Nga Lah ne Em Ban Shem Ia Ka Balang
U Blei Mynta?

Bunsien U Blei U ju ai ki khubor ban pynbiang ia ki jingdonkam jong ki pateng kiba pher: Ka khubor ban iarap ia u Adam bad ka Im hadien ba ka pop ka la pynsniew ia ka pyrthei jong ki, ka khubor ia ka pyrthei shwa ka jingshlei um bashyrkhei, ki khubor ia ki Israel mynba ki Assyria bad ki nong Babilon ki la byrngem. U Jisu U la wan bad ka khubor bakyrpang ia ki sngi jong ngi. Ki lynnong 12 bad 14 jong ka Jingpynpaw ki iathuh lyngkot ia ka khubor ia ki sngi jong ngi. Ha kane ka JINGSHEM Guide bad ha ka Guide kaba bud, ngin ia peit ia kata ka khubor.

1. KA BALANG BA LA SENG DA U JISU

Ka jingim bad ki jinghikai U Jisu ki pynskhem ia ka jingiatylli ka jingngeit bad ka jingiasyllok bajan ha ka balang ki Apostol kaba U la seng. Ki Apostol ki don ka jingiadei bajan eh bad U Khrist Uba la mih pat. U Paul u mutdur ia kata ka jingialong jan bad ka jingiashong kurim:

"Namar nga la pyniateh ktien ia phi ha uwei u briew, ba ngan ioh aiti ia phi kum ka sotti ha U Khrist." II Korinth 11:2.

Kat kum u Paul, ka Balang Khristan ka long ka briew kaba khuid, ka nongleit kurim jong U Khrist, ka pharshi kaba bit ia ka balang baieit U Khrist.

Ha ka Testament Barim ia kajuh ka jingpynsyriem la pyndonkam ban batai shaphang ki Israel, u paidlang ba la jied jong U Blei. U Blei U la ong ia ki Israel: "kum ka nongleit kurim phi la ieit ia nga" (Jeremiah 2:2); nga long u tnga ia phi." (Jeremiah 3:14).

Ka kitab Jingpynpaw ruh ka kren ia ka balang kum ka briew:

"Bad la iohi ia ka dak khyllah bakhraw ha bneng; ka briew kaba la kup da ka sngi, bad u bnai hapoh ki kjat jong ka, bad halor ka khlieh jong ka ka pansngiat da ki khadar ki khlur." Jingpynpaw 12:1.

(1) Kata ka briew ka "kup da ka sngi." Kane ka ai jingmut ia ka balang kaba tyngshain kum ka sngi, namar ba la pynkup ia ka da ka burom ka jingdon lem jong U Khrist. U Jisu "U jingshai jong ka pyrthei" (Ioannis 8:12)., u tyngshain lyngba ki dkhot ka balang jong U, bad ma ki pat ki kylla long "ki jingshai jong ka pyrthei" (Mathaios 5:14).
(2) Kata ka briew ka don ia "u bnai hapoh ki kjat jong ka." U bnai u ieng pharshi ia ka jingshai jong ka gospel ba phalang ha ki niam ki rukom ba la leh da ki briew jong U Blei ha ka Testament Barim. U bnai u don "hapoh ki kjat jong ka" ka ai jingmut ba kata ka jingshai ba phalang na ka gospel ka la shim ia ka jaka jong ka da ka jingtrei jong U Khrist.
(3) Kata ka briew ka don "ka pansngiat da ki 12 ki khlur ha ka khlieh jong ka." Ki 12 ki khlur ki iengpharshi ia ki 12 ngut ki apostol, ki riew donburom kiba ka jingphla jong ki shaphang U Jisu ka tyngshain phyrnai haduh kine ki sngi.

Ka jingiathuh shaphang kane ka briew ka kdew shai ba u Ioannis u don ha ka jingmut jong u ia ka jingiaid lyngba na ki briew jong U Blei, ki Israel, ha ka Testament Barim sha ka Balang Khristan jong ka Testament Bathymmai ba U Jisu U la seng. Ka sngi, u bnai, bad ki khlur ki shon jur ia ka jingtrei ba ai jingshai jong ka balang Khristan ha kaba iasam ia ka khubor babha ka jingpynim.

2. KA DRAMA JONG KA JINGSHAH JOP U SOITAN

Ka jingwan rung jong kata ka briew ka la pynbeit ia ka rynsan ia ka drama bakhraw:
"Bad ka la punkhun, bad ka la kyang jam haba ka suh khun, bad haba ka pang shitom ban kha khun. Bad la iohi ia kawei pat ka dak khyllah ha bneng; bad ha khmih u iakjakor basaw uba khraw, uba don hynniew ki khlieh bad shiphew ki reng bad halor kita ki khlieh jong u hynniew ki pansngiat. Ka tdong jong u ka ring ia kaba lai ka bynta na ki khlur ka bneng, bad ka la bred noh ia ki sha ka khyndew; bad uta u iakjakor u la ieng ha khmat kata ka briew ka ban sa kha khun, khnang ba ynda ka la kha un ioh bam duh ia ita i khunlung jong ka. Te ka la kha ia u khun shynrang, uban sa synshar ia ki kynja bynriew baroh da ka dieng synshar nar; te la rong noh artet ia ita i khunlung jong ka sha U Blei, bad sha ka khet jong U." Jingpynpaw 12:2-5.

Ki don lai tylli ki dur kiba iashim bynta ha kane ka drama kiba long u shabi:
(1) Ka briew, kaba la dep pynithuh kum ka balang U Blei.
(2) U Khun ba la kha na ka briew ia uba "la rong noh sha U Blei sha ka khet jong U," bad ha kawei ka sngi "un synshar ia ki kynja bynriew baroh." Uta U dei U Jisu ia Uba la kha sha kane ka pyrthei bad ia Uba la shim noh sha ka khet U Blei bad ha kawei ka sngi Un synshar ia ki bynriew baroh.
(3) U iakjakor uba ieng pharshi ia u Soitan, u ksuid.
"Te ka thma ka la long ha bneng, U Michael bad ki angel jong u ki la ialeh pyrshah ia uta u iakjakor bad ki angel jong u ruh ki la ialeh thma. Hynrei kim shym la jop, lymne ia ka jaka jong ki ruh ym shym la shem shuh ha bneng. Te la shop noh arsut ia uta u iakjakor bakhraw, uta u bsein tymmen ia uba la khot u ksuid bad u Soitan, uba shukor ia ka pyrthei baroh kawei; la shop noh arsut ia u sha ka khyndew, bad ia kita ki angel jong u la shop noh arsut lem bad u." Jingpynpaw 12:7-9.

Ka dur ka shai shisien ba phi la sngewthuh ia ki dak. Haba u Ksuid bad ki angel jong u ki "la duh noh ia ka jaka jong ki ha bneng," la "bred noh ia ki sha khyndew." Mynba la kha ia U Jisu ha kane ka pyrthei, u soitan u la pyrshang ban pyniap ia U, U Khun shynrang, tang shu dep kha. U la rem, namar ia U Jisu la "rong noh" sha ka khet U Blei.

Nangta u soitan u la thmu skhem ban pynjot ia ka balang Khristan ba U Khrist U la seng. U Apostol Ioannis, uba la thoh ia ka kitab Jingpynpaw, u la iohi ngut-nget ia ka jingialeh bakhraw hapdeng U Khrist bad u Soitan da ka jingbitar ha khyndew. Haba kata ka jingialeh ka la poi ha ka bakut jong ka ha ka jingsahnarphna ia U Khrist, U Ioannis u iohsngew ia ka jingpyrta na bneng:

"Mynta la wan ka jingpynim bad ka bor, bad ka hima jong U Blei jong ngi, bad kata ka bor synshar Uta U Khrist jong U: naba la shop noh arsut ia uta u nong mudui ia ki para bangeit jong ngi, uba shait mudui ia ki ha khmat U Blei jong ngi mynsngi bad mynmiet, la bred noh ia u." Jingpynpaw 12:10 (Ianujor Ioannis 12:31 bad Lukas 10:18).

U Jisu U la ioh ka jingjop halor u Soitan ha ka diengphna. Nangta u la pynskhem ia ka jingthikna ka lad ka "jingpynim" bad pynioh ia ka "bor" ban ia pyneh ia ka buit sianti u Soitan. "Ia ka hima U Blei" la pynskhem, bad ia ka "iktiar" U Nongpynim ban long U Rangbah Lyngdoh bad U Syiem jong ngi la pynskhem.

"Mynta la wan ka jingpynim". "Ka jingkha ia U Khrist, U Nongpynim ka pyrthei, ka la jia (dkhot 5). Hapdeng ki jingpynshoi ba jur jong u Soitan, U Jisu U la im ka jingim kaba khlem pop,. U la iap bad U la mih pat U Nongjop halor ka pop bad ka jingiap (dkhot 10). Ia u Soitan la pynrem junom (dkhot 7-9). Ia ka diengphna la pynkhraw ha ka bor ba dap biang jong ka.

Ka jingpynbna, "mynta la wan ka jingpynim," la pynkmen ym tang ia u Ioannis hynrei ia ki jingthaw baroh kawei:

"Naba kumta to ia kmen, ko ki bneng, bad phi kiba shong ha ki, kordit ia kata ka khyndew bad ia ka duriaw! Naba uta u ksuid u la leit hiar ha phi, uba don ka jingbitar bakhraw, naba u la tip ba u don tang khyndiat por." Jingpynpaw 12:12.

Ka bneng baroh kawei ka la ia kmen lang ia ka jingjop U Jisu. U Khrist U la pynduh noh ia kano kano ka jingdawa ba u Soitan u dawa, bad u Soitan uba la shah jop u la duh noh junom ia ki jingdawa jong u ha kane ka pyrthei jong ngi.

3. KA BALANG KHRISTAN HA KA JINGIALEH BAD U SOITAN

Shwa ba U Jisu Un leit kiew sha bneng U la seng ia ka balang Khristan (kaba la ieng pharshi da ka briew). Ka jingiap jong U ha ka diengphna ka la ai ia ka balang Khristan ia ka bor ban pynrem ia u Soitan.

"Ki la jop noh ma ki ia u namar kata ka snam jong Uta U Khunlangbrot bad namar kata ka ktien ka jingphla jong ki; te kim shym la ieit ia ka jingim jong ki jin haduh ka jingiap." Jingpynpaw 12:11.

U Khrist mynta U la lah ban ai ia ka bor jong U, U soh ka jingjop jong U, ha ka balang jong U. U Jisu U la jop pynkut thiaw halor u Soitan ha ka diengphna, bad mynta u iai jop halor u Soitan lyngba ka balang. Lai tylli ki jinglong kiba buh dak ia ka jingjopthiaw ka balang ha ki spah snem kiba la leit jong ka juk Khristan:
(1) "Ki la jop ia u (Soitan) da ka snam Uta U Khunlangbrot." Ia U Jisu la rong noh sha ka khet U Blei kumta U lah ban pynlong ia ka snam jong U kaba trei kam ha ki jingim ki nongbud jong U. U lah ban pynkhuid ia ki jingthoh jingkynmaw ki pop jong ngi, bad pynim ia ngi da ka snam jong U. (I Ioannis 1:7), bad ai bor ia ngi ban im ka jingim Khristan bakoit bakhiah man ka sngi.
(2) "Kim shym la ieit ia la ka jingim haduh ba kim khein ia ka jingiap." "Ka snam U Khunlangbrot" ka pynlong ia ki kiba kloi ban iap na ka bynta ka kam U Khrist; kim "kynran na ka jingiap." U Blei U la shah ia ka jingjynjar bakhraw, kumta kine ki Khristan martyr ruh ki mon ban shah shitom bad iap. Wat ki khynnah ruh ki mon ban shah ia ka jingiap ha kaba khatduh. La iathuh ia kawei ka kmie Khristan kaba la shah bred sha ki sing ha ka jaka khmih kai ki Rom hyndai namar ba ka la ai ia ka jingkohnguh syiem ha U Khrist bad ym ha u Kaisar. Ka khun samla rit jong ka, ha ka jaka ba kan kynran dien na kata ka jingtriem, la wan pynban da ka jingrhem ha ka mynsiem ban aiti ialade ha U Jisu. Katba ki sing ki kynrup ia ka kmie jong ka, ka ieng joit bad pyrta, "nga ruh nga long ka Khristan." Ki Roman ki la kem bad bred ia ka sha kita ki mrad.
(3) "Ki la jop ia u (Soitan). . . da ka ktien ka jingphla jong ki." Ym ki ktien, hynrei ki ktien ka jingphla __ ka jingphla ki jingim jong ki, ka jingphla baim jong ki ia ka bor U Jisu bad ka gospel jong U. Ha ki por badum tam jong ka juk Khristan ka kynhun shipai Khristan __ naduh ki kpa balang banyngkong shaduh ki Protestant nong pynthymmai niam ki la jop ia ka basniew tam ba u Soitan u la bred ha ki, tang da ka jingphla badonbor ka jingim jong ki.

Ka Jingpynpaw 12:11 ka pynpaw ia ka balang kaba jop kaba dap da ki nongjop: ki Apostol, ki martyr, ki nongpynthymmai niam, bad kiwei ki Khristan baiaineh. Ka jingbha sbun, ka jingiaineh skhem, ka jingshlur bad ka jingjop jong ki ka la sawa jam kum u pyrthat lyngba ki spah snem bad la pynkhih ia ka pyrthei.

Naduh ba u Soitan u la rem ban pynjot ia U Jisu mynba u la im ha pyrthei, mynta u la wad ban pynjot ia U Khrist Uba im hapoh ka balang jong U.

"Te mynba uta u iakjakor u la iohi ba la shop noh arsut ia u sha ka khyndew, u la beh bein ia kata ka briew kaba la kha khun shynrang. Te la ai ha kata ka briew artylli ki thapniang jong ka pukni ka bakhraw, ba kan da ioh her noh sha kata ka ri khlaw, sha kata ka jaka jong ka, ha kaba yn bsa ia ka shi ia, bad ki ia, bad ka shiteng ia, na khmat uta u bsein. Bad uta u bsein u la theh buk buk na ka shyntur jong u ia ka um kum ka wah na shadien kata ka briew khnang ba un ioh pynrong noh ia ka da kata ka wah. Hynrei kata ka khyndew ka la iarap ia kata ka briew, te kata ka khyndew ka la ang la ka shyntur, bad kala nguid noh khoit ia kata ka wah ia kaba uta u iakjakor u la theh buk buk na ka shyntur jong u." Jingpynpaw 12:13-16.

Kumba la iathuhlypa, hamar ki Arta Badum jong ka juk Khristan, u Soitan u la phah ia ka "wah" jong ka jingpynshitom bein "bansar" ia ka balang "lem bad ka lat lat." U soitan u kwah ban pynduh ia ka bor ktah jong U Khrist da kaba pynjot ia ka balang jong u bad u pyndonkam lut ia ki buit Soitan jong u baroh kaba u lah ban pyrkhat. Uta u iakjakor u iengpli nyngkong ia u Soitan. Hynrei kynmaw ba u Soitan u pyndonkam ia ka bor sorkar ha ka jingtrei jong u kum u iakjakor ban leh bor ia ki briew jong U Blei. U pyndonkam ia u syiem Roman u Herod ban pyrshang pyniap ia U Jisu mynba la kha ia u. U trei lyngba ki nong ialeh pyrshah jong U Khrist, ki rangbah niam ki Jiw ban iaid syntiat, ban pynshitom ia U Nongpynim, bad khatduh ban pyniap ia u ha ka diengphna. Hynrei kaba paw kum ka jingjop u Soitan ka kylla pynban sha ka jingjop bakhrawtam jong U Khrist. U bitar ba u la shah jop ha ka diengphna, u Soitan u la pynphai ia la ka jingbitar pyrshah ia ka balang ba U Jisu U la seng. Hamar ki phew snem hadien ka jingsahnarphna ia U Khrist, la pyniap da ki hajar ki Khristan ha ki jaka ialehkai, ha ki madan shnong, ha byndi, ha ki jaka barieh.

Nyngkong la sdang ia ka jingpynshitom bein da ka sorkar. Hynrei hadien ka jingiap ki Apostol la wan ka jingkylla suki suki hapoh ka balang. Ha ka spah snem ka baar, balai, bad basaw, ki babun hapoh ka balang ki la sdang ban pynkylla ia ki jingshisha ba la hikai da U Khrist bad ki apostol jong U. Katto katne ki nongialam ba phaidien ki sdang ban pynshitom bein ia ki Khristan kiba ialeh ban bud ia ka jinghikai bakhuid jong ka Testament Bathymmai.

Ki riewstad ki pynshongdor kumba 50 millian ngut kiba iaineh ki la duh ei la ki jingim. Ha ka jingialeh ban pynngam jyllop ia ka balang bad pynjot ia ka, u Soitan u la phah ia ka "wah" jong ka jingpynshitom bein "ban sar ia ka (balang) ha ka lat lat." "Hynrei ka khyndew ka la iarap ia kata ka briew da . . . kaba nguid ia kata ka wah" ka jingpynshitom bein bad ka jinghikai lamler.

Ha ki jingpynshitom bein ki arta pdeng, ka balang kaba shisha ka la kynriah noh na ki nongialam baphaidien bad shem jaka rieh "sha ri khlaw sha ka jaka ba la pynkhreh ia ka da U Blei, ba yn ioh bsa ia ka hangta 1260 sngi" (dkhot 6). Ia kane ka jingiathuhlypa la pyndep hamar ka 1260 snem jong ka jingpynshitom naduh H.K. 538 shaduh 1798 (ha ki jingiathuhlypa ka Baibl shi sngi ka ieng ia ka shi snem, peit Esekiel 4:6).
Hamar kine ki spah snem badum, ki Khristan kiba iaineh kiba ngeit bad snoh ha ka Baibl ki la wad jaka rieh kat shaba ki lap; kum ka nuksa, ha ki them Walden jong ka Western Italy bad ki phang Mihngi jong ka France, bad ha ka balang jong ki Cells ha ka British Isles.

4. KA BALANG U BLEI HA KI SNGI JONG NGI

Kane ka la pynpoi ia ngi shaduh ki sngi jong ngi __ sha ka balang bashisha jong U Khrist naduh 1798. Kumba lah ban khmih lynti, u iakjakor u iai bitar sah ia ki briew jong U Blei. Ka jingialeh bympaw kaba khraw ka dang iai bteng. Ha ka jingshisha, ka jingleh bor bakhraw tam jong u Soitan ia ka balang ka jia shwa ka jingwan U Jisu.

"Te uta u iakjakor u la sngew bitar lep ia kata ka briew, bad u la leit noh ban ialeh thma bad kita kiba sah na u symbai jong ka, kita kiba sumar ia ki hukum U Blei bad kiba bat ia kata ka jingphla ia U Jisu Khrist." Jingpynpaw 12:17.

Kane ka jingiathuhlypa ka kdew sha ki sngi jong ngi. U Soitan u la bitar; u ialehthma "bad ki khun jong ka briew" __ ki briew jong U Blei kiba mynta. Peit bha ia ki dak bapynithuh ithaw ia ki:
(1) Ki bangeit ha ki sngi khatduh "ki bat skhem ia ka jingphla U Jisu." Kiba snoh da ka jingiaineh skhem ha ki jinghikai bakhuid ka Ktien U Blei, ki phla ia U Jisu lyngba ka jingim Khristan badonbor.
(2) Ki Khristan jong ki sngi khatduh ki long ki briew jong ka jingiathuhlypa. Kaba pdiang ia ka jingphla U Jisu Khrist ka pynlah ia u Ioannis ban thoh ia ka kitab Jingpynpaw (Jingpynpaw 1:1-3). Ki kynhun bangeit khatduh kin ioh pdiang ia ki jingai kiba iasyriem: ka jingphla beit na U Blei lyngba ki nongrah khubor ha pyrthei. Ka jingai jong ka jingiathuhlypa jong ki ki phai sha ka jingpynpaw U Blei ia ka jingtrei bad jingthmu ba khatduh jong ki.
(3) Ia ki Khristan ha ki sngi khatduh la kdew kum kita "kiba kohnguh ia ki hukum U Blei." Ym tang ba ki iada ia ka jinglong hok bad bha ki 10 hukum, hynrei ki kohnguh de ia ki. Ka jingieit U Blei ha ka dohnud jong ki ka pynlong ia ki ban kohnguh ia U da ka ba kmen (Rom. 5:5; 13:8-10).

Ki Khristan jong ki sngi khatduh ki bud ia ka nuksa U Khrist bad ia ka balang banyngkong ha kaba kohnguh ia ki hukum U Blei. Kata ka la pynkhih bitar jur ia u iakjakor __ u ksuid. Kumta u ialeh thma bad ki symbai basah jong ka namar ba ki phla shynna ba ka jingieit ia U Blei ka pynmih ia ki synran kiba kohnguh. Kumba U Jisu U la hukum:
"Lada phi ieit ia nga, sumar ia ki hukum jong nga." Ioannis 14:15.

Ki jingim jong ki Khristan ha ki sngi khatduh ki pyni ba ka long kaba lah ban ieit ia U Blei da ka dohnud jong ngi baroh bad ia ki para briew kumba ia lade. Kat kum U Jisu, kine ki jinglong babha, ieit ia U Blei bad ieit ia ki para briew, ki kynthup ia ki 10 hukum jong U Blei (mathaios 22:35-40).

Ka basaw na kito ki hukum ka ong ia ngi ban sumar ia ka sngi Saitjain, ka sngi ba hynniew jong ka taiew, kum ka Sabbaton. Naduh ba ka jingieit ia U Jisu ka la kynthup lang ne kjit ia ki 10 hukum baroh ha ki dohnud jong ki, ki Khristan jong kine ki sngi khatduh ki long kiba sumar ia ka Sabbaton.

Ka Sabbaton ka don ha ka dohnud jong ka khubor khatduh U Blei ia ki briew jong U ha ki Jingpynpaw 12 lynnong, bad 14:6-15. Ia ka spah jong ka bneng baroh la pynbeit ba kan wan nadien ki Khristan jong ki sngi khatduh kumba la iathuh ha kine ki lynnong. U Nongpynim U baim U long U Lok ba iai don barobor jong ki, bad U Mynsiem Bakhuid U trei "ban pynshait bor ia ki da ka bor jong U Blei." Ka kular ka long kaba skhem. Kin jop ia u Soitan "da ka snam jong U Khunlangbrot bad ka ktien ka jingphla jong ki." Jingpynpaw 12:11).

Hato phi kwah ban long uwei na kine ki Khristan ha ki sngi khatduh kiba sumar ia ki hukum U Blei bad kiba bat ia ki jingphla U Jisu"? Balei phim rai mynta?