Ka Jingbuhrieh Jong Ka Jingduwai Ba la Jubab

U Anatoli Levitin, u nongthoh kot bad u nongthoh histori, u la pynlut la bun snem ha Siberian Gulag ha kaba ka jingkyrpad ha U Blei imat ka la kylla thah ha khyndew. Hynrei u la wan phai u briew uba bit ha ka mynsiem. "Ka kambah bakhraw tam ka dei ka jingduwai," u la thoh. "Nga donkam tang ban phai sha U Blei ha ka jingmut bad mar kumta hi nga sngew ia ka bor kaba wan tuid ha nga nangno re nangno, ha ka mynsiem jong nga, ha ka met jong nga baroh kawei. Ka dei kaei? Nangta Nangno kum ma nga, u riew tymmen u bym long ei ei, ngan ioh ia kane ka bor kaba pynthymmai bad pynim ia nga, kaba kyntiew ia nga sha neng ka pyrthei? Ka wan na bar jong nga __ bad ym don bor ha pyrthei kaba lah ban ialeh pyrshah bad ka."

Ha kane ka Guide ngin ia peit kumno ka jingduwai ka lah ban iarap ia ngi ban tei ka jingiadei ba kham khlain bad U Blei bad ka jingim Khristan bashait bakhlain.

1. KA JINGIAKREN BAD U BLEI

Da kumno ngi lah ban thikna ba U Blei U sngew haba ngi duwai?

"Te phin khot kyrpad ia nga, bad phin ioh leit ban duwai ha nga, nga ruh ngan shah shkor ia phi. Bad phin wad ia nga bad phin shem ia nga, haba phin wad ia nga da ka dohnud baroh." Jeremiah 29:12,13.

Kaei ka jingsngew skhem U Jisu U la ai ba un sngew bad jubab ia ki jingduwai jong ngi?

"Nga ruh nga ong ha phi, to pan te yn sa ai ha phi; to wad, phin sa shem ruh; to tied, te yn sa plie ia phi. Naba baroh uba pan u pdiang; bad jar uba wad, u shem; bad ia uta uba tied yn plie." Lukas 11:9.

Ka jingduwai ka dei ka jingiakren na baroh arliang. Dei ia kata ba U Jisu U kular:

"Ha khmih, nga ieng ha ka jingkhang bad nga tied; lada uno uno ruh un iohsngew ia ka ktien jong nga bad un plie ia kata ka jingkhang, ngan wan rung hapoh ha u bad ngan ia khawai miet lem bad u, bad ma u lem bad nga." Jingpynpaw 3:20.

Kumno ka long kaba lah ban iashongkai bad don ka jingiabam miet basngewtynnad da ka jingiakren bad U Khrist? Nyngkong da kaba iathuh lut ha u ia kaba don ha ka dohnud ha ka jingduwai. Kaba ar, da kaba sngap bha. Katba ngi pynleit jingmut ha ki jingduwai, U Blei U lah ban kren beit ha ngi. Bad katba ngi pule ia ka ktien U Blei da kaba aiti, U Blei un kren ha ngi lyngba ki sla jong ka Baibl.

Ka jingduwai ka lah ban long ka rukom im ia u Khristan.

"TO DUWAI KHLEM DA PUD, ha kiei kiei baroh to phin ainguh; namar kane kein ka long ka mon U Blei ha U Khrist Jisu sha phi." I Thessaloni 5:16-18.

Kumno ngin "duwai khlem da pud"? Hato ngi dei ban iai dem khohsiew barobor lane iai spel khlem sangeh ia ki ktien jong ka jingiaroh ne ki jingkyrpad? Da shisha em. Hynrei ngi dei ban im hajan U Jisu ba ngin sngewlaitluid ban kren ha u ha kano kano ka por, ha kano kano ka jaka.
"Hapdeng ka surok bah, hapdeng ka jingbun kam, ngi lah ban phah ia ki jingkyrpad jong ngi sha U Blei bad kyrpad ia ka jingialam ba kynja blei. . . Ngi donkam ban plie ia ka jingkhang ka dohnud jong ngi barobor bad ka jingkhot ba U Jisu un wan bad shong kum u nongwan kai bakynja bneng ha ka mynsiem." Ki Mawjam Sha U Khrist, p. 99.

Kawei na ki lad babha tam ban don kum kane ka jingiadei bajan ka dei ban puson katba ngi duwai.

"Ai ba ka jingpyrkhat jong nga kan long kaba dianghun ha U; ngan leh kmen ha U Trai." Salm 104:34.

Haba phi dwai, wat kyrkieh ban pan ia ki jingdonkam jong phi. Da ap. Sngap. Lada pyrkhat ne puson kan jin da la kham pynbha ia ka jingiadei jong phi bad U Blei.

"To wan hajan ia U Blei, te un wan hajan ia phi." Jakob 4:8.

Katba ngi nang wan kham jan sha U Jisu, katta ruh ngin nang kham lah ban sngew ia ka jingdon lem jong U. Kumta to ri ia ka jingialong jan bad U Jisu, bad wat khuslai shaphang ka bakren da ki ktien ki ba dei. Shu kren hok bad da kaba shai. Ia kren ia kiei kiei baroh. U la iaid lyngba ka kordit bad ka jingiap hi khnang ban ioh long u lok bajan jong phi.

2. KUMNO BAN DUWAI

Haba ngi iaduwai, ngi lah ban kwah ban buh ia ka mat jong ka jingduwai U Trai, ka jingduwai ba long nuksa ba U Jisu U la hikai ia ki synran jong u namar ba ki la kyrpad ia u; "To hikai ia ngi ban duwai."

"Ko kpa jong ngi uba ha bneng, long bakhuid ka kyrteng jong me, wan ka hima jong me, long ka mon jong me ha ka khyndew kumba ha bneng. To ai ha ngi mynta ka jingbam jong ngi kaba ha la ka sngi ka sngi. To map ruh ia ngi ia ki ryngkang jong ngi, kumba ngi ruh ngi map ia kiba lehsniew ia ngi. To wat ialam ia ngi sha ka jingpynshoi ruh, hynrei sumar ia ngi na ka basniew. Naba jong me long ka hima, bad ka bor, bad ka burom ruh, ha la karta: Amen."__ Mathaios 6:9-13.

Kat kum ka nuksa ba U Jisu U la ai ha ka jingduwai jong U, ngi dei ban wan ha U Blei kum U Kpa ba ha bneng jong ngi. Pan ba ia ka mon jong u yn leh ha ka jingim jong ngi kumba ia ka mon jong u la leh ha ka bneng baroh. Ngi wad ia u na ka bynta ka jingdon kam ka met, ia ka jingmap, bad ka jingmap ia ki jingsngew jingpyrkhat. Kynmaw ba ka jinglah jong ngi ban ialeh pyrshah ia ka pop ka wan na U Blei. Ka jingduwai U Khrist ka pynkut da ki ktien ka jingiaroh.

Ha kawei pat ka por U Jisu U bthah ia ki synran jong U ban duwai ha U Kpa "ha ka kyrteng jong nga" (Ioannis 16:23). Kata ka long ban duwai ha ka jingiadei bad ki jinghikai U Jisu. Na kata ka daw ki Khristan ki ju pynkut ia ki jingduwai jong ki da kine ki ktien: "Ha ka kyrteng U Jisu, Amen." Amen ka dei ka ktien Hebrew kaba mut "ai ba kan long kumta."
Wat la ka jingduwai U Trai ka ai jingmut shaphang ia kaei ban duwai bad kumno ban pynlong ia ka jingduwai, ka jingiakren bad U Blei ka bha eh kum kata kaba mih na dohnud u briew.

Ngi lah ban duwai ia kaei kaei. U Blei U khot ia ngi ban duwai shaphang ka jingmap ia ki pop jong ngi (I Ioannis 1:9), ban pynkhraw ia ka jingngeit (Markos 9:24), ia ki jingdonkam ka jingim (Mathaios 6:11), ka jingpynkoit na ki jingpang (Jakob 5:15), bad ia ka jingtheh ia U Mynsiem (Sekhariah 10:1). U Jisu u ong ba ngi lah ban buh ha u ia ki jingkhuslai bad ki jingdonkam jong ngi baroh; ym don kaei kaei ruh kaba rit than ban wallam ha u ha ka jingduwai.

"Da kaba bred ha u ia ki jingkhuslai jong phi baroh, naba u sumar sukher ma u shaphang jong phi." I Petros 5:7.

U Nongpynim jong ngi u sngewtynnad ia iwei pa iwei i bynta ka jingim jong ngi. Ia ka dohnud jong U la pynkmen haba ki dohnud jong ngi ki wan sha u da ka jingngeit bad jingieit.

3. JINGDUWAI BA MARWEI

Kiba bun na ngi ngi don kiei kiei kiba ngim smat ban iathuh lem ia ki lok bajan. Te U Blei U khot ia ngi ban buh noh ia ki jingkit bakhia ha ki jingduwai bamarwei: tang u briew bad U Blei. Ym dei ba u donkam kano kano ka jingpyntip. U Badonbor baroh u tip ia ki barieh jong ngi, ka jingsheptieng, bad ki jingthmu barieh jong ngi, bad ia ki jingsngewpyrshah ba la tip kham bha ban ia kaba ngi ngi tip ia lade. Ngi donkam ban plie ia la ki dohnud ha Uta u ba tip bha bad uba ieit ia ngi na bymjukut. Ka jingpynkoit kan sdang ynda U Jisu U la ktah ia ki jingmong jong ngi.

Haba ngi duwai, U Jisu U Rangbah Lyngdoh jong ngi, U don hajan ban iarap ia ngi:
"Namar ngim don u Rangbah Lyngdoh u bym lah ban ia sngewlem bad ki jingtlot jong ngi; hynrei ia uba la pynshoi ha kiei kiei baroh syriem ia ngi, hynrei khlem pop. Namar kata te to ngin iawan hajan da ka jingshlur ha ka khet ka jingaiei, ba ngin ioh pdiang ia ka jingisnei, bad ba ngin ioh shem ka jingaiei ia ka ban iarap ia ngi ha ka por ba donkam." Heb. 4:15,16.

Hato phi sngew buhkhoh, sngewpang, sngew pop? Buh lut ia ki ha khmat U Trai. Te un sa pyndap ia ki jingdonkam jong ngi baroh.
Donkam ban don da ka jaka ba kyrpang ia ka jingduwai marwei?

"Hynrei me, haba me duwai, to leit rung sha la ka pulit, bad haba me la khang ia la ka jingkhang to kyrpad ia U Kpa jong me uba ha ka barieh; te u kpa jong me uba iohi ha ka barieh un ai nong ha me ha ka bapaw." Mathaios 6:6.

Nalor kaba duwai kaba iaid ha surok, haba dang trei ha ka kam lane haba dang ia kmen ha ba iasyllok lang, uwei pa uwei u Khristan u dei ban don ka por ba u pynkyrpang man ka sngi ban duwai bad pule Baibl. Buh ia ka por ba phin ia kynduh bad U Blei ha ba ka jingmut ka shai bha bad ka lah ban pynleit jingmut kham bha.

4. KA JINGDUWAI PAIDBAH

Kaba iasoh lang bad kiwei ha ka jingduwai ka pynlong ka jingteh kaba kyrpang bad kaba khot de ia ka bor U Blei ha ka rukom kaba kyrpang.

"Naba ha kaba don arngut ne lai ngut kiba iaseng ha ka kyrteng jong nga, hangta nga don hapdeng jong ki." Mathaios 18:20.

Kawei na kiei kiei ki bakhraw tam ba ngi lah ban leh kum ka longing ka dei ban don ka jingiaduwai shi ing. Pyni ia ki khun jong phi ba lah ban leit rah ia ki jingdonkam jong ngi beit sha U Blei. Kin shad kmen shaphang U Blei haba ki iohi ba U jubab ia ki jingduwai ha ka rukom kaba iadei bad ka jingim. Pynlong ia ka jingduwai shi ing ka por ba sngewtynnad bakmen bad ba iadon bynta.

5. DON HYNNIEW TYLLI KIBA RIEH IA KA JINGDUWAI BA LA JUBAB

Haba u Moses u la duwai, ka duriaw Basaw ka la kad. Haba u Elijah u la duwai, ka ding ka la wan na bneng. Haba u Daniel u la duwai, u angel u la set ia ka shyntur jong ki sing ba thngan. Ka Baibl ka pynpaw ha ngi da ki jingjia kiba bun jong ki jingduwai ba la jubab. Bad ka pyni ia ka jingduwai kum ka lad ban ioh ia ka bor bakhraw U Blei. U Jisu U kular:

"Lada phin pan ia kaei kaei ruh na nga ha ka kyrteng jong nga, ia kata ngan leh kein." Ioannis 14:14.

Pynban ki don ki jingduwai kiba imat leit khlem shah shkor. Balei? Hangne don hynniew tylli ki jinghikai kiban iarap ia phi ban duwai kham shitrhem:

(1) Ialong jan bad U Khrist.
"Lada phin iaineh ha nga, bad ki ktien jong nga ki iai neh ha phi, ia kaei kaei ruh ba phi mon, phin pan, te kan long ia phi." Ioannis 15:7.

Ynda ngi pynlong ka jingiadei bad U Blei ka kamram badei ban leh nyngkong, ngi ia kren bad U, ngin long kiba shah shkor bad kiba ap khmih ia ka jubab ia ki jingduwai jong ngi, lym kumta ki lah ban long kiba khlem shah shkor.

(2) Iai shaniah ha U Blei.
"Bad ia kiei kiei baroh kat kiba phin pan ha ka jingduwai da kaba ngeit phin pdiang." Mathaios 21:22.

Ban ngeit, ne don jingngeit, ka mut ba ngi da ap khmih shisha ia U Kpa jong ngi uba ha bneng ban pyndap ia ka jingdonkam jong ngi. Lada pynwit ia phi da kaba ym don jingngeit kynmaw ba U Nongpynim u leh ia ki kambah na ka bynta u briew uba kyrpad ha ka jingkut lad:

"Nga ngeit, ah Trai; to iarap ia ka jingbymngeit jong nga." Markos 9:24.

To pynleit jingmut ha kaba pyndonkam ia ka jingngeit ba ngi don; wat khuslai ia ka jingngeit kaba phim don.

(3) Pyndem jai jai ha ka mon U Blei.
"Te kane ka long kata ka jingsngewshaniah kaba ngi don ha U, ba, lada ngi pan ia kaei kaei ruh, katba kum ka mon jong U, U sngew ia ngi." I Ioannis 5:14.

Kynmaw ba U Blei U kwah ban hikai ia ngi, bad ruh ban ai de ha ngi ia kiei kiei, lyngba ka jingduwai. Teng teng U ong, "Em;" Teng teng U pynphai ia ngi sha kawei pat ka liang. Ka jingduwai ka dei ka lad ban iakren bad ban tip ia ka mon U Blei. Ngi dei ban long kiba kloi ban sngewthuh ia ka jubab U Blei bad shim jinghikai nangta. Kaba thoh ia ki jingkyrpad kiba thikna bad ia kaei kaba la jia kat kum ka jingmih ka long ka jingiarap bakhraw.

U Mynsiem Bakhuid un iarap ia phi ban don ha ka jaka kaba dei: "U Mynsiem U iasaid na ka bynta ki riewkhuid ha ka jingiadei bad ka mon U Blei." (Rom 8:27). Kynmaw ba ka mon jong ngi kan ia iaid ryngkat bad ka jong U Blei lada ngi lah ban iohi kumba U U iohi.

(4) Ap ia U Blei da kaba iaishah.
"Nga la ap shah slem ia U Trai; te u la dem ha nga, bad u la iohsngew ia ka jingkyang jong nga." Salm 40:1.

Ka mat bakongsan hangne ka dei ban iai peit sha U Blei, iai phai sha ka jingpynshai jong U. Wat pan na U Blei ia ka jingkyrshan ha kawei ka minit nangta pyrshang ban pynngop ia ki jingjynjar jong phi ha kaba wad jingsngewbha pat de hadien. Ap da kaba iaishah slem ha U Trai; ngi donkam katta katta ia kata ka jingpynbeit.

(5) Wat snoh ha kano kano ka pop.
"Lada nga niew ia ka jingbymhok ha la ka dohnud, U Trai un ym sngew." Salm 66:18.

Ki pop kiba ngi iai snoh ki pyndkut ia ka jingiadei bad U Blei, ha ka jingim u briew; ka pop barobor ka pyniakhlad ia u nongpop na U Blei (Isaiah 59:2). Phim lah ban bat da kawei ka kti ha ka pop, da kawei pat ban kner sha ka jingiarap bakynja blei. Phla kum ia kata ka pop bad kylla ka bamut naduh la ka dohnud te phin lait na kata ka jingeh. Lada ngim mon ban aiti ia lade ha U Blei ba un pyllait ia ngi na ka jingsniew, ki ktien bad ki kam, ki jingduwai jong ngi kin ym long ei ei.

"Phi pan, te phim ioh pdiang, naba phi pan bym dei, khnang ba phin ioh pynlut kein ha kita ki jingkwah brai jong phi." Jakob 4:3.

U Blei Un ym ong "haoid" ia ki jingduwai khwan myntoi. Shah shkor ia ki hukum U Blei, Ka mon jong U, te un shah shkor ia ki jingkyrpad jong phi.

"Uta uba phai noh ia la ka shkor na kaba iohsngew ia ka hukum, wat ka jingduwai jong uta ka long ka jingijli." Proberb 28:9.

(6) Dei ban sngew ba ngi donkam ia U Blei.
U Blei u jubab ia kito kiba pan ia ka jingdonlem bad ia ka bor jong u ha ka jingim jong ki.
"Suk kita kiba thngan bad kiba sliang ia ka hok, naba yn pyndap ia ki." Mathaios 5:6.

(7) Iai ialeh ha ka jingduwai.
U Jisu U pyni nuksa ia ka jingdonkam ban iai ialeh ha ki jingkyrpad da kaba iathuh shaphang ka riew kynthei kaba iai wan sha u nongbishar bad ki jingkyrpad jong ka. Khatduh uta u nongbishar u la ong ha ka jingdom, namar ba kane ka riew kynthei kan iai pynsalia ia nga, ngan sa peit ba ka dei ban ioh ia ka hok." Nangta U Jisu u pynkut: "Ha sngew, kaei ba uta u nongbishar bymhok u ong! U Blei te un ym bishar hok ia kita kiba la jied jong U, kiba lynniar kyrpad ha u mynsngi bad mynmiet, bad u shah slem na ka bynta jong ki?" Lukas 18:5-7.

Iakren bad U Blei ia ki jingdonkam, ki jingkyrmen, bad ki jingkwah jong phi baroh. Pan ia ki jingkyrkhu ba phi donkam. Iai wad bad shah shkor, haduh ba phin da sngewthuh na ka jubab jong U Blei.

6. KI ANGEL KI SHAKRI IA KI JINGDONKAM JONG KITO KIBA DUWAI

U nongrwai Salm u shadkmen ba lyngba ka jingtrei jong ki angel U Trai ia ki jingduwai jong u la jubab:

"Nga la wad ia U Trai, bad u la phai ktien ia nga; U la pyllait ia nga na ki jingsheptieng jong nga baroh. . . . U angel U Trai u ker sawdong ia kita kiba sheptieng ia u bad u pyllait ia ki." Salm 34:4-7.

Haba ngi duwai, U Blei U phah ia ki angel ban jubab ia ki jingduwai jong ngi (Heb 1:14). Uwei pa uwei u Khristan u don u angel:

"To sumar ba phin ym ibein ia iwei na kine ki barit; naba nga ong ha phi, ba ki angel jong ki ha bneng ki iohi ha la ka sngi ia ka khmat U Kpa jong nga uba ha bneng." Mathaios 18:10.

Namar ki jingduwai jong ngi:
"To phin ia kmen noh ha U Trai ha la ka sngi: Te nga ong pat, To iakmen. To ai ba ka jingiaishah jong phi kan paw ha ki briew baroh. U Trai u la jan. Wat khuslai ia kiei kiei ruh; hynrei ha kaei kaei baroh da ka jingduwai bad ka jingkyrpad lem bad ka jingainguh, to phin pyntip ia ki jingpan jong phi sha U Blei. Te kata ka jingsuk U Blei, kaba palat ia ka jingshemphang baroh, kan ri jai jai kein ia ki dohnud jong phi bad ia ki jingmut jong phi ha U Khrist Jisu." Philippi 4:5-7.

7. KA RUKOM IM U KHRISTAN

Ka Baibl ka iathuh ia ka rukom im Khristan kaba pher. Katba kum ki Ephesos 4:22-24, U Khristan u dei ban "buh noh" ia ka rukom im ka barim kaba wan na ka "jingkwah ka jingshukor," bad ba yn pynthymmai ia phi ha ka mynsiem ka jingmut jong phi; bad baphin kup ia u briew ubathymmai, ia uba la pynlong ha ka. Ephesos 4:22-24. Ha kane ka jingthoh bad ha ka Guide 6 ngi shem ba ha ka jingkha thymmai ia ngi la thaw thymmai ban long ki briew kiba pher ha U Khrist.

Kane ka Guide bad ki hynriew tylli ki ban dang bud, ki pynpaw ia ka rukom im Khristan; ki pynpaw ia ka barieh jong ka jingim Khristan kaba suk. Kin iarap ia phi ban tei ka jingiadei kaba kham khlain bad U Khrist, ka ban pynmih ia ka rukom im khristan kaba pher. Kumta to pynneh ia la ki khmat ha U Jisu mynta te phin long shi bynta na kata ka jingkhawai ynda ka jingsuk U Khrist kan synshar khlem nong iakop shuh.