Ka Lad Baar Ha Ka Jingim

Hadien ba u la im la jan baroh shirta kum u Buddhist, u briew uba la iaw ha Singapore uba la kylla Khristan la kylli ia u, "Mr. Lin, kaei ka jingiapher phi shem hapdeng kaba long Buddhist bad kaba long Khristan?"

"Kata ka basuk," u la jubab. "Naduh ba nga la shem ia U Jisu kum U Nongpynim jong nga, nga la ioh ka jingsuk ha ka mynsiem."

Kata kaba jia haba ngi la aiti ia la ka jingim ha U Jisu.

"Men bat ha ka jingsuk bajanai ia uba pynneh la ka jingmut ha me; naba u shaniah ha me."- Isaiah 26:3.

Kaba im ia ka jingim Khristan ka pynmih ia ka jingsuk bajanai ___ ka jingsngew skhem sngewthikna.

Kito kiba la pynlong ia kane ka jingshem ia ka lad kaba tang kata ka lad baar ha ka jingim ___ U Jisu.

1. KAEI KA JINGMUT IA KIBA LA JAH BAN IOH IM

Ka long ka ba lah ia u briew uba dang im ha ka met ban don ia kaba kiwei ki khot ka por basngewtynnad, bad ki dang iap hi __ kiba iap ha ka mynsiem.

"Ia phi u la pynim, haba phi la long kiba iap ha ki jingryngkang bad ki pop, ha kiba phi la ju iaid mynno mynno katba kum ka rukom jong kane ka pyrthei, katba kum u syiem ka jingsynshar ka suin ka jong kita ka mynsiem kein kaba trei mynta ha ki khun ka jingbymkohnguh." Eph. 2:1,2.

U Soitan u ialam ia u briew uba iap ha ka mynsiem ban nang ngam ha ka pop bad jingbymkohnguh. Hynrei ka jingshisha baphylla jong ka gospel ka long ba U Blei U ieit ia kiba la rem. U ieit ia ki katba ki dang long kiba iap ha ki pop jong ki, bad u tyrwa ha ki ia ka jingpyllait ei kaba janai na ka jinglong bama.

"Hynrei U Blei, ba u long uba kynrei ha ka jingisnei namar ka jingieit ka bakhraw jong u da kaba u la ieit ia ngi. U LA PYNLONG IM IA NGI LEM BAD U KHRIST WAT HABA NGI LONG KIBA IAP HA KA JINGRYNGKANG.". . . ba un iohpyni ha ki rta ki ban sa wan ia kata ka jingkynrei eh ka jingaiei jong u ha ki jinglehsbun sha ngi ha U Khrist Jisu." Eph. 2:4-7.

U Blei U la ieit ia ngi haba ngim don ei ei ruh ba un ieit. Ka jingaiei jong u ka la pynlong ha ngi ia ka jingim bathymmai ha U Khrist. Ngim lah ban pynkylla ia lade, hynrei U Blei U lah. Haba ngi wan ha u da ka jingngeit bad da kaba pyndem ha u, u ai lad biang ia ngi sa shisien ha ka jingim kum ka jingaiei.

2. NA KAEI BA DEI BAN PYNIM IA NGI?

(1) Ngi donkam ban pynim ia ngi na ka pop.
"Baroh ki la leh pop bad ki la duh lehnohei ia ka burom U Blei." __ Rom 3:23.

Ban kren beit: Ngim shym ialeh ban im kum ba ngi tip kaei kaba dei. U Kpa hapoh ka jingeh u lah ban khie dom bad pynmong ia u khynnah. U briew u lah ban pynbitar ia uwei pat u nongniah kali ba la jan aksiden. U nongkhaii u lah ban "leh klet" shaphang ka jingioh nong ha ka por siew khajna. "Baroh ki la leh pop;" kata ka dei ka jinglong briew.
Kumno ka Baibl ka pynshai ia ka pop?

"Ka jingleh bakla baroh ka long ka pop." I Ioan. 5:17.

Ia ngi donkam ban pyllait na ki jingmliem basniew bad ka jingpynbor: kaba thok, ka jingbitar, jingkwah brai, ka jingkthang, ban shu kren khyndiat.

"Uwei pa uwei baroh uba iai leh ia ka pop u iai leh ruh ia ka jingpalat hukum; te ka pop ka long ka jingpalat hukum." I Ioannis 3:4.

Kumta ngi donkam ban lait na ka pop __ kaba pynkhein ia ki hukum U Blei.

(2) Ngi donkam ban lait na kaba pyniakhlad ia ka jingiadei bad U Blei.
"Hynrei ki jingbymhok jong phi ki la pyniakhlad noh hapdeng jong phi bad U Blei jong phi, bad ki pop jong phi ki la kah ia ka khmat jong u na phi, katba un ym sngew." Isaiah 59:2.

Ki pop kiba khlem ioh map ki pyndkut ia ka jingiadei bad U Blei. U Khrist U la wan ban pynbha pat ia ka jingshaniah ha U Blei, kaba u Soitan u la pynsniew.

(3) Ngi donkam ban lait na ka jingiap bymjukut __ ka bainong jong ka pop.
"Da uwei u briew ka pop ka la bsut sha ka pyrthei, bad da kata ka pop ka jingiap; bad kumta kata ka jingiap ka la wan hap ha ki bynriew baroh phar, namar baroh ki la leh pop." Rom 5:12.

(4) Ngi donkam ban lait na ka jingim bapop, ka bymsuk, bad ba thylli.
Namar ia u nongpop, ka jingim ka long kum ka lynti bakut kynsan.

(5) Ngi donkam ban lait na ka pyrthei bapop.
Ia ngi dei ban pyllait na ka pyrthei kaba dap da ka pop bad ki jingmih jong ka __ ka kordit, ka pangnud, ka kynjah, ka thma, ka jingpang, bad jingiap!

3. UEI BA LAH BAN PYNIM IA NGI?

Tang U Jisu ba lah ban pynim ia ngi.
(1) U Jisu U lah ban pyllait ia ngi na ka pop.
"Men khot ia ka kyrteng jong U U Jisu naba un pynim ia ki briew na ki pop jong ki." Mathaios 1:21.

Uwei u Hindu u iathuh ia u paralok Khristan, "Nga shem shibun kiei kiei ha ka niam Hindu kiba ym shem ha ka jingngeit Khristan, hynrei don kawei kaei ba ka Jingngeit Khristan ka don ba ka niam Hindu kam don __ U Nongpynim." Ka niam Khristan ka dei tang ma ka ka niam ha pyrthei kaba tyrwa ha ki briew ia U Nongpynim.

(2) U Jisu U lah ban pynim ia ngi na ka jingiadei kaba la dkut bad U Blei.
"Myn kata phi la long khlem U Khrist. . . . Ki bym don ka jingkyrmen bad kiba khlem U Blei ha ka pyrthei. Hynrei mynta ha U Khrist Jisu, ia phi kiba ju long jngai noh mynno mynno, la pynlong hajan da ka snam U Khrist." Ephesos 2:12,13.

U Jisu U dei u Lok bajanai ban don ka jingiadei. U ieit ban pynmih ia ka babha tam ha ngi. Lyngba ka snam U Khrist ia ki pop ba mynshwa jong ngi la map, bad man ka sngi u ai ha ngi ia ka jingpdiang jong U, ia ka bor halor ka pop, bad ia ka jingim bajanai jong U. Ngi tip ba u don hangta ban khyllie ia ngi man ba ngi kyllon. Ka jingieit jong ngi ia u ka pynmih ia ka jingkwah ban im ha kata ka rukom kaba pynsngewbha ia U.

(3) U Jisu U lah ban pynim ia ngi na ka jingiap bymjukut, ka bainong jong ka pop.
"Namar ka bainong ka pop ka long ka jingiap; hynrei ka jingaiei jong U Blei ka long ka jingim bymjukut da U Jisu Khrist uba U Trai jong ngi." Rom 6:23.

Ngi long ki nongpynkhein hukum kiba la rai ban iap. Ka kuna namar ka pop ka long ka jingiap. U Jisu U pyllait ia ngi na ka jingiap bymjukut bad ai ha ngi ia ka jingim bymjukut.

"Hynrei U Blei U pyni shynna ia la ka jong ka jingieit sha ngi, ha kaba, haba ngi dang long ki ba pop, U Khrist U la iap ia phi ia nga." Rom 5:8.

Namar ka jingieit baiaineh jong U, U Jisu U "la iap na ka bynta jong ngi." Da kaba iap na ka bynta u briew U Jisu u la siew ia ka dor kaba biang jong ka pop, U Blei u lah mynta ban map bad pdiang ia ki nongpop khlem pynrit dor ia ka pop.

(4) U Jisu U lah ban pyllait ia ngi na ka jingim bapop bad ka bym don jingsuk.
"Namar lada u briew u don ha U Khrist u kylla long u jingthaw bathymmai __ kiei kiei ki barim ki la duh noh, ha khmih kiei kiei baroh ki la jia long kiba thymmai." II Korinth 5:17.

Ngim lah ban pynim ialade na ka pop lane pynkylla ia la ka jinglong da lade hi kumba u sing um lah ban pynkylla ia lade sha u khunlangbrot (Rom 7:18). Ka pop ka kham khlain ban ia ka bor jong ka mon jong ngi. Hynrei U Khrist U lah ban "pynkhlain ia phi da ka bor U mynsiem jong u ha u briew bashapoh" (Ephesos 3:16) U trei ban buh bujli ia ki jingmlien basniew jong ngi da ki jinglong babha: ka jingieit, ka jingsuk, ka jingkmen, ka jingsbun, ka bor halor lade (Gal. 5:22,23). U Khrist U im ka jingim jong U lyngba jong ngi, kumta ngi iohpdiang ia ka jingpynkhiah bakynja mynsiem, ka jingpynthymmai, bad ka jingim bathymmai.

U Harold Hughes u la duh jingkyrmen ba un kylla. U la ialeh tyngeh ban sangeh dih bunsien. U la tip bha ba dei u bitor kiad jong u uba la buh ia ka lok bad ki arngut ki khun kynthei ha ka jingjynjar haduh 10 snem. Kumta u la ieng ha ka jaka sum ha kawei ka step ka ba khriat jur bad thew da ka suloi ha ka shyntur jong u. Shwa ba un siat, u rai ba u dei ban pynshai shwa ha U Blei. Kata ka jingduwai ka la kylla long ka jingkyrpad iaiam ba jrong na ka bynta ka jingiarap.

U Blei U la jubab. U Harold Hughes u la aiti ialade ha U Khrist bad u la ioh bor ban iai ialeh. U la ieh noh ia ka dih kiad, bad kylla sha u tnga bad u kpa baieit bad ba lah ban shniah, bad u la nang iaid shaphrang haduh ba u la long u dkhot jong ka iing Dorbar ha USA. U Harold Hughes u la shem ia ka bor bakhraw tam kaba pynkylla ha ka pyrthei jong ngi __ U Jisu!

(5) U Jisu U lah ban pyllait ia ngi na ka pyrthei bapop.
Ki saw tylli ki JINGSHEM Guides kin pynshai kumno

4. IA NGI LA PYNIM DA KABA SHIM IA KI LAI TYLLI KI JINGJAM

Jingjam 1. Aiti ha U Khrist ban iehnoh ia ka pop kaba don ha ka jingim jong phi.
Kaei ka bynta jong ngi ha kaba iehnoh ia ka jingim bapop?

"KYLLA KA BAMUT, nangta phai sha U Blei, khnang ba ia ki pop jong phi yn pyndam noh." Ki Kam 3:19.

Kaei kaba ialam ia u briew ban kylla ka bamut?

"KA DEI KA JINGBHA SBUN JONG U BLEI KABA IALAM IA PHI SHA KA JINGKYLLA KA BAMUT." Rom 2:4.

"KA JINGSNGEWSIH BA RIEWBLEI KA IALAM IA PHI SHA KA JINGKYLLA KA BAMUT." II Korinth 7:9.

Ka jingkylla ka bamut ka dei kaba sngewsih ia ka jingim bapop kaba ladep, nangta phai noh na ka pop, kaba pynduh noh ia ki jingmlien barim, ki jingleh, bad ki jingsngew. Kam dei ka sngewsih namar ba tieng ia ka jingpynshitom, hynrei ka dei ka jubab ia ka jingbha sbun jong U Blei, ka ba la ialam ia U Jisu ban iap ha ka jaka jong ngi ia ki pop jong ngi. Ngi kyntait ia ka pop namar ba ka pynmong ia U Blei.

Ynda ngi la ioh mad ia ka jingim bathymmai ha U Khrist, ngi dei ban pynbeit ia ki jingbakla ba mynshwa katba lah (Esekiel 33:14-16).

Kaei ka bynta jong U Blei ha kaba bred noh ia ka jingim barim jong ka pop?

Ka jingkylla ka bamut bad ka jingmap ki dei ki jingai jong U Blei ha ngi.

"Ia une U Blei U la kyntiew sha ka kti kamon jong U ban long U Syiem bad u Nongpynim ia kaban ai ka jingkylla ka bamut ha u Israel bad ka jingmap ia ki pop." Ki Kam 5:31.

Bad haba ngi kylla ka bamut, U Nongpynim baieit u map bad pynkhuid ia ngi na ki pop bad bred ia ki sha kiba jylliew ka duriaw.

"Lada ngi phla ia ki pop jong ngi, U LONG UBA IAINEH bad Uba hok ban map noh ia kita ki pop jong ngi bad ban pynkhuid ia ngi na ka bymhok baroh." I Ioannis 1:9. (Peit Mikah 7:18, 19).

Ym don kano kano ka pop bashyrkhei kaba U Nongpynim uba la iap ha Kalbari Um lah ban map. U briew uba shaniah ha U Jisu u donkam tang ban pan na U ia ka jingmap. Ka jingiap U Khrist na ka bynta ki pop kam lah ban map lymda ngi pan map na U. Ka dei ka jingshisha ba ktah mynsiem ba ki pop jong ngi ki iarap sah ia kito ki prek lyngba ki kti bad ki kjat jong U Jisu. Pynban U Jisu U long uba thrang eh ia ngi ba ngin pdiang ia ka jingai jong ka jingmap jong u bad ia ka jingpyniasuk.

Ka khubor ka la poi sha uwei u samla uba la phet noh na ing ba ka kmie jong u ka la jan iap. Kata ka khubor ka la pyndap ia u da ka jingsngewsih ba um don shuh ka jingiadei babha ha ing. U pynkloi kat ba lah ban poi sha ing, u rung beit sha ka kamra bad bred ia lade ha ka jingthiah ka kmie. Da ki ummamt kiba iai tuid u kyrpad ia ka ban map ia u.

Ka la ring ia u shajan bad pasiaw, "Khun, ngan jin da la map ia phi la slem lada phi la pan na nga."

Lada phi la syntuid jngai na U Blei ___ lane phim pat la ithuh ia U ___ sngewbha pyrkhat shaphang katno U Kpa baieit jong phi uba ha bneng u kwah ban pdiang sngewbha ia phi sha ing. U kwah eh ia phi ban pdiang ia ka jingmap ba u tyrwa. U Jisu U ieit ia phi. To sngap ia ka jingkhot ieit jong u ban kylla ka bamut. Phla ia la ki pop. Shu ngeit ba U Blei U la map ia phi namar ba u la kular. Shaniah ha U! Shaniah ha ki kular jong U.

Jingjam 2. Pdiang ia ka jingim bathymmai na U Jisu. Ka bynta jong phi ha kaba pdiang ia ka jingim bathymmai na U Jisu ka dei ban ngeit ba U Jisu u la pynim shisha ia phi. Pdiang khlem jingartatien ia ka jingshisha ba U la map bad la pynkhuid ia phi, u la shim noh ia ka jingim barim bapop jong phi, ba u la ai ia phi ka jingim bathymmai.

"Kat kiba la pdiang ia u, ha kito u la ai bor ban long ki khun U Blei." Ioannis 1:12.

Kum u khun jong U Blei, phi don hok ban ioh pdiang ia ka jingim bathymmai na U Jisu. Kumba la ju ong, phim lah ban ioh pdiang na la ka jong ka bor, ka dei ka jingai na U Kpa uba ha bneng! U Jisu U ai kum kata ka jingkular baskhem khnang ban weng ia ki jingartatien bad jingbymthikna.

Kaei ka bynta jong U Blei ha kaba ai ha ngi ia ka jingim bathymmai?

"U Jisu U la iathuh, nga ong ha phi ia kaba shisha, ym don uba lah ban iohi ia ka hima U Blei lymda kha pat ia u." Ioannis 3:3.

Kat kum U Jisu, u nongpop u ba ngeit, uba la kylla ka bamut u dei uba la kha pat sha ka jingim bathymmai. Ka dei ka kam phylla kaba tang U Blei balah ban leh. U kular:

"Ngan ai ha phi ia ka dohnud bathymmai bad ngan buh ia U Mynsiem Bathymmai ha phi; bad ngan shim noh ia ka dohnud maw na phi bad ai ha phi ia ka dohnud doh." Esekiel 36:26.

U Jisu u pynkylla ia ka dohnud jong ngi __ ki jingsngew bad ki jingleh __ bad u shong "ha ngi" (Kolosai 1:27). Kane ka jingim bathymmai kam dei tang ka jingmut ba kynja mynsiem, ka dei kaba shisha, ka jingmih pat na ka jingiap ba kynja mynsiem sha ka jingim bathymmai.

Jingjam 3: Kaba im namar U Jisu man ka sngi.
Ka jingim Khristan ka kynthup ia kaba phai noh man ka sngi na ka jingkhwan lade bad kaba iasoh bad U Jisu kum u Lok baieit jong ngi. Ngi san ha kane ka jingim bathymmai da kaba pynskhem ia ka jingiadei jong ngi bad U Jisu. Kata ka mut ngi dei ban pynlut por ban iasyllok bad u, ha kaba iakren bad u lyngba ki jingduwai bad kaba pule ia ka Baibl. U Blei U la ai ha ngi san tylli ki jingiarap bakynja mynsiem ba ngin san; kaba pule ia ka Baibl, ka jingduwai, kaba puson ne duriap ia ki kam baphylla U Blei, ka jingiasyllok bad ki para Khristan, bad kaba iasam lem bad kiwei ia ka jingshem mynsiem jong ngi.

Kaba im ha U Khrist kam mut ba ngim don jingbakla shuh. Hynrei haba ngi jynthut bad leh pop, ngi pan map na U Khrist, bad iaid shaphrang. Ngi ia iaid sha kawei ka liang, bad ngi tip ba U Khrist U iaisah ha ka dohnud.

5. KA JINGKMEN JONG KA LAD KA BAAR

U Harold Hughes u la ioh pdiang shibun ki jingleh burom bakyrpang na ka jingtrei jong u kum u dkhot dorbar thaw ain ha USA, hynrei kawei kaba don jingmut tam eh ha u ka dei kaba wan hadien ka jingaiti jong u ia la ka jingim ha U Khrist.

U Harold u dang pule Baibl marwei ha ka kamra pdeng jong u ha kawei ka janmiet mynba u la iohsngew ia ka jingktah na tymbuit jong u. U khmied. Ki dei ki khun kynthei barit jong u, ki dang ieng jar jar ha ki soptithiah. U shu peit sha ki shiphang; ki la kylla shibun, bad u la sngew duh ia ki shibun ha ki por ba u dang ialeh thma bad u bilor kiad.

Nangta ka Carol, kaba kham rit ka la ong, "Ko Pa, ngi wan ban doh ia phi, thiah suk."

Ki khmat u kpa ki dap da ki ummat. La kham slem naduh ba ki khun ki la wan khatduh ba un kdup ia ki. Mynta ki khmat bashai bad ba itynnad jong ki kim don jingtieng shuh. U Kpa khatduh u la wan phai sha ing. U Jisu U ai da shisha ia ki briew ia ka lad ka baar. U shim ia kito kiba khlem jingkyrmen shuh bad thaw ia ka jingsdang kaba thymmai.

U Nongpynim u thrang ia iwei pa iwei na ngi ban wan noh sha ing. Phi la pdiang ia ka jingkhot ieit jong U Khrist? Kaba pdiang ia ka jingmap bad jingpynkhuid ka long ka bajem bad bajylliew kum kaba plie ia ki ksang kti jong phi ia ka jingkdup i khun baieit.

Lada phim pat shaniah ha U Khrist kum U Nongpynim jong phi shimet, phi lah ban leh kumta mynta hi da kaba duwai kumne:
"Ko Kpa, nga sngewsih ia ka jingim barim bad bapop jong nga. Khublei ba me la phah ia la U Khun sha kane ka pyrthei ban iap ha ka jaka jong nga. Ko Jisu, sngewbha map ia ki pop jong nga, to wan ha ka jingim jong nga bad pynim ia nga. Nga kwah ia ka lad baar ha ka jingim ___ nga kwah ba yn kha pat ia nga. Hynrei khamtam, nga kwah ban don ka jingiadei ba man la ka sngi bad me. Khublei ba men leh ia kane ka kam phylla ha nga. Ha ka kyrteng U Jisu. Amen."

To pynlong ia kane ka jingshem baphylla: Haba ngi wan sha U, U Jisu U pynim.