Ynda U Jisu Un Wan Na Ka Bynta Jong Phi

Hadien bun snem ka jingshah lehbein, u Armando Valladares u la raikhoh, bad u la dkoh, u ikumba satang ka syrngiew na kaba u long mynshwa. U la shah set patok haduh 30 snem ha kawei na ki iingbyndi jong u Castro namar ba u leit duwai ha ingmane ha ka sngi Khristmas. Ki nong pyniaid ka byndi ki la pynshah thngan, shoh bein, bad pynpoh briew ia u, hynrei um mon ban iehnoh ia la ka jingngeit.

Ka don kaei re kaei kaba iai bat ia u ban nang iai im: ka kular kaba u la ai ha kawei ka samla kaba kyrteng ka Martha. Ki la ju ia kynduh bad la ia ieit katba u dang don ha byndi. La khring ia ka da ka jingngeit ba skhem jong u. Ki tang shu dep iathoh ha iing shari, ia ka Martha la pynbor ban leit noh sha Miami.

Ka jingiakhlad jong ki ka long kaba pang mynsiem haduh katta katta. Hynrei u Armando u la ioh lad ban phah ia ka kular jong u sha ka. Ha i kot lyngkhot i barit i ba la bret, u thoh ia ka kular jong u: "Ngan wan sha phi. Ia ki suloi kiba don sha lyndet nga khein shuh."
Une u koidi u la kut jingmut ba la kumno kumno ma u bad ka Martha kin iateh jutang ha ingmane ha khmat U Blei. Ha kawei ka sngi ka jingiasoh jong ki kan long kaba shisha kaba janai. "Phi long barobor bad nga," u iathuh ia ka.

Ka jingkular u Armando ka la ri ia u lyngba ki snem jong ka jingshah lehbein ka ban jin da la pynduh noh ia ka mynsiem jong ki ba bun ki briew. Bad ka iarap ia ka Martha ban nang iai im. Ka la trei shitom khlem man thait ban pynpoi sha ki shkor jong ki paidbah ia ka jingshah lehbein ia u tnga jong ka. Kam ju duh jingkyrmen.

1. KA KULAR

Teng teng ngi lah ban sngew phylla, hato U Khrist un wan hiar shisha ha kawei ka sngi na katei ka sahit bneng ban don ka jingiashem baphylla? La pyniakhlad ia ngi la slem bah. Kaba kum kata ka jingpynkut bakmen ia ka histori ba slem bad basngewsih jong ka pyrthei ka lah ban paw kum kaba bha than ban long kaba shisha. Hynrei ka don kawei kaei kaei kaba lah ban ri pynim ia ka jingkyrmen ha ka dohnud jong ngi. Bad kata ka dei ka jingkular U Jisu ban wan phai. Shwa ba un khlad na ki synran jong u sha bneng, U Jisu U la ai ia kane ka jingkular:

"Wat khih khuslai ha ka dohnud jong phi. To ngeit phi ha U Blei, to ngeit ha nga ruh. Ha ka ing U Kpa jong nga don bun ki jaka shong neh; lymda kumta, nga la iathuh ia phi. Ngan sa leit ban khreh ka jaka ia phi. Bad lada nga leit khreh ka jaka ia phi, NGAN WAN PAT BAD NGAN shimti ia phi ha lade hi ba ha kaba nga long ma nga phi ruh phi lah ban long." Ioannis 14:1-3.

Shwa ba U Jisu un leit kiew sha bneng, u iathuh skhem ia ki nongbud jong U, "Ngan wan pat!" U la kular ban wan phai bad shimti ia kito kiba shaniah ha U bad ialam ia ki sha ka jaka ba U la leit pynkhreh ia ki. Ki jingthoh ki kren shaphang ka jingwan arsien jong u kumba 2500 sien. Ka jingshisha ba U Jisu un sa wan sha kane ka pyrthei sa shisien ka long ka baskhem kum ka jingwan banyngkong ar hajar snem mynshwa.

La slem bah U Blei U la kular ba U Messaiah un wan, U Nongpyllait uban shim ia ki ryngkang jong ngi bad un ai jingmap ia ki pop ki briew. Kata ka kular ka imat ka long kaba bha than ban long kaba shisha ha ka pyrthei kaba ngi im. Hynrei U Jisu U la wan bad U la iap halor ka diengphna. Ka jingkular ka la urlong kham donburom ban ia kaba ki briew ki iamutdur. Ka jingkular jong U ban wan phai ruh kan sa urlong. Ngi lah ban shaniah ha uta uba ieit ia ngi, ban wan phai bad lum lang ia kito kiba U la siew da ka dor bah.

Lyngba ka jingshah set byndi jong u, u Armando u iai ialeh ban phah ki khubor bad jingdro sha ka Martha. Bad ka la ioh shon katto katne na kita ki jingthoh. Bad ka jingtbit jong ka ka la khring ia ka jingshah shkor ka pyrthei. Ki sorkar bapher jong ka pyrthei ki la sdang ban kren bad ong ia u Castro ban pyllait noh ia ki koidi kiba shah lehbein na ka bynta ka jingiatiplem. U President jong ka Phrans u la ia kren bad u Castro bad khatduh ha u October 1982 ia u Armando la leit buh ha ka eroplein kaba her sha Paris. Um sngew lah ngeit ba ia u la pyllaitluid __ wat hadien ba ka eroplein ka la hiar ha khyndew. Hadien arphew snem ka jingjynjar bad jingap bad jingkhmih lynti, u Armando u la mareh sted sha ki kti ba la kner jong ka Martha.

Khyndiat bnai hadien kine ki arngut ki la ia ieng hapoh ka ingmane St. Kieran ha Miami ban pyndep ia ka jingsmai jong ki. Khatduh khat wai ka jingiashongkurim jong ki ka la skhem ha khmat ka ain. Ia ka kular jong u la pyndep: "ngan wan sha phi."

Phi lah ne em ban mut dur ka jingiakynduh baphylla haduh katno kata ka long haba ngin lah ban iohi ia U Khrist mar khmat? Ka jingmih paw badon burom jong u kan sa nguid lut ia ki jingkhuslai bad duh jingkyrmen baroh, kan niad lut ia ki jingpang baroh kiba ngi la buhrieh ha ka dohnud jong ngi. Ka jingwan phai U Jisu kan pyndap ia ki jingkwah ne sliang bajylliew tam jong ngi bad ia ka jingkhmih lynti ba pynkyndeh mynsiem tam jong ngi. Te ngin sa ioh rung sha ka jingiadei lok bajan bad ki briew baphylla tam jong ki jingthaw jong U. U Jisu un sa wan shen! Phi thrang ban iashem bad U?

2. KUMNO U JISU UN WAN?

(1) U Jisu un wan ne em ha ka barieh?
"Ha khmih nga la iathuhlypa ia phi. Namar kata la kin ong ha phi, ha khmih u don ha ka ri khlaw; phi wat mih noh: ha khmih u don ha ki pulit ba jar jar: phi wat ngeit. NABA KUMBA KA MIH KA LEILIEH na mih-ngi, BAD KA SHAI haduh sepngi, KUMTA RUH KAN LONG KATA KA JINGWAN U KHUN U BRIEW." Mathaios 24:25-27.

Lah ban iohi jngai ia ka jingba ka leilieh, kumjuh ruh ka jingwan U Jisu kam dei ka jingjia kaba rieh lane ka jingjia kaba tang ha ka jingmut ki briew.

(2) Hato U Jisu Un wan pat kum u briew shisha?
"Te haba ki dang ia khmih shain sha bneng, katba U dang kiew, ha khmih arngut ki rangbah ki la ia wan ieng hajan jong ki ha ki jain kup balieh; kiba la ong ruh, 'Ko rangbah Galilaia, balei phi ieng khmied sha bneng? UNE U JUH U JISU, ia uba la SHIM noh na phi SHA BNENG, UN WAN PAT HA KAJUH KA RUKOM kumba phi la iohi ia U ba u leit sha bneng." Ki Kam. 1:10,11.

Ha ka sngi ba u la leit noh na ka pyrthei jong ngi, ki angel ki la iathuh skhem ia ki synran ba uta u juh U Jisu uba la shim na ki sha bneng __ ym da uwei pat __ un wan pat ha ka dur kum u Syiem jong ki syiem. U juh U Jisu uba la pynkhiah ia ki bapang bad uba la pynpeit ia ki khmat uba matlah. U juh U Jisu uba la kren jai jai ha ka kynthei kaba la shem ha kaba klim. U juh U Jisu uba la niad ia ki ummat na ki khmat kiba iam sngewsih bad uba khot ieit ia ki khunlung ha ka pneh jong U. U juh U Jisu uba la iap ha ka diengphna ha Kalbari, uba la shong thait hapoh jingtep, bad uba la mih pat na kiba iap ha ka sngi balai.

(3) Un wan ne em U Jisu khnang ba ngin iohi ia U?
"Ha khmih, u wan bad ki lyoh, TE KA KHMAT BAROH KAN IOHI IA U." Jingpynpaw 1:7.

Baroh kiba dang im haba U Jisu un wan pat, kiba hok bad ki bymhok kin iohi ia ka jingwan jong U.

Katno ngut U Jisu hi dalade u ong kiban iohi ia ka jingwan jong U?

"Ynda kumta te ka dak U Khun u briew kan paw ha bneng; te hangta ki jait bynriew baroh ka pyrthei kin ia lynniar lympat haba kin iohi ia U Khun u briew ba u wan ha ki lyoh bneng da ka bor bad ka burom bakhraw." Mathaios 24:30.

Baroh kiba dang im ha kane ka pyrthei kin iohi ia U Jisu ba U wan phai.

(4) Kiei kiban wan bud ia U Jisu haba un wan?
"Haba U Khun u briew un wan ha ka burom jong u, bad baroh ki angel lem bad U te un shong halor ka khet ka burom jong U." Mathaios 25:31.

To mutdur kumno kan long ynda U Jisu un wan phai ha ka burom batyngshain phyrnai ba la ker sawdong da ki angel bakhuid baroh."

(5) Ngi lah ne em ban iathuh thik ia ka por ba U Jisu Un wan phai?
"Hynrei shaphang kata ka sngi bad kata ka por ruh ym don batip, lymne ki angel ki bneng, hynrei tang U Kpa jong nga hi. . . . Naba kumta, phi ruh to long kiba la kloi; na ba ha ka por ba phim mut, u wan U Khun u briew." Mathaios 24:36,44.

Baroh kin iohi ia ka jingwan badon burom U Jisu, hynrei kiba bun ki long kiba khlem pynkhreh ia kata ka jingjia. Hato phi shimet phi la pynkhreh ia U Jisu ynda U wan?

3. AIU U JISU UN LEH YNDA UN WAN PAT?

(1) U Jisu un lum lang ia baroh kiba la pynim.
"Un phah noh ruh ia ki angel jong U da ka jingsawa bakhraw ka turoi, bad kin ialum ia kiba lajied jong u na ki saw lyer, naduh ki bakut jong ki bneng haduh ki bakut jong ki." Mathaios 24:31.

Lada phi la shah ia U Jisu ban pynkhreh ia phi ha ka dohnud bad ka jingim, phin sa iakynduh bad u da ka jingkmen kum u Nongpynim jong phi.

(2) U Jisu Un sa pynmih pat ia kiba hok kiba la iap.
"Naba U Trai hi Un wan hiar na bneng da ka jingrisa da ka ktien sawa u angel rangbah bad da ka turoi U Blei; BAD KITA KIBA IAP HA U KHRIST KIN IA MIH PAT SHWA." I Thessaloni 4:16.

U Jisu Un wan hiar na Bneng da ka jingrisa. Ia ka jingsawa bakhraw jong U lah ban iohsngew sawdong ka pyrthei. Ka plie ia ki jingtep ha kawei pa kawei ka jaka tep, bad la pynmih pat da ki millian ki briew kiba la pdiang ia U Jisu lyngba ki arta. Ka sngi ka bakmen haduh katno kata kan long!

(3) U Jisu un pynkylla ia ki bahok baroh ha ka jingwan jong U __ ym tang ia ki bahok kiba la iap, hynrei ia ki bahok kiba dang im ruh.
"Ynda kumta ma ngi kiba dang im ia kiba la pynsah, YN RONG NOH IA NGI LEM BAD KI ha ki lyoh, ia ka ban iashem ia U Trai ha ka suin bneng, te kumta ngin iai long junom junom lem bad U Trai." (dkhot 17).
Ban pynkhreh ia ngi ia ka bymjukut, U Khrist U pynkylla ia ki met baiap jong ngi sha ki met kiba itynnad bad ki bym iap shuh.
Ha khmih nga iathuh ia phi ia ka jingmaian ngin ym iohthiah baroh, hynrei yn pynkylla ia ngi baroh shi syndon, ha kaba shi khyllipmat kein ha ka turoi kaba khatduh. Namar ka turoi kan sawa, ynda kumta ia ki baiap yn pynmih pat ki bym pyut, bad ia ngi yn pynkylla. Namar ka dei da lei lei ia kane ka bapyut ban phong ia ka bympyut, bad ia kane ka baiap ban phong ia ka bymiap." I Korinth 15:51-53.

Ynda U Jisu un wan "yn pynkylla ia ngi baroh."
Pyrkhat: ym don jingpang mat shuh, jingpang iapshilliang, lane ka kansar. Ia ki hospital la khang bad ia ki ing buh met iap. U Khrist U la wan!

(4) U Jisu un ialam ia ki bahok baroh sha bneng.
U dei U Jisu hi uba kular, "ngan wan pat bad ngan shimti ia phi ha lade hi" ha ing U Kpa jong nga (peit Ioannis 14:1-3). U Petros u kren ia ka jingioh pateng jong kiba la siewspah "ia kaba la ri ha bneng na ka bynta jong phi." I Petros (1:4). Ngi lah ban khmih lynti ban ioh peit bniah ia ki jingphylla ka nongbah U Blei, ka Jerusalem bathymmai, bad ban ithuh ia U Kpa Uba ha bneng.

(5) U Jisu Un pyndam noh ia ka jingsniew bad jingjynjar baroh jong kane ka pyrthei.
Ki bymman __ kito kiba la kyntait barobor ia ka jingtyrwa U Jisu ia ka jingisnei __ ha ka jingshisha ki la rai pynrem ia lade hi. Haba ki peit ia ka khmat U Jisu haba U wan sha ki na ki lyoh ka bneng, ka jingkynmaw kynsan ia ki pop jong ki ka long kaba pang eh haduh katta katta ia ki ban shah; ki la pyrta ia ki lum bah bad ia ki mawsiang, "To hap ha ngi bad buhrieh ia ngi na ka khmat jong uta uba shong halor ka khet bad na ka jingbitar uta u khun langbrot." (Jingpynpaw 6:16). Ki kham jied ia ka jingiap ban ia kaba ieng ha khmat ka jingpeit basam lyngba jong U Jisu.
Ki tip mynta ba kata ka sur kren kaba tied kum u pyrthat na sahit bneng, shisien ka sngi ka la ju khroh ia ki ban pdiang ia ka jingaiei blei. Kito kiba la len ia lade ha ka jingiabeh ia ka spah ne ka jingsngewbha lane ia ka kyrdan mynta ki la sngewthuh ba ki la leh lyndet ia kata kaba tang ma ka hi kaba kordor ban don ha ka jingim.

Ka dei kane ka jingsngewthuh kaba khniot iap ia ki. Ha ka jingshisha, ym donkam ia uwei ruh na ki ban jah noh. Wat U Blei hi da lade "um shem jingsngewbha ha ka jingiap u bymman" (Esekiel 33:11). Um kwah "iano iano ruh ban jot noh, hynrei ba baroh kin poi sha ka jingkylla ka bamut" (II Petros 3:9). U Jisu U kyrpad jur ia ngi, "To wan ha nga, phi baroh kiba thait bad bakhia ka jingkit, te ngan pynjem ia phi" (Mathaios 11:28). Hynrei, ka bym sngew lah ngeit, katto katne ki kyntait sharud ia ka jingkhot ieit jong U.

4. PHI LA PYNKHREH IA KA JINGWAN U JISU?

Ka shong rem shi katdei ia U Jisu ban bah jamin ba ngin don ka lawei ba donburom bad U "ha ka ing U Kpa jong nga." U hap ai ia la ka jingim!

"IA U KHRIST LA KNIA AINGUH TANG SHISIEN ia ka ban bah noh ia ki pop jong ki ba bun UN MIH PAW HA KABA ARSIEN, khlem bah ki pop ha kita kiba ap khmih lynti ia u, ia ka jingpynim." Heb. 9:28.

U Nongpynim uba la iap ha ka diengphna ban bah ia ki pop jong phi un wan ha kaba "arsien," bad un wallam jingpynim ha kito kiba ap khmih ia u." U Khrist U da kheinduh ia lade khnang ba un ioh tyrwa jingpynim ia iwei pa iwei na ngi. Hynrei khlem ka jingwan arsien ka diengphna ka long lehnohei. U Khrist U kwah ia ngi ban don ka ing baskhem lem bad u. Te khnang ban pynlong ia kata kaba lah ban jia, ngi dei ban shah ia u ban synshar ia ki dohnud jong ngi kum U Trai bad U Nongpynim mynta hi.

Ha ka step u August 16, 1945 uwei u khynnah u mareh sha kut ki Shantung ha North China bad pyrta ba u la iohi ia kawei ka erplein hasuin bneng. Te baroh kiba lah ban mih shabar ki la iamih bad khmied. Kine ki briew shynrang bad kynthei ki la shah shitom da ki snem ha ka jingkynjah, ka jingkhang lad, ka jingpisa mynsiem, ka shah set byndi da ki nong Japan kum ki nongshun ka jaitbynriew. Ia kiba bun na ki don tang kawei kaei kaei kaba ri im ia ki: ka jingkyrmen ba ha kawei ka sngi ka thma kan kut.

Ka jingkyndit ka par kata ka jingsngew ki 1500 ngut kita ki koidi thma haba ki la sngewthuh ba kata ka eroplein ka lah ban wan na ka bynta jong KI. Katba ka jingsawa kata ka eroplein ka la nang jam don uba pyrta, "Peit, katei ka dei ka lama America ba la niad rong ha krung!" Te nangta ha ka jingkmen kabym sngew lah ngeit, ki ktien sawa ki iapyrta, "khmih, ki kaweh ia ngi! Ki tip ngi dei kiei. Ki wan ban pyllait ia ngi."
Ha kata ka por ka jingkhihwin ka la palat ban ia kaba kita ki briew ki lah ban synshar. Kata ka ing babuh ia ki ka la pra. Ki briew ki ia mareh, ki ia pyrta katba don ka bor, ki ia kaweh ia la ki kti bad ia iam.

Kyndit uta u paid byllien u shu ia ang la ka shyntur bad peit lyngngoh ha ka jingjar jar. Ka kpoh jong ka eroplein ka plie wang kynsan bad ki briew ki la mih nangta ha ki parashut. Ki nong pyllait ia ki koidi ki la wan mynta ka sngi bad ki don hapdeng jong ki!

Uta u paidbah u la iatuid sha ka khyrdop jong ka kut. Ym don shuh uba pyrkhat ia ka suloi kaba kdew sha ki na ka kut. Hadien bun snem ka jingsngewlehnohei bad ka jingkynjah, ki la pynpra ia ka khyrdop bad mareh sha ki shipai kiba hiar da ki parashut.

Shen uta u paidbynriew u la phai biang sha poh kut lem bad ki shipai ha ki tyrpeng jong ki. U nongialam jong ka kut u la shu pyndem khlem ialeh shuh. Ka thma da shisha ka la kut. Ka jinglaitluid ka la wan. Ka pyrthei ka la thymmai biang.

Shen U Blei JONG NGI, U Nongpynim JONG NGI un hiar na ki lyoh ban pyllait ia ngi. Ka jingiathuh bajrong bad ba shyrkhei jong u briew ia u para briew khatduh ka la kut. Kan don ka jingrisa ka jingkmen ha kata ka sngi, ka jingpyrta ka jingkmen khatduh la sngewthuh. "U la nang jan; nga lah ban iohi ia ki angel kiba put ia ki turoi jong ki." Ka jingsawa ka la nang kham jam, bad u lyoh ka burom u la nang kham phyrnai tad haduh ba da kaba eh ngi lah ban shah ia ka. Hynrei ngim lah khlem da peit haba ngi sngewthuh: "U iohi ia nga. U ithuh nga dei uei." Ngin sa ithuh da ka jingkmen bymlah ban batai: "Une U long U Blei jong nga. U la wan na ka bynta jong nga, ym ha kawei ka por, hynrei mynta, mynta hi."

Phi la kloi ne em ban pdiang sngewbha ia U Syiem ha ka Burom jong u? Lada phim pat kloi, sngewbha khot ia U Jisu da lade sha ka jingim jong phi mynta hi. Kumba ia ki jingeh jong ka pyrthei yn pynjem da ka jingwan U Jisu, te ka jingwan jong u ha ka dohnud kan iarap ia phi bad ia ki jingeh ba phi ia kynduh man ka sngi. U Nongpynjem bakhraw ia ki jingeh u lah ban pyllait ia phi na ka jingpalat bad na ki jingkit bakhia ka pop te un ai ha phi ia ka jingim bymjukut.

Phi lah ban shaniah ha U Jisu. Un pynkhreh ia phi ia ka jingwan jong U bad ai ha phi ia ka jingsngew thikna ia ka jingim jong ka jingsuk bymjukut.