YESU BW'ANAAKOMAWO KU LULWO

Oluvanyuma olw'okumala emyaka egiwerako ng'ayisibwa bubi, Armando Valladares yali akozze, ng'alemadde okuva ku bulamu bwe obwasooka. Yali ng'akola ekibonerezo eky'obusibe obw'emyaka asatu (30) mu kkomera erye Castro olw'okuzannyira mu kkanisa ku lunaku olwa Christmas. Abakulu b'ekkomera, baamusiibya nga enjala. Bamubonyaabonya yaswaziibwa, naye yagaana okulekayo okukkiriza kwe.

Ekintu ekya muyamba okugenda mu maaso kwe kusuubiza kwe yalina wakati we n'omuwala omuvubuka erinnya lye Martha. Basisinkana era ne baagalanira mu kkomera. Omukyala ono yasikirizibwa nnyo okukkiriza kwe okugumu. Nga baakamala okugattibwa mu bufumbo obutuufu mu luggya lw'ekkomera Martha yawalirizibwa okuwang'angukira mu Miami.

Okwawukana kwabwe kuno kwali kwa bulumi. Naye Armando mu kyama yasobola okuwa omwagalwa we ekisuubiizo. Ku kapapula akatono ke yaalonda kwe yali awandiise ekisuubizo kye nti: "Ngenda kudda gyoli."

Omusibe ono yamalirira nti mu ngeri yonna ye ne Martha bagenda kukola ebirayiro byabwe mu kkanisa mu maso ga Katonda. Olunaku olumu obufumbo bwabwe bugenda kubeera nga bujjuvu. Yamugamba nti: "Bulijjo oli wamu nange."

Ekisuubizo kya Armando kyamukuuma ekiseera kyonna eky'emyaka gyonna egy'okuyisibwa obubi ekintu ekyandizikiriza ebirowoozo eby'abasajja abasinga obungi. Era ne kikuuma ne Martha okubeerawo. Omukyala yakolanga obutakoowa ng'assayo Omwoyo ku kisuubizo ky'omwami we. Teyaggwaamu ssuubi.

1. EKISUUBIZO

Ebiseera ebimu tukyasobola okukemebwa n'okwewunya, nti, ddala Kristo olunaku olumu alikka okuva mu ggulu n'ajja olw'okwegatta naffe okwekyewunyo. Nga twawukanye naye okumala ebbanga ddene! Enkomerero y'ensi ey'essanyu ng'ekomekkereza ebyafaayo by'ennaku eby'omuntu kikyasobola okulabika nga mawulire malungi nnyo agatakkirizikka. Naye waliwo ekintu kimu ekikuuma essuubi nga ddamu mu mitima gyaffe. Kye kisuubizo kya Yesu okudda. Nga Yesu tannaba kuddayo mu ggulu okuva ku bayigirizwa be, kino kye kisuubizo kye yakola:

"Omutima gwammwe tegweralikiriranga; mukkiriza Katonda, era nange munzikirize. Mu nnyumba ya Kitange mulimu ebifo bingi eby'okubeeramu. Singa tekiri bwe kityo, nandibagambye: kubanga ng'enda okubateekerateekera ekifo, ndikomawo nate ne mbatwala gyendi, nammwe mubeere eyo." - Yokana 14:1-3.

Nga Yesu tannaba kulinya mu ggulu, yakakasa abagoberezi be nti: "NDIKOMAWO NATE," Yasuubiza okudda era atwale abo bonna abamwesiga mu kifo eky'enjawulo ky'atuteekeddeteekedde. Ebyawandiikibwa ebitukuvu byogera ku kudda kwe omulundi ogw'okubiri kumpi emirundi 2,500. Ensonga ey'okudda kwa Yesu ku nsi kuno omulundi ogw'okubiri nkakafu nnyo ng'amazima gano nti yaliko ku nsi kuno emyaka nkumi bbiri egiyise.

Edda ennyo Katonda yasuubiza nti Kristo agenda kujja, omulokozi agenda okwetikka ebibi byaffe era atuwe okusonyiyibwa olw'ekibi ky'abantu. Ekisuubizo kino mu biseera eby'edda kyali kirabika nga tekisoboka kukkirizika eri abantu abaali babonyaabonyezebwa mu bulamu bwabwe. Naye Yesu yajja era n'afa ku musaalaba. Okusuubira kwatuukirira nga kwa kitiibwa okusinga n'abantu kye baali basuubira nti kisoboka. N'ekisuubizo ky'okudda kwe omulundi ogw'okubiri nakyo kijja kutuukirira. Tusobola okwesigama ku oyo atwagala, okudda era n'okukung'anya abo be yasasulira omuwendo ogutaggwaawo.

Okuyita mu kiseera kye kyonna eky'obusibe Armando yabbiriranga obugambo obuyiiye n'obubaka n'obufaananyi n'abuwerezanga Martha. Era Martha yasobolanga obusasanyanga, mu bantu. Era ebigambo byabwe byasikkiriza ensi. Era Gavumenti nnyingi zannyigiriza ekkomera lye Castro okuta abasibe abaali batawanyizibwa. Omukulembeze w'eggwanga lya Bufaransa yabiyingiramu, era eky'enkomerera mu October mu mwaka 1982, Armando yaateekebwa ku nnyonyi eyali egenda mu Paris. Kino kyamukalubirira okukkiriza nti yali ateereddwa - n'ennyonyi gye yalimu ne bweyatuuka ku kisaawe nga ye takikkiriza.

Newankubadde byali bwe bityo, oluvanyuma olw'okubonnabona emyaka 20 egy'obwetaavu n'okulindirira Armando yatwalibwa mu mikono gya Martha.
Nga wayiseewo emyezi mitono abantu bano bombi, nga bajjudde essanyu baayimirira mu Miami mu kkanisa y'Omutukuvu Kierau ne baddamu okukola ebirayiro byabwe. N'ekyasembayo obufumbo bwabwe bwa malirizibwa. Ekisuubizo ekyali kigamba nti Ndikomawo gyoli kyatukirizibwa.

Osobola okukuba akafaananyi obwegaffu obw'ekitalo bwe buliba, enkomerero bwetulitunuragana ne Yesu amaaso n'amaaso? Okulabika kwe okw'ekitiibwa kugenda kumalawo ennaku yaffe era n'okulemwa kwaffe, kugenda kumalawo obulumi bwonna obuli mu mitima gyaffe. Okudda kwe Yesu kugenda kumatiza okwetaaga kwaffe okugenda ewala ennyo. Era kuliba essuubi eriisingira ddala okutukyamula. Era kugenda kutuyingiza mu bwegaffu obw'omukwano ogw'emirembe gyonna nga tuli n'omuntu w'ekitalo enyo mu ggulu ne ku nsi. Yesu ajja mangu! Oyagala nnyo okumusisinkana?

2. YESU AJJA ATYA?

(1) Yesu alijja mu kyama?
"Laba (nze Yesu) mbalabudde. Kale bwe babagambanga nti laba, ali mu ddungu: temufulumanga; laba ali mu bisenge munda; temukkirizanga. Kubanga ng'okumyansa bwe kuva ebuvanjuba, ne kulabikira ebugwanjuba; bwe kutyo bwe kuliba okujja kw'Omwana w'omuntu." - Matayo 24:25-27.

Okumyansa bwe kumyansa kulabikira mu bbanga ddene, bwe kutyo n'okujja kwa Yesu bwe kuliba; si kwa kyama yadde si kwa mu birowoozo.

(2) Yesu alidda omulundi ogw'okubiri nga muntu ddala?
"(Abagoberezi ba Yesu) bwe baali beekaliriza amaaso mu ggulu bw'agenda, laba, abantu babiri ne bayimirira kumpi nabo nga bambadde engoye ezitukula: abayogera nti abantu b'e Galiraya kiki ekibayimirizza nga mulaba mu ggulu? Oyo Yesu abagyiddwako okutwalibwa mu ggulu alijja bw'atyo nga bwe mumulabye ng'agenda mu ggulu." - Bikolwa 1:10-11.

Ku lunaku lwe olw'okudda mu ggulu okuva ku nsi kuno, bamalayika baakakasa abatume nti; Yesu y'omu atwaliddwa mu ggulu, so si mulala - agenda kudda mu buntu bwe nga Kabaka wa bakabaka. Yesu oyo y'omu eyawonyanga abalwadde era n'azibula n'abazibe b'amaaso. Yesu oyo yennyini eyaayogera ebigambo eri omukyala eyakwatibwa mu bwenzi. Yesu y'omu oyo eyasangula amaziga g'abakungubazi era eyawambaatira abaana mu kifuba kye. Yesu y'omu oyo eyafa ku musaalaba eyasula mu ntaana era ku lunaku olw'okusatu n'azuukira okuva mu bafu.

(3) Yesu alijja naffe tulisobola okumulaba?
"Laba ajja n'ebire, ERA BULI LIISO LIRIMULABA." - Kubikkulirwa 1:7 (ekitundu ekisooka).

Abantu bonna abalamu, abatuukirivu era n'aboonoonyi bagenda kulaba okujja kwe. Yesu yennyini agamba nti: abantu bameka abalimulaba?

"Awo lwe kalirabika akabonero ak'omwana w'omuntu mu ggulu; n'ebika byonna eby'ensi lwe birikuba ebiwoobe, bariraba Omwana w'omuntu ng'aja ku bire eby'eggulu n'amaanyi n'ekitiibwa." - Matayo 24:30.

Buli muntu yenna omulamu ali ku nsi agenda kulaba Yesu.

(4) Ani aliweerekera Yesu ng'ajja?

"Naye omwana w'omuntu bwalijjira mu kitiibwa kye ne bamalayika bonna (nga bali) naye, awo bw'alituula ku ntebe ey'ekitiibwa kye." - Matayo 25:31.

Kuba akafaananyi kiriba kitya Yesu bw'anaakomawo n'ekitiibwa kye kyonna nga kimwetoloode n'ebamalayika be bonna.

(5) Tusobola okumanyira ddala essawa n'olunaku Yesu gy'aliddirako?
"Naye eby'olunaku luli n'ekiseera tewali abimanyi, newankubadde bamalayika ab'omu ggulu, newankubadde omwana wabula Kitange yekka... Mukale nammwe mweteeketeeke, kubanga mu kiseera kye mutalowoolezamu Omwana w'omuntu ky'alijjiramu." - Matayo 24:36, 44.

Buli muntu ajja kulaba okujja kwa Yesu okw'ekitibwa, naye bangi bagenda kuba nga tebamweteekeddeteekedde. Ggwe ku bubwo weeteeseteese olw'okujja kwa Yesu?

3. KIKI YESU KY'ANAAKOLA BW'ANAJJA OMULUNDI OG'OKUBIRI?

(1) Agenda kukung'anya abantu bonna abaalokolebwa (abalonde).
"Era alituma bamalayika be n'eddoboozi ddene ery'ekondere, nabo balikung'anya abalonde be mu mpewo ennya, okuva ku nkomerero y'eguulu okutuusa ku nkomerero yalyo." - Matayo 24:31.

Singa ng'okkiriza Yesu okuteekateeka omutima gwo n'obulamu bwo, ogenda kumwaniriza mu ssanyu ng'omulokozi.

(2) Yesu ajja kuzuukiza abafu abatuukirivu.
"Kubanga Mukama waffe yennyini alikka okuva mu ggulu n'okwogeera waggulu n'edooboozi lya malayika omukulu n'ekondere lya Katonda, nabo abafiira mu Kristo be balisooka okuzuukira." - 1 Basesalonika 4:16.

Yesu ajja kukka okuva mu ggulu n'okwogerera waggulu. Eddoboozi lye ery'ekitalo ligenda kuwulirwa okwetoloola ensi yonna. Era okwogera kwalyo kuggulawo entaana era ne lizuukiza obukadde n'obukadde bw'abantu abaafa nga bakkiriza Yesu okuyita mu mirembe gyonna. Nga ssanyu liriba lya kitalo nnyo!

(3) Ku kujja kwe Yesu agenda kufuusa abatukuvu bonna si batukuvu abafu bokka - naye n'abatukuvu abalamu.
"Naffe abalamu abasigalawo ne tulyoka tutwaliba wamu nabo mu bire okusisinkana Mukama waffe mu bbanga, kale bwe tutyo tunabeeranga ne Mukama waffe ennaku zonna." - 1 Basesalonika 4:17.

Olw'okuteekateeka okubeeranga naye emirembe n'emirembe. Yesu agenda kukyusa emibiri gyaffe gino egifa mu mibiri egy'ekittiibwa egitafa.

"Laba mbabuulira ekyama, tetulyebaka ffena, naye ffena tulifuusibwa, mangu ago, nga kutemya kikowe, akagombe ak'enkomerero bwe kalivuga, kubanga kalivuga n'abafu balizuukizibwa obutavunda, naffe tulifuusibwa kubanga oguvunda guno kigugwanira okwambala obutavunda, n'ogufa guno okwambala obutafa." - 1 Abakolinso 15:51-53.

Yesu bw'anajja, "tujja kufuusibwa." Kirowoozeko okumala akaseera. Tewakyali kabootongo, tewakyali kukozimba, yadde kokolo. Amalwaliiro gaggalidwawo n'okuziika tewakyali Kristo azze.

(4) Yesu ajja kutwala abatukuvu bonna mu ggulu.
Yesu yennyini yasuubiza nti, "Ndikomawo nate ne mbatwala gyendi mubeere nange" mu nnyumba ya Kitange (Yokana 14:1-3). Petero ayogera ku busika obw'abanunule (1 Petero 1:4). Tukyasobola okulindirira okulambula ekibuga kya Katonda eky'ekyewuunyo. Yerusalemi ekiggya era n'okulaba Kitaffe ow'omu ggulu.

(5) Yesu agenda kuggyawo ekibi era n'okubonaabona eky'ekiseera kyonna. Ababi b'ebo abajeemera okukkiriza ekirabo kyonna eky'ekisa kya Yesu - mu butuufu bagenda kwesalira bokka omusango. Bwe balitunuulira mu maaso ga Yesu ng'ajja gye bali ku bire. Olw'okutegeera ebibi byabwe bigenda kubalumya nnyo okubyetikka era balikaabirira ensozi era n'amanyinja nti, "Mutuggweeko mutukise mu maaso g'Oyo atudde ku ntebe, ne mu busungu bw'Omwana gw'endiga" (Kubikkulirwa 6:16). Balyegomba okufa okusinga okuyimirira mu maaso ga Yesu alaba byonna.

Bakimanyi nti eddoboozi kaakano eribwatuka okuva mu bire olunaku olumu lyabeegayiriranga okukkiriza ekisa kya Katonda. Abo abaabuza obulamu bwabwe nga banoonya ensimbi mu makubo agatali mattufu, oba amasanyu, oba kufuna buyinza mu kiseera kino balikitegeera nti baagayalirira eky'obugagga eky'omugaso ekisinga byonna eky'obulamu.

Kuno kuliba kuzikirira. Newankubadde ng'ebyo biribeera bwe bityo, tewali n'omu eyayagala okuzikkirira. Katonda yennyini talina ssanyu mu kufa kw'ababi (Ezekieri 33:11). "Tayagala muntu yenna kubula, naye bonna batuuke mu kwenenya" (2 Petero 3:9). Yesu atwegayirira nti, "Mujje gyendi mmwe mmwenna abakooye era abazitoweereddwa, nange nnabawummuza" (Matayo 11:28). Naye kino tekkikkirizika, abantu abamu bagana okuyita kwe kuno okw'ekisa.

4. WEETESETEESE OKUSISINKANA YESU BW'AKOMAWO?

Yesu kyamutwalako kinene okusobola okutukakasa ekiseera eky'omu maaso nti, "Muyumba ya Kitange mulimu ebifo bingi." Okukikola kyamutwalako bulamu bwe "Era ne Kristo bw'atyo bwe yamala okuweebwayo omulundi ogumu okwetikka ebibi by'abangi alirabika omulundi ogw'okubiri awatali kibi eri abo abamulindirira olw'obulokozi." - Abebbulaniya 9:28.

Omulokozi eyafa ku musaalaba okuggyawo ebibi byo ajja kukomawo "Omulundi ogw'okubiri era ajja kuleeta obulokozi eri bonna abamulindirira." Kristo yeewaayo okukomererwa alyoke awe buli kinnomu ku ffe obulokozi. Naye awatali kudda kwe omulundi ogw'okubiri omusaalaba gwe guba tegulina mugaso. Kristo ayagala okutuwa amaka ag'emirembe gyonna nga tuli awamu naye. Kino okubaawo tuteekwa okumukkiriza okufuga emitima gyaffe ng'omulokozi waffe era Mukama waffe kaakako.

Ku lunaku olwa August 16 omwaka 1945, mu bukiika obwa kkono obwa China, omulenzi omuto yadduka emisinde ng'ayita mu kisaawe e Shanturg, nga bw'aleekanira waggulu nti yali alabye ennyonyi mu bire. Abantu bonna abaali beesobola abaali basibiddwa mu nkambi baafuluma era ne batunula waggulu. Abaami bano, n'abakyala bano baali baabonaabona dda emyaka mingi egy'okwawulibwa okuva ku bantu baabwe, n'okujjibwako ebyabwe, okweralikirira, nga basibiddwa Abajapani olw'okuba abatuuze ab'eggwanga ery'omulabe. Eri abangi ekintu kimu kyokka ekyabakuuma nga balamu mu Mwoyo, lye essubi nti olunaku lumu olutalo lugenda kuggwa.

Abantu 1,500 abaali abasibe abaali basibiddwa bwe bakitegeera nti ennyonyi eno yali esobola okuba ng'ezze kuddukira bo. Ng'eddoboozi ly'ennyonyi ligenda lyeyongera okuvuuma, omu ku bo n'ayogera nti, "Laba, ebendera ya America esigiddwa ku ludda olumu olw'ennyonyi." Era nate nga n'okulowooza kubaweeddemu mu butakkiriza eddoboozi ne ligamba nti, "Laba, abali mu nnyonyi batuwubira emikono. Batumanyi, bazze kutunona."

Mu kiseera kino essanyu lyassukirira abantu bano abaali bakyasigaddewo. Abantu baagwa eddalu. Abantu batandika okudduka nga beetoloola, nga bawogganira waggulu nga bawuuba emikono gyabwe ate nga bwe bakaaba.

Amangu ddala abantu bakitegeera era n'ebasirika ne bateeka. Olugi olwa wansi olw'ennyonyi amangu ddala lweggula era abantu batandika okuvaamu nga bakka ne Paracuti. Abanunuzi baabwe baali nga tebakyali ba kujja olunaku olumu oluli eyo mu maaso, naye baali bazze ku lunaku olwo lwennyini. Mu kiseera ekyo baali nga bali awo mu maaso gaabwe.

Abantu beeyongera okukung'ana ku mulyango gw'ekisaawe. Tewali n'omu eyayimirira okulowooza ku mundu seruwandula masasi eyali ebatunuulidde ng'eva ku kitikkiro kyenju. Nga bamaze emyaka mu bunaku, olw'okubeera bokka, bayita mu lugi ne badduka okutuuka abanunuzi abajjira mu nnyonyi we baagwa.

Mu bwangu ddala nnamungi w'omuntu ono yakomawo era ne badda mu nkambi yaabwe nga beebagadde, abaserikale ku bibegabega byabwe. Omukulu eyali akuuma enkambi eyo yeewayo yekka awatali kulwana. Mu butuufu ddala olutalo lwali luwedde. Eddembe lyali lizze. Ensi yafuuka mpya.

Mu bwangu ddala Katonda waffe, omulokozi waffe ajja kukka okuva mu bire okutununula. Ebyafaayo ebiwanvu eby'entiisa eby'obukambwe bw'omuntu eri muntu munne bijja kukomezebwa. Wajja kubeerawo okusanyuka ku lunaku olwo, okwogerera waggulu okw'essanyu, nga n'ekisembayo olwo ne tutegeera nti, "Okujja kwe kusembedde, nsobola okulaba nga bamalayika nga bafuuwa eng'ombe zaabwe." N'eddoboozi ly'ekkondere lyeyongera okuleekana. Ekire eky'ekittiibwa kyeyongera okumasamasa okutuusa lwe kinaaba nga tekikyaggumikirizika. Naye tetuteekwa kuyimirira nga tutunla butuunuzi nga bwetukitegedde nti, "Andaba, Amaanyi nga bwendi." Tugenda kutegera nga tulina essanyu eritannyonnyolekeka: ONO ye Katonda wange, "Ajja ku lwange, si lunaku lulala, naye olwa lero, mu kiseera kino kyennyini."

Weeteeseteese okwaniriza Kabaka mu kitiibwa kye? Oba nga si bwe kityo, nsaba oyite Yesu yennyini mu buntu ajje mu bulamu bwo kaakano. Ng'okujja kwa Yesu bwe kugenda okumalawo emitawaana egy'ensi, bwe kityo mu ngeri y'emu okujja kwa Yesu mu mutima gwo kujja kukuyamba mu bizibu byo ebya buli lunaku. Yesu omugonjoozi w'ebizibu omukulu asobola okukuwonya okuva mu kusingibwa omusango ne mu mugugu ogw'ekibi, era n'akuwa obulamu obutaggwaawo.

Okujja kwa Yesu mu bulamu bwo kusobola okukukyusa emirembe gyonna, mu ngeri y'emu ng'okujja kwe mu nsi bwe kugenda okugikyusa ddala. Okyasobola okwesigama ku Yesu. Ajja kukuteekateeka olw'okujja kwe omulundi ogw'okubiri era ajja kukuwa obukakafu obw'obulamu obw'emirembe ne mirenbe ate obusanyufu.