Kaei Bad Hangno Don Ka Dujok?

Ka jingsiat dumok ba khlem pyrkhat, u khynnah u leit shapoh skul bad pyniap ia ki katto katne ngut ki para klas jong u. U phoi kynsha uba la shah beh kam, u wan rung ha ka jaka kaba u ju trei mynshwa bad siat ia uba kham halor jong u. Ka kmie ka ngiat ia ka kali jong ka shapoh pung um bad ki khun rit jong ka arngut hapoh bad ki la iap jyllop.

Ha ki artylli ki dewbah la pyniap da ki bun hajar na ka daw ba iapher ka jait. Ka jingiashun kaba la neh da ki bun spah snem hapdeng ki jait ba iapher ka dei ka daw. La siat ia ki rangbah, ki kynthei, ki khynnah, bad wat ia ki khunlung, la ot, shoh bein bad bat bor.

Kaba pynshitom ia kine ki kam runar jong ki riewkhlaw da kaba pyniap kum ka kuna, wat ia ki nongpyniap dusmon la pynrem da ki babun. Ki kynhun pyrshah ia ka jingpyniap ba la rai da ka ingbishar ki iapyrshah jam, ki da khot ia ka "ka niam runar ki nong pagan." La kylli, hato, ia kine ki nongpyniap ki long kiba ym lah shuh ban siewspah?

Kaei ka rukom kaba isnei eh ban pyniap ia ki nongkam sniew? Ka shuki electric? Ki don kiba pyrkhat ba ka dei ka inject da ka lethal drok kan long kaba khlem pang ei ei ruh. Kiwei pat ki ong ba ka jingim kan kut kloi da kaba pasi.

Hynrei ha kine ki jingiatai nia baroh ia ka jingpynshitom da ka jingiap na ka bynta ki kam bymman, ka don kawei ka lad kaba khlem pat pyrkhat. Ym pat don ba ai jingmut ba ia u nongpyniap bein, uba la pynkut da kaba leh runar ia ka jingim jong uwei pat, u dei ban siew da kaba pynkordit ia ka met da kaba pynshitom haduh ka jingiap. Ym don, kum ka nuksa, uba ai jingmut ba ia kine ki nongpyniap dei ban thang suki haduh un da iap.

Hynrei kiba bun ki Khristan kiba shida ki pyrkhat ba U Kpa jong ngi uba ha bneng un leh khamsniew ban ia kata. Ia ki bymman, ki ong, dei ban pynshitom khnang ba kin siew ia ki pop ba ki la leh. Bad kaei shuh shuh, ki ia mut dur ia ka jaka pynsaja jong U Blei kum ka jaka pynkordit kaba khlem kut shuh.

Kaei ka bajia ia ki bymman? Kumno ka nusib jong ki ka iabiang bad ka jingieit bad ka hok U Blei? To ngin ia peit kumno ka Baibl ka jubab.

1. KA JINGPAITDOHNUD KHATDUH U JISU

La 6000 snem U Blei U la iai kyrpad iai khroh ia ki briew shynrang bad kynthei:

"Katba nga im, ong U TRAI U Blei, ngam don jingsngewbha ha ka jingiap u bymman; hynrei ba uta u bymman un phai noh na ka lynti jong u bad ba un im: to phai phi na ki lynti sniew jong phi; namar balei ba phin shu iap ei, Ah phi ka ing Israel?" Esekiel 33:11.

Ka diengphna ka pynpaw haduh katno U Blei U kwah ban pyllait im ia u khun bynriew. Mynba U Jisu U la pyrta halor ka diengphna, "ko Kpa, to map ia ki na ba kim tip kaei ba ki leh." U la plie wang ia la u dohnud ba pang (Lukas 23:34). Shen hadien kata U Jisu U la aiti ia la ka jingim bad, ki don kiba ngeit ba u la iap da ka jingpaitdohnud (Ioannis 19:30,34.)

Hynrei wat kane ka jingpynpaw badonbor jong ka jingieit blei, kiba bun ki briew kim phai sha U Jisu. Bad slem katba ka pop ka dang synshar ha kane ka pyrthei, kan iai pynkhraw ia ka jynjar u briew. Kumta ia ka pop dei ban pynjot. Kumno U Blei U thmu ban pynkut ia ka pop?

"Ka sngi U Trai kan wan. . . . ha kaba ki bneng kin leit noh bur; bad ia ki jor tynrai da kaba thang rhem kin um noh, bad ia ka khyndew bad ia kita ki jingleh badon ha ki yn thang duh." II Petros 3:10.

U Blei Un pynkut ia ka pop bad pynkhuid ia ki jingsniew baroh. Kito kiba iai snoh ha ka pop yn sa pynjot da ka ding kaba la khreh ia u Soitan, ki angel jong u bad ka pop. Katno ka jingpaid ka dohnud U Jisu haba U iohi ka ding ka bam duh ia kito kiba U la wan ban pynim.

1. HAEI BAD LANO KA DING KAN THANG

Mar pyrshah ia ki jingsngewthuh ba pawnam, U Blei Um don ka ding kaba thang mynta ha ka jaka ba khot "Dujok" ka jaka ha kaba kiba pop ki leit haba ki iap. Kata ka jingthang kan jia haba ia kane ka pyrthei yn thang da ka ding na bneng. U Blei U dang ap ia ka rai ia ki bymman ha ka jingbishar ha kaba kut ka 1000 snem (Jingpynpaw 20:9-15).

"U Trai U nang ban knieh kynthet noh ia kiba riewblei na ka jingpynshoi, bad ban rakhe ia ki bymhok ia ka sngi ka jingbishar ban pynshitom ia ki." 2 Petros 2:9.

Un pynkhuid artat ia kane ka pyrthei jong ngi da kata ka ding ba pynkhuid.

"Hynrei kita ki bneng bad kata ka khyndew kiba mynta ki long ba la rakhe ia ki da kata ka juh ka ktien, ia kiba la ri noh sha ka ding ia ka sngi bishar bad ka jingpynjot noh ia kita ki briew ki bymriewblei." II Petros 3:7.

U Blei Um ju thmu ia uno uno u briew ba un kut ka jingim jong u ha ka dujok ding. Hynrei haba ki briew ki kyntait ban khlad na u Soitan bad ki iai snoh ha ki pop jong ki, te khatduh kim lah lait na kaba pdiang ia kaba ki bet ne shah ia ka jingmih jong ka jingjied bakla jong ki.

"Ynda kumta un ong ha kita ruh sha kadiang jong u, To khie leit noh na nga, phi ia kiba la tim, sha ka ding ka bymjukut, ia kaba la buh lypa ia u Soitan bad ia ki angel jong u." Mathaios 25:41.

Kat kum U Jisu, lano ka dujok kan ing?

"Kumba ialum ia kita ki niut bad bathang ia ki ha ka ding, kumta kein kan long ha kaba wai noh kane ka pyrthei. U Khun u briew un phah noh ia ki angel jong U, bad kin ialum na ka hima jong U ia kiei kiei baroh kiba pynthut, bad ia kita kiba leh bymman, bad kin bred ia ki ha ka lawar ding; hangta kein yn long kaba lynniar bad kum dait bniat." Mathaios 13:40-42.

Ia ki niut, ki nongkam bymman, ym pat thang tad haduh ka bakut kane ka pyrthei. Shwa ban pyndep ia kata ka rai, ka bneng bad ka khyndew ka dei ban sngewthikna ba U Blei U la long Uba hok ha ka jingiadei kam jong U bad uwei pa uwei u briew. Kumba la iathuh bniah ha ka Guide 22, ha ka jingialeh bakhraw hapdeng U Khrist bad u Soitan, u Soitan u ialeh ban pynshisha ia ki jingthaw ba ka lynti jong ka pop ka dei ka lynti ba kham bha; U Jisu U ialeh ban pynpaw ba ka lynti jong ka jingkohnguh ka dei ka lynti ka ba lam sha ka jingim ba sngewhun bad basuk.

Ha ka bakut jong ka 1000 snem, kane ka jingpynshisha kan poi ha ka bakut ha ka jingbishar ia u Soitan, ia ki angel jong u, bad ia ki bymman. Hadien ba la plie ia ki kitab kiba pynpaw ia ka bynta ba uwei pa uwei u briew u la leh ha kane ka drama bakhraw, U Blei un sa bred ia u Soitan, ia ka jingiap, bad ka jingtep ryngkat bad kito baroh kiba ia ki kyrteng jong ki "ym shym la thoh ha kitab ka jingim. . . . sha ka pung ka ding." Jingpynpaw 20:14-15). Kat kum ka dkhot kaba bud, Jingpynpaw 21:1, hadien ba U Blei u la pynkhuid ia ka khyndew na ka pop da ka ding, U pynlong ia ka "bneng bathymmai bad ia ka khyndew bathymmai."

3. SLEM KATNO KA DUJOK KAN IAI ING?

Kiba bun ki ngeit ba ka ding jong ka dujok ka neh junom, kaba mut ba yn pynkordit ia kiba don hangta junom la junom. To ngin ia peit bniah ha ki dkhot kiba iathuh ia ki jingleh U Blei ia ka pop bad ia ki nongpop.

"U da pynhiar kput ha kita ki bym ithuh ia U Blei, bad ha kita ki bymkohnguh ia ka gospel ka jong U Trai Jisu jong ngi; ki ban shah ia ka jingpynshitom ka jingpynjot bymjukut kein na khmat U Trai bad na kata ka burom ka bor jong U." II Thessaloni 1:8,9.

Sngewbha peit bniah ba ka "jingpynjot bym jukut" kam dei kajuh kum ka "jingpynshitom bymjukut." Ka mut, ka jingpynjot kaba neh junom. Ka jingktah ka dei ka jingiap ba neh junom. U Petros u la kren ia ka sngi ka jingbishar bad ka jingpynjot ia ki bymriewblei." (II Petros 3:7).

Kat kum U Jisu, baroh ar la pynjot, met bad mynsiem ha ka dujok (Mathaios 10:28). Ha ka jingiathuhkhana halor u lum, U Jisu U kren shaphang ka khyrdop ka bakhim, "kaba ialam sha ka jingim," bad ia ka lynti kaba kylluid "kaba ialam sha ka jingjot" (Mathaios 7:13,14). Ha u Ioannis 3:16 U Jisu U pynshai ba U Blei "U la ai ia la U Khun ba la kha marwei," ba kito ki bangeit kin ym "jot shuh, hynrei kin ioh ka jingim bymjukut." U Jisu U pyniapher ia ki ar ki nusib: ka jingim bymjukut ne ka jingjot ym kaba shah thang junom. Ngi dei ban pynkut nia ba ka dujok khlem artatien ka don ka jingkut; ka jingmih ha ka jingiap bad jingjot jong ki bymman.

Ki jingong kiba shai lyngba ka Jingthoh ki iathuh ia ngi ba ia ki bymman yn sa pynjot. "Ia ki bymman yn ot noh" (Salm 37:28), kin "sa jot" (II Petros 2:12), "kin dam noh ha ka tdem kin dam noh" (Salm 37:20). Ka ding kan pynkylla dpei ia ki (Malakhi 4:1-3). "Ka bainong ka pop ka long ka jingiap." (Rom 6:23).

Ka jingthmu jong ka jingpynshitom bakhatduh ha ka dujok ding ka dei ban pynduh jait noh ia ka pop na ki jingthaw, ym ban pynsah ia ka junom. Kaba eh katta katta ban mutdur ba U Khrist uba la iam pangnud halor ka Jerusalem ba mutlop bad uba map ia kito kiba pyniap ia U kin lah ban pynlut ia ka bymjukut ba kin peit ia ka kordit jong kiba la tim.

Ka dujok khlem artatien ka don ka jingkut. Ha kaba kut jong ka 1000 snem, U Blei Un pynhap slap da ka ding na bneng bad pynjot ia u soitan, ki angel jong u, bad ki bymman kiba iai snoh ha la ki pop. "Ka ding" ka wan na bneng "bad ka la bam duh ia ki." (Jingpynpaw 20:9).

Kat kum U Jisu, kane ka dei ka ding ka "bym lah pynlip" (Mathaios 3:12). Ym don kor pynlip ding ba lah ban pynlip ia ka haduh kan da la pyndep ia la ka kam jong ka jingpynjot thiaw.

U Blei U la kular ba na kane ka ding kaba pynkhuid, un sa pynlong ia "ka pyrthei bathymmai." Ha kaba ia ki "jingjynjar kiba la dep yn klet noh"; bad yn ym iohsngew shuh ia ka jingiam briew ha ka." (Isaiah 65:16-19).

Katno kata kan long ka sngi kaba phylla! Kawei pa kawei ka daw ia ka jingpangnud kan leit noh. U Blei Un pyndam noh ia ki jingmong jong ka pop na ki dohnud baroh, bad ka jingsuk jong ngi kan long kaba janai.

4. "JUNOM" HA KA JINGTHOH

Ha u Mathaios 25:41 U Jisu U kren ia ka "ding bymjukut ba la pynkhreh ia u Soitan bad ia ki angel jong u." Hato ka ktien "bymjukut" hangne ka ai jingmut ba kata ka dujok kaba neh sah junom? U Judah 7 ka ong ba ka Sodom bad Gomorrah kum ka nuksa la buh ia ki ha khmat kum ka rukom maham kein da kaba ki shah ia ka jingpynshitom hok ka ding bymjukut." Ka paw shai ba kito ki nongbah ki khlem iai ing haduh mynta. Hynrei ka ding ka la long kaba bymjukut ha ka jingmut ba ka pynmih ka jingpynjot kaba neh sah haduh mynta.

Ha II Petros 2:6 sa shisien ngi pule ia ka ding bymjukut. Hynrei kane ka jingthoh ruh ka kdew shai ba U Blei "U la pynrem ia ki da ka jngpynkyllon khram, u da buh ia ki ban long ka rukom maham ia kita ki ban im bymriewblei." Kita ki bymriewblei jong ka Sodom bad Gomorrah kim don shuh ha ka jingkordit; la pynkylla dpei ia ki la slem bah. Hynrei ka ding da kaba la thang ia ki ka dei kaba "bymjukut" ha ki jingmih ba ka pynmih __ ka jingpynjot kaba neh sah. Bymjukut ka mut ia ka jingpynshitom baneh sah, ym kaba dang iai pynshitom.

Namar ba ka kitab Jingpynpaw da ki ktien kiba shai, bad ba long pharshi ia ki katto katne ki jingong jong ka la sngewthuh bakla. Kum ka nuksa, Jingpynpaw 14:11 ka ong shaphang kiba la jah, "Ka tdem ka jingkordit jong ki ka kiew sha ki bymjukut ki bymjukut." Kane ka sawa kum ka jingshitom kaba khlem jingkut. Hynrei, to ngin ai ba ka Jingthoh hi kan pynshai ia ka Jingthoh.

Ka Eksodos 21:6 ha ka KJV ka kren ia u shakri uba shah sam thliew ia ka shkor jong u ban long ka dak ba un shakri ia u kynrad jong u "junom". Ha kane ka kynti ka "junom" kan long slem tang katba uta u shakri u dang im. U Jonah, uba sah tang lai sngi lai miet hapoh ka kpoh jong ka dohkha (Jonah 2:6). Khlem artatien lai sngi hapoh ka jingdum tliw ka lah ban i kum kaba la slem palat junom.

Kumta ngi dei ban leh sumar ban sngewthuh kumno bad mynno ka Jingthoh ka pyndonkam da ki ktien pharshi, ktien poitri. Ka tdem kaba kiew junom na ka pung ka ding ka dei ka rukom kren bashai ia ka jingpynjot ba neh junom. Ka Jingpynpaw 21:8 ka kren shai ha ngi ba kata ka pung kaba ing da ka ding bad da u kyndok ka "dei ka jingiap ka baar." Ka dujok ka don ka jingkut. Ia ki bymman la bam duh; la pynjot thiaw ia ki.

5. BALEI BA DEI BAN DON KA DUJOK?

Ha ka banyngkong U Blei U la thaw ia ka pyrthei kaba janai. Hynrei ka pop ka la wan bad ka la wallam ia ka jingjynjar, jingpyut, bad jingiap. Lada phi wan phai sha ing ha kawei ka janmiet bad shem ba la wad bad la lute ia ka bad la pynjot ruh, hato phin ieh ia ka junom kumta? Da shisha phim ieh. Phin sar bad pynkhuid ia ka jakhlia, pynkhuid ia ka na jrong shapoh, bad bred noh ia ki tiar ki tar kiba la duh la jot bym lah pynbha shuh. U Blei Un leh kumjuh. Un pynkhuid ia ka jingjot jingpra bad ka jingpyntngit da ka pop bad weng noh junom ia kita baroh, bad thaw thymmai ia ka pyrthei. Ka jingthmu jong U Blei ba U pynkhuid ia ka da ka ding ka long ban pynkhreh lynti ia ka pyrthei bajanai ba kin ioh shong kiba la siewspah ha ka.

U Blei U iakynduh ia ka jingeh bakhraw namar ka pop ym tang ba ka pynsniew ia ka pyrthei ba kynja met, ka la ktah ia ki briew ruh. Ka pop ka la pynsniew ia ka jingiadei bad U bad ki para briew. Ia u khun bynriew la ktah da ka jingpang pop da kaba lehbein ia ki khynnah, da ka jingpyntriem, da ki dur lyngkhuid, bad da ki hajar kiwei ki jingpang bampong ka mynsiem. U Blei U dei ban pynduh ha kawei ka sngi ia ka pop, namar ka pop ka pynjot ia ki briew. Ka jingeh ka jong U Blei ka dei kane: Kumno Un pynduh jait ia kane ka khniang pop na ka pyrthei khlem da pynduh lut ia kito kiba ka la ktah da ka? Ka lad baphylla ba U la shem ka dei ban shim ia kine ki khniang jingpang jong ka pop ha lade hi: U la shah ia ka kansar jong ka pop ban pynjot ia U ha ka diengphna. Te kum ka jingmih:
"Lada ngi phla ia ki pop jong ngi, u long uba iaineh bad uba hok, ban map noh ia kita ki pop jong ngi bad ban pynkhuid ia ngi na ka bymhok baroh." I Ioannis 1:9.

U Blei U tyrwa ei ia ka lad ban lait na ka pop baroh. Hynrei kaba sngewsih ka long, ki ba bun ki ieit ban iaisnoh ha kata ka jingpang pop. Bad U Blei Un ym pynbor ia ki briew ban jied ia ka lynti jong ka jingim bymjukut. Kito kiba kyntait ia ka jingaiei jong U yn sa bam duh ia ki da kane ka pop. Ka daw bashisha ia ka dujok ka dei kane:
"Namar haba nga la khot phim shym la phai ktien; haba nga la kren, phim shym pynsngew; hynrei phi la leh ia kata ka basniew ha khmat jong nga, bad phi la jied ia kata kaba ngam shym la sngewbha." Isaiah 65:12.

Ki la pyndkhut ia ka jingiadei jong ki bad U Jisu da la ka jong ka jingjied, ki bymman kin sa shem ba ym don lad shuh ia ki da kumwei lait sa tang ka jingiap bymjukut.

6. KAN SHONG REM HADUH KATNO BAN JAH DUH?

Wat la ki Jingthoh ki khlem hikai ba ka ding jong ka dujok kan pynmih ia ka jingjynjar ba khlem kut, hynrei ka ai ha ngi ia ka jingiohi liak ba ka long ka jingiakynduh basngewtriem ban jah noh. Ki bymman kin duh ia ka jingim bymjukut. Ka jingsngewtriem kaba katno kan long ban sngewthuh ba ka jingkmen jong ka jingim bymjukut bad U Blei ka la syntuid na ki kti jong ki, ba kin ym ioh mad lano lano ruh ia ka jingkmen bajanai, ka jingiadei baieit lyngba ki bymjukut.

Mynba U Khrist U dang shah sdien halor ka diengphna bad ki pop jong ka pyrthei kiba pyniakhlad ia U na U Kpa, U la dei ban sngew ia ka kordit jong ka jingiap bymjukut. Katba ki bymman ki peit ia ka jingiong bathylli ha ki por ban sa wan jong ki, ki iohi tang ia ka jingjot babymjukut. Ki la dei ban iap khlem ka jingkyrmen ia ka jingmih pat ka baar. Ha kajuh ka por ki iohi ruh kumno ki kyntait ia U Khrist man ka por mynba U wan tyrwa ia ka jingieit. Ha ka bakut ki la dem khrup ha la ki khohsiew bad phla ia ka jingleh hok U Blei bad ia ka jingieit jong U (Philippi 2:10,11).

Ym sngewphylla ba ki nongthoh Baibl ki kyntu jur halor jong ngi ia ka jingkhia ki jingjied jong ngi bad ia ki jingdawa U Khrist.

"Ngi te, kum ki para ba ia trei lem bad U, ngi ia kyrpad ba phin ym pdiang lehnohei ia ka jingaiei U Blei; (Namar u ong, nga la shah shkor ia me ha ka ia badiang hun, bad ha ka sngi ka jingpynim nga la wan iarap ia me: Ha khmih, mynta kein kata ka sngi ka jingpynim." II Korinth 6:1,2.

Ngam lah shuh ban pyrkhat ia ka jingsngewsih kaba kham khraw ban ia kaba u briew u la pynsep ei ia ka jingkhein duh bakordor jong U Jisu baieit da kaba jied ban jah duh. Ka jingjied kaba ngi iakynduh markhmat ka long kaba shai kdar: ka jingjot bymjukut __ ka bymjukut kaba khlem U Blei, lane ka jingialong bymjukut bad U Khrist kaba pyndep ia ka jingkwah sliang bajylliew tam ka dohnud. Ia kano phi jied na ka bynta ia lade? Balei phim jied ia ka bakut jong phi ha U Khrist mynta?