Ti Limed ti Nailangitan a Panagina

Iti saan pay nabayag a sumagmamano a tawen adda sumagmamano a tattao ti mangibagbaga nga itin saan a mabayag maaddaantayon iti ad-adu nga oras a panagaliwaksay ngem iti maam-ammotayo nga ar-aramid. Adda dagiti naimbag a rasrason kadagidiay a sasao. Kadagiti ciudad iti computers a lubong ket pababaenna dagiti napaut nga ar-aramid. Ken dagiti robots ket irugidan nga aramiden ti nadadagsen a trabaho iti industria.

Ngem kalpasan a dagiti computers ket agdardarasda ken ti automation agotomatikoda, ket aglallalo a maaw-awanantayo iti anges. Dagiti tao ket awanen iti panawenda. Dagiti agasawa marigatanda a maaddaan iti "naimbag a panawen" kadagiti annakda, aglallalo kadakuada.

Maysa a panagadal iti maysa a komunidad ti nangipakita a ti average nga oras iti maysa nga aldaw a dagiti amma ket ipaayda kadagiti ubbingda ket--37 a segundo! Awanen ti panawen dagiti familia ken awanen ti panaglalangen.

Kasanotayo a makainayad tapno laeng aglalangen?

1. TI REMEDIO AGPAAY ITI NANGATO A TENSION TI PANAGBIAG

Maawatan ni Jesus dagiti parikut ti familia a mabanbannog ket kayatna a maawatantayo a ti naespiritualan a panaginana ket paset iti addaan kalidad a biag:

"UMAYKAYO KANIAK, dakayo amin nga agrigrigat ken madagdagsenan, ta PAGINANAENKAYTO…. AGSURSUROKAYO KANIAK, ta siak naemmaak ken napakumbabaak iti panagpuspusok; ket makasarakkayto ti INANA A MAIPAAY KADAGITI KARARUAYO."--Mateo 11:28, 29.

Ti Biblia ibagana a mapadasantayo daytoy klase a panaginana iti dua a pamayan: umay ken Cristo iti agpadpada iti inaldaw ken tunggal lawas.

2. INALDAW NGA ADDAAN KONEKSION KEN JESUS

Dagiti adu a tattao kanayonda a dawaten ti atension ni Jesus. Ngem ni Cristo makisasao a sitatalna, makapalaing nga espiritu kadagiti amin iti aglawlawna. Kasano? Nangipaay iti panawen iti inaldaw a makisasao iti nailangitan nga Ama. Nagdepende iti Amana a kanayon kadagiti kasapulan tapno mausarna kadagiti karit ti biag (Juan 6:57).

No kayattayo nga agbiag a natalna kas Kenkuana, masapultayo a kanayon a nakadepende ken Jesus--itulok a ti Saona ken Espirituna ti mangpunno kadatayo ken mangsukog kadatayo. Ti kasayaatan a pamayan a sangngoen dagiti puwersa a mangpupuor kadatayo kas tattao ken mangrakrakrak iti familiatayo ket maaddaan iti nasayaat a tiempo ken Cristo. Ibagbagana kadatayo:

"AGIANKAY KANIAK, ket siak kadakayo…TA NO AWANAK, AWAN TI MABALINYO NGA ARAMIDEN."--Juan 15:4, 5.

Maysa kadagiti kadakkelan a kasapulan iti panawentayo ket agpaay iti tao nga alaenda dagiti naespiritualan a pamuspusan nga adda a mangforma iti inaldaw a panagrelasion ken Jesus. Maysa a napateg a punto a masapul a maipalawag maipapan iti relasiontayo ken Cristo ket ti natungpalen a trabaho idiay krus. Ti pudno a panaginana, pudno a kinatalged, ket maadda laeng gapu iti nangato nga aramid ni Jesus nga imbagana idi nagsangit Isu idin matmatay: "Nalpasen" (Juan 19:30). Iti sabali a sasao, ti trabahona a panangsubbot kadatayo ken nalpasen.

"Ngem ita, NAMINPINSAN LAENG ITI PANUNGPALAN adu a pannawen, isu [Cristo] naiparangarang a maipaay iti PANANGPUKAW TI BASOL, gapu iti pannakaidaton ti bagina met laeng."--Hebreo 9:26.

Idin natay ni Jesus, "immadayon iti basol." Isu't gapuna a naibaga a ti mammati a nangikonfesar kadagiti basolna ket "makapaginana" iti nalpasen a trabaho ni Cristo. Naawattayo.

Ti basol ket adda nga ad-adu kadagiti napartak nga ar-aramidtayo iti biagtayo ita. Ngem ni Jesus sinolbarna ti parikut ti basol a naminsan laeng agpaay iti amin idiay krus. Insangit ni Jesus, "Nalpasen," sinelloan ti karina nga "Ipaayanna iti inana" kas naipasdek a kinapudno. Inpalpas ni Cristo ti managsubbot a trabahona kadatayo idiay Kalbario (Tito 2:14), kalpasanna naginana idiay tanem iti Sabado, ken nagungar manipud tanem iti Domingo ti agsapa kas Nagballigi manipud basol ken patay. Ti Cristiano ket awanen ti dakdakkel pay a talged ngem ti aginana iti nalpasen nga aramid ni Cristo.

"Umadanitay koma a buyugan ti puso a napudno ITI NAAN-ANAY A KINATALGED TI PAMMATI,… Salimetmetantayo koma a sittibker ti panangipaduyakyak ti inanamatayo tapno di agisin TA MAPAGTALKAN DAYDIAY NAGKARI."--Hebreo 10:22, 23.

Gapu ta Isu "a nagkari a napudno," mabalintayo iti sumrek iti manangisalakan nga inana nga inkari ni Jesus.

Gapu isu a "nagkari ket matalek," ket makastrektayo iti inana iti pannakaisalakan nga inkari ni Jsus. Ti kinatibker, talna, ken panaginana a mapadpadasantayo kenni Jesus iti inaldaw ket saan a resulta iti aniaman a maaramidtayo, no diket no ania iti naaramidna idiay krus.

Makainanatayo kenni Cristo agsipud ta ti pannakaisalakantayo ket naipatalged. Dayta a talged iti mangtignay kadatayo a mangusar iti tiempo a kadua ni Cristo iti tunggal aldaw, a mangan iti sasaona ken umang-anges iti angin iti langit babaen iti kararag. Ti pannakisarita kenni Jesus ket tumulong kadatayo a mangiturong iti nabannog unayen nga estilo iti panagbiag iti napno iti talna ken adda panggepna a biag.

3. TI LINAWAS A PANNAKAIKAPET KENNI JESUS

Kalpasan a naparsua ni Cristo ti lubong iti uneg iti innem nga aldaw (Colosas 1:16-17), ket intedna ti Sabado a panaginana. Daytoy ket nilawas nga oportunidad agpaay kadatayo tapno taraknentayo ti koneksiontayo Kenkuana.

"Ket ti Dios nakitana amin nga inaramidna, ket, adtoy, nasayaatda unay. Ket naadda ti malem ken ti bigat, aldaw a maikanem. Ket BINENDISIONAN ti Dios ti aldaw a maikapito ket SINANTIFIKARNA: agsipud ta kenkuana ti NAGINANAANNA kadagiti amin a gapuanan a ti Dios pinarsuana ken inaramidna."--Genesis 1:31-2:3.

Kas Mammarsuada, ni Jesus ket "naginana" iti umuna a Sabado a kadua ni Adan kenni Eva, ket "benindisionanna" ti aldaw ti Sabado ket "inaramidna daytoy a nasantoan." Ti Dios ket nangaramid iti pito nga aldaw a sirkulo iti linawas, saan nga agpaay iti pagimbaganna, no diket agpaay kenni Adan ken Eva, ken agpaay kadatayo ita a tiempo. Gaputa kasta la una iti panagtarakenna kadagiti tao nga inaramidna, plinanona a ti tunggal maikapit nga aldaw iti entiro a biagda ket maipaay iti panangbiruk iti presensiana. Tunggal Sabado, kas iti awagna ditoy, ket masapul nga agbalin nga aldaw a panaginana iti pisikal a bagi ken naespirituan a pannakabang-ar. Ti iseserrek iti basol ditoy lubongtayo ket nangaramid laeng a nakarkaro a masapultayo ti panaginana iti aldaw ti Saado.

Ti isu met laeng a Mangisalakan a nagkari ken Adan ken Eva iti "panaginana" ket iti ngan-ngani dua a ribu a tawen iti ud-udina ket intedna ti linteg kenni Moises iti Bantay ti Sion (1 Corinto 10:1-4). Pinili ni Jesus nga ikabil ti bilin maipapan iti panaginana iti aldaw ti Sabado idiay mismo sentro iti Sangapulo a Bilin. Ti maikapat a bilin ket mabasa:

"LAGLAGIPEM TI ALDAW A PANAGINANA TAPNO SANTIFIKAREM. Kadagiti innem nga aldaw agtrabahokanto ket aramidem amin nga aramidmo; Ngem ti maikapito nga aldaw isu ti maysa apanaginana ken JEHOVA a Diosmo: iti dayta nga aldaw, dika atrabaho iti uray ania, sika, wenno ti anakmo a lalaki, wenno ti anakmo a babai weno ti adipenmo a lalaki, wenno ti adipenmo a babai, wenno dagiti animalmo, wenno ti gangannaetmo nga adda ti uneg dagiti ruanganmo. Ta kadagiti innem nga aldaw ni Jehova inaramidna ti langit ken daga, ti taaw, ken amin nga adda kadakuada, ket naginana iti maikapito nga aldaw: isu ti gapuna a ni JEHOVA BINENDISIONANNA ti aldaw a panaginana ken SINANTIFIKARNA."--Exodo 20:8-11.

Intakder ti Dios ti Sabado kas maysa nga aldaw tapno "laglagipen" ti Apo a "nangaramid kadagiti langit ken ti daga." Ti panaginana iti Sabado iti tunggal lawas ket ikapetnatayo iti Namarsua a nangbendision ditoy nga aldaw ken nangisina ditoy.

Idi ni Jesus ket agbibiag ditoy daga, ket innalana ti bentahe iti tunggal oportunidad tapno sustenarenna ti pannakaikapetna iti Ama. Isu ket nagbenefisio manipud iti panaginana iti Sabado babaen iti panagdayawna iti Sabado kas iti ibagbaga ni Lucas kadatayo:

"Ket immay sadi Nazaret, isu a dinakkelanna; ket simrek kas ugalida iti ALDAW A PANAGINANA iti sinagoga."--Lucas 4:16.

No ni Jesus a Dios ken tao ket masapulna iti aginana iti presensia ni Amana iti aldaw ti Sabado, datayo a tattao laeng ket pudno a nakarkaro a masapultayo daytoy. Idi inikkat ni Jesus dagiti legal a makaipawil nga inkabil dagiti Judio iti Sabado (Mateo 12:1-12), intudona nga inaramid ti Dios daytoy a pagimbagan dagiti tao:

"Ket kinunana kadakuada: Ti aldaw a panaginana naaramid a maipaay iti tao, ket saan a ti tao maipaay iti aldaw a panaginana. Iti kasta, toy Anak ti tao isu ti Apo ti aldaw a panaginana."--Marcos 2:27, 28.

Minarkaan ni Jesus ti kinapateg ti Sabado uray idi pannakatayna. Isu ket natay iti Viernes, "aldaw iti panagsagana, ti Sabado ket ngan-nganin mangrugi" (Lucas 23:54). Idiay a kanito ket impakdaarna, "Nalpasen," dayta ket ti trabahona nga iyuumay ditoy lubong ken ipapatayna kas kasukat nga agpaay iti tao ket nakumpleton (Juan 19:30; 4:34; 5:30). Ket tapno marambakna ti nalpasen a misionna, ni Jesus ket naginana iti tanem iti aldaw ti Sabado.

Kas met idi nakumpleto ni Cristo ti trabahona a panagparsua iti maikanem nga aldaw sa naginana iti maikapito nga aldaw, isu nga babaen iti ipapatayna idiay krus, ket nakompletona ti trabahona a panangsubbot iti maikanem nga aldaw, sa naginana iti maikapito nga aldaw.

Iti agsapa iti Domingo, ni Jesus ket bimmangon manipud iti tanem, maysa a naballigi a Mangisalakan (Lucas 24:1-7). Dinawatnan kadagiti adalanna tapno taginayonenda ti makipagkita Kenkuana iti aldaw ti Sabado kalpasan iti panagungarna Iti panangisaritana maipapan iti pannakadadael ti Jerusalem, a napasamak idi nganngani uppat a pulo a tawtawen kalpasan ti pannakatayna, ket binilinannaida nga:

"Agdawdawtkayo narud, nga ti panagtalawyo saan koma iti kalam-ekna, wenno iti aldaw a panaginana."--Mateo 24:20.

Kalikagum ti Mangisalakantayo a dagiti adalanna ken dagiti naawisda nga ituloyda dagiti ar-aramidda nga insurona kadakuada (Juan 15:15, 16). Tarigagayna a mapadasanda nga agpada ti panaginana iti pannakaisalakan ken panaginana iti Sabado. Saanda Isu nga inuppapay. Dagiti disipulo ket intuloyda iti nagngilin iti aldaw ti Sabado kalpasan iti pannakatay ni Cristo (kitaen ti Lucas 23:54-56; Aramid 12:14; 16:13; 17:2; 18:1-4).

Ti ay-ayaten nga apostol Juan ket intuloyna ti nilawas a pannakaisilpona kenni Cristo iti aldaw ti Sabado. Iti maudin a tawtawen ti biagna ket insuratna: "Idiay Aldaw iti Apo ket addaak; ti Espiritu" (Apocalipsis 1:10). Babaen kenni Jesus, "ti Aldaw ti Apo" ket ti Sabado, "gaputa ti Anak ti Tao ket Apo met iti Sabado" (Mateo 12:8).

Iti Sabado ket ramrambakantayo dagiti dua a dadakkel nga inaramidna agpaay kadatayo: Pinarsuanatayo ken insalakannatayo. Daytoy a kapadasan maipapan iti Sabado ket agtultuloy inggana iti langit:

"Ta kas kadagiti babbaro a langlangit ken baro a daga, nga aramidekto, agtalinaeddanto iti saklangko', kuna ni JEHOVA….'manipud iti maysa a lutuad agingga iti saali, ket manipud iti masya nga aldaw a panaginana agingga iti sabali, amin a lasag umayto agkararag iti sangoanak, kuna ni JEHOVA."--Isaias 66:22, 23.

4. DAGITI BENEFISIO ITI PANAGINANA ITI SABADO

Dagiti tao ita a tiempo ket agbibinnaddekda iti maysa ken maysa iti naleddaang a biagda. Dagiti tao ket kasta unay iti bannogda. Dagiti familia ket marmarbada gapu iti dagsen. Ngem iprespresenta ti Dios ti Sabado a kas nakarkaro a naim-imbag a pamayan tapno ibiag ti nasayaat a biag.

Intayo kitaen dagiti dadduma a direkta a benefisio iti panaginana iti Sabado:
(1) Ti Sabado ket maysa a pakalagipan iti panamarsua, ket babaen iti panangsantifikar ditoy, ket mangitaktakdertayo iti monumento ti Mammarsuatayo. Dagiti nasantoan nga orasna ket mangidasdasar iti nakaskasdaaw nga oportuniad tapno makasaritatayo dagiti naggappuantayo iti lubong a pinarsua ti Dios. Kaano ti kaudian a tiempo a sika wenno ti familiam ket naaddan iti tiempo tapno pudno a naguper iti natalna a pintas iti dana iti bakir wenno nabato nga ubbog?

(2) Iti Sabado ket mapadasantayo ti ragsak ti panagdayaw ken pannakitipon kadagiti dadduma a Cristiano. Adda iti bendision manipud iti panagdayaw iti Dios a kadua dagiti dadduma kas maysa a grupo dagiti agdaydayaw. Ti Sabado ket mangmangted kadatayo iti naisangsangayan a tiempo tapno mapantayo aguurnong nga agkakadua kas maysa a bagi iti iglesia tapno paregtaentayo dagiti naespirituan a bateriatayo.

(3) Ti Sabado ket mangmangted kadagiti okasion tapno aramidentayo dagiti mapagpanunotan nga ar-aramid iti kinaanus. Adda kadi karrubam a masakit kabayatan iti maysa a lawas a saanmo a napasiar agsipudta awan iti tiempom? No ti maysa a gayyem ket makasapul iti manangngaasi a lapayag kalpasan iti ipapatay ti asawana, dagiti kadi rigrigat iti inaldaw a panagbiag ket nanglapped kenkuana iti naayat nga atensionmo? Imbalakad ni Jesus: "Nalinteg iti agaramid iti naimbag iti aldaw ti Sabado" (Mateo 12:12).

(4) Ti Sabado ket aldaw tapno papigsaen ti siglot ti familia. Idi imbilin ni Cristo a, "ti Sabado ket saanka nga agaramid iti aniaman a trabaho" (Exodo 20:10). Mabalin a saan Isu a nangted iti nasaysayaat a bilin kadagiti sobra iti panagtrabahona nga amma, ken sobra iti bannogna nga inna. Ti Sabado ket myasa a higante a senias iti AGSARDENG nga agpaay kadagiti familia. Sumardeng nga ipalabos dagiti apurado unay a banbanag a salisianda dagiti bantay a kapategan unay. Ti Sabado ket maysa nga aldaw tapno sukatantayo ti panagdukot iti kararag, trabaho iti ragsak, dagiti awan inanana nga eskedyol iti natalna a panagpanunot. Ti panaginana iti Sabado ket mangted iti entiro a familia iti tiempo tapno makisilputayo kenni Cristo ken maikapet iti naespirituan a pigsana.

(5) Ti Sabado ket maysa a tiempo a ni Jesus ket nangruna a makaasideg unay. Ti tunggal relasion ket masapulna iti naisangsangayan a tiempo, ket ti relasiontayo kenni Cristo ket saan a mailaksid. Ti panangitedtayo iti entiro a maysa nga aldaw kenni Cristo iti tunggal lawas ket maysa a dakkel a pamayan tapno maaywanantayo ti pannakigayemtayo Kenkuana a naregta ken nakaliwliwa. Ti Sabado ket mangted kadatayo iti ekstra a panawen nga agpaay iti panagadal iti Biblia ken panagkararag, ekstra a tiempo tapno makaduatayo ni Cristo a datdatayo iti natalna a lugar ken sa agdengngeg Kenkuana.

"Benindisionan ni Jesus ti maikapito nga aldaw ken inaramidna daytoy a nasantoan" nga addaan iti kari iti presensiana (Genesis 2:3). Maawatam no apay a napateg a salimetmetan ti Sabado, ti maikapito nga aldaw iti lawas kas ti Sabado, agsipud ta daytoy iti aldaw nga inlasin ni Cristo idi panagparsua tapno makapagsarita isu kadatayo iti naisangsangayan a pamayan.

Idi pinarsua ni Jesus ti Sabado ket kasla nganngani a ti adda iti panunotna ket ti kapututantayo. Daytoy iti eksakto a masapultayo ditoy napno iti rigat a lubongtayo: maysa nga aldaw a pudno a naan-anay agpaay iti panaginana manipud iti aniaman a banag. Maysa nga aldaw tapno daydayawen ti Dios, makipagkita manen kadagiti dadduma a parsua ken pagpanunotan dagiti relasion imbes a dagti banbanag.

5. MAYSA A PAMAYAN ITI MAKALANGIT A PANAGINANA

Mapagmaymaysatayo dagiti benefisio iti pannakaikapet kenni Jesus babaen iti inaldaw ken ti linawas a pannakisango Kenkuana iti maysa a sao-panaginana. Ti sao a "Sabbath" ket naggapu iti sao a Hebreo a ti kayatna a saoen ket panaginana., isu a saan a nakaskasdaaw nga awagan ti Kasuratan ti maikapito nga aldaw a "Sabado iti panaginana" (Levitico 23:3).

"Ta ti maysa a paset kastoy ti masasao [Dios] a maipapan iti maikapito nga aldaw: 'Ket naginana ti Dios iti maikapito nga aldaw, kadagiti isu-amin na ar-aramidna.'…. ADDA PAY NGARUD MAYSA A PANAGINANA A MAIPAAY ITI ILI TI DIOS…. Umagawatay ngarud tapno sumrektayo iti daydiay a panaginana."--Hebreo 4:4-11.

Ti pannakapadas iti "Sabado a panaginana" ket mangted kadatayo iti linawas a pannakaraman iti ragsak a mapadasantayonto iti naan-anay a panaginana idiay langit. Daytoy a panaginana ket saan laeng a basta a wan iti ar-aramiden, daytoy ket ti kaipapananna ket iti rikna iti kinatalged, talna ken pagimbagan nga adda iti ramut iti pudno a naruay a biag. Daytoy a kita iti espiritual a panaginana ket mapagyamanan laeng babaen iti pannakapadas. Ti testimonia dagiti nakapadasen iti pannakaisalakan a panaginana ken ti Saado a panaginana ket pangsangalubungan: "No sumrekka iti panaginana ni Jesus babaen iti inaldaw ken linawas a koneksion Kenkuana, ket madiskobrem ti kadakkelan a ragsak iti biag."

Kayatmo kadi a pagyamanan ni Jesus gapu iti sagutna a panaginana?" Kayatmo kadi a pagyamanan Isu gapu iti karina a pannakaisalakan a panaginana iti inaldaw tapno masango dagiti karit ti biag, ken ti kari iti Sabado a panaginana iti linawas tapno simintoenna ti relasionmo Kenkuana? No saanmo pay naaramid daytoy uray kaano, kayatmo kadi nga awaten ti pannakaisalakan nga idasdasarna? Kayatmo kadi nga ibaga Kenkuana a kalikagummo a salimetmetan ti Sabadona iti linawas? Kayatmo kadi nga ibaga iti, "Wen, Apo! Kalikagumko iti makasarak iti ragsak iti aldaw nga intakdermo." Apay a saanka a mangaramid iti panagkari itatta mismo?

(Mabalin a masmasdaawka: no sinno iit nangbaliw iti Sabbath manipud iti Sabado, ti maikapito nga aldaw iti Domingo, ti umuna nga aldaw iti lawas? Kaano a naaramid daytoy a pannakabaliw? Impalubos kadi ti Dios daytoy a panangbaliw? Dagitoy a saludsod ket masungbatanto iti Guide 21.