Ti Limed iti Nasungbatan a Kararag

Ni Anatoli Levitin, maysa a Ruso a mannurat ken estoriador, ket inusarna ti adu a tawen iti pagbaludan idiay Siberian Gulag a dagiti araraw iti Dios ket kasla timmangken iti daga. Ngem isu immay a nagsubli a medio nasayaat iti espirituna. Insuratna a "ti kadakkelan amin a milagro ket kararag." "Iturongko laeng ti panunotko iti Dios ket sigud a makariknaak iti puersa a maibukbukbok kaniak manipud iti adinno, ditoy kararuak ken entiro a kinataok. Ania daytoy? Adinno ngata iti pangalaak, maysa nga awan pategna a lakay ken nabannogen iti biag, iti pigsa a mangpapigsa ken mangisalakan kaniak, mangitag-ay kaniak a nangatngato ngem ti daga? Daytoy ket aggapu manipud iti ruarko ket awan iti puersa ditoy lubong a kaanoman ket makalaban ditoy."

Ditoy a mangidalan ket makitatayo no kasano a ti kararag ket tumulong kadatayo a mangitakder ti napigpigsa a relasion iti Dios ken ti nasalun-at a Nacristianoan a panagbiag.

1. PANNAKISARITA ITI DIOS

Kasanotayo a masiguro a denggennatayo ti Dios no agkararagtayo?

"Ket umawagkayto kaniak, ket rumuarkayto ket agkarkararagkayto kaniak, ket ipangagkayonto. Ket sapulendakto, ket masarakandak, intono birokendak iti amin a pusoyo."--Jeremias 29:12, 13.

Ania iti talged nga inted ni Jesus kadatayo a denggenna ken sungbatanna dagiti kararagtayo?

"Ket siak kunak kadakayo: Dumawatkayo, ket maikkankayto; agsapulkayo, ket makasarakkayto; umawagkayo ket ilukatandakayto."--Lucas 11:9.

Ti kararag ket agsinnabat a pamayan iti panagsarita. Dayta iti inkari ni Jesus.

"Adtoy, siak addaak nga agtaktakder iti ruangan, ket agtugtugak; no adda dumngegto iti timekko ket luktannanto ti ruangan, sumrekakto kenkuana, ket makipanganakto kenkuana, ket isu, kaniak."--Apocalipsis 3:20.

Kasano a posible iti agtugaw ken maaddaan iti naimbag a pannakisarita iti maysa a pannangan iti rabii kenni Jesus? Umuna, babaen iti panangibagatayo Kenkuana ti tunggal banag nga adda iti pusotayo iti kararag. Maikadua, babaen iti naannad a panagdengngegtayo. Kas iti intayo panagmuni-muni iti kararag, ti Dios ket direkta a makapagsarita kadatayo. Ken kas iti intayo panagadal iti Sao ti Dios, ti Dios ket agsarita kadatayo babaen kadagiti panidna. Ti kararag ket mabalin nga agbalin a dalan iti panagbiag agpaay iti Cristiano.

"AGKARARAGKAYO A KANKANAYON; Agkararagkayo a di agressat; Iti isu-amin, agyamankayo; ta daytoy ti nakem ti Dios ken Cristo Jesus ti maipapan kadakayo."--1 Tesalonica 5:16-18.

Kasanotayo nga "agkararag nga awan ressatna"? Kanayontayo kadi a nakaparintumeng iti amin a tiempo, wenno agtultuloytayo nga ulit-uliten dagiti paset iti panagdayaw wenno kararag? Siempre ket saan. No di ket agbiagtayo a nakadikdikket unay kenni Jesus a mabalintayo latta iti makisarita Kenkuana iti aniaman a tiempo, uray adinno.

"Iti tingnga iti adu a tattao iti kalsada, iti tingnga iti komersio, ket mabalintay laeng ti agkararag iti Dios tapno dumawattayo iti nailangitan a panangidalan…. kanayontayo a lukatan ti ruangan dagiti pusotayo ken dawatentayo kenni Jesus nga umay agtaeng kas nailangitan a bisita ti kararuatayo."-Steps to Christ, p. 99.

Maysa kadagiti kaimbagan a pamayan tapno maparang-ay daytoy a kita iti nadikket a relasion ket ti masursurotayo iti agmuni-muni kas iti intayo panagkararag.

"Toy panagpanunotko nasam-it koma kenkuana: pagrag-oakto ni JEHOVA."--Salmo 104:34.

Saanka a basta agapura a mapan iti listaan dagiti dawatmo no agkarkararagka. Agurayka. Dumngegka. Ti bassit a panagintuod a napno iti kararag ket mangparang-ay a pirmi iti relasionmo iti Dios.

"Umadanikayo iti Dios, ket isu umasidegto kadakayo."--Santiago 4:8.

No ad-adda a mapantayo umasideg kenni Jesus, ket ad-adda a mapadasantayo ti presensiana. Isu nga aggianka iti distansia a makapagsinnaritaka kenni Jesus, ket saanka nga agdukot maipapan idiay no kasanom nga ibaga ti tama a sarita. Basta agsaoka a sipupudno ken silulukat. Saritaem maipapan iti amin a banag. Isu Mismo ket naglabasannan ti rigat iti patay tapno Isu ket agbalin a nadikket a gayyemmo.

2. KASANO ITI AGKARARAG

No datayo ket ar-aramidentayo iti agkarkararag, mabalintayo a suroten ti ehemplo ti kararag ti Apo, ti modelo iti kararag nga insuro ni Jesus kadagiti adalanna kas sungbatna iti dawatda nga "Isuronakami nga agkararag."

"Amami, nga addaka sadi langit, madaydayaw koma ti Naganmo. Umay koma ti pagariam. Maaramid koma ti pagayatam kas sadi langit kasta met ditoy daga. Itedmo kadakam ita ti taraonmi iti inaldaw. Ket pakawanennakami kadagiti ut-utangmi, a kas met panamakawanmi kadagiti nakautang kadakami. Ket dinakam iyeg iti pannakasulisog, no di ket isalakannakami iti dakes. Ta kukuam ti pagarian, pannakabalin, ken ti dayag iti agnanayon. Amen."--Mateo 6:9-13.

Kas maiyannurot iti sukog nga inted ni Jesus iti kararagna ket masapul a mapantayo umasideg iti Dios kas Amatayo nga adda idiay langit. Dawaten nga ipanguloanna dagiti pusotayo kas iti pagayatanna a nagballigi iti langit. Birokentayo Isu nga agpaay kadagiti pisikal a kasapulantayo, pannakapakawan, ken agpaay iti managpakawan a kababalin. Laglagipentayo a ti abilidadtayo a lumaban iti basol ket aggapu iti Dios. Ti kararag ni Cristo ket nagleppas iti panangiyebkas iti panagdayaw.

Iti sabali pay nga okasion, imbilin ni Jesus kadagiti adalanna nga agkararagda iti Ama "iti naganna" (Juan 16:23)-dayta ket, tapno agkararagda a maitunos iti prinsipio ni Jesus. Isu a dagiti Cristiano ket kadawyan a leppasenda dagiti kararagda iti kastoy a sasao: "Iti nagan ni Jesus, Amen." Ti sao nga Amen ket sao a Hebreo a ti kayatna a saoen ket, "maaramid koma."

Nupay ti kararag ti Apo ket mangted iti panangidalan no ania iti ikararagtayo ken no kasano iti mangforma iti kararag, ti pannakisaritatayo iti Dios ket napinpintas a makaaramid iti kararag iti bukodtayo a panagdawat iti puso. Mabalintayo nga ikararag maipapan iti aniaman a banag. Aw-awisennatayo ti Dios nga ikararagtayo ti pannakapakawan dagiti basoltayo (1 Juan 1:9), parang-ayenna ti pammatitayo (Marcos 9:24), dagiti kasapulantayo iti biag (Mateo 6:11), pannakapaimbag manipud panagsagaba iti rigat ken saksakit (Santiago 5:15), ken ti pannakaibukbok iti Espiritu Santo kadatayo (Zacarias 10:1). Pinatalgedannatayo ni Jesus nga alaenna amin dagiti masapsapultayo ken parparikuttayo Kenkuana, awan iti banag a bassit a saantayo a mabalin nga ikararag.

"Nga itaklinyo kenkuana ti amin a pagdanaganyo gapu ta isu aluadannakayo."--1 Pedro 5:7.

Ti Mangisalakantayo ket interesado iti tunggal detalye dagiti biagtayo. Ti pusona ket pumudot no dagiti pusotayo ket dumket Kenkuana iti ayat ken pammati.

3. PRIBADO A PANAGKARARAG

Kaadduanna kadatayo ket addan iti banbanag a saantayo a basta-basta nga ibaga uray pay kadagiti kadikketan a gagayyemtayo. Isu a ti Dios ket aw-awisennatayo a palag-anentayo dagiti bagitayo iti limed a panagkararag: sika ken Isu laeng. Saan a gapu ta masapulna iti aniaman nga imformasion. Ammo ti Dios dagiti nakalimed a butbutengtayo, dagiti nakalemmeng a motibotayo, ken nakakali a sakit ti nakemtayo a nakarkaro ngem ti pannakaammotayo kadagiti bagitayo. Ngem masapultayo a lukatan dagiti pusotayo iti Maysa a makaammo unay kadatayo ken nagayat kadatayo iti kasta unay. Ti panagimbag ket mangrugi no ni Jesus ket masagidna dagiti sugattayo.

No agkararagtayo, ni Jesus a Nangato a Paditayo ket asideg tapno tulungannatayo.

"Addaantayo iti maysa a NASULISOG ITI ISUAMIN, A KAS KADATAYO-ngem saan a nagbasol. Umadanitay ngarud a sitatalged iti trono ti parabur awatentayo ti asi ken makasaraktayo iti parabur; a tumulong kadatayo iti aldaw ti pannakasapul."--Hebreo 4:15, 16.

Mariknam kadi a sika ket madandanagan, aburido unay, ken nakabasol? Iyaplagmo ti sangoanan iti Apo, Maitednanto amin dagiti tunggal masapsapultayo.

Addaantayo kadi iti naisangsangayan nga agpaay iti pribado a panagkararag?

"Ngem sika, inton agkararagka, sumrekka iti siledmo, ket into nairikepen ti ruangan, agkararagka ken Amam nga adda iti nalimed…gungunaannakanto."--Mateo 6:6.

Kas mainayon iti panagkararagtayo no magmagnatayo iti dalan, panagtrabaho, wenno manarimaantayo nga agragragsak iti maysa a pagraragsakan, ti tunggal Crisitano ket masapul a maaddaan iti tiempo nga ilasinna iti tunggal aldaw nga agpaay iti personal a panagkararag ken panagadal iti Biblia. Aramidem ti inaldaw a pannakisaritam iti Dios iti tiempo a mariknam a sika ket naregta unay ken makapagpanunot a nalaing.

4. PANGKAADUAN A PANAGKARARAG

Ti pannakitiponmo kadagiti dadduma tapno agkararag ket mangaramid iti naisangsangayan a pannakimaymaysa ken mangawis iti pannakabalin iti Dios iti naisangsangayan a pamayan.

"Ta no adino ti naguurnongan ti dua wenno tallo gapu iti naganko, addaak idiay iti nagtengngaanda."--Mateo 18:20.

Maysa kadagiti katan-okan a banbanag a maaramidtayo kas maysa a familia ket ti mangparang-ay iti panagkararag a panagbiag nga agkakadua. Ipakita kadagiti annakyo a mabalintayo nga ipan a direkta Kenkuana dagiti masapsapultayo. Maragsakanda maipapan iti Dios kas iti pannakakitada Kenkuana a sumungsungbat kadagiti kararagyo iti praktikal a detalye iti biag. Aramiden ti panagdayaw iti familia a maysa a naragsak, nasayaat a tiempo iti panagiinnadal.

5. DAGITI PITO A SEKRETO ITI NASUNGBATAN A KARARAG

Idi ni Moises ket nagkararag, ti nalabasit a baybay ket nagudua. Idi ni Elias ket nagkararag, ti apuy ket bimmaba manipud langit, Idi ni Daniel ket nagkararag, ti anghel ket sinerraanna dagiti ngiwat dagiti mabisin a leon. Ti Biblia ket mangipakita kadatayo iti adu a makaliwliwa nga estoria iti nasungbatan a kararag. Ken irekomendana ti kararag kas pamayan tapno maikonektatayo iti mannakabalin a pigsa ti Dios. Inkari ni Jesus:

"No adda aniaman a dawatenyonto iti naganko, dayta ti aramidekto."--Juan 14:14.

Ngem dagiti dadduma a kararag ket kasla agtultuloyda a saaan a masungsungbatan. Apay? Adtoy dagiti pito a prinsipio a tumulong kenka nga agkararag iti nakarkaro nga epektibo:

(1) Kanayonka a nakadikket kenni Jesus.
"NO AGNAEDKAYO KANIAK, ket dagiti saok agtaengda kadakayo, dawatenyo ti aniaman a kayatyo ket maaramidto kadakayo."--Juan 15:7.

No aramidentayo ti relasiontayo iti Dios a nangruna ken kanayontayo a nakadikket Kenkuana, ket mangngegtayo ken makitatayo dagiti sungbat kadagiti kararagtayo a ti sabali a pamayan ket mapalabas a saantayo a mapupuotan.

(2) Kanayon nga agtalek iti Dios.
"Ket amin a dawatenyonto iti panagkararag, NO SIPAPATIKAYO, awatenyonto."--Mateo 21:22.

Ti pammati, wenno maadddan iti pammati, kayatna a saoen ket datayo ket pudno nga agtaltalek iti Amatayo iti langit a mangted kadagiti masapsapultayo. No marirriribukanka gapu iti kinakurang iti pammati, laglagipem a ti Mangisalakantayo ket nagaramid iti milagro agpaay iti tao a nagpakaasi iti pannakauppapay.

"Mamatiak, tulungam ti kurang ti pammatik."--Marcos 9:24.

Basta ipunteriam ti panunotmo iti panangusarmo iti pammatim nga adda kenka; saanka a madukutan iti pammati nga awan kenka.

(3) Itedmo a sitatalna iti pagayatan ti Dios.
"Ket daytoy ti adda kadatayo a panagtalek kenkuana, a no adda aniaman a dawatentayo a MAYANNUROT ITI PAGAYATANNA, isu denggennatayo."--1 Juan 5:14.

Laglagipen a kayat ti Dios a suroannatayo, ken kasta met nga ikkannatayo dagiti banbanag, babaen iti kararag. Isu nga no dadduma ket ibagana a s "Saan"; no dadduma ket iturongnatayo iti sabali a direksion. Ti kararag ket maysa a pamayan tapno ad-adda a maiyasidegtayo iti pagayatan ti Dios. Masapultayo iti agbalin a sensitibo iti sungsungbat iti Dios ken makaadaltayo manipud kadakuada. Ti panangaywantayo kadagiti diretsaan a dawdawattayo ken no ania iti naaramid kas resultana ket dakkel a tulong.

Ti Espiritu Santo ket tumulong kenka tapno mapanka iti tama a pagilasinan: "Ti Espiritu ket mangiballaet agpaay kadagiti Santo kas maiyannurot iti pagayatan ti Dios" (Roma 8:27). Laglagipen a dagiti pagayatantayo ket kanayon a mailapat iti pagayatan ti Dios no makitatayo a kas iti pannakakitana.

(4) Aguray a siaanus iti Dios.
"PINATURAYKO A SIAANUS NI JEHOVA; ket inallingagnak, ket nangnegna ti ikkisko."--Salmo 40:1.

Ti nangruna a punto ditoy ket taginayonen ti punteriam iti Dios, taginayonem ti panunotmo iti solusionna. Saanka a dumawat iti tulong iti Dios iti maysa a minuto, kalpasanna ti sumaruno ket padasem a limmesen dagita parikutmo iti panagbirok iti liwliwa. Agurayka a siaanus iti Apo; masapultayo unay dayta a disiplina.

(5) Saanka a kumkumpet iti aniaman a basol.
"No IPATEGKO TI KINADAKES ITOY PUSOK, ti Apo saanto a dumngeg."--Salmo 66:18.

Dagiti kadwyan a mabigbig a basbasol ket mangpugsat iti pannakabalin ti Dios kadagiti biagtayo; isinanatayo daytoy manipud iti Dios (Isaias 59:1-2) Saan a mabalin a nakakapet dayta maysa nga imam iti basol ken dayta maysa nga imam ket dumawdawat iti nailangitan a tulong Ti naimpusoan a panangipudno ken panagbabawi ket mangresolba iti parikut.

No saantayo nga ipalubos ti Dios a mangibulos kadatayo manipud kadagiti dakes a panpanunot, sasao, ken ar-aramid, dagiti kararagtayo ket saan nga epektibo.

"Agdawatkayo ket dikay umawat, ta saan a nasayaat ti panggepyo nga agdawat, ta karitenyo kadagiti ragragsakyo."--Santiago 4:3.

Ti Dios ket saanna a sungbatan iti 'wen" dagiti naimbukodan a karkararag.
Taginayonen a silulukat dagiti lapayagmo iti linteg ti Dios, iti pagayatanna, ket taginayonenna met a silulukat dagiti lapayagna kadagiti ar-ararawmo.

"Ti di mangyallingag iti lapayagna iti panangdengngegna iti linteg, uray pay ti kararagna makarimon."--Proverbio 28:9.

(6) Riknaem ti pannakasapulmo iti Dios.
Ti Dios ket sumungsungbat kadagiti dumawdawat iti presensiana ken pannakabalinna kadagiti biagda.

"Nagasat dagiti mabisin ken mawaw iti kinalinteg; ta mapnekdanto."--Mateo 5:6.

(7) Piliten ti agtultuloy nga agkararag.
Inladawan ni Jesus ti pannakasapul iti agtultuloy a panangisingasing kadagiti dawattayo babaen iti panangiyestoriana iti mapilit unay a babai a balo a kanayon a mapan iti hues gapu iti dawatna. Ti udina ket, kinunana ti hues nga addaan iti panagsikor, "Ngem gapu ta daytoy balo makaalimuteng kaniak, aramidekto ti kinalinteg kenkuana, tapno sumardeng nga um-umay kaniak. Ket kinuna ti Apo: Denggenyo ti sao ti okom a nakillo. Ket ti Dios dinanto aramiden ayan ti kinalinteg kadagiti pinilina, nga umaw-awag kenkuana iti aldaw ken rabii, ket addanto anusna kadakuada?" (Lucas 18:5-7).

Ibagam iti Dios dagiti masapsapulmo, namnamam, ken planom. Dawatem dagiti nalatak a bendision, a tumulong kadagiti tiempo iti pannakasapul. Ituloymo iti agbirok, ken ituloymo iti dumngeg, inggana makasursuroka iti banag manipud iti sungbat iti Dios.

6. DAGITI ANGHEL KET AGSERSERBIDA AGPAAY KADAGITI MASAPSAPUL DAGITI AGKARKARARAG

Ti salmista ket nagragsak a babaen iti ministerio iti anghel iti Apo, dagiti kararagna ket nasungbatan:

"Binirbirokko ni JEHOVA, ket isu sinungbatannak, ket inispalnak kadagiti amin a panagbutbutengko. Kimmitada kenkuana, ket nagraniagda; ket dagiti ruprupada uray kaanoman didanto agmalmalanga. Toy nanumo a tao imkis, ket dinengngeg ni JEHOVA, ket insalakanna kadagiti amin a dukdukotna. Ti anghel ni JEHOVA alikubkubenna dagiti agbuteng kenkuana, ket ispalenna ida."--Salmo 34:4-7.

No agkarkararagtayo, ibaon ti Dios dagiti anghelna tapno sungbatanda dagiti kararagtayo (Hebreo 1:14). Ti tunggal Cristiano ket addaan iti anghel a bantayna:

"Kitaenyo ta dikay umsien ti maysa kadagitoy babassit nga ubbing, ta kunak kadakayo a dagiti anghelda sadi langit agnanayon a makitada ti langa ni Amak nga adda sadi langit."--Mateo 18:10.

Gapu kadagiti karkararagtayo!

"Maammoan koma dagiti isu-amin a tattao ti kinaanusyo. Ti Apo asidegen. Dikay madanagan iti uray ania, no di ket kadagiti isu-amin, maipakaammo koma dagiti dawdawatyo iti Dios, gapu iti kararag ken araraw, agraman panagiaman. Ket ti talna ti Dios, a daeganna ti amin a pannakaawat, aywanannanto dagiti pusoyo ken dagiti panunotyo ken Cristo Jesus."--Filipos 4:5-7.

7. TI ESTILO TI PANAGBIAG TI CRISTIANO

Inladawan ti Biblia ti naidumduma nga estilo ti panagbiag ti Cristiano. Babaen idiay Efeso 4:22-24, ti Cristiano ket "masapul nga ikkatenna" ti daanen a panagbiag a nagresulta manipud kadagiti "makaallilaw a kalkalikagum," ken "isuot" ti baro a panagbiag a "naparsua tapno agbalin a kas iti Dios." Ditoy a kasuratan ken iti Guide 6, nadiskobretayo nga idiay baro a pannakaiyanak datayo ket "naparsua manen" tapno agbalin a sabali a kita a tao kenni Cristo.

Daytoy a mangidalan ken dagiti innem pay a sumaruno-ket iparangna ti panagbiag ti Cristiano; ipakitada dagiti limed iti naragsak a biag iti Cristiano. Tulungandaka dagitoy a mangaramid iti napigpigsa a relasion ken Cristo, nga agresulta iti naidumduma nga estilo ti panagbiag ti Cristiano. Isu nga ikitatayo dagita matayo kenni Jesus ita nga aldaw ket agbalinkayo a paset iti daydiay a maudi a selebrasion iti panagballigi inton ti talna ni Jesus ket agparang nga awan iti tumakder a kumarit.