Hato Ka Jingim Jong Nga Ka Don
Jingmut Shisha ha U Blei?

Ki don ki step, ba ka pyrthei ka i kum ka paradais. Phi kyndit na ba iohthiah, phi ring mynsiem jylliew ha jingkhang iit, bad khmih ia ka jingtyngshain ka sngi halor ki dieng, kawei pa kawei ka sla dieng. Ki don ki khyllipmat kiba pynlong ia ka jingim kaba i kordor katta katta: ka khmat u lok baieit katba phi ia ong khublei ban iakhlad noh, ka sur kaba la kyntiew sha khlieh eh bad ia dei bad ka jingsngew jong phi, ka jingleh ieit bym poi pyrkhat jong i khynnah rit.

Hynrei kiwei ki step, ka pyrthei kaba i shyrkhei. Phi peit ia ki kot khubor phi iohsngew ia ka jinglynniar ba la pynbthei bom ki lehnoh ba la mynsaw jur ne la matlah u khynnah, sa uwei u nong pyniap uba ong ba u la pyniap la shiphew ngut, nangta sa ka nemsniew ne ka jingshlei um, ne ka thma ne ka jingkhynniuh jumai. Kine ki dei ki khyllipmat, kiba ym don ei ei kaba sngewtynnad. Ym don ei ei kaba itynnad ne pynsngewbha.

Ki mut aiu kita kiei kiei baroh? Ngi dang lah hi ban sngewthuh ia kane ka pyrthei baphylla bad ba shyrkhei jong ngi? Balei ngi don hangne? Hato ka jingim jong nga ka don jingmut ha khmat U Blei ne nga long tang kum i tiar barit ha ka kor bakhraw jong ka haw-haw?

1. U BLEI U LA THAW IA KA PYRTHEI KABA JANAI

U Blei U long U Nongthaw, U Nongtei bad U Nongsain dur jong kiei kiei baroh. Naduh uba khrawtam haduh ibarit tam.

"Da ka Ktien U Trai la thaw ia ki bneng bad ia u paidbah jong ki baroh da ka jingpyrsad ka shyntur jong U. . . Naba u la kren te ka la long, bad u la hukum te ka la neh skhem." Salm 33:6,9.

U Blei U donkam tang ban shu kren bad ki met tynrai ki kohnguh ia ka mon jong U.

2. HYNRIEW SNGI U LA THAW IA KA PYRTHEI JONG NGI

"Naba ha ki hynriew sngi U Trai U la thaw ia ki bneng bad ia ka khyndew, ia ka duriaw, bad ia baroh katba don ha ki, U la shong sngi ruh ha kata ka sngi ka bahynniew: namar kata U Trai u la kyrkhu ia ka sngi Sabbaton bad u la pynkyntang khuid ia ka ruh." Eksodos 20:11.

U Nongthaw bakhraw bor bad bymjukut U lah eh ban pynlong ia ka pyrthei ha ka shi khyllipmat, da ka jingpyrsad ka shyntur jong U." Hynrei U Blei U la jied ban shim por 6 sngi ban leh ia kata ___ hynriew minit, ne wat hynriew sekhon kan jin da la biang. Ka lynnong ba nyngkong jong ka Baibl, Jenesis 1, ka iathuh aiu U Blei U pynlong ha kawei pa kawei ka sngi jong ka jingpynlong.

Ka jingthaw ba kynsai tam aiu U Blei U la pynlong ha ka sngi kaba hynriew kum ka pansngiat ia ka jingpynlong jong U?

"U BLEI U LA PYNLONG IA U BRIEW HA KA DUR JONG U HI, ha ka dur jong U Blei U la pynlong ia u: SHYNRANG BAD KYNMTHEI U LA PYNLONG IA KI." Jen. 1:27.

U Blei U la rai ban pynlong ki briew kiba kum ma u hi kiba lah ban sngew bad ieit. Ia ki briew baroh la thaw ha ka "dur" U Blei. Kat ka sngi kaba hynriew ka pyrthei ka la dap da ki jingthung bad ki mrad te nangta U Blei U la pynithuh ia u jingthaw ba kynsai tam jong ka jingpynlong. Kat kum ka Jenesis 2:7, U Badonbor baroh u la thaw ia ka met u Adam na ka dewmet ka khyndew. Kumta haba U Blei U la pyrsad ia ka "jingpyrsad ka jingim" ha ki thliew khmut jong u, u briew u la kylla long ka mynsiem baim" ___ kata ka mut u la long u baim. U Blei U la khot ia uta u briew uba nyngkong u Adam, kaba mut u "briew", bad ia ka briew kaba nyngkong ka Im kaba mut "baim" (2:20; 3:20). U Nongthaw baieit u la iohi ia ka jingdonkam ia u lok ba kynja briew.

Haba ki dang shu wan na ka kti U Blei, u Adam bad ka Im baroh arngut ki phalang ia ka dur jong U Blei. U Blei U lah eh ban thaw ki briew kiba kum ki briew nar bad pynlong ia ki ban iaid kai ha kper Eden bad pynjam ia ka sur kren jong ki ha ka jingiaroh ia U. Hynrei U Blei U kwah ia ka jingiadei bakham bha. Ki briew nar ki lah ban wiatsamrkhie, ban kren wat ban sait ban khlieng, hynrei kim lah ban ieit.

U Blei U la thaw ia ngi ha ka dur jong U bad ka bor ban pyrkhat bad jied, bad ban kynmaw, ban sngewthuh bad ieit. U Adam bad ka Im ki dei ki khun jong U Blei, bad ki long kiba la ieit eh da U.

3. KA BYMMAN KA WAN SHA KA PYRTHEI BA JANAI

U Adam bad ka Im ki don lut ia kiei kiei baroh ban pynlong ia ki kiba suk bakmen. Ki don ka jingkoit jingkhiah bajanai met bad mynsiem, ki shong ha ka kper baitynnad, ka pyrthei kaba khlem jingduna ei ei ruh em. (Jen. 2:8; 1:28-31). U Blei U la kular ba kin sa don khun, bad ia ka jingtbit ban pyrkhat pyrdain, bad ban shem jinghun ha ki kam ki kti jong ki ___ (Jenesis 1:28; 2:15). Ki ioh lad ban ia kren iasyllok bad la U Nongthaw. Ym don dak jingkhuslai, jingtieng, ne jingpang ban pynsiew ia ki sngi bakmen jong ki.

Kumno ka pyrthei ka kylla kynsan sha ka jaka jong ka jingshitom bad jingiap? Ki lynnong baar bad balai ka Jenesis ki iathuh ia kaei kaba la jia kumno ka pop ka la wan sha kane ka pyrthei. Da pule bad pyrkhat bha. Hangne ngi iathuh lyngkot.

Hadien ba U Blei U la dep thaw ia ka pyrthei kaba janai, u Bymman u la wan sha ka kper Eden ban pynshoi ia u Adam bad ka Im ban ym kohnguh ia U Nongthaw jong ki. U Blei U la khanglad ia ka bor ktah uta u Bymman tang ha uwei u dieng ha ka kper, "u dieng ka jingtip ia ka babha bad ka basniew." Bad u la maham ia ki arngut ki ba nyngkong ban nym wan shajan uta u dieng bad ban ym bam ia ki soh jong u, lada ki bam kin iap.

Hynrei ha kawei ka sngi ka Im ka iaid sakma sha uta u dieng adong. Te uta u nongshukor u la sdang ia ki jingpynshoi jong u. U ong ba U Blei U la thok ia ka bad lada ka bam ia uta u soh kan ym iap, hynrei kan stad kum U Blei hi, kaba tip ia ka babha bad basniew. Da kaba sngewsih ka Im bad u Adam, kiba tip tang ia kaba bha, ki la shah ia U Bymman ban shukor ia ki, bad ki la bam na uta u soh jong u dieng adong ___ kumne ki la pynkhein ia ka jingteh kular jong ka jingshaniah bad jingkohnguh ia U Blei.

U Blei U la thmu ia u Adam bad ka Im ban synshar halor ka pyrthei kum ki sordar ka jingpynlong jong U (Jen. 1:26). Hynrei namar ba ki la pynkhein ia ka jingshaniah ha U Blei bad jied ia u Bymman kum u nongialam jong ki, kita ki arngut shi lok ki la duhnoh ia ka hok ban synshar. Mynta ki por u Soitan u kam ia ka pyrthei kum ka jong u bad u ialeh katba lah ban pynlong mraw ia ki briew jong ka.

Bunsien ngi shem ia lade ba ngi leh ia ki kam khwan myntoi ne leh ia ki kam runar haba ha ka jingshisha ngi kwah ban leh ia kaba mar pyrshah. Balei? Namar ba u nongshun bym lah iohi, u Soitan, u trei ban pynlong ia ki briew ban nym leh ia ka babha.

Katba ngi pule ia ka Jenesis 3 lynnong, phin sa shem ba ka pop ka pynlong ia u Adam bad ka Im ban rieh na U Blei ba ki tieng. Ka pop ka la ktah jur ia ka jngpynlong baroh. La mih sa ki shiah bad ki shiah keng ki la ih bad ki phuh syntiew. Ka khyndew ka la tyrkhong, bad ka jingtrei ka la kylla long ka jingkit bakhia. Ki jingpang ki la sdang ban trei na phang. Ka jingiashun, ka jingbishni, bad ka jinglalot ki la pynbun ia ka kordit u bynriew. Hynrei kaba shyrkhei tam na baroh, bad ka pop, la wan ruh ka jingiap!

4. UEI UNE U BYMMAN UBA LA PYNBIT IA KA PYRTHEI JONG NGI DA KA POP?

"U la long U NONGSHUN BRIEW NADUH KABA MYNNYNGKONG, . . . Ka jingshisha kam don satia ha u: haba u kren ia ka lamler, u kren na kiei kiei la ki jong, naba u long uba lamler, bad U KPA jong ka jinglamler." Ioannis 8:44.

Kat kum U Jisu, U Soitan u dei u nong seng ia ka pop, u "Kpa" jong ka pop bad jong ka jingpyniap bad ka lamler.

U Thomas Carlyle, u riewstad bakhraw, shisien u la ialam ia u Ralph Waldo Emerson lyngba ki surok basniew tam jong ka London East End. Katba ki dang iaid hangta, jar jar ki la peit thuh ia ka jingpohrati bad jingsniew ba don sawdong jong ki, khatduh u Carlyle u la kylli, "Hato phi ngeit ha u Soitan mynta?"

5. HATO U BLEI U THAW IA U SOITAN?

Em! U Blei U babha um lah ban thaw ia u Soitan. Pynban ka Baibl ka ong ba u Soitan lem bad ki angel kiba u la shukor, ki la duh noh ia la ka jaka sah ha bneng bad ki la wan sha kane ka pyrthei.

"Bad ka thma ka la long ha bneng: U Mikhal bad ki angel jong u ki la ialeh thma ia uta u iakjakor; te uta u iakjakor ruh bad ki angel jong u ki la ialehthma; hynrei kim shym la jop, lymne ia ka jaka jong ki ym shym la shem shuh ha bneng. Te la shop noh arsut ia uta u iakjakor bakhraw, uta u bsein tymmen ia uba la khot u ksuid bad u Soitan, uba shukor ia ka pyrthei baroh kawei; la shop noh arsut ia u sha ka khyndew, bad ia kita ki angel jong u la shop noh arsut lem bad u." Jingpynpaw 12:7-9.

Kumno une u ksuid u leit poi sha bneng pynban?

"Me la long u kherub ba la sleh uba kah: bad nga la buh ia me, kumta ba me la long halor u lum bakhuid jong U Blei; me la iaid sharum shaneng hapdeng ki maw bameh ding. Me la long janai ha la ki lynti naduh kata ka sngi ba la pynlong ia me, haduh ba la shem ia ka jingbymhok ha me." Esekiel 28:14,15.

U Blei um shym la thaw ia u Soitan, u la thaw ia u Lusiphar u angel uba janai, uwei na ki angel ba lam khmat ka bneng, u da ieng ruh hajan ka khet U Blei. Hynrei nangta u leh pop __ "la shem ia ka jingbymhok ha u." La beh noh ia u na bneng, bad da kaba leh mynleh lok ia u Adam bad ka Im, u la kylla long u nongshun bashyrkhei tam ia u khun bynriew.

6. BALEI U LUSIPHAR, UNE U ANGEL BAJANAI U LEH POP?

"Kumno ME LA HAP NA BNENG, Ko Lurshai, u khun jong ka step! . . . LA OT NOH IA ME SHA KHYNDEW . .. Me la ong ha la ka dohnud, ngan kiew sha bneng, ngan kyntiew ia la ka khet haneng ki khlur jong U Blei; . . . NGAN LONG KUM UBA HAJRONG TAM EH." Isaiah 14:12-14.

U jingthaw uba la kylla ksuid lakhot nyngkong ia u u Lusiphar, kaba mut u "Lurshai" ne "uba tyngshain." Ha ka dohnud une u angel, ka jingthala bad ka jingkwah burom ka la sdang ban shim ia ka jaka jong ka jingaiti. U symbai ka jingsarong u la san shaduh ka jingkwah ban shim ia ka jaka U Blei.

Khlem artatien u Lusiphar u la trei tyngeh ban pynkohnguh ia ki jingthaw ba kynja bneng. Ka long kaba jem ban mutdur ba u soitan u la pyni ba U Blei u bat ei ei na ki, bad ba ka ain blei ka long kaba pyrkhing than, bad ba U Blei U long u syiem ubym salia. U la kren bein da ka lamler ia uta uba ka jinglong jong u ka pyni kaei ka jingieit.

Kumno la pynjem ia kane ka jingialeh ha bneng?

"Ka dohnud jong me ka la meng,. . . kumta nga la bred ia me sha khyndew." Esekiel 28:17.

Ka jingsarong ka la pynkylla ia u rangbah ki angel sha u ksuid ne u Soitan. Te khnang ban pynneh pynsah ia ka jingsuk ka bneng, ma u bad shi bynta na ka lai bynta jong ki angel kiba iasoh bad u ha ka jingialeh pyrshah, la dei ban beh noh (Jingpynpaw 12:4,7-9).

7. MANO BA KIT KHLIEH IA KA POP?

Balei ba U Blei um thaw ki jingthaw ki bym lah ban leh pop? Lada u la leh kumta, yn ym don jingsniew ha ka pyrthei jong ngi. Hynrei U Blei u kwah ia ki briew kiba u lah ban don ka jingiadei ba don jingmut. Kumta u la thaw ia u briew ha ka dur jong u hi." (Jen. 1:27). Kata ka mut la thaw ia ngi ban long kiba lait luid bad kiba kit khlieh. Ngi lah ban rai ban ieit ia U Blei lane phai da ka lyngthohdoh sha U.

U Blei U la ai ha ki angel bad ki briew jong kawei pa kawei ka pateng bynriew, ia ka jinglong bakynja mynsiem bad ia ka bor ban jied.

"To jied phi ha kane ka sngi iano phin shakri." Joshua 24:15.

U Blei U pynsngewthuh ia ki jingthaw kiba u la thaw ha ka dur jong U ban jied bad leh ia kaba dei namar ka bor pyrkhat jong ki ka iathuh ia ki "ka lynti U Blei ka dei kaba bha tam." Bad ban phai noh na ka jingbakla namar ka bor pyrkhat jong ki ka maham ia ki pyrshah ia ka jingmih jong ka pop bad ka jingbym kohnguh.

Tang ki jingthaw kiba don ka bor pyrkhat bad ba lah ban jied kiba lah ban iohmad ia ka jingieit bashisha. U Blei U kwah ban thaw ki briew kiba lah ban sngewthuh bad sngewnguh ia ka jinglong jong U, bad jubab mon sngewbha ia U ha ka jingieit, bad kiba don ka jingieit ia kiwei. U Blei U thrang eh ban iasam ia ka jingieit jong U haduh ba u la mon ban shim ka jingkheinduh bakhraw ban thaw ia ki angel bad ki briew bad ka bor ban jied. U la tip ba ka long kaba lah ha kawei ka sngi ba uwei na ki jingthaw jong u u lah ban jied ban nym shakri ia U. U Soitan u la dei u ba nyngkong na ki jingthaw ha bneng bad khyndew ban leh ia kata ka jingjied ba shyrkhei. Ka jingsniew jong ka pop ka la sdang bad u (Ioannis 8:44; I Ioan. 3:8).

8. KA DIENGPHNA KA PYNLAH IA KA JINGPYNDUH IA KA POP

Balei U Blei um pynduh noh ia u Lusiphar shwa ba ka pop jong u kan phriang? U Lusiphar u la kop ia ka jinglong hok ka sorkar U Blei. U la iathuh lamler shaphang U Blei. Lada U Blei U la pynjot ia u mardor, ki angel kin jin da la shakri ia U da ka jingtieng ha ka jaka ka jingieit. Kata kan jin da la pynsniew ia ka jingthmu ba U Blei U la don ha kaba thaw ia ki bad ka bor ban jied.

Kumno lah ban tip da shisha ba ka lynti U Blei ka dei kaba bha tam? U Blei U la ai ia u Soitan ka lad ban pyni ia ka jingpyniaid kam jong U. Namar kata u shah ia u ban pynshoi ia u Adam bad ka Im.

Kane ka pyrthei ka la long ka jaka tynjuh ha kaba ia ka jinglong u Soitan bad ka hima jong u la pyniapher bad ka jinglong U Blei bad ka hima jong u. Mano ba dei? Iano ngi lah ban shaniah shisha? U Lusiphar u long uba sian bad uba shukor, kumta ka shim por ia kiwei ki jingthaw ban sngewthuh janai haduh katno ka long ka bama ka jingialam jong u. Hynrei ha ka bakut baroh kin iohi ba ka "bainong ka pop ka long ka jingiap" bad ba ka jingaiei U Blei ka long ka jingim bymjukut ha U Khrist Jisu U Trai jong ngi" (Rom 6:23).

Uwei pa uwei u jingthaw ha ka bneng bad khyndew kin sa mynjur ba:
"Ki bakhraw bad ba iphylla long kita ki jingleh jong me Ah Trai uba U Blei Badonbor baroh! Ki bahok bad bashisha kita ki lynti jong me U Syiem jong kita ki rta! . . . Naba ki kynja bynriew baroh kin ia wan bad kin ia mane dem ha khmat jong me, na ba la pynpaw shynna ia ki jingleh bahok jong me." Jingpynpaw 15:3,4.

Hadien ynda baroh ki la sngewthuh ia ka jinglong bashyrkhei jong ka pop bad ia ka jinglong bapynjot jong ki buit Soitan, U Blei Un pynduh noh ia u Soitan bad ka pop. Un hap pynduh noh ia kita ruh kiba leh mutlop ia ka jingaiei jong U bad ba iai snoh ha u Soitan. U Blei U kwah ban pynduh noh ia ki jingeh jong ka pop bad ka jingjynjar. Hynrei u dang ap haduh ba Un da lah ban leh ia kata ha ka nongrim kaban neh junom, bad haduh un da lah ban pynsah ia ka mon laitluid jong ngi bad ban pakhang ia ka jingsniew na kaba mih biang.

U Blei U la kular ban pynduh noh ia ka pop junom da kaba pynkhuid ia ki bneng bad ka khyndew da ka ding. Ha ka jingiadei bad ka kular jong U, "ngi lah ban ap khmih ia ka bneng bathymmai bad ka khyndew bathymai, ka ing jong kiba hok" (II Petros 3:10,13). Ka pop kan nym mih shuh. Ki jingmih basngewsih jong ka pop kin sakhi shai ba ka jingbym kohnguh ia U Blei kan long kaba ijli bad basngew ia pyrshah lyngba ka bymjukut.

"Namar kata haba kita ki khun ki long ki nong ia ioh bynta na ka doh bad ka snam, ma u hi ruh da ka juh ka rukom u la shim bynta na ki juh; ba da ka jingiap un ioh pynduh noh ia uta uba don ka bor ka jingpyniap, uta u long u Soitan kein; bad ba un ioh pyllait ia kita baroh kiba da kaba sheptieng ia ka jingiap ki la ju long baroh shi rta hapoh ka jinglong mraw." Hebrew 2:14,15.

Ha ka diengphna ki angel bad ki pyrthei bakhlem pop ki la iohi ia u Soitan kumba u long shisha ___ u nong shukor, uba lamler, bad u nongshohnoh briew. Hangta u la pynpaw ia ka jinglong bashisha jong u da kaba pynbor ia ki briew ban pyniap ia U Khun bakhuid jong U Blei. Ki ba shong ha bneng bad ha khyndew ki la iohi ba ka pop ka long kaba runar bad khlem jingisnei. Ka diengphna ka la thadmadan ia ki jingthmu u Soitan, bad ynda U Blei u la pynjot ia u Soitan bad ia kito kiba iaisnoh ha ka pop, baroh kin phla ba U Blei U long Uba hok.

Ka jingiap U Jisu halor ka diengphna ka la thadrong ia ki jingthmu u Soitan ha khmat ki jingthaw baroh (Ioannis 12:31,32). Ka diengphna ka pynpaw ruh ia U Khrist ia ka jinglong jong U __ U Nongpynim jong ka pyrthei. Ha Golgatha ka bor jong ka jingieit ka la iengrangbah marpyrshah ia ka jingieit ia ka bor. Ka diengphna ka la pynskhem khlem jingartatien ba ka dei da ka jingieit kaba len ia ka lade kaba pynkhih ia U Blei ha ki jingleh jong u baroh ia u Soitan, ia ka pop, bad ia ki briew bapop shynrang bad kynthei. Ha ka diengphna U Jisu u la pyni ia ka jingieit ba hakhlieh tam bad pyndem ngon ia u Bymman. Ka thma ka la kut, uei uban synshar ia ka pyrthei, U Khrist ne u Soitan? Bad ka diengphna ka la pynskhem ia ka junom. Ka dei ban long U Khrist Uba ha khlieh tam!

Phi la shem ne em ia ka jingiadei bad u Nongpynim uba la iap ban pynpaw ia ka jingieit bymlah ban ia nujor jong u? Kumno phi sngew shaphang uta uba la wan sha ka pyrthei jong ngi kum u briew bad iap ha jaka jong phi ban pynim ia phi na ki jingmih jong ka pop? Phin pyndem ne em ia la ka khlieh mynta bad ainguh ia U Jisu, nangta kyrpad ia u ban ialam ia ka jingim jong phi?