Hato U Blei U Don Ka Khubor Ba Kyrpang Ia Ki Sngi Jong Ngi?

Ia u Ramon Umashankar la kha ha ing Brahmin. Ki rangbah ki la hikai ia u naduh dang rit ba u dei u blei, bad khnang ba un sngewthuh ia ka jinglong blei u dei ban kilan yoga bad puson jylliew shaphang U Blei. Hynrei kum u khynnah, u Ramon u la sdang ban mutdur lada u lah shisha mo ban shem ia U Blei lyngba ka jingmane ia ki bleithaw ba bun jait bun rukom ha temple ki Hindu.

U Ramon u la sdang ban eksamin ia ka Baibl bad ia ki jingdawa jong U Khrist. Barobor u la ju burom ia U Jisu namar ka jinglehrit jong u, hynrei mynta u Ramon u la iohsngew ba une U Jisu U kam ba U dei U Khun bamarwei jong U Blei. Bad u la iohi ba kiba bun ki Khristan ki don ka jingsuk kaba ka jingpuson jylliew da ka bun snem kam lah ban pynmih. Pynban, u Ramon u thmu skhem ban wad jingshisha ha ka niam Hindu la jong.

Hynrei u la iohi ia ka phlim shaphang ka jingim U Khrist. Ka sien nyngkong u sngewthuh ba U Jisu U la iohmad ia ka jynjar ka shitom bad jingtieng kum u briew. Mynshwa kane u ju pyrkhat ba U Jisu U pyndonkam da ka bor blei jong u ban lait na ka jingpang jong ka jingshah sahnarphna. Hynrei mynta, um lah shuh ban sngewthuh ia ka diengphna. U la sngewphylla: Kumno une U Jisu U lah ban shah kat kata ka jingiakynduh bashyrkhei __ na ka bynta ki nongpop?

Katba u Ramon u iai puson ia ka jingiap U Khrist, la tyllep lin ia u da kum kata ka jingpyni jong ka jingieit. U la rai kut ban iehnoh ia kata ka kyrdan Brahmin bad pynphai noh ia la ka jingim sha U Jisu, U Nongpynim. Haba ianujor bad ka jingieit bakheinduh jong U Khrist, u Ramon u la ong, "Kiei kiei baroh ki la shu pra lyngkhot lyngkhai."
Une u Brahmin samla u la shem ia ka jingshisha ba shongpdeng jong ka jingngeit Khristan. U Jisu, U Nongpynim jong ka pyrthei.

1. KANO KA NIAM KABA PYNIM?

U Jisu U long ka Lynti __ kaba tang kata hi __ jong ka jingpynim.

"Bad ym don ka jingpynim hano hano ha uwei pat; naba ym don kawei pat Ka Kyrteng hapoh ka bneng ia kaba la ai hapdeng ki briew, da kaba ka dei ba yn pynim ia ngi." Ki Kam. 4:12.

Ka Baibl ka hikai ba ngi long kiba la jah ha ka pop, bad ngi la dei ban siew ia ka kuna jong ka pop: Ka jingiap (Rom 6:23). Baroh ki la leh pop (Rom 3:23), kumta baroh la dei ban iap. Bad U Jisu U long Uta __ Uba tang ma U hi __ Uba lah ban pyllait ia ngi na ka jingpynrem jong ka pop.
"U briew baroh uba iohi ia U Khun bad uba ngeit ha U, un ioh ka jingim bymjukut, bad ngan pynmih pat ia u ha ka sngi khatduh." Ioannis 6:40.
Ka don tang kawei ka niam kaba shisha"

"Uwei U Trai, kawei ka jingngeit, kawei ka jingpynbaptis." Ephesos 4:5.

2. HATO U BLEI U DON KA KHUBOR BAKYRPANG IA KI KHRISTAN HA KI SNGI KHATDUH?

H'oid. Ka khubor jong ki lai angel Jingpynpaw 14:6-16. Ka jingpynbna ia ki khubor ba la ai da kine ki lai angel kan kut bad ka jingwan arsien U Jisu (dkhot 14-16).

(1) Ka khubor u angel uba nyngkong.
"Bad nga la iohi ia uwei pat u angel uba her hapdeng ka bneng, uba don ka gospel bymjukut ban iathuhkhana ha kita kiba shong halor kata ka khyndew, bad ha ki kynja bynriew bad ka jait bad ha ka thylliej bad u paidlang baroh; bad u da ong, To sheptieng ia U Blei, bad to ai ka burom ha U; naba la wan ka por ka jingbishar jong U; bad to phin ia mane dem ia Uta Uba la thaw ia ka bneng bad ia ka khyndew, bad ia ka duriaw bad ia ki pukri um." Jingpynpaw 14:6,7.

Wat la ki Jingthoh ki pynpaw ia kine ki lai ki khubor da ki pharshi jong ki lai angel, ki nongrah khubor shisha ki dei ki briew jong U Blei kiba leit ialap shisha sha ka pyrthei. Kim shym ialap ia ka gospel kaba thymmai hynrei ka "gospel bymjukut" sha satlak ka pyrthei __ "Sha kawei pa kawei ka jait bynriew, ka jait, ka thylliej, bad u paidlang." Ka gospel bymjukut jong U Jisu ka dei ka juh ka khubor jong ka jingpynim kaba ki briew jong Ka Testament Barim ki la pdiang "da ka jingngeit" (Hebrew 3:16-19; 4:2; 11:1-40); ka juh ka jinghikai ka ba U Jisu da lade hi U la pynbna; ka juh ka gospel ba ki synran ki la ialap ban jop ia ka pyrthei na ka bynta U Khrist; kajuh ka gospel kaba la sawa jam lyngba ki spah snem jong ka juk Khristan.

Ka gospel U Jisu Khrist kaba pynim bad kaba suk ban sngewthuh ka la jan jah na ka balang palat ia ka shi hajar snem ha ki Arta Badum, hynrei ka Jingpynthymmai ka la pynkhie im ia ka, bad ki briew jong U Blei ki ialap ia ka sawdong ka pyrthei mynta. Une u angel uba nyngkong u pynbna ia kajuh ka khubor, hynrei la ai ia ka na ka jaka kaba thymmai __ kaba kynthup ia ka pyrthei baroh kawei __ ia ki briew ki ba im shwa ba U Jisu Un wan arsien.

Kito kiba pdiang ia kane ka khubor ki shem ia lade ba la khot ia ki ban "sheptieng ia U Blei bad ban ai ka burom ha U (pynpaw ia ka jinglong jong U)". Ki pyni ia ka pyrthei ia ka jinglong baieit U Blei, ym tang da ki ktien jong ki, hynrei da ka jingphla ka jingim jong ki. Ki ai ia ka jingpynpaw ba pynkyndeh mynsiem ia kaei ba U Blei U lah ban leh lyngba kito kiba la dap da U Mynsiem U Khrist.

Lano ia ki khubor jong kine ki lai angel yn ialap ha ka pyrthei baroh kawei? Mynno la wan ka por ka jingbishar U Blei. Ka Guide 13 ka pynshai ba U Jisu U la sdang ia ka kam ka jingbishar shwa ka jingwan arsien ha u snem 1844. Ha uta u juh u snem, 1844, U Jisu U la pynkhih ia ki briew ha kylleng ka pyrthei ban sdang ialap ia ka khubor jong ka Jingpynpaw 14.

Kata ka khubor ka khot ia ngi ban "mane dem ia Uta Uba la thaw ia ki bneng (bad) ia ka khyndew" (Jingpynpaw 14:7). U Blei U la phah ia ngi ban "kynmaw ia ka sngi Sabbaton da kaba sumar khuid ia ka" (Eksodos 20:8-11). Ha u 1844 mynba u Darwin u la pynmih ia ka jinghikai ba kiei kiei baroh ki long hi, U Blei U dang khot ia ki briew ban mane dem ia U kum U Nongthaw. Ha kata kajuh ka por, kito kiba ialap ia ki khubor jong ki lai angel ki la shem ia ka Sabbaton ka sngi ka ba hynniew jong ka ktien U Blei bad ki la sdang ban sumar ia ka da kaba burom ia U Nongthaw ka bneng bad ka khyndew.

(2) Ka Khubor u Angel u Baar.
"Bad u angel u baar u la bud u da ong la kyllon, la kyllon ka Babilon, kata ka nongbah ka bakhraw, kaba la pyndih ia ki kynja bynriew baroh na ka wain ka jingkhih bitar ka jingklim sih jong ka! Jingpynpaw 14:8.

U angel u baar u maham, "la kyllon ka Babilon bakhraw." Ka Jingpynpaw 17 ka batai bniah ia ka "Babilon" ba kynja mynsiem __ ka jingngeit Khristan ba phaidien __ kum ka nuti (dkhot 5). Ka long marpyrshah ia ka briew kaba sngur jinglong jong ka Jingpynpaw 12 kaba ieng pharshi ia ka balang Khristan kaba shisha. Ka briew kaba ieng pharshi ia ka Babilon ka dei ka briew kaba la kyllon kaba "la pynlong ia ki kynja bynriew baroh ban dih na ka wain ka jingklim sih jong ka." Ka wain jong ki jinghikai lamler jong ka ki la iakhleh lang bad kine ki niam ba la khot Khristan kiba la pdiang ia ki jinghikai ba bakla jong ka. Ka khubor jong u angel u baar ka khot ia ki briew jong U Blei ban ialeh pyrshah ia kita ki jinghikai lamler jong ka balang kaba phaidien.

Ka Babilon ka iengpli ia ki babun ki niam ba la phaidien bad ba pyniakhleh ia ki jinghikai ka Ktien U Blei bad ki rukom ki dustur ki nongmane bleithaw. Ka long kaba ma shi katdei namar ba ka kren ne hikai kyllain ban pynsniew ia ka dur jong U Blei sha kaei kaei kaba bakla: kum U Blei Uba pynhiar kput bad ba dawa palat, lane U Blei kum U Kparad uba bha palat ban pynwit ne pynsngewsih iano iano shaphang ka pop. Ka balang kaba bha kan pyni ia ki jinglong baroh jong U Blei bad pynpaw kumno ka hikai bad ka jingisnei jong U ki iasoh lang ha ka jingshisha ba U Blei U long ka jingieit.

U Blei U khot ia ki briew ban mih noh na Babilon (Jingpynpaw 18:4), ban kyntait ia ki jinghikai kiba ym iadei bad ka Baibl, bad ban bud ia ki jinghikai U Khrist.

(3) Ka khubor U Angel u Balai.
"U angel u balai u la bud ia ki u da ong da ka ktien bajam, lada uno uno ruh u mane dem ia uta u mrad khlaw bad ia ka dur jong u, bad un pdiang ia kata ka dak halor ka shyllangmat jong u lane halor ka kti jong u, uta ruh un dih na ka wain ka jingbitar lep U Blei ia kaba la khreh khlem da pynkhleh ha kata ka khuri ka jingot shla jong u; kim ioh kaba shongthait mynsngi bad mynmiet kiba ia mane dem ia uta u mrad khlaw bad ia ka dur jong u, bad jar uba pdiang ia kata ka dak ka kyrteng jong u. Hangne ka don ka jingiaishah jong kita ki riewkhuid, kita kiba sumar ia ki hukum U Blei bad ia ka jingngeit U Jisu." Jingpynpaw 14:9-12.

Ka khubor jong u angel u balai ka pynbynta ia ka pyrthei baroh kawei ha ki ar bynta ne ar kynhun. Ha kawei ka liang ieng ki Khristan baphaidien kiba "mane dem ia u mrad khlaw bad ia ka dur jong u bad ki pdiang ia ka dak jong u ha shyllangmat lane ha ka kti." Ha kawei pat ka liang ieng kito kiba kyntait ia ka iktiar jong u mrad khlaw, ki "riewkhuid kiba kohnguh ia ki hukum U Blei bad ba iaineh ha U Jisu."

Peit bha ia ka jingiapher hapdeng ki ar kynhun kiba iapyrshah. Kito kiba pdiang ia ka dak u mrad khlaw ki dei ki nongmane ba wad ban pyniajan ia ki jinghikai ka Ktien U Blei bad ki jinghikai briew, kiba kham lah ka jingbit jingbiang para briew ban ia U Blei. Ki "riewkhuid" ki don ka jinglong ba pyniapher ia ki: "kiba iaishah slem," kiba "sumar ia ki hukum U Blei," bad ki long kiba "iaineh ha U Jisu."

Hadien ba la dep ialap ia kine ki lai khubor ha satlak ka pyrthei, U Jisu Un sa wan ban "lum" ia kiba la pynim:
"Bad nga la iohi, te ha khmih u lyoh balieh; bad halor uta u lyoh u da shong kum U Khun u briew, uba don halor ka khlieh jong u ka pansngiat ksiar, bad ha ka kti jong u ka rashi banep. Bad uwei pat u angel u la mih noh na ka ing U Blei, u da pyrta da ka ktien bajam ha uta uba shong halor uta u lyoh, To phah noh ia kata ka rashi jong me, bad to ot; naba kata ka aiom ban ot ka la wan, naba kata ka jingot ha khyndew ka la ih rkhiang. Te uta uba shong halor uta u lyoh u la buh ia kata ka rashi jong u halor kata ka khyndew; kumta la ot ia kata ka khyndew." Jingpynpaw 14:14-16.

3. KA BALANG U KHRIST HA KI SNGI KHATDUH

Phi burom ne em ia u Khristan uba skhem bakhlain, phi sngewphylla ia ka jingaiti, ka jingiaishah, bad ia ka jingngeit jong u ne jong ka, bad thrang ia ka jingiashem bakynja mynsiem kaba kum kata? U Blei U la ai ia ka khubor bakyrpang jong U na ka bynta ki sngi jong ngi ha ka Jingpynpaw 14 namar ba ka lah ban pynmih ia ka jingiakynduh kaba kum kata.

Kumba la ia pule ha ka Guide 25, Jingpynpaw 12:17 ka kdew sha ki Khristan jong ki sngi khatduh kum "Kito kiba kohnguh ia ki hukum U Blei bad bat skhem ia ka jingphla U Jisu." Jingpynpaw 14:12 ka iathuh ia ka juh ka kynhun kum ki "riewkhuid kiba kohnguh ia ki hukum U Blei bad kiba iaineh ha U Jisu."

To ngin iathuh lyngkot ia ki jinglong jong ki Khristan ha ki sngi khatduh:
(1) Ki "bat skhem ia ka jingphla U Jisu." Wat haba u Soitan u la pynmih lut ia ka jingbitar jong u halor jong ki, "Ki iai long kiba shisha ha U Jisu." Ka jingngeit jong ki kam dei kaba ki shu thaw hi, ka dei ka jingai U Blei (Eph. 2:8). Ka balang ba khatduh jong U Blei ka iohi da kaba kham shai ia ka jinglong bashisha jong U bad da ka jingaiei lyngba ka jingngeit ki long ka jingpynkynmaw ia ka bor jong ka jingwan shong U Khrist hapoh jong ki.
(2) Ki "ri . . . ia ka jingngeit U Jisu" (Jingpynpaw 14:12). Ka jingngeit kaba U Jisu U la don, ka jingngeit kaba u la hikai, ka jingngeit da kaba u la im, mynta ka pyndap ia ki dohnud jong ki. Ym tang ba ki don ia ka jingshisha ki "ri" ia ka jingshisha __ ki da bud ia ka. Ha ki ka niam ka dei ka jingim, ka jingngeit ka ia iaid lang bad ki jingleh, bad ka jingngeit ka iasynrop bad ka jingkohnguh. Ki im ia "ka jingngeit U Jisu." Ki la shem ba ki jinghikai bakhraw jong ka Baibl, kaba pyniadei bad ka jingim ba man ka sngi, ka pynmih ia ka jingim Khristan kaba donbor. Ki la shem ba kine ki jingshisha bakhraw jong ka Baibl ki pynkyndit ia ka jingieit bad jingaiti ha U Khrist kaba pynhun ia kawei pa kawei ka jingthrang jong ka dohnud briew.
(3) Ki "kohnguh ia ki hukum U Blei" __ ki 10 hukum, ka ain babha jong U Blei. Ki kwah khamtam eh ban kohnguh ia kawei pa kawei ka jingkwah jong U Blei, ia kawei pa kawei ka hukum. Ki pyni ia ka jingieit jong ki ia U Blei bad ia ki parabriew da kaba sumar ia ki hukum baroh, kaba kynthup ia ka hukum ka basaw kaba iathuh ia ngi ban mane ia U Blei Nongthaw da kaba rakhe ia ka Sabbaton, ka sngi bahynniew jong ka taiew.
(4) Ki iasam ia ka khubor jong ka "gospel bymjukut" sha ka pyrthei baroh (Jingpynpaw 14:6). Ka gospel ka pynbna ba U Jisu U la iap namar ki pop jong ngi, nangta u la mih na jingtep khnang ba ngi lah ban don ka jingiadei ba pynim bad U. Ka balang bakhatduh jong U Blei ka iai khot ia ki briew kylleng la kylleng ban mih noh na ka jingkulmar niam bad ban don ka jingiadei bad U Jisu kaba pynshong nongrim tang ha ki jingshisha jong ka Baibl.
(5) La ialam ia ki da ka jingsngew kyrkieh namar "ba ka por ot ka la wan, naba ka jingot ia ka khyndew ka la ih rkhiang." (Jingpynpaw 14:15), bad dang don da ki millian ki bym pat shem ia U Khrist.
(6) Ia ki la pyndap da ka jingkitkhia ia ka kam U Blei. Namar ka "Babilon bakhraw" ka la kyllon, ki kyrpad ia kito kiba dang sah ha ka jingkulmar niam, "To ia mih noh na ka, phi ki briew jong nga" (Jingpynpaw 18:4). Ki thrang ban iasam ia ka jingiadei baphylla bad U Khrist bad ia ka jingsuk jong ki bad ki briew baroh.

Kane baroh bad kham palat ka la pyniasoh lang ia ki dohnud jong ki millian bad ka balang Khristan jong ki sngi khatduh ia kiba la khot da ki khubor jong ki lai angel. Ka jingim bakmen ka la ialam ia ki ban iasoh lang bad u Apostol Ioannis ha kaba ai ia ka jingkhot sngewbha sha phi:

"Ia kata kaba ngi la iohi bad ngi la iohsngew, ngi iathuh shai ha phi, ba maphi ruh phin ioh ka jingiasyllok lem bad ngi: bad kata ka jingiasyllok de ka jong ngi ka long lem bad U Kpa bad U Khun jong U U Jisu Khrist. Te ia kine kiei kiei ruh ngi thoh ha phi, ba ka jingkmen jong ngi kan ioh long ka badap." I Ioannis 1:3,4.

Lyngba U Mynsiem bad ka Balang jong U, U Jisu U khot ia phi ruh ban wan bad aiti lut baroh ha U:

"U Mynsiem bad ka nongleit kurim (ka balang) ki ong to wan!' bad ai ba uta uba iohsngew un ong 'to wan!' Jar uba sliang, ai un wan; bad jar uba mon, ai un shim ei ia ka um ka jingim. Jingpynpaw 22:17.

4. KI AR KI JINGOT

Ki khubor jong ki lai angel ki kut noh ynda U Jisu un wan phai sha pyrthei ban lum ia kiba la pynim na ki por baroh (Jingpynpaw 14:14-16). U Jisu Un lum lang ia kiba la pynim baroh bad leit lam ia ki sha ki ingshong neh ha bneng (Ioannis 14:1-3). U la pynduh noh ia ka pop baroh, ki jingpang, jingjynjar, bad jingiap. Ki riewkhuid ki sdang ia ka jingim bathymmai bad badon burom bad U lyngba ki bymjukut (Jingpynpaw 21:1-4).

Ha ka jingwan arsien U Jisu un "lumlang" ia ki bymman ruh.

"Bad uwei pat u angel u la wan mih na kata ka templ kaba ha bneng uba don ma u ruh ka rashi banep. Bad uwei pat u angel u la wan mih noh na ka duwan, uba don ka bor halor ka ding; bad u la pyrta da ka jingpyrta bajam ha uta uba don kata ka rashi banep, u da ong, To phah noh ia kata ka rashi banep jong me, bad to lum ia ki rynjup u diengsoh wain kata ka khyndew; naba ki soh wain jong ki ki la ih bha. Te uta u angel u la buh ia kata ka rashi jong u ha khyndew bad u la kheit ia uta u diengsohwain jong kata ka khyndew, bad u la bred ia ki sha ka jingtylliat umsoh bakhraw jong ka jingbitar U Blei. Te ia kata ka jingtylliat umsoh la iuhroit shabar kata ka nongbah, bad ka snam ka la mih noh na kata ka jingtylliat umsoh haduh ki la kam ki kulai, jin haduh arspah mail." Jingpynpaw 14:17-20.

Kane ka dei ka por ba shyrkhei bad ba sngewsih ka por ka jingpynjot bakhatduh, ka jingjia basngewsih shisha ia U Khrist namar ba u dei ban pynjot ia kita ki bym mon ba yn pynim ia ki. U Jisu U "iaishah slem bad phi, um kwah iano iano ruh ban jot, hynrei ba baroh kin poi sha ka jingkylla ka bamut" (II Petros 3:9).

Ynda U Jisu Un wan ban lum ia ka jingot ka khyndew, ha ka jingot kaba kumno phin don? Hato phin ieng hapdeng u soh ba la ih lem bad kiba la siewspah jong ki arta baroh (Jingpynpaw 14:13-16)? Lane phin don hapdeng ki soh grape ba la ih jong ka jingbitar lep ia kiba la jah noh (dkhot 17-20)?

Ia ka jingmih la kdew shai. Ha kawei ka liang, U Jisu U ieng bad ki kti ba la kner ba la sah prek, U kyntu ia phi ban rai bad ieng lem bad "ki riewkhuid kiba kohnguh ia ki hukum U Blei bad ri ia ka jingngeit U Jisu" (dkhot 12). Ha kawei pat ka liang ki don ki jingsawa ka ktien briew kiba pynshlur ba ym donkam ban kohnguh ia ka Baibl bad ia ki hukum U Blei baroh.

U paidbhur ha ingbishar u Pilat shisien ki la iakynduh ia ka jingmih kaba iasyriem kum kata. Ha kawei ka liang la don U Jisu, uba long u briew bad U Blei bashisha. Ha kawei pat ka liang u don u Barabas, u briew uba khlem jingiarap, um lah ban iarap ialade ruh lane ia kito kiba hapdeng u paidbah kiba sakhi ia kata ka jingjia ba shyrkhei. Pynban haba la kylli don bor u Pilat, "iano na kine arngut ngan pyllait ha phi?" Ka sur uta u paid byllien ka la phai kylla da ka jingdom, "U Barabas!"

"Haba kumta," la kylli u Pilat, "ngan leh kumno ia U Jisu, ia uba ki khot U Khrist?"

Da kawei ka sur u paidbhur u la pyrta, "ai ban sah narphna ia U!"
Kumta ia U Jisu Uba khlem jingduna la sahnarphna; bad ia u Barabas, u nongryngkang la pyllait luid. (Peit Mathaios 27:20-26).

Iano phin jied mynta, ia u Barabas ne ia U Jisu? Hato phin jied ban bud ia ki jinghikai briew kiba long marpyrshah ia ki hukum U Blei bad marpyrshah ia ka gospel bymjukut jong U Jisu? Lane phi kwah ban kohnguh ia ki hukum U Blei bad iaineh ha U Jisu"? Kynmaw, U dei U Jisu Uba kular ban phah ia U Mynsiem Bakhuid jong U ban pynjem ia ki jingeh bad jingkut lad jong phi, ban pynhun ia ka jingthrang ka mynsiem jong phi.