Ti Limed ti Panagrang-ay Babaen iti Panangibingay

Ragragsaken ni Larry ti nakaliwliwa a saritaan, tea ti Japon, ken kinirog nga innapoy iti balay ni Mr. Komori, idi dagiti dadduma a bisbisita ket inrugida nga iruar dagiti Bibliada. Nakakitada amin kenkuana a mangnamnama. "Mabalinmo kadin nga adalannakami ita?" saludsod ni Mr. Komori.

Ni Larry ket nganngani naipdukan iti ig-igupenna a tea. Impagarupna a daytoy a panagtitipon ket agpaay laeng a panagragragsak. Ket ita saan isu a makapanunot iti banag a saoenna.

Ti kinapudnona, ni Larry ket nakapagisuron iti Biblia kadagiti klasena iti eskuelaan ti Nacristianoan nga English idiay Japan a pagtrabtrabhaoanna. Ngem amin dagitoy ket nasayaat a naplano. Makaited isu iti imformasion maipapan iti Biblia nga awan rigrigatna. Ngem ti agsarita ken iti maipapan iti Dios iti biglaan…ket sabali daydiay.

Nangngegan ni Larry amin dagiti estoria iti Biblia manipud pay kinaubingna. Ngem bassit laeng iti kaipapananna dagitoy kenkuana iti personal. Ar-aramidenna met dagiti banag nga ammona a dakes idiay imatang ti Dios. Kasano isu nga agsarita maipapan iti Dios kadagiti dadduma nga isu mismo ket saanna met nga am-ammo?

Ket ita, nakatugaw isu idiay sofa, napalikmutan iti tattao a mangnamnama, ket kasta la unay ti panagdanagna. Ket idiay a kanito iti panagdanag, ti maysa a teksto ket bigla a limmawag iti panunotna maipapan iti aramid ti Espiritu Santo a mangted kadatayo kadagiti sasao a saoentayo no datayo ket maipan iti sangoanan dagiti tao tapno agsaksitayo (Lucas 12:12). Nagkararag isu iti panunotna a dimmawat iti tulong ket intrangkana iti kadawyan nga estoria nga ammona: ti Naiyaw-aywan nga Anak.

Kas iti panangiladawanna no kasano nga ay-ayaten ti Dios uray pay dagiti immadayo Kenkuana, nasarakan ni Larry nga isu ket agsarsarita a diretso manipud iti pusona. Dagiti saona ket umun-unegda. Iti kaunaan a tiempo iti biagna, naammoan ni Larry no kasano iti panagayat ti Dios kenkuana.

Daydiay a rabii ni Larry ket nagparintumeng idiay sikigan iti Katrina ket inkomitna ti biagna iti Dios a ti udina ket nagbalin a pudno kenkuana. Ti panangibingay iti ayat ti Dios ket nangaramid daytoy a nakarkaro ngem ti ammo laeng a kapanunotan. Ita ket nagbalin daytoy a pudno a nangpunno iti kararuana.

1. KARKARITENNATAYO NI JESUS A RUMANG-AY BABAEN ITI PANANGIBINGAY

Dagiti adalan ket nakaibusda iti tallo a tawen ket kagudua a nangala kadagiti sao ken aramid ni Jesus, iti udina ket ti pannakatayna ken panagungarna. Kas ni Jesus ket ngannganin agsubli idiay langit, binilinna dagiti adalanna tapno agbalinda a personal a representantina:

"Ngem UMAWATKAYTOY TI PANNAKABALIN, inton umay kadakayo ti Espiritu Santo; ket DAKAYTO TI SAKSIK… ken agingga iti ungto ti daga."--Aramid 1:8.

Idi dagiti adipen ni Cristo ket intedda dagiti pusoda a naan-anay Kenkuana idi Pentecostes, ket binaliwan ti nagungar a Cristo dagiti biagda babaen iti pannakabalin iti Espiritu Santo. Nabbalinda a saksi, saan laeng nga iti nagungar a bagi ni Cristo ken ti iyuulina idiay langit, no diket kasta met ti nagungar a pannakabalinna a nangbaliw kadagiti biagda.

Kas Cristiano, datayo met ket saksi idiay panagungar ni Jesus agsipudta napadasantayo ti mangbaliw a pannakabalinna ditoy bukodtayo a biag.

"Ngem ti DIOS, idinto a nabaknang iti kaasi, gapu iti dakkel nga ayatna a pinangayatna kadatayo, URAY PAY NATAYTAYON IDI GAPU KADAGITI BASBASOLTAYO, PINAGBIAGNATAYO A NAIRANUD KEN CRISTO… TAPNO… IPARANGARANGNA TI NAINDAKLAN A KINABAKNANG TI PARABURNA ti kinaimbag kadatayo ken Cristo Jesus."--Efeso 2:4-7.

Naaramidtayo a sibibiag ken Cristo, isu a mabalintayo nga "ipakita ti saan a maparisan a kinabaknang iti paraburna." Ket dawdawatenna kadatayo nga ipantayo ti naimbag a damag maipapan iti no ania iti maaramidna iti biag ti tao ti entiro a lubong ket ikarkarina kadatayo nga Isu ket makiadda kadatayo kas iti intayo panangaramid ditoy (Mateo 28:19-20).

Ni H.M.S. Richards, ti nangyuna iti Timek iti Padto a ministerio iti radio, ket naminsan nagpaneknek: "Nakitak ti panagbaliw iti puspuso dagiti tao a nakangngeg iti ebanghelio ni Cristo. Nakapagbiahek idiay luglugar a ti nagan ti Dios ken ni Cristo ket saan pay kaanoman a naamoan inggana ti ebangehlio ket impan idiay iti iglesiana. Nakitak dagiti tao a nabaliwan manipud kinarugit inggana kinalinis, manipud sakit inggana iti salun-at, manipud iti agtultuloy a panagbuteng kadagiti dakes nga espiritu inggana iti ragsak iti Nacristianoan a panagbiag. Nakitak ti panagbaliw iti kasasaad iti kinababai. Nakitak dagiti pudno a pagtaengan dagiti Cristiano a bimmangon manipud iti kinasipnget iti paganismo. Iti tunggal lugar a binisitak ket nakitak dagiti biag a nabaliwan. Ammok a "ti ebanghelio ni Cristo…ket isu iti pannakabalin ti Dios agpaay iti pannakaisalakan" (Roma 1:16). Ammok a no ti iglesia ket iwaragawagna ti mensahe ti ebanghelio, dagiti panagbaliw ket mapan iti puspuso dagiti tao ken iti pagtaenganda, ket makita dagitoy iti biag dagiti simmungbat iti pakaasina."

Inted ti Dios kadatayo a nakapuy a tattao ti naisangsangayan a pannakipaset nga agaramid ditoy nakaliwliwa a trabaho, gaputa ti panangibingay ket maysa a napateg a paset iti panagrang-ay. Tapno ti pammatitayo ket agtultuloh a nasalun-at, masapul a daytoy ket maiyebkas. Kas iti nadrama a pannakadiskobre ni Larry, ti panangibingaytayo iti pammatitayo ket tumulong kadatayo a mapadas daytoy iti ad-adda pay a pannakaan-anay, ken tumulong kadatayo a rumang-ay.

2. IBINGAYTAYO NI CRISTO BABAEN ITI PAMAYAN ITI PANAGBIAGTAYO

Ti mayga nga agtutubo a dimmakkel iti maysa a naranggas a pagtaengan ket napaliiwna naminsan: "Kitkitaek dagiti nagannakko a babaen iti ehemploda ket nangted kaniak iti nadadael a ladawan ti Dios; saanak kaanoman a naaddaan iti ehemplo iti maysa nga adda iti kudilna a nagayat kaniak." Dagiti tao iti aglikmottayo ket siuuppapay a kasapulanda unay iti maysa a makaited kadakuada iti nasalun-at a ladawan ti Dios. Masapulda iti maysa nga "addaan iti kudil" a mangiladawan kadagiti makadios a kababalin. Ti kapigsaan a sermontayo ket masansan iti simpli a pamayan ti panagbiagtayo. Sakbay a ti tao ket ammoenna no kasano kaadu iti ammom, masapul nga ammoda no kasano kadakkel iti panagtarakenmo. Balbalakadannatayo ni Pedro:

"A PATAKNENGENYO KOMA TI PANAGBIBIAGYO iti tengnga dagiti Gentil;… GAPU KADAGITI NASAYAAT NGA ARAMIDYO A MAKITADA, DAYAWENDA KOMA TI DIOS…ta ni CRISTO NAGSAGABA MET GAPU KADAKAYO ITI ULIDAN, TAPNO SURUTENYO DAGITI ADDANGNA."--1 Pedro 2:12, 21.

Manipud iti "panagsagaba ni Cristo" agpaay kadatayo idiay kalbario, ket naaddaantayo iti ehemplo iti managsakrifisio nga ayat a nadikket ken asideg unay. Dayta nga ayat, ket nagaramid iti unegtayo a kas naayat nga ar-aramid kadagiti dadduma, ket agbalin a napigsa a puersa a mangiyasideg kadagiti saan a mammati iti takiag ni Cristo.

3. IBINGBINGAYTAYO NI CRISTO GAPU ITI PAMAYAN ITI PANAGPANUNOTTAYO

Idi inambus ti Diablo ni Jesus iday let-ang babaen kadagiti panangawisna iti raman, kinatangsit, ken panagingparagup, ni Jesus ket limmaban a sibaballigi babaen iti panangisaritana iti Kasuratan (Mateo 4:4, 7, 10). Ni Cristo ket nakasagana gapu ta pinunnona ti panunotna kadagiti kinapudno ti Biblia. Dayta iti lugar a pangabakan wenno pakaabakan iti laban-ditoy panpanunottayo.

"Ta kas iti panpanunotenna iti unegna, isu kasta met."--Proverbio 23:7.

Dagiti agdakdakkel a Cristiano ket agpanunotda iti agpangato. Panunotenda dagiti nasalun-at a kababalin a padpaasenda a maala.

"Agragsakkayo iti Apo iti kankanayon… kadagiti isu-amin GAPU ITI KARARAG ken araraw, agraman panagiaman. Ket ti talna ti Dios, a daeganna ti amin a pannakaawat, AYWANANNANTO DAGITI PUSPUSOYO KEN DAGITI PANUNOTYO ken Cristo Jesus. Kamuadiananna, kakabsat, dagiti aniaman a banbanag a NAPUDNO, dagiti aniaman a banbanag a NADAYAW, dagiti aniaman a banbanag a NALINTEG, dagiti aniaman a banbanag a NADALUS, dagiti aniaman a banbanag a MAKAAY-AYO, dagiti aniaman a banbanag a NAIMBAG TI DAMAGDA; no aniaman A KINASINGPET, ken no aniaman a KINADAYAW, panunotenyo dagitoy a banbanag."--Filipos 4:4-9.

No ania iti ipakpakantayo kadagiti panunottayo ket dagitoy iti nangaramid iti panagduma. No basura iti simrek, basura met laeng iti rumuar. No ti simrek ket Sao ti Dios, ti rumuar ken makadios a panagbiag.

4. IBINGBINGAYTAYO NI CRISTO BABAEN ITI PAMAYAN ITI MAKITA KADATAYO

Kas representante ni Cristo, ti Cristiano ket masapul nga agbalin a napakumbaba, uray idiay no kasano isu a Makita, a liklikanna ti main a kita iti murdong.

"Ta uray pay dagiti dadduma saanda nga agtulnog iti sao, mapatulnogda nga awan ti gapu… no mapaliiwda ti nanakman a panagbiagyo a buyugen ti pammadayaw. A ti arkosyo saan koma a ti arkos iti ruar, ti pannagsallapid iti buok ken ti panangikapet kadagiti alahas a balitok wenno ti naarkos a pagan-anay; Ngem ti tao a makin-uneg iti puso maarkosan koma iti kawes a MATAGINAYON ITI MAYSA A NAKEM A NAEMMA KEN NATALNA, isu a dakkel ti pategna iti imatang ti Dios."--1 Pedro 3:1-5.

Ti kinasimpli iti panagkawes ken panagarkos ket kanayon a mangtanda iti pudno a langa ni Cristo. Kas ulidan, dagiti dadduma ket masapul a maawis kadatayo kas Cristiano saan a babaen kadagiti sarita nga inaramidtayo maipapan iti moda (uso), no di ket babaen kadagiti sarita nga ar-aramiden wenno ipakpakita dagiti biagtayo maipapan kenni Jesus.

5. IBINGBINGAYTAYO NI JESUS BABAEN TI PAMAYAN NO KASANOTAYO NGA AGGUNAY

Ni estoriador nga Edward Gibbon ket imbagana kadatayo nga idi ni Galerius ket kinunesda ti kampo dagiti Persiano, ti maysa a nasileng a balat a bag a napunno iti perlas ket natinnag iti ima iti maysa a soldado nga agtaktakaw. Daytoy a tao ket naannadna nga inlemmeng iti bag, ngem imbellengna dagidiay napateg a perlas.

Dagiti tao a nakakapet kadagiti Makita a liwliwa a mabalin nga idasar ti lubong-bayat nga iwalwalinda ni Jesus, Isu a perlas a nangina-ket nakarkaroda pay a dakes iti kasasaadda ngem ti soldado a nagtakaw. Saan laeng a dakkel a kinabaknang iti makabulos kadagiti imatayo, no diket agnanayon a pannakaisalakan. Isu a patpatigmaanannatayo ti Kasuratan:

"Dikay ayaten ti lubong, uray dagiti banbanag nga adda ditoy lubong. No ti siasinoman a tao agayat iti lubong, ti ayat ti Ama awan kenkuana. Ta isu-amin nga adda ditoy lubong, ti derrep ti lasag, ken ti derrep dagiti mata, ken ti kinapalangguad ti panagbiag, saanda nga aggapu iti Ama, no iti lubong. Ket ti lubong aglabas, ken ti dakes a tarigagayna; ngem ti agaramid iti pagayatan ti Dios mataginayon."--1 Juan 2:15-17.

Ni Satanas ket agar-aramid a nalaing tapno balkotenna iti balitok dagiti makadadael unay a basbasol ken kadaksan unay nga ug-ugali. Dagti komersial nga agpaay kadagiti arak wenno sigarilio ket ipakpakitada laeng dagiti agtutubo, napintas, nagaget, ken naragsak pay a tattao. Saantayo kaanoman a nakakita iti komersial iti maysa a mangipakita iti langa iti tao a mapatpatulid iti kalsada gapu iti bartekna nga aramid iti arak nga adda iggemna a papel a langgotsi iti imana.

Masapultayo iti agannad a makilaok kadagti asosasion a mangikompromiso kadagiti prinsipio iti Cristiano (2 Corinto 6:14). Siempre, kayat met ni Cristo a mapantayo met asitgan dagiti gagayyemtayo a saan a Cristiano. Ti personal a relasion ket isu iti nangruna a pamayan tapno maibingaytayo ti pammatitayo. Siguradoen laeng a dagiti pakikadduaam ket saandaka nga iguyod nga isubli iti daan a pamayan iti panagbiag.

Aniaman dagiti ipastrektayo ditoy biagtayo, uray dagiti mabuya a makaliwliwa a pilientayo, ket adda dagsenna iti naespirituan a panagbiagtayo. Masapultayo a maamoantay no ania dagiti ipakpakantayo kadagiti panunottayo.

"Diakto mangikabil iti naalas a banag iti saklang dagiti matak."--Salmos 101:3.

No busbussogentayo dagiti kararuatayo iti kapintasan, ti dakes ket saanna a mabalin nga iduronnatayo nga ipababa. No kumpettayo kadagiti nangangato a paglintegan maipapan kadagiti banbanag nga iserserrektayo kadagiti pagtaengantayo ken panpanunotttayo ket saanna a makiputan dagiti biagtayo. Ti Cristiano ket adaaan iti ad-adu pay a mangaramid kenkuana a naragsak ngem iti siasinoman.

"ITA SANGOANAM ADDA TI NAAN-ANAY A RAG-O; ita makanawanmo adda dagiti pakaay-aywan nga agnanayon."-- Salmo 16:11.

6. IBINGBINGAYTAYO NI CRISTO BABAEN ITI PAMAYAN ITI PANAGITEDTAYO

Idi ngangnganina bautisaranen ti maysa a baro a mammati; daydiy Dios ti aluadna a Pastor H.M.S. Richards, ket nariknana a daytoy a lalaki ket adda pay laeng iti napintas iti pannakabalkotna a pera a papel iti bulsana. Sinaludsod ni Pastor Richards ti lalaki no baka nalipatanna nga imbati ti kuartana idiay kuarto a nagsukatanda. "Ti libritak ket agkuyogkami a mabautisaran." Natiliwna ti pudno nga espiritu iti Cristianismo-ti panagited nga agpaay kadagiti dadduma. Dagiti Cristiano ket rumang-ayda babaen iti panagited isu nga "imbaga mismo ni Jesus: `Nagasgasat iti mangted ngem iti umawat" (Aramid 20:35).

No aniaman iti itedtayo tapno maparang-ay ti pagarian ti Dios ket mangibati iti awan patinggana a pateg.

"Saanka nga agurnong kadagiti gupgupit nga agpaay kadakayo ditoy daga, isu a ti sanga ken ti lati dadaelenda ida, ken isu a dagiti mannanakaw kalienda ket takawenda. Ngem AGURNONGKAYO KADAGITI GUPGUPIT SADI LANGIT…. Ta no adino ti yan ti gupityo, addanto met idiay ti pusoyo."--Mateo 6:19-21.

Iti panagitedmo, laglagipem a: "Ti daga ket kukua ti Apo, ken amin nga adda ditoy" (Salmo 24:1), agraman ti pirak ken ti balitok (Haggeo 2:8). Datayo mismo ket kukua ti Dios, agsipudta pinarsuanatayo, ken gaputa insalakannatayo manipud kadagiti basoltayo babaen iti panangbayadna iti gatad dagiti basbasoltayo iti darana (1 Corinto 6:19-20). Amin a banag nga adda kadatayo ket kukua ti Dios, gaputa inikkannatayo iti "abilidad nga agbirok iti kinabaknang" (Deuteronomio 8;18).

Kasano kaadu iti dawdawaten ti nailansa ken nagungar nga Apotayo nga ibingaytayo Kenkuana tapno maited met ti ebanghelio kadagiti dadduma"

"Ti tao takawannanto aya ti Dios? Nupay kasta dakayo takawandak. Ngem dakayo kunayo, 'Iti ania ti mangtakawanmi kenka?' kadagiti apagkapullo ken datdaton…. Yegyo ti amin nga apagkapullo iti kamalig, tapno adda koma taraon iti balayko, ket padasendak ita iti daytoy, kuna ni JEHOVA dagiti buybuyot no SIAK diakto LUKTAN KADAKAYO DAGITI TAWTAWA TI LANGIT, ket ibuyatkonto kadakayo ti bendision, nga awanto ti lugar a makalaon nga umawat."--Malakias 3:8-10.

Ti "apagkapullo" ket "maikasangapulo" a paset iti "kinitatayo" (Deuteronomio 14:22; Genesis 28:22). Kadagiti mannalon wenno negosiante, ti kita ket ti nabati kalpasan a maikissay ti puonan ken dagiti gastos iti negosio. Kadagiti empleado, daytoy ket ti entiro a suweldona. Ti prinsipio ti panagkapullo ket maysa a moral a prinsipio gaputa iramanna ti kababalin. No saantayo a mangmangted iti apagkapullo, "taktakawantayo" ti Dios. Ti apagkapullo ket kukua ti Dios ket daytoy ket masapul a mausar laeng nga agpaay iti ministerio ni Cristo (1 Corinto 9:14). Ken iti pannakaileppas iti trabahona ditoy daga tapno Isu ket makasublin (Mateo 24:14).

Idi ni Jesus ket immay nagbiag ditoy tengngatayo, ket nangted Isu iti panangipalubos nga agkapullo iti tiempo ti Baro a Tulag (Mateo 23:23).
Kasano met kaadu iti itedtayo a daton? Dagiti daton ket banag a desison iti tao. Ti tunggal tao "Ket mangted no ania iti dinisesionan iti pusona nga ited" (2 Corinto 9:5-7). Saanmo a kabaelan a labasan ti Dios a di mangted:

"Mangtedkayo ket maikkankayto; sukat a naimbag, napenpen, nasesded ken agliplippias ti maitedto met iti saklotyo."--Lucas 6:38.

Ni H.M.S. Richards ket insaritana a naminsan daytoy a kapadasan;
"Ti maysa a nabayagen a sugarol ket nagatendar iti panangasabak idiay Los Angeles, ket saanko kaanoman a malipatan ti tiempo a kinasaritak isu nga agmaymaysa iti likudan iti paggimongan. Nangiruar isu iti maysa a balkot a papel a kuarta manipud iti bulsana, $500, ket intedna amin kaniak, sa nagkuna, "Daytoy iti umunga nga apagkapullok."

"Ti lalaki ket saan a nasayaat, ket awan iti banag nga inaramidna no saan nga agsugal iti uneg iti 30 wenno 40 a tawtawen, isu nga imbagak, "kasanoka ngaruden nga agbiag itan?" "Isu ket simmungbat, 'adda laengen iti lima wenno innem a dolyarko a nabatbati, ngem dagitoy a dadduma ket kukua ti Dios.'
"Sinaludsodko isu, 'ania iti armidemon?"
"Saanko nga ammo' kunana, ngem amok a masapulko a bayadan ti apagkapullok iti Dios, ket Isun iti mangtaraken kaniak."
"Ket pudno nga inaramid ti Dios. Ti panagbabawi daytoy a tao ket pudno. Nagtuloy isu iti panangitedna ket naragsak isu iti biagna a Cristiano. Ket ti Dios iti nangtuloy kenkuana inggana iti ipapatayna." Saan nga inkari ti Dios nga amin dagiti matalek a mamati ket bumaknangda ngem addaantayo iti talged a ti Namarsua kadatayo iti mangted kadagiti masapsapul iti biag.

Inted amin ni Cristo ti tunggal banag kadatayo. Itedtayon a naan-anay Kenkuana ita dagiti pusotayo. Ibingaytayo ni Cristo kadagiti dadduma babaen iti pamayan iti panagbiagtayo, panagpanunot, buyatayo, panagtignay, ken panagited. Apay a saanmo a diskobrien ti ragsak iti panagbingay ken Cristo kadagiti dadduma ken iti panagrang-ay iti nakaskasdaaw a paraburna?