuma akakwata amaloboozi omusawo ke yakozesanga okuwandiika emboozi zonna ze yayogeranga n'abalwadde be abajjanga okuweebwa amagezi.

Abaali banoonyereza ku musango guno mu bwangu ddala baateekako teepu eno ne yeetoolola era n'okwewuunya ne beewuunya, bwe baatandika okuwulira ensonga eyavaako omusango gwennyini.

Omusajja eyali ayitibwa Anthony yayingira offisi era n'atandika oluyombo kakuzzi n'omusawo. Ekyaddirira amasasi ne gatulika. Era teepu n'emaliriza n'okukaaba okw'obulumi okw'omusawo ng'afa ng'agudde ku kiwempe.
Buli kantu konna akaali ak'entiisa kaali kawandiikiddwa. Omutemu yalowooza omusango gwe emirembe gyonna gwali gwakusigala nga kyama. Yali mwegendereza nnyo obutarekawo kizibiti. Naye teepu yategeeza abantu ebyaliwo byonna. Mu Mulagirizi ono tugenda kuyiga ku musango gwa Katonda ogusembayo ng'abantu basalirwa omusango "okusinziira ku ebyo bye baakola, nga bwe byawandiikibwa mu bitabo" (Kubikkulirwa 20:12). Eri abo abatannaba kukkiriza Yesu ng'omulokozi waabwe gajja kuba mawulire mabi. Naye omusango mawulire malungi eri abo abazudde Yesu ng'obuddukiro bwabbwe.

1. ENGERI GY'OSOBORA OKUYIMIRIRA MU MUSANGO NGA TOLINA KUTYA

Ani agenda okusalira ensi omusango?

"Era Kitaawe talina n'omu gw'asalira omusango wabula Omwana gwe yawa Okusala emisango gyonna." - Yokana 5:22.

Omusaalaba gwateekateeka gutya Kristo okufuuka omulamuzi waffe?

"Yesu oyo mu kufa kwe, yateekebwawo okuba amutango ogw'ebibi by'abamukkiriza… alyoke akakase mu kiseera kino, NGA BW'ALI OMUTUUKIRIVU, ERA NGA BW'AWA OBUTUUKIRIVU buli akkiriza Yesu." - Abaruumi 3:25, 26.

Okufa kwa Kristo ng'adda mu kifo kyaffe kimusobozesa okukola mu bifo byombi, ng'omulamuzi omwesigwa era ow'ekisa awa obutuukirivu era asobola okusonyiwa omwonoonyi eyeenenya. Eggulu n'ensi bitunuulidde ebintu bino nga bwe libuuza ekibuuzo nti; "Omulamuzi ow'amazima ayinza atya okujja omusango ku muntu oyo eyaguzza?" Kristo addamu ng'alaga ku nkovu ez'ebiwundu bye ebiri mu bibatu bye. Yafuna ekibonerezo ekituufu olw'ebibi byaffe mu mubiri gwe.

Ebitabo eby'omu ggulu bikuuma obuwandiike buno era bukozesebwa mu kusala omusango (Kubikkulilwa 20:12). Ago nno mawulire mabi eri abo abalowooza nti ebibi byabwe bya kyama tewali abimanyi, era n'omusango gwabwe tegugenda kudda okubayigga. Naye ate waliwo amawulire ag'ekitalo eri abo mu mazima akkiriza Kristo ng'omuwolereza wabwe mu ggulu: "Omusaayi gwa Yesu… gutunaazaako buli kibi" (1 Yokana 1:7).

Yesu atuwa ki okuwanyisa n'ebibi byaffe?

"Kristo ataalina kibi, Katonda yamufuula ekibi, ffe olw'okwegatta ne Kristo, tulyoke tufune obutuukirivu obuva eri Katonda." - 2 Abakkolinso 5:21.

Obulamu bwaffe obw'ekibi buwanyisibwa mu bulamu obutuukirivu obwa Kristo. Olw'obulamu obwa Kristo ataalina kibi era n'olw'okufa kwe, Katonda ayinza okutusonyiwa era n'okututwala ng'abatayoonoonangako.

Kiki ekimusaanyiza okubeera omuwolereza era omulamuzi waffe?

2. KRISTO YAJJIRA MU KISEERA

Ku kubatiza kwe Yesu yafukibwako amafuta n'Omwoyo Omutukuvu.

"Yesu bwe yamala okubatiza, amangu ago n'ava mu mazzi, awo eggulu ne libikkuka, n'alaba Mwoyo wa Katonda ng'akka ng'ejjiba, ng'ajja ku ye. Era eddoboozi ne liva mu ggulu, ne ligamba nti: "ono ye Mwana wange omwagalwa era gwe nsiimira ddala." - Matayo 3:16,17.

Ekyaddirira okufukibwako amafuta n'Omwoyo Omutukukuvu okwa Yesu Kristo ku kubatizibwa kwe, abayigirizwa be kwe kulangira nti:

"Messiya tumulabye." - Yokana 1:41.

Abayigirizwa baali bamanyi ekigambo ekyo ekyolwebulaniya "Messiya" era n'eky'oluyonaani "Kristo" byombi ebiteegeeza nti "eyafukibwako Amafuta."
Luka, omuyigiriza wa Yesu, yawandika ekiseera kya Yesu eky'okufukibwako Amafuta nga Messiya mu mwaka ogw'ekkumi n'etaano ogwa Kayisaali Tiberiya (Luk 3:1). Gyetuli, ogwo guba mwaka ogwa 27 AD.
Ng'ebula emyaka 500 nga Yesu tannaba kujja Nnabbi Danieri yakiranga nti Yesu yali wakufukibwako amafuta nga Messiya mu mwaka AD 27:

"Kasooka ekiragiro kifuluma okuzzayo n'okuzimba Yerusalemi okutuusa ku Afukibwako amafuta… walibawo Ssabbiiti musanvu; (olwebbulaniya wiiki) era walibawo Ssabbiiti nkaga mu ebiri." - Danieri 9:25.

Ssabbiiti omusanvu ne Ssabbiiti enkaga mu ebbiri bw'ozigatta awamu ojjamu Ssabbiiti (wiiki) nkaga mu mwenda oba ennaku 483. (7 x 69 = 483 ennaku). Mu bunnabbi bwa Bayibuli olunaku olumu lutegeeza mwaka gumu (Ezekieri 4:6; Kubala 14:34), bwe kityo ennaku 483 zenkanankana emyaka 483. Danieri yalaga nti ekiragiro kigenda kulagirwa ekyokuddayo n'ekyokuzimba Yerusalemi era ng'ekiragiro kino kimaze okuyita, emyaka 483 gigenda kuyitawo, olwo Messiya n'alyoka alabika.

Yesu yalabika nga Messiya ku kiseera kino ekyayogerwako? Alutagizeragizi yayisa ekirangiriro ekyokuddamu okuzimba Yerusalemi mu mwaka 457 BC (Ezera 7:7-26). Emyaka 483, gyaggwaako mu AD 27. (457 BC + 27 AD = 484.) Ekiragiro kyalangirirwa mu mwaka 457 BC era ne Kristo n'afukibwako amafuta mu mwaka 27 AD bw'ogatta ebitundu by'emyaka gino gyombi olwo ekiseera ekituufu kibeera emyaka 483.

Mu kiseera kyennyini ekyalangibwa, mu 27 AD, Yesu yalabika ng'alina obubaka obugamba nti "Ekiseera kituuse" (Mako 1:15) obutuufu bw'okutuukirira kw'obunnabbi bwa Bayibuli bwe bukakafu obw'amanyi nti Yesu ow'eNazaleesi ye Messiya yenyini, Katonda ng'ayambadde omubiri ogw'omuntu.

Yesu yali wakumala kiseera ki okunyweza endagaano?

"Era aliragaana endagaano ennywevu n'abangi okumala Ssabbiiti emu." - Danieri 9:27, ekindu ekisooka.

Bw'okozesa etteeka ery'olunaku okuba mwaka, Ssabbiiti eno emu (wiiki) ejja kubaamu emyaka musanvu (7) Bwe kityo emyaka musanvu giva mu mwaka AD 27 okutuusa AD 34 - Yesu yali "wakunyweza endagaano" oba ekisuubizo, kye yakola ne Adamu ne Kaawa mu lusuku Adeni nga kye bajje boonoone. Katonda yakola endagaano oba ekisuubizo, nti yali wa kulokola olulyo lw'omuntu okuva mu kibi ng'ayita mu omuntu omu gw'agenda okuweereza okufa olw'ebibi byaffe (Luberyeberye 3:15).

Kiki ekyali ekyokubeera mu makkati ga Ssabbiiti (wiiki)?

"Ne mu kitundu ekya Ssabbiiti alikomya ssaddaaka n'ekitone." - Danieri 9:27, ekitundu ekisembayo (mu lwebulaniya wiiki).

Yesu yakomererwa ku musaalaba mu AD 31 "mu makkati ga Ssabbiiti" (wiiki). Mu kiseera kyennyini eky'okufa kwa Yesu, Katonda yayuza "eggigi ery'omu Yeekaalu ebitundu bibiri okuva waggulu okutuuka wansi" (Matayo 27:51). Ssaddaaka ey'endiga ey'ekiweebwayo eyali egenda okuttibwa endiga (akabonero aka Yesu endiga ya Katonda) yava mu mikono gya Kabona n'edduka. Kano kaali akabonero akategeeza nti Katonda yali takyayagala muntu okuwaayo Ssaddaaka ez'ensolo.

Ng'amaze okutuukiriza obunnabbi bwonna bwamuwandiikibwako, Yesu "yakomya" okwetaaga kwonna `okulala okw'okuwaayo Ssaddaaka. Okuva ku kufa kwa Kristo, abantu kaakati batuuka eri Katonda si kuyita mu Ssaddaaka ez'ensolo yadde mu Kabona omuntu, naye bayita mu Messiya, endiga ya Katonda era Kabona waffe asinga obukulu.

3. OBUKAKAFU BW'EBIBI OKUSONYIYIBWA

Okusinziira ku bunnabbi bwa Danieri lwaki Yesu yafa?

"Oyo afukibwako amafuta n'alyoka azikirizibwa, naye si ku lulwe'." - Danieri 9:26.

Okufa kwe ku musaalaba, Yesu "yasalibwako" yafa, "naye si ku lulwe" si lwa kusasula kibonerezo eky'ebibi bye, naye olw'okusasula ekibonerezo eky'ebibi by'ensi yonna.

Tusobola tutya okutegeera nti Katonda asonyiye ebibi byaffe byonna?

"Bwe butuukirivu bwa Katonda, okuyita mu kukkiriza Yesu, eri bonna era ku bonna bakkiriza… Kubanga BONNA BAAYONONA… Katonda OLW'EKISA KYE, YABAWA OBUTUUKIRIVU bwa buwa kubanga baanunulibwa Yesu Kristo… OKUYITA MU KUKKIRIZA OMUSAAYI GWE." - Abaruumi 3:22-25.

Ensonga enkulu mu kyawandiikibwa kino ze zino: Ffe "ffena twayonoona" naye Katonda "olw'ekisa kye'' bonna "baweebwa obutukirivu" abalina "okukkiriza" mu kunaazibwa okw'amaanyi "okw'omusaayi" gwa Kristo. Bwe tuweebwa obutuukirivu, Katonda atulangirira nga abatalina musango, ng'ajjawo omusango ogw'ebibi byaffe ebyayita. Era Katonda atulangirira okuba abatukuvu "Olw'obutuukirivu obuva eri Katonda okuyita mu kukkiriza mu Yesu Kristo."

Ffe ffena abakooye olw'okufuba okuba abalungi ekimala, nga twegerageranya ku bwaffe ffekka, tusobola okufuna ekiwummulo mu kukkirizibwa okw'ekisa kya Kristo. Atusuubiza nti "Mujje gye ndi, mmwe mmwenna abakoze ne mukoowa n'abazitoowereddwa, nze nnaabawummuza." (Matayo 11:28). Ffe ffena abazitoowereddwa olw'enkovu (ez'ebibi) ebyayita era n'olw'okulumwa okw'obutaliimu bwaffe era n'obuswavu, tusobola okuzuula emirembe era n'obumativu mu Kristo.

4. EKISEERA EKY'OMUSANGO OKUTANDIKA

Mu ssuula ey'omunaana eya Danieri malayika yalaga nnabbi ekifaananyi ekinene eky'ekiseera eky'omu maaso. Danieri yalaba (1) endiga, (2) embuzi ensajja era, (3) mu limu ku jjembe ery'embuzi ensajja, mwavaamu "ejjembe eddala eryali ettono ne likuula mu buyinza." (Danieri 9:8,9). Obubonero obwo bulanga: (1) Obwakabaka bw'Abamedi n'Abaperusi. (2) Obwakabaka bwa Buyonaani, (3) Obufuzi bwa Ruumi (Danieri 8:1-12, 20-26)
Ekitundu eky'okuna eky'obunnabbi kyali kiki?

"Ebikwolesebwa eby'oku kiweebwayo ekyokebwa eky'ennaku zonna birituusa wa okubeerawo…? N'agamba nti birituusa amakya n'amawungeera (oba ennaku mu Lwebbulaniya) enkumi bbiri mu bisatu (2,300) awatukuvu ne walongosebwa." - Danieri 8:13,14.

Danieri yazirika nga Malayika tannaba kunnyonnyola kitundu kya bunnabbi eky'ennaku 2,300 essuula ey'omunaana eggwaako nga tekinnyonnyoddwa. Naye oluvannyuma malayika yaddamu okulabika era n'agamba bwati:

"Tegeera bye wayolesebwa: Ssabbiiti nsanvu (wiiki mu Lwebbulaniya) ziragiddwa olw'abantu bo (zisaliddwako, olwebbulaniya) n'ekibuga kyo ekitukuvu, okukomya okwonoona, n'okumalawo okusobya, n'okutabaganya olw'obutali butuukirivu." - Danieri 9:22-24.

Kitegeerekeka nti ennaku 2,300 gy'emyaka 2,300, buli lunaku lutegeeza mwaka (Ezekieri 4:6). Ssabbiiti ensanvu oba emyaka 490 ky'ekitundu ekisooka eky'emyaka 2,300. Ebiseera bino byombi byatandika mu mwaka 457 BC, Abaperusi bwe baayisa ekiragiro "eky'okuddamu okuzimba Yerusaremi." Bw'otoola emyaka 490 okuva ku myaka 2,300 wasigalawo emyaka 1,810. Bw'ogatta emyaka 1,810 ku myaka 34 AD emyaka 490 we gyakoma, ekyo kitutuusa ku myaka 1844 AD.

5. YEEKAALU EY'OMU GGULU OKULONGOOSEBWA KITEGEEZA OMUSANGO

Malayika yagamba Danieri nti mu mwaka 1844, ku nkomerero y'emyaka 2,300, "awatukuvu ne walongoosebwa" (Danieri 8:14). Naye kino kitegeeza ki? Okuva mu AD 70, Abaruumi bwe baazikiriza Yeekaalu mu Yerusaalemi, abantu ba Katonda tebabadde na Yeekaalu ey'oku nsi. N'olw'ekyo awatukuvu oba Yeekaalu ey'okulongoosebwa eyatandikibwa mu mwaka 1844 eteekwa okuba Yeekaalu ey'omu ggulu. Yeekaalu ey'oku nsi kwe yajja ekifaananyi.

Kaakati, okulongoosa Yeekaalu ey'omu ggulu kitegeeza ki? Mu Isiraeri ow'edda olunaku olw'okulongoosa Yeekaalu ey'oku nsi baaluyitanga olunaku olw'okutangirira (Yom Kippur). Lwali lunaku lwa kusala musango.

Nga bwe twakizuula mu ky'okuyiga ekye 12, omulimu gwa Kristo gw'akola mu ggulu ku lwaffe mu Yeekaalu gulimu ebitundu bibiri; (1) Ssaddaaka eya buli lunaku zalanga ku kuweereza kwa Kabona mu kifo ekisooka ekya Yeekaalu, ekifo ekitukuvu. (2) Ssaddaaka eya buli mwaka ekwata ku kuweereza kwa Kabona asinga obukulu, mu kisenge eky'okubiri ekya Yeekaalu, ekifo ekisinga obutukuvu (Baleevi 16).

Mu Yeekaalu ey'oku nsi abantu bwe baayatulanga ebibi byabwe buli lunaku buli kadde, omusaayi gw'ensolo ezattibwanga gwamansulirwanga mu nsonda ey'ekyoto ne gutwalibwa ne mu kifo ekitukuvu (Baleevi 4 n'essuula eyo 6). Bwe kityo mu ky'okulabirako, ebibi ebyayatulwanga buli lunaku, byateekebwanga mu Yeekaalu ne biterekebwa eyo.

Buli mwaka omulundi gumu ku lunaku olw'okutangirira Yeekaalu yonna yalongoosebwanga okuva mu bibi byonna ebyayatulwanga mu mwaka omukadde (Baleevi 16). Okukola okulongoosa kuno, Kabona asinga obukulu yakolanga omukolo ogw'enjawulo ogw'embuzi ewongeddwa eri Katonda. N'atwala omusaayi gwayo mu nda mu kifo ekisinga obutukuvu era n'amansira omusaayi guno ku ngulu ku Ssanduuko, okulaga omusaayi gwa Yesu, Omulokozi agenda okujja okusasula empeera ey'ekibi. Mu kabonero, Kabona asinga obukulu yaggyanga ebibi by'abantu ebyali byatuddwa ku Yeekaalu era n'abiteeka ku mutwe ogw'embuzi endala, eyo eyatwalibwanga mu ddungu okufa (Abaleevi 16:20-22).

Omukolo guno ogw'olunaku olw'omwaka olw'okutangirira gwalongoosanga Yeekaalu okuva mu bibi. Abantu baalutwalanga ng'olunaku olw'omusango, kubanga abo abaagaananga okwatula ebibi byabwe baatwalibwanga ng'abatali batuukirivu era "basalilwangako okuva mu bantu ba (Katonda)" (Baleevi 23:29).

Ekyo kabona asinga obukulu ow'oku nsi kye yakolanga ng'akabonero omulundi gumu buli mwaka, Yesu yakikola omulundi gumu olw'emirembe gyonna nga Kabona waffe asinga obukulu (Abebbulaniya 9:6-12).
Mu lunaku olukulu olw'omusango Yesu ajja mu Yeekaalu ebibi byonna ebyatuddwa eby'abantu abo abamukkiriza ng'Omulokozi waabwe. Singa twatula ebibi byaffe, mu kiseera ekyo, ajja kubisangula okuva mu buwandiike obw'ebibi byaffe emirembe gyonna (Bikolwa 3:19). Okuweereza kuno gwe mulimu ogw'omusango Yesu gwe yatandika mu mwaka 1844.

Mu mwaka 1844 ekiseera eky'omusango we kyatandikira mu ggulu, obubaka obw'essaawa ey'okusala omusango bwatandika okubuulirwa mu nsi yonna (Kubikkulirwa 14:6-7). Eby'okuyiga eby'omu maaso ebya ZUULA bijja kwogera ku bubaka buno.

6. OKWOLEKAGANYA AMAASO N'OBUWANDIIKE OBW'OBULAMU BWO MU MUSANGO

Okutandika n'omwaka 1844, Kristo ng'omulamuzi abadde nga yeekebejja obuwandiike bwa buli muntu eyali abaddeko ku nsi kuno okukakasa buli agenda okubeera mu bantu abanaalokolebwa bw'anajja omulundi ogw'okubiri. Ng'omulamuzi waffe, Yesu "asangula" (aggyawo) ebibi byonna eby'abatukuvu okuva mu biwandiiko eby'obulamu bwabwe mu ggulu (Bikolwa 3:19).

Erinnya lyo bwe lirijja mu musango kirikubeerera kyangu okwolekera obuwandiike obw'obulamu bwo - SINGA nga wamala okukkiriza Kristo ng'ali mu kifo kyo (omuyima wo). Era omusango gw'abatukuvu bwe gunaggwa, Yesu ajja kudda ku nsi okubawa empeera (Kubikkulirwa 22:12,14).

Weeteeseteese olw'okujja kwa Yesu? Oba olina ekintu kyonna ky'obadde omukweka? Olina enkolagana ennungi ey'obwesigwa n'oyo eyasuubiza nti:

"Bwe twatula ebibi byaffe, Katonda omwesigwa era omutuukirivu abisonnyiwa, era atunaazaako byonna ebitari bya butuukirivu." - 1 Yokaana 1:9.

Okwatula kitegeeza okukkiriza okworeka ebibi byaffe, era ne tukkiriza ekisonyiwo kya Katonda era ne tulaga obwetaavu bw'amaanyi ge n'ekisa kye.

Kabaka Frederick William ow'oluberyeberye bwe yali akyalira ekkomera mu Postdam yawuliriza abasibe bangi abaali beegayirira okusonyiyibwa. Abasibe bonna baalayira nti obuvunanyizibwa bw'okusibibwa kwava ku balamuzi abakyamu, abajulizi ab'obulimba, ne ku bawolereza abatategeera. Mu buli kasenge k'ekkomera ebigambo byebimu ebyo bye yasanganga eby'abasibe abataalina musango.

Naye yatuuka mu kasenge akamu omusibe waamu teyalina kigambo kya kwogera. Frederick yeewuunya era n'amusaagirako nti: "Ndowooza nawe baakusibira bwerere." Omusajja n'amuddamu nti: "Ow'ekitiibwa nedda, nze omusango gwansinga era ekyo ekibonerezo kye nkola kinsaanidde okukifuna."

Kabaka kyeyava akyukira omukuumi w'ekkomera n'amukowoola nti: "Jangu osumulule omumenyi w'amateeka ono, Mu bwangu nga tannaba kwonoona bantu bano abaasibirwa obwerere."

Tweteekateeka tutya olw'omusango? Tweteekateeka tutya olw'okuja kwa Kristo? Olw'okwatula okw'amazima nti: nze mu butuufu ngw'aniidde ekibonerezo eky'okufa olw'ebibi byange, naye omuntu omulala yatwala ekifo kyange era n'ansoonyiwa okusonnyiyibwa okw'ekyewuunyo.

Kaakano mu kiseera kino weeweeyo era buli kintu kyonna ekinaabaawo ojja kubeera n'enkolagana ey'amazima ne Kristo ey'amaaso ku maaso era n'omutima ku mutima eya mazima.