U Nongpynim Uba Iai Don Barobor

Mynba uwei u khynnah uba kyrteng u Peter u la jah hapoh ka 'lawphlang ha kawei ka miet badum tliw tliw, U Blei u la khot ia u da ka kyrteng: "Peter!" Ynda kata ka sur kren ka la khot biang, u Peter u la sangeh ha ka lynti ba u iaid, u peit sha khyndew, bad u shem ba sa tang shisien jam u lait na kaba hap shapoh ka jaka tih maw shun kaba la ieh noh la slem.
Hato kan ym long kaba phylla lada iwei pa iwei na ngi ngi lah ban iohsngew ia ka jingkhot U Blei ia ngi da ka kyrteng? Hato kan ym long kaba khraw lada u la long jan haduh katta kum u Lok __ lada ngi lah ban iashong kai bad ia kren ia kylli shaphang ki jingialeh bad ki jingphohsniew jong ngi?

1. KA JINGIOH RUNG BA KHLEM PUD SHA U JISU

Phi ngeit ne phim ngeit, ngi lah ban wan kham jan sha U Jisu mynta ban ia kaba ngi lah lada u don hangne kum u briew ba lah ban iohi. Ban don ia U Khrist ha ka jinglong doh ha shnong jong ngi ka long kaba phylla da shisha, hynrei pyrkhat ia u paidbyllien uban wan tur ban iohi kham jan. Pyrkhat ia ka jingdawa ha ka por. Ngin leh bha lada lah ban ioh wat tang khyndiat minit ban iakren markhmat ha ka jingim baroh shi lynter.

U Khrist U kwah ban ioh ia ka jingiadei ba marwei bad iwei pa iwei na ngi. Kata ka dei kawei ka daw ba U leit noh na kane ka pyrthei ban trei ia ka kam bakyrpang ha beng ka ban ai lad ia u ban wan kham jan sha iwei pa iwei na ngi man ka sngi. Namar ba ia U Jisu ym shym la set kut tang ha kawei ka jaka kumba u la long mynba u dang iaid ha sla khyndew, lyngba U Mynsiem Bakhuid U long hajan mynta ban ialam ia ka jingim jong uwei pa uwei uba mon sngewbha.

Kaei ka jingkular bapynshlur U Jisu U ai shwa ba un leit kiew sha bneng?

"Ngan long lem bad phi ha la ka sngi, haduh bawai noh ka pyrthei." Mathaios 28:20.

U Khrist U dang leh aiu ha bneng kaba pynlong ia u ban long lem bad phi barobor?

"Namar kata haba ngi don U RANGBAH LYNGDOH Bakhraw uba la leit lyngba ia ki bneng, U Jisu. U Khun U Blei to ngin ia batkshem ia la ka jingphla. Namar ngim don u Rangbah Lyngdoh u bym lah ban iasngew lem bad ki jingtlot jong ngi; hynrei ia uba la pynshoi ha kiei kiei baroh syriem ia ngi hynrei khlem pop. Namar kata to ngin iawan hajan da ka jingshlur ha ka khet ka jingaiei, ba ngin ioh pdiang ia ka jingisnei, bad ba ngin ioh shem ka jingaiei ia kaban iarap ia ngi ha ka por ba donkam." Hebrew 4:14-16.

Peit thuh ia ka jingthikna ban don ia U Jisu kum u nongmihkhmat jong ngi ha bneng: "La pynshoi ia u ha kiei kiei baroh syriem ia ngi." "Uba sngewlem ia ki jingtlot jong ngi." "Uba iarap ia ngi ha ki por badonkam." Bad U Jisu kum U Rangbah Lyngdoh jong ngi ym shym la ot noh ia ngi na ka bneng ka bajngai; U Khrist U lah ban ialam ia ngi haduh ha khmat U Blei. Ym sngewphylla ba la kyntu ia ngi ban "wan sha ka khet ka jingaiei da ka jingshlur."

Ka jaka aiu U Jisu U bat ha bneng?

"Hynrei Une, haba u la lah ainguh tang kawei ka jingknia namar ki pop, junom u la shong ha ka kti kamon U Blei." Hebrew 10:12.

U Khrist u baim __ uta uba sngewthuh __ u long u nongmihkhmat jong ngi marwei ha ka khet" ha ka kti kamon jong U Blei."

Kumno ka jingim U Jisu ka pynkhreh ia u ban long u lyngdoh jong ngi?

"Namar kata ka la dei ban pynlong ia u uba syriem ia la ki para ha kiei kiei baroh, ba un ioh long u Rangbah Lyngdoh baisnei bad ia uba lah ban shaniah ha kiei kiei kiba dei sha U Blei, ba un pynlong ka kuna namar ki pop u paidlang. Namar ha kaba ma u hi u la shah haba la pynshoi ia u, u lah kein ban iarap ia kita ia kiba la pynshoi." Hebrew 2:17,18.

U "hynmen" jong ngi uba la iashim bynta ha ka jinglong briew bad ia uba la pynshoi kum ma ngi, u long mynta u Rangbah Lyngdoh jong ngi ha ka kti kamon jong U Kpa. "La pynlong syriem" ia ngi, u tip aiu ngi la iaid lyngba. U la shah thngan, shah sliang, la shah pynshoi, bad uba la lut ka bor. Uba la sngewdonkam ia ka jingsngewlem bad jingsngewthuh.

Hynrei nalor baroh, U Jisu U long uba la tbit ban long u Rangbah Lyngdoh jong ngi namar ba u la iap ban "pynlong ka jingpyniasuk" na ka bynta ki pop jong ngi. U la siew ia ka dor ki pop jong ngi da kaba iap ha ka jaka jong ngi. Kane ka dei ka khubor babha, ka gospel ia u bynriew baroh ha ka pyrthei satlak bad lyngba ki por baroh.

Uwei na ki nongialam jong ki skul jong ngi u iasam lem ia kane ka jingiashem: "Mynba ka khun khatduh jong ngi ka dang lai snem, ka la shah tylliat ia ka shynriahti ha ka shuki khylliap, haduh ba la pait ka shyieng. Katba ngi ialam pynkloi ia i sha u doctor, ka jinglynniar jong i namar ba pang eh ka la kad ia ka dohnud jong ngi. Kata ka jingjia ka la ktah ia ka khun kaba dang san snem karta ha ka rukom kaba kyrpang. Ngan ym klet ia ki ktien jong ka hadien ba la dep sumar u doctor ia ka para jong i. Ka kren ia iam artat, 'Oh, Papa, nga kwah ba kan jin da la dei ka shynriahti jong nga'"!

Ynda baroh u khun bynriew la khniot iap da ka pop bad la rai pynrem ban iap junom, U Jisu U la ong, "Oh, Pa, nga kwah ba kan jin da la dei ia nga." Bad U Kpa U la ai ia ka jingkwah U Jisu ha ka diengphna. U Nongpynim jong ngi U la mad ia kawei pa kawei ka kordit kaba ngi la shah ___ bad kham palat!

2. KA GOSPEL HA KA TESTAMENT BARIM

Haba ki Israel ki la iasieh dara ha trai u lum Sinai, U Blei U la phah ia u Moses ban thaw ia ka jaka kyntang kaba lah ban rah ba kin ioh mane "kat ba kum ka nuksa ba la pyni ha u (Moses) halor u lum" (Eksodos 25:40). Lajan san spah snem hadien, ka templ u syiem Solomon ba la thaw da ki maw ka la shim ia ka jaka jong ka tabernakl. Bad ia kane ka templ la tei ha kajuh ka dur thik kum ka tabernakl.

Haba U Blei U la ai ha u Moses ia ki jingbthah ban tei ia ka jaka kyntang, ka jingthmu aiu u don ha ka jingmut?

"Bad to kin thaw ia ka jaka kyntang ia nga; ba ngan ioh shongneh hapdeng jong phi." Eksodos 25:8.

Ka pop ka la pynlong ia ka jingiakhlad basngewsih hapdeng u khun bynriew bad U Nongthaw jong ki. Ka jaka kyntang ka dei ka lad ka lynti ba U Blei U pyni kumno U lah ban shong biang hapdeng jong ngi. Ka jaka kyntang, bad hadien ka templ, ka la kylla long ka pdeng jong ka jingmane blei ha ka Testament Barim. Man ka step bad ka janmiet ki paidbah kin ialum lang sawdong ka jaka kyntang ban ia kynduh bad U Blei ha ki jingduwai (Lukas 1:9,10), ki dawa ia ki kular jong U Blei: "ngan ia kynduh bad phi" (Eksodos 30:6).

Ka Testament Barim ka hikai ia ka juh ka gospel ka jingpynim kumba hikai ka Testament Bathymmai. Baroh ar ki pynpaw ia U Jisu u baiap na ka bynta jong ngi bad uba trei kum u Rangbah Lyngdoh jong ngi ha ka jaka kyntang ha bneng.

3. IA KA JINGTREI U JISU NA KA BYNTA JONG NGI LA PYNPAW HA KA JAKA KYNTANG

Ka jaka kyntang bad ki jingshakri jong ka ki pynpaw ia kaei ba U Jisu U dang trei mynta ha ka templ ha bneng, bad ia kaei kaba u dang leh mynta ha khyndew ban pynbha bad ialam ia iwei pa iwei na ngi man ka sngi.
Kumba ia ka jaka kyntang ha pyrthei la bud nuksa katba kum ka templ ha bneng, ka phalang ia ka jaka ha bneng ha kaba U Jisu U trei mynta. Eksodos 25-40, ki iathuh ia ki niam ki rukom jong ka jaka kyntang ha ri khlaw. Ka jingiathuh lyngkot shaphang ka jaka kyntang bad ki tiar badon ha ka ki paw ha ka Testament Bathymmai.

"Mynta wat kata ka jutang ka banyngkong ruh ka la don ki niam ki rukom ka jingmane blei, bad ka ing kyntang, kaba na kane ka pyrthei. . . . Kata kaba nyngkong, ha kaba la don kata ka diengpynieng sharak, bad kata ka miej bad kita ki pu pyni; ia kaba la khot ka jaka kyntang. Sha lyndet ka jingkah kaba ar, ka tabernakl ia kaba la khot ka jaka kyntang tam; kaba don ki pliang ksiar ba thang iwbih, bad ka synduk ka jutang ia kaba la suid baroh sawdong da ka ksiar, ha kaba la don u khiew ksiar uba don kata ka manna, bad uta u diengduh u Aaron uba la phuh, bad kita ki maw lyngkniap jong ka jutang ha kiba U Blei U la thoh ia ki shiphew hukum (Deut. 1:1-5). Halor jong ka ki kherub ka burom ki kah ia ka jingtap-isnei; shaphang kita ngim lah mynta ban kren ha la ka bynta bynta." Hebrew 9:1-5.

Ka jaka kyntang ka don ar kamra, ka jaka kyntang bad ka jaka kyntang tam. Ka phyllaw ka don ha khmat ka jaka kyntang. Ha kata ka phyllaw la buh ia ka duwan rnong ha kaba ki lyngdoh ki knia ia ki jingknia, bad ka dabor ha kaba ki sait.

Ki jingknia kiba la knia halor ka duwan rnong ki iengpharshi ia U Jisu, uba da ka jingiap jong U halor ka diengphna U la kylla long "u khun langbrot jong U Blei, uba kit ia ki pop jong ka pyrthei!" (Ioannis 1:29). Haba u nongpop uba la kylla ka bamut u la wan sha ka duwan lem bad ka jingknia bad u phla ia la ki pop, u ioh ka jingmap bad jingpynkhuid lyngba ka snam U Jisu (I Ioannis 1:9).

Ha ka kamra banyngkong, ne ka jaka kyntang, ka diengpynieng sharak ka iai aijingshai khlem sangeh, ka iengpharshi ia U Jisu kum "U Jingshai bym julip jong ka pyrthei." (Ioannis 8:12). Ka miej jong u kpu bakyntang ka iengpharshi ia ka jingpyndap pynbiang jong U ia ka jingthngan ka met bad ka mynsiem kum u kpu ka jingim uba iai don (Ioannis 6:35). Ka duwan ksiar bathang jingiwbih ka iengpharshi ia ka jingtrei ka jingduwai U Jisu na ka bynta jong ngi ha khmat ka burom U Blei (Jingpynpaw 8:3,4).

Ka kamra ka baar, ne ka jaka kyntang tam, ka kynthup ia ka synduk ka jutang. Ka iengpharshi ia ka khet U Blei. Ka jingtap jong ka jingpyniasuk ne ka jingtap isnei, ka iengpharshi ia ka jingiasaid U Khrist, U Rangbah Lyngdoh jong ngi uba dang iasaid na ka bynta u khun bynriew bapop, kiba la pynkhein ia ka ain bakhuid U Blei. Ia ki artylli ki mawlyngkniap ha kiba U Blei U la thoh ia ki 10 hukum la buh hapoh ka jingtap isnei. Ki kherub ksiar ka burom kiba pyiar la ki thapniang halor ka jingtap isnei ki don ha ki ar ki tduh ka synduk. Ka burom U Blei ka paw hapdeng kine ki ar ki kherub kaba long ka pharshi ia ka burom jong U Blei hi.
Ka pyrda bakah ia ka jaka kyntang na ka jingiohi ki paidbah katba ki lyngdoh ki dang trei na ka bynta jong ki ha ka phyllaw. Ka pyrda kaba ar pat ka don ha khmat ka jaka kyntang tam kaba kah ia kata ka kamra kaba hapoh.

Mynba U Jisu U la iap ha ka diengphna, la jia aiu ia kata ka jingkah?

"Ha khmih ruh ka jingkah ka temple ka la kad ar bynta, naduh na jrong haduh ha tbian." Mathaios 27:51.

Ia ka jaka kyntang tam la thad ryngkhang ynda la iap U Jisu. Hadien ka jingiap U Jisu ym don jingkah shuh hapdeng U Blei Bakhuid bad uba ngeit shisha; U Jisu U Rangbah Lyngdoh jong ngi U ialam ia ngi sha khmat U Blei syndon (Heb. 10:19-22). Ngi lah ban wan ha ka kamra jong ka khet bneng namar ba U Jisu U Rangbah Lyngdoh jong ngi U don ha ka kti kamon U Blei. U Jisu U pynlah ia ngi ban wan ha khmat U Blei ___ Sha ka dohnud baieit U Blei. Kumta "to ngin ia wan hajan."

4. KA JINGPYNPAW IA U KHRIST UBA IAP BAN PYNIM IA NGI

Kumba ka jaka kyntang ha khyndew ka long ka nuksa barit jong ka temple ha bneng ha kaba U Jisu U shakri mynta na ka bynta jong ngi, ki jinglehniam ha ka jaka kyntang ha pyrthei ki long kum "ka kopy ne syrngiew jong kita kiba ha bneng" (Heb. 8:5). Hynrei ka don ruh ka jingiapher bakhraw; ki lyngdoh kiba shakri ha khyndew kim lah ban map ia ki pop, hynrei ha ka diengphna U Jisu U "la paw tang shisien ia baroh ha ka bakut jong ki yrta ban pyndam noh ia ki pop da kaba knia ia lade (Heb. 9:26).

Ka kitab Lebitikos ka iathuh bniah ia ki jinglehniam ba la leh ha ka jaka kyntang. Ia kita ki jingleh niam la pynia bynta ha ki ar bynta: kiba man ka sngi bad kiba shisien shisnem. (Guide 13 ka iathuh ia kiba shisien shi snem.)

Ha ki jingleh niam ba man la ka sngi, ki lyngdoh ki knia ia ki jingknia na ka bynta u briew shimet bad na ka bynta ki paidbah ruh. Haba u briew u leh pop, un wallam ia u mrad uba tlem kum ka jingknia namar ka pop, "u buh ia la ki kti halor ka khlieh jong uta u jingknia bad pyniap ia u ha ka jaka ka jingknia" (Lebitikos 4:29). Ia ka ryngkang jong u nongpop la dei ban pynkynriah sha uta uba khlem pop da kaba phla ia ka pop bad buh ia la ki kti. Kane ka pyni pharshi ia kaba U Khrist U la leh kumno u shim ia ki pop jong ka Kalbari; Uta uba khlem pop u la kylla long "ka pop na ka bynta jong ngi" (II Korinth 5:21). Ia uta u mrad la pyniap bad ia ka snam jong u la pynmih namar ba ka kdew sha ka kuna ba hakhlieh tam ba U Khrist u la siew halor ka diengphna.

5. BALEI DA KA SNAM?

"Khlem kaba pynmih snam ym don jingmap (Heb. 9:22). Kaei kaba la jia ha ka jaka kyntang jong ka Testament Barim ka kdew sha khmat sha ki kam ba khraw bapynim jong U Khrist. Haba U la iap na ka bynta ki pop jong ngi, u la leit rung sha ki jaka kyntang "tang shisien leit da la ka jong ka snam, haba u la ioh ia ka jingsiewspah bymjukut na ka bynta jong ngi (dkhot 12). Haba ia ka snam U Jisu la pynmih na ka bynta ki pop jong ngi, "ia ka jingkah jong ka templ la kad na khlieh sha trai" (Mathaios 27:51). Hadien ka jingknia U Jisu ia lade halor ka diengphna ka jingknia da ki mrad ym donkam shuh.

Haba U Jisu U la pynjaw ia la ka snam na ka diengphna, u la aiti ia la ka jingim bajanai bad bakohnguh kum u nongmih bujli na ka bynta ka jingrem jong ngi. Haba ia U Kpa bad U Khun la pynkhlad da ka pop ha Kalbari, U Kpa ula phai noh ha ka kordit bad U Khun u la iap da ka jingpaitdohnud. U Blei U Khun U la jam sha ka histori ban shim ha lade ia ka jingmih bapura jong ka pop bad ban pyni rukom haduh katno ka shyrkhei ka jingleh bymdei. U lah nangta ban map ia ki nongpop khlem da pynrit dor ia ka pop. U Khrist U la pynlong "ka jingiasuk da ka snam jong u ba la pynmih halor ka diengphna" (Kolosai 1:20).

6. KA JINGPYNPAW IA U JISU UBA IM BAN PYLLAIT IA NGI

Kaei ka kam ba man la ka sngi jong U Jisu ha ka templ bneng?

"Namar kata U lah ruh ban pynim janai ia kita kiba wan ha U Blei da U, haba U im hala ka rta ia kaban iasaid na ka bynta jong ki." Heb. 7:25.

U Jisu U "im" mynta ban tyrwa ia ka snam jong U, ia ka jingknia jong U na ka bynta jong ngi. Mynta U trei minot ban pynim ia uwei pa uwei u briew na ka pop ba shyrkhei. Ki don kito kiba pyrkhat bakla ba, kum U Nongiasaid jong ngi, U Jisu U don ha bneng U da kyrpad rit ia U Kpa U bym da mon eh ban map ia ngi. Ha ka jingshisha, U dei U Blei Uba pdiang da kaba kmen ia ka jingkheinduh jong U Khun na ka bynta jong ngi.

Kum U Rangbah Lyngdoh jong ngi ha bneng, U Khrist ruh U iasaid bad u khun bynriew. U trei ban iarap ia ka jingleh bymsalia u briew ban peit biang ia ka jingaiei, ban iarap ia ki nongpop ba la duh jingkyrmen ban bat ia ka jingkyrmen ka gospel, bad ban iarap ia ki bangeit ban shem ia ka spah ha ka ktien U Blei bad ia ka bor ha ka jingduwai. U Jisu u pynwandur ia ki jingim jong ngi ha ka jingiadei bad ki hukum U Blei bad U iarap ia ngi ban tei ia ka jinglong kaba lah ban ieng ia ki jingtynjuh jong ka por.

U Blei U la aiti ia la ka jingim na ka bynta ki briew baroh kiba la ju im ha kane ka pyrthei. Bad mynta, kum U Rangbah Lyngdoh ne U Ksiang, "U iai im" ban ialam ia ki briew ban pdiang ia ka jingiap jong u na ka bynta ki pop jong ki. Wat la u la pyniasuk ha lade ia ka pyrthei ba la kyllon baroh kawei halor ka diengphna, Um lah ban pynim ia ngi lymda ngi pdiang ia ka jingaiei jong u. Ki briew kin ym jah duh tang namar ba ki long ki nongpop, hynrei namar ba ki kyntait ban pdiang ia ka jingmap ba U Jisu U tyrwa.

Ka pop ka la pynduh ia ka jingiadei bajan ba u Adam bad ka Im ki la don bad U Blei. Hynrei U Jisu, kum U Khun Langbrot jong U Blei, U la iap ban pyllait ia u khun bynriew baroh na ka pop bad ban pynioh pat ia ka jingialong lok kaba la duh noh. Phi la shem ne em ia U kum U Rangbah Lyngdoh jong phi, Uta uba iai im ban ri ia kata ka jingiadei kaba jan bad bakhlain?

Ka jingiap bakheinduh U Khrist ka long kaba tang ma ka marwei. Ka jingtrei U Khrist ha bneng ka bym lah ban ianujor badno badno ruh. Tang U Khrist Uba lah ban pynlong kaba lah ia U Mynsiem bakynja blei ba un shong da shisha ha ki dohnud jong ngi. U da pynsuda ia lade khnang ba un ioh pynlong ia ngi ki badap. U don hok ban ioh ka jingaiti kaba ia syriem kum kata na ngi. To ngin pdiang janai ia U kum U Nongpynim bad U Kynrad ka jingim jong ngi.