Manipud iti Nakabasol a Managbasol
Agturong iti Napakawan a Santo

Awan ti marka iti ramramay. Awan iti armas a nasarakan. Awan iti nakakita idiay pimmatay a simrek idiay opisina iti doktor. Awan iti uray maysa a nakangneg idiay uni ti paltog. Ngem nasarakanda ti doktor a natay a dara-dara idiay likudan iti tugawna. Lima a bala iti timmarus iti kamisetana.

Daytoy ket kasla iti naan-anay a krimen. Idi umuna, awan iti masarakan dagiti pulis a pakaammoan. Ngem idi kuan adda nakitada a bassit laeng a barut a nakaikapet iti pagik-ikkan iti lapis iti rabaw iti lamisita ti doctor. Daydiay a bassit a barut ket nagturong a naikapet iti maysa a tape recorder iti bulsa iti lamisita. Ti pangtengngel iti lapis ket naammoanda a mangilenglinged iti bassit a mikropono nga us-usaren ti doktor tapno irekordna dagiti tungtunganda kadagiti pasientena a balbalakadanna.

Dagiti imbestigada ket dagusda a pinaandar ti tape recorder, ket sisisiddaawda a dinengngeg ti pudno a pannakaaramid iti krimen. Ti lalaki a managan Anthony ket simrek iti opisina ket nangirugi iti napudot a diskusion iti doctor. Nangneg dagiti uni iti paltog. Ti tape ket nagleppas iti aring-ing ti doktor, a matmatay iti datar.

Ti tunggal nakabutbuteng a detalye ti krimen ket nairekord. Impagarup ti kriminal a ti krimen nga inaramidna ket agnanayonen a limed. Naannadna nga inaramid nga awan iti pakaamoan. Ngem ti tape recorder iti nangibaga iti entiro nga estoria.

Ditoy a mangidalan ket maadaltayo maipapan iti maudi a panangokom ti Dios inton dagiti tao ket "maokomanda kas maiyannurot iti inaramidda kas iti nakasurat iti liblibro" (Apocalipsis 20:12). Kadagiti saan nga immawat kenni Cristo kas Mangisalakanda, daytoy ket dakes a damag. Ngem ti panangokom ket napintas a damag kadagiti nakasarak iti talged kenni Cristo.

1. KASANOM A SANGOEN TI PANANGOKOM NGA AWAN ITI BUTENG

Sinno iti mangokom ditoy lubong?

"Ta ti Ama awan ti okomenna, no di ket isuamin a panangokom intedna iti Anak."--Juan 5:22.

Kasano nga insagana ti krus ni Cristo tapno agbalin nga Okomtayo?

"Isu nga impaay ti Dios a daton ti pannakikappia, gapu iti pammati iti darana, tapno maiparangarang ti kinalintegna, ta gapu iti kinaanus ti Dios pinalabasna dagiti basbasol a naaramid idi; Tapno ti kinalintegna maiparangarang iti agdama a tiempo; tapno maipakita a NALINTEG, KEN MANGPALINTEG iti adda pammatina ken Jesus."--Roma 3:25, 26.

Ti pannakatay ni Jesus kas kasukattayo ket timmulong Kenkuana tapno agbalin a nalinteg nga Okom ken managparabur a mangilinteg a mabalin a mamakawan kadagiti agbabbabawi a managbasol. Inton ti agbuybuya a sangalubungan ket agsaludsod iti kastoy a saludsod, "Kasano a ti patas nga okom ket maibagana a ti tao a nakabasol ket awan basolna? Ni Cristo ket makasungbat babaen iti panangitudona kadagiti nagpiglat nga imana. Innalana ti nalinteg a dusa nga agpaay kadagiti basoltayo iti bukod a bagina.

Dagiti libro iti langit ket nakaidulinda idiay dagiti record ti tunggal tao a nagbiag, ket dagitoy a record ket mausar iti panangokom (Apocalipsis 20:12). Daytoy iti dakes a damag kadagiti nagipagpagarup a dagiti limed a basbasolda ken krimenda ket saanen nga agsubli tapno butengennaida. Ngem adda iti nakaskasdaaw a naimbag a damag kadagiti amin a sipupudno nga immawat kenni Cristo kas mangidepensa kadakuada idiay langit: "Ti dara ni Jesus…ti manglinis kadatayo manipud kadagiti amin a basol" (1 Juan 1:7).

Ania iti idasdasar ni Jesus a kasukat iti biagtayo a napno iti basol?

"Daydi saan a nakaammo ti basol, inaramidna a basol gapu kadatayo, tapno makapagbalintayo a kinalinteg ti Dios gapu kenkuana."--2 Corinto 5:21.

Dagiti biagtayo a managbasol ket naisukat iti naan-anay a nalinteg a biag ni Cristo. Gapu iti awan basolna a biag ni Jesus ken ti pannakatayna, ti Dios ket mapakawannatayo ken tratoennatayo a kas uray la no saantayo kaanoman a nagbasol.

Ania iti nakaikari kenni Jesus tapno agbalin nga Abogadotayo ken Okomtayo?

2. NI CRISTO KET IMMAY A NAINTIEMPOAN

Idiay pannakabautisarna, ni Jesus ket nabukbukan iti Espiritu Santo:

"'Ket ni Jesus, idi nalpas a nabautisaran, dagus a simmang-at nanipud iti danum; ket adtoy; dagiti langlangit nalukatanda kenkuana, ket nakitana ti Espiritu ti Dios a bumabbaba a kas la kalapati ket um-umay kenkuana. Ket adtoy ti maysa a timek a manipud kadagiti langlangit a kununana: `Daytoy ti Anakko a dungdungoek, Isu a pakapnekak unay kenkuana.'"--Mateo 3:16, 17.

Kalpasan ti pannakaibukbok ti Espiritu Santo iti pannakabautisarna, ket impakdaar dagiti disipulo ti:

"Nasarakanmi ti Mesias [a no maipatarus, Cristo]."--Juan 1:41.

Ammo dagiti disipulo a ti sao a Hebreo a "Mesias" ken ti sao a Griego a "Cristo" ket agpada ti kaipapananna ket "ti maysa a napulotan."

Ni Lucas, maysa a disipulo ni Jesus, ket inrekordna ti petsa ti pannakapulot ni Jesus kas Mesias idi maika-sangapulo ket lima a tawen ti panagturay ni Tiberius Caesar (Lucas 3:1). Kadatayo ket daydiay ti tawen nga A.D. 27.

Nasurok pay a 500 a tawen sakbay ti iyuumay ni Jesus, ni mammadto Daniel ket impadtona a ni Jesus ket napulotan kas Mesias idi A.D. 27:

"Ket kalpasan ti innem a pulo ket dua a lawasna madadaelto ti napulotan, ket awanto ti mabati kenkuana: ket ti ili ti prinsipe nga umayto rakrakennanto ti ciudad ken ti santuario; ket ti panungpalanna maaramidto agraman ti maysa a layus, ket agingga iti kanibusanan maaramidto ti gubat; maikeddeng dagiti pannakalangalang."--Daniel 9:25.

Pito a lawas ken innem a pulo ket dua a lawas-amin-amin ket innem a pulo ket siam a lawas wenno 483 nga aldaw (7x69 - 483 nga aldaw).
Idiay simboliko a padto iti Biblia, tunggal aldaw ket kapada ti maysa a tawen (Ezequiel 4:6; Numeros 14:34), isu nga ti 483 nga aldaw ket kapada ti 483 a tawen. Impadto ni Daniel nga addanto dumteng a bilin tapno maisubli ken tarimaanen ti Jerusalem, ket eksakto a 483 a tawen kalpasan daytoy a bilin ket, rumuar ti Mesias.

Rimmuar kadi ni Jesus kas Mesias iti naibatang a tiempo? Inted ni Artaxerxes ti bilin a tarimaanen ti Jerusalem idi 457 B.C. (Ezra 7:7-26). Dagiti 483 a tawen ket nagleppas idi A.D. 27 (457 B.C. + A.D. 27 = 484). Ti bilin ket naited iti katingngaan iti 457 B.C. ket ni Cristo ket napulotan idi katingngaan iti A.D. 27, agpadada a sagkagudua iti tawen, isu a ti pudno a bilangna ket 483 a tawen). Idiay mismo naibatang a tiempo, idi A.D. 27, ni Jesus ket nagparang nga addaan iti daytoy a mensahe: "Ti tiempo ket dimtengan" (Marcos 1:15). Ti eksakto a pannakatungpal iti daytoy a padto ti Biblia ket makaawis a mangpaneknek a ni Jesus iti Nazareth ket pudno nga Isu iti Mesias, ti Dios nga immay naglasag.

Kasano kabayag a paneknekan ni Jesus ti kari?

"Ket mangaramidto iti maysa a nalagda a tulag kadagiti adu iti maysa a lawasna."--Daniel 9:27, umuna a paset.

No ipakattayo ti prinsipio iti aldaw-tawen, daytoy a "lawas" ket agbalin a pito a tawen. Isu nga iti pito a tawen-manipud A.D. 27 inggana A.D. 34-ni Jesus ket "kompirmaenna ti tulag," wenno ti kari nga intedna kenni Adan ken Eva kalpasanda iti nagbasol. Ti Dios ket nagaramid iti tulag, iti kari, nga isalakanna ti tao manipud iti basol babaen iti pannakatay iti maysa nga ibaonna tapno matay agpaay kadagiti basoltayo (Genesis 3:15).

Ania iti mapasamak iti katingngaan iti daytoy maikapito a pulo a lawas?

"Ket iti tengnga ti lawasna pasardengennanto ti sakrifisio ken daton."--Daniel 9:27, maudi a paset.

Ni Jesus ket nailansa idi A.D. 31, idiay "katingngaan iti daytoy a lawas." Idiay kanito iti pannakatay ni Cristo, pinisang ti Dios "ti kuritna ti templo…iti dua manipud ngato inggana baba" ( Mateo 27:51). Ti animal a sakrifisio a daton a ngan-nganin mabagsol a matay (simbolo ni Jesus, "a Kordero ti Dios") ket nakabulos manipud iti ima iti padi. Daytoy ket tanda a saanen a masapul ti Dios iti tao nga agidaton pay iti sakrifisio nga an-animal. Iti panangtungpalna iti padto inggana iti letra, "nileppasen ni Jesus" ti aniaman a pannakasapul iti mainayon pay a sakrifisio a maidaton. Manipud iti pannakatay ni Cristo, dagiti tao ket naaddaandan iti gundaay a makaasideg iti Dios saan a babaen kadagiti sakrifisio nga animal ken tattao a papadi, no diket babaen iti Mesias, ti Kordero ti Dios ken Nangato a Paditayo.

3. TI TALGED TI PANNAKAPAKAWAN KADAGTI BASOL

Babaen iti padto ni Daniel, apay a natay ni Jesus?

"Madadaelto ti napulotan."--Daniel 9:26.

Iti pannakatayna idiay krus, ni Jesus ket "naputed." Isu ket natay, "ngem saan nga agpaay iti bagina, saan a tapno bayadana ti dusa ti bukodna a basol, no diket tapno bayadanna ti dusa nga agpaay kadagiti basbasol iti entiro a lubong.

Kasanotayo a maammoan a pinakawanen ti Dios dagiti basoltayo?

"Nadiosan a kinalinteg, a magun-odan gapu iti pammati ken Jesu-Cristo, a maipaay kadagiti amin a mamati…. TA ISUDA AMIN NAGBASOLDA…. Idinto a maibilangda a NALINTEG nga awan ti baybayadna GAPU ITI PAMMATI ITI DARANA, tapno maiparangarang ti kinalintegna, ta gapu iti kinaanus ti Dios pinalabasna dagiti basbasol a naaramid idi;… ITI ADDA PAMMATINA KEN JESUS."--Roma 3:22-25.

Dagiti panglukat a punto kadagitoy a bersikulo ket: "datayo amin ket nagbasol," ngem gapu iti "parabur" ti Dios, "ket napaawanan iti basol" amin dagiti naaddaan iti "pammati" iti pannakabalin a nanglinis ti "dara" ni Cristo. No datayo ket naabsuelto, ideklara ti Dios a saantayo a nakabasol, ket ikkatenna ti rikna a nakabasol kadagiti nakalabasan a basbasoltayo. Ket ideklara ti Dios a datayo ket nalinteg: "ti kinalinteg a naggapu iti Dios ket aggapu iti pammati ken Cristo-Jesus.

Amintayo a nabannogen a makidangdangadang tapno agbalin a naimbag, tapno masukat iti bukodtayo, ket makasarak iti pudno a panaginana iti naparabur a panangawat ni Cristo. Ikarkarina nga: "Umaykayo kaniak dakayo amin nga agrigrigat ken madagdagsenan, ta paginanaenkayto" (Mateo 11:28). Amintayo a madagdagsenan gapu kadagiti piglat iti napalabastayo ken gapu iti naut-ot a rikna iti kinakurang ken pannakaibabain, ket makasarak iti pudno a talna ken pannakaimbag ken Cristo.

4. TI TIEMPO TI PANANGRUGI ITI PANANGOKOM

Idiay maikawalo a kapitulo iti Daniel ket impakita iti maysa nga anghel iti mammadto iti dakkel a buya maipapan iti masangoanan. Nakita ni Daniel iti (1) maysa a bulog a karnero, (2) ti maysa a bulog a kalding, ken (3) manipud iti maysa a sara iti kalding, ket "rimuar iti sabali a sara a ti rugina ket bassit ngem dimakkel a napigsa" (Daniel 9:8, 9); simbolo nga itakderanna ti (1) Medo-Persia, (2) Grecia, ken (3) Roma (Daniel 8:1-12, 20-26).

Ania ti maikapat a paset daytoy a padto?

"Kasanonto ti kabayag ti sirmata a maipapan iti di agsarday a daton a mapuuran, ket ti salungasing a mangpalangalang…. Ket isu kinunana kaniak, Aginggana iti dua ribu ket tallo gasut a malem ken bigat; kalpasanna ti santuario madalusanto."--Daniel 8:13, 14.

Ni Daniel ket natalimudaw sakbay a maipalawag ti anghel ti paset iti 2,300 nga aldaw iti padto, ket ti maikawalo a kapitulo ket nagleppas nga awan iti interpretasionna daytoy. Ngem iti udina ket nagparang manen ti anghel ket imbagana iti:

"Ket insurunak, ket nagsao kaniak a kinunana, O Daniel, ita rimuarak, tapno ikkanka iti sirib ken pannakaawat. Pitopulo a lawas nakaikeddengda kadagiti tattaom ken iti nasantoan nga ilim a pangleppas iti salungasing, ken panangaramid iti panungpalan dagiti basbasol."--Daniel 9:22-24.

Dagiti 2,300 nga aldaw ket siempre, 2,300 a tawen, tunggal aldaw ket itakderanna ti maysa a tawen (Ezequiel 4:6). Pitopulo a lawas, wenno 490 a tawen, ket saklawenna ti umuna a paset iti at-atiddog a panawen iti 2,300 a tawen. Agpada dagitoy a tiempo iti panawen ket nangrugida idi 456 B.C. idi ti Persia ket nangited iti bilin 'tapno maisubli ken matarimaan ti Jerusalem." No ikissay dagiti 490 a tawen manipud iti 2,300 a tawen ket agbalin nga 1,810. No inayon dagitoy 1,810 a tawen iti A.D. 34, idi nagleppas dagiti 490 a tawen, ket ipannatayo iti A.D. 1844.

5. TI NAILANGITAN A SANTUARIO KET NADALUSAN-PANANGOKOM

Imbaga ti anghel kenni Daniel nga inton 1844, iti panaggibus dagiti 2,300 a tawen, "ti santuario ket madalusan" (Daniel 8:14). Ngem ania iti kayat a saoen daytoy? Manipud idi A.D. 70 idi dinadael dagiti Romano ti templo idiay Jerusalem, ti ili ti Dios ket awanen iti temploda ditoy daga. Isu a ti snatuario a madalusan, a nangrugi idi 1844, ket ti nailangitan a santuario a nakaituladan iti naidagaan a santuario.

Ita ngarud, ania iti kayat a saoen ti pannakalinis iti nailangitan a santuario? Dayta lakay nga Israel ket awaganda ti aldaw ti panaglinis iti naidagaan a santuario a Yom Kippur, ti Aldaw iti Panangsubbot, wenno Panagbayad. Daytoy ket ti kinapunona ket aldaw iti panangokom.

Kas iti intayo nadiskobre idiay Guide 12, ti trabayo ni Cristo agpaay kadatayo iti santuario ket adda dua a pasetna: (1) Ti inaldaw a panagdaton a nakasentor iti miniterio iti padi idiay umuna a kuarto ti santuario, idiay nasantoan a lugar. (2) Ti tinawen a sakrifisio a nakasentro iti ministerio iti Nangato a Padi idiay Maikadua a Kuarto ti santuario, idiay Nasantoan Unay a Lugar (Levitico 16).

Idiay naidagaan a santuario, dagiti tao ket ipudpudnoda dagiti inaldaw a basolda, ket ti dara dagiti naidaton nga animal ket maiparsiak idiay suli iti altar, kalpasanna maiyalis iti kasantoan a lugar (Levitico 4 ken 6). Isu nga idiay simbolo, iit inaldaw dagiti naikonfesar a basbasol ket maipan iti santuario ket naurnongda idiay.

Ket iti tunggal tawen, iti Aldaw iti Panangsubbot, ti santuario ket madalusan manipud kadagiti amin a basbasol a naikonfesar kabayatan iti naglabas a maysa a tawen (Levitico 16). Tapno naaramid daytoy a panaglinis, ti Nangato a Padi ket mangaramid iti naisangsangayan a panagidaton iti napili a kalding. Ipanna ngarud ti darana iti Kasasantoan a Lugar, ket iparsiakna daytoy a mangdalus a dara iti sangoanan iti kalub a mangsubbot tapno ipakitana a ti dara ni Jesus, ti umay a mangsubbot, ket bayadanna ti dusa nga agpaay iti basol. Ket ngarud, ti Nangato a Padi ket simbolikal nga ikkatenna dagiti naipudno a basbasol manipud iti santuario ket ikabilna iti rabaw iti ulo iti sabali a kalding, a maiyabog a mapan iti let-ang tapno matay (Levitico 16:20-22).

Daytoy a seremonia iti tinawen nga Aldaw iti Panangsubbot ket linisanna ti santuario manipud iti basol. Ituring dagiti tao daytoy a kas aldaw iti panangokom gapu ta dagiti saan nagipudno kadagiti basolda ket maituring a nakillo ket "maisinada manipud iti ili ti Dios (Levitico 23:29).

Ti naisimboloan nga inaramid ti Nangato a Padi maminsan iti makatawen, ket inaramid ni Jesus daytoy iti naminsan nga agpaay iti amin a tiempo kas Nangato a Paditayo (Hebreo 9:6-12). Idiay dakkel nga aldaw iti panangokom ket ikkatenna manipud iti santuario dagiti naipudno a basol dagiti amin nga immawat Kenkuana kas mangisalakanda. No impudnotayon dagiti basoltayo, ket agnanayonen nga ikkatenna ti record dagiti basoltayo idiay a tiempo (Aramid 3:19). Daytoy a ministeiro ket isu iti aramid a panangokom ni Jesus a nangrugi idi 1844.

Idi 1844 idi ti oras ti panangokom ti Dios ket nangrugi idiay langit, ti mensahe a maipapan iti oras iti panangokom ket nangrugi met a maikasaba ditoy entrio a lubong (Apocalipsis 14:6-7). Ti masangoanan a Discover Guide ket iyadalna daytoy a mensahe.

6. PANANGSANGOM ITI REKORD TI BIAGMO ITI PANANGOKOM

Nanipud pay idi 1844, ni Cristo kas Okom ket im-imbestigaannan ti record ti tunggal tao a nagbiag manipud pay idi tapno maammoan no sinno dagiti maisalakan inton umay ni Jesus. Kas Okomtayo, ni Jesus ket "punasenna" amin dagiti basol dagiti nalinteg manipud iti record iti biagda idiay langit (Aramid 3:19).

No ti naganmo ket dumtengen idiay panangokom, nalaka laingen a sangoen ti record iti biagmo-no inawatmo ni Cristo a kas kasukatmo. Ket no ti pannakaokom dagiti nalinteg ket nalpasen, ni Jesus ket agsublin ditoy daga tapno gungunaanna ida (Apocalipsis 22:12, 14).

Nakasaganaka kadin iti iyuumay ni Jesus? Wenno adda banag nga ilemlemmengmo Kenkuana? Addaanka kadi iti silulukat ken pudno a relasion iti Maysa a nagkari:

"No ipudnotayo dagiti basbasoltayo, isu ti mapagtalkan ken nalinteg a mamakawan kadagiti basbasoltayo, ken mangagas kadatayo iti amin a kinakillo."--1 Juan 1:9.

Ti panagipudno ket simpli a ti kayatna a saoen ket makitunos a sangoen dagiti basoltayo, awatentayo ti pammakawan ti Dios, ken bigbigentayo ti pannakasapultayo iti pannakabalinna ken ti paraburna.

Kabayatan a bisbisitaenna ti maysa a pagbaludan idiay Potsdam, ni Ari Frederick William I ket dinengngegna dagiti mano a bilang iti dawat a pakaasi agpaay iti pannakapakawan. Amin dagiti balud ket nagsapatada a dagiti saan a patas nga ok-okom , ulbod a saksaksi; wenno dagiti awan prinsipioda nga ab-abogado ket isuda iti responsabli iti pannakaipupokda manipud selda inggana iti dadduma a seldada ket agpapada iti estoriada. Ngem idiay maysa a selda, ti maysa a balud ket saan nga agtagtagari. Nasdaawan, ni Ari Frederick ket inangawna daytoy a balud, "Ti pagarupko sika ket awan met iti basolna."

"Saan, Apo" kuna ti lalaki, "nakabasolak ket talaga a pakaikariak amin dagitoy a naganabko."

Ti ari ket tinaliawna nga inayaban ti guardia sa nagkuna iti napigsa, "Umayka ditoy ket paruarem a daras daytoy a dakes a tao, sakbay a rungsotenna dagitoy nasayaat a grupo dagiti awan basolna a tattao."
Kasanotayo a pagsaganaan ti panangokom? Kasanotayo nga agsagana agpaay iti iyuumay ni Cristo? Simpli laeng. Babaen iti napudno a panangibaga iti kinapudno: Maikariak a talaga a madusa iti patay gapu kadagiti basolko, ngem adda maysa a nangala iti lugarko ket inikkannak iti nakaskasdaaw a pannakapakawan.

Mangaramid iti kari itatta mismo nga uray ania iti mapasamak, ket aywanam ti relasionmo kenni Cristo a napudno a mata-ken-mata, ken puso-ken-puso a napudno.