Ti Agnanayon nga Adda a Mangisalakan

Idi ti maysa ng ubing idiay Scotland a managan Pedro ket natawtaw iti nasamek a karuotan iti nabaybay-an a daga iti maysa a nasipnget a rabii, inawagan ti Dios ti naganna, "Pedro." Idi ti nailangitan a timek ket immawag ulit, ni Pedro ket simmardeng a nagna idiay dalanna, nagdumog a kimmita iti sangona, ket natakkuatanna a maysa laengen nga addang ket matnag isun iti nauneg a kali a nagkalian iti batbato.

Saan kadi a nakaskasdaaw no ti tunggal maysa kadatayo ket mangngegna nga aw-awagan ti Dios ti naganna? Saan kadi a nagtan-ok no Isu ket nadekket a kaduatayo-no makatugawtayo nga agkakadua ken makapagiinnistoria iti napaut maipapan kadagiti pannakidangadangtayo ken dagiti planotayo?

1. AWAN PATINGGANA A PAMAYAN ITI IYAASIDEG KEN JESUS

Patiem wenno saan, a makaasidegtayo a nakarkaro kenni Jesus ita ngem no Isu ket pudno nga adda ditoy lubong ita a kaduatayo a kas makita a tao. No Isu ket adda a silalasag ditoy lugartayo ket siempore nagimbag unay, ngem panunoten dagiti pangen a tattao nga agsisinnelsel nga umasideg Kenkuana tapno makiadda Isu. Panunoten dagiti dawat idi tiempona. Nasayaaten kadatayo no maaddaantayo iti uray sumagmamano laeng a minuto a direkta a makasaritatayo Isu iti entiro a biagtayo.

Kalikagum ni Jesus iti maaddaan iti personal a relasion iti tunggal maysa kadatayo. Daytoy ti maysa a rason no apay a pinanawanna daytoy lubong agpaay iti maysa a naisangsangayan a ministerio idiay langit a mangipalubos Kenkuana a makaasideg iti tunggal maysa kadatayo iti inaldaw. Gapu ta ni Jesus ket saan a limitado iti maysa laeng a lugar kas idi kaaddana ditoy daga, babaen iti Espiritu Santo, Isu ket asidegen tapno idalanna ti biag ti tunggal tao nga agduyos a sumurot Knekuana.
Ania ti makapapigsa a kari ti inted ni Jesus sakbay ti iyuulina idiay Langit?

"ADDAAK KADAKAYO NGA AGNANAYON agingga iti panungpalan ti lubong."--Mateo 28:20.

Ania iti ar-aramiden ni Jesus idiay langit a mangaramid Kenkuana a posibli a "kanayon a kaduatayo"?

"Idinto ngarud ta ADDAANTAYO TI MAYSA A DAKKEL A KANGATOAN A PADI, a limmabas kadagiti langlangit, ni JESUS, NGA ANAK TI DIOS, salimetmetantayo koma a sititibker ti pammatitayo. Ta awan kadatayo ti maysa a kangatoan a padi a di makabalin a mangrikna kadagiti kinalap-ittayo, no di ti maysa a nasulisog iti isuamin, a kas kadatayo ngem saan a nagbasol. Umadnaitay ngarud a sitatalged iti trono ti parabur awatentayo ti asi ken makasaraktayo ti parabur; a tumulong kadatayo iti aldaw ti pannakasapul."--Hebreo 4:14-16.

Paliiwen dagiti kinatalged a ni Jesus ket kukuatayo a kas personal a representantetayo idiay langit: "Nasulisog iti amin a pamayan, kas met kadatayo." "Makiramraman kadagiti kinakapuytayo." "Tumulong kadatayo iti tiempo iti pannakasapultayo."

Agsipud ta ni Jesus ket Nangato a Paditayo, saantayo a naisina manipud iti adayo a langit; ni Jesus ket maiyasidegnatayo idiay mismo sangoanan ti Dios. Isu a saan a nakaskasdaaw a pakisarsaritaannatayo a "mapantayo umasideg iti trono iti parabur nga addaan iti kompiansa."

Ania iti lugar a nagianan ni Jesus idiay Langit?

"Ngem daytoy idi indatonna timaymaysa a daton gapu kadagiti basbasol a maipaay iti agnanayonen, nagtugaw ITI MAKANAWAN TI DIOS."--Hebreo 10:12.

Ti sibibiag a Cristo-maysa a nakaawat-ket isu iti personal a representantetayo iti trono "idiay makanawan nga ima ti Dios."
Kasano a ti biag ni Jesus ket nangisagana Kenkuana tapno agbalin Isu a paditayo?

"Gapuna maipaay idi nga iti isu-amin mayasping koma kadagiti kakabsatna, tapno isu makapagbalin koma a maysa a kangatoan a padi, manangngaasi ken matalek, iti maipapan iti Dios, tapno ikarona dagiti basbasol dagiti umili. Ta gapu iti panagsagabana met laeng ti pannakasulisog, mabalinna a badangan dagiti masulisog."--Hebreo 2:17, 18.

Ti "kabsattayo" a nakibingay iti kinataotayo ken "nasulisog" a kas met kadatayo, ket isun iti Nangato a Paditayo idiay makanawan nga ima ti Dios. "Naaramid a kasla" kadatayo, isu nga ammona iti daldallasatentayo. Isu ket nagbisin, nauwwawan, ken nagkapsut. Nariknana ti pannakasapul iti asi ken pannakaawat.

Ngem nangruna amin, ni Jesus ket kaulipikado nga agbalin a Nangato a Paditayo agsipudta isu ket natay "tapno mangaramid iti panangsubbot" agpaay kadagiti basoltayo. Binayadanna ti gated nga agpaay kadagiti basoltayo babaen iti pannakatayna iti lugartayo. Daytoy ti Ebanghelio, ti Naimbag a Damag nga agpaay iti amin a tao adinnoman iti ayanda ken agpaay iti amin a panawen.

Maysa kadagiti direktor iti pagadalan iti Biblia ket imbingayna daytoy a kapadasan:

"Idi ti kaubingan nga anakmi a babai ket agtawen iti tallo, naipitna ti maysa a ramayna iti dikulpi a tugaw, ket natukkol ti tulangna. Idi itartaraymi isu idiay ospital, ti inyarga gapu iti ut-otna ket pudno a timmarus kadagiti pusomi ket nakasagid a pirmi iti rikna iti maysa nga anakmi nga agtawen iti lima. Saanko kaanoman a malipatan dagiti saona kalpasan a maagasan ti doktor ti ramay ni adingna. Insaennekna nga inkuna, "Oh, Daddy, ti ramayko laengen koma!"

Idi dagiti amin a tao ket rinumek iti basol ken naukoman nga agnananyon a matay, kinuna ni Jesus, "Oh, Ama, Siak la koman." Ket inted ti Ama kenni Jesus ti kalikagumna iti krus. Ti Mangisalakantayo ket napadas ti tunggal sakit a sinagabatayon-ken ad-adu pay!

2. TI EBANGHELIO ITI DAAN A TULAG

Idi ti ili ti Israel ket nagkampoda iti puon iti bantay a Sinai, binilinan ti Dios ni Moises a mangaramid iti santuario a mabalin a bitbiten wenno mabalin a maiyalis-alis agpaay iti modelo a "kas maiyannurot iti modelo a naipakita kenkuana [Moises] iti bantay." (Exodo 25:40). Kalpasan iti ngan-ngani 500 a tawen, ti natan-ok a bato a templo nga inaramid ni Ari Solomon iti nangsukat iti maiyalis-alis a santuario. Ket daytoy a bato a templo ket naaramid a kapada met laeng iti isu met laeng a plano kas ti naiyalis-alis a santuwario.

Idi inted ti Dios kenni Moises dagiti direktiba nga agpaay iti panangitakder iti santuwario, ania itipudno a panggep nga adda iti panunotna?

"Ket yaramidandak koma iti maysa a santuario, TAPNO AGNAEDAK ITI NAGBABAETANDA."--Exodo 25:8.

Ti basol ket nangaramid iti nakabutbuteng a panagsina iti tao ken iti Mammarsuana. Ti santuario ket isu iti pamayan ti Dios tapno ipakitana no kasano nga Isu ket makapagtaeng manen ditoy tingngatayo. Ti santuario, ken ti udina ket ti templo, ket nagbalin a sentro iti narelihionan a panagbiag ken panagdayaw iti tiempo iti Daan a Tulag. Tunggal agsapa ken ti malem dagiti tao ket makapaguurnongda iti aglikmot iti santuario ket makaasidegda iti Dios babaen iti kararag (Lucas 1:9, 10), a tagtagikuaenda ti kari ti Dios: "Ket ikabilkonto iti sango ti abbong nga adda iti abay ti lakasa ti pamaneknek, iti sango ti tugaw ti kaasi nga adda iti rabaw ti pamaneknek, a pangsarakakto kenka" (Exodo 30:6).

Ti Daan a Tulag ket isursurona ti isu met laeng nga ebanghelio iti pannakaisalakan a kas met iti Baro a Tulag. Parehoda nga ipakpakita ni Jesus a matmatay agpaay kadatayo ken agserserbi kadatayo kas Nangato a Paditayo iti nailangitan a santuario.

3. TI MINISTERIO NI JESUS AGPAAY KADATAYO KET NAIPAKAAMMO ITI SANTUARIO

Ti santuario ken dagiti serbisiona ket ipakpakitana no ania ti ar-aramiden ni Jesus ita idiay tTemplo idiay langit, ken no ania iti ar-araramidenna ita ditoy daga tapno parang-ayenna ket idalanna ti tunggal maysa kadatayo ditoy inaldaw a panagbiagtayo.

Kasdi met laeng a ti naidagaan a santuario ket naitulad iti santuario idiay langit, daytoy ket ipakitana ti nailangitan a a santuario a pagserserbian ita ni Jesus. Ti Exodo 25-40 ket iladawanna dagiti serbisio ken seremonia idiay santuario idiay let-ang a detalyado. Ti ababa a salaysay dagiti arwaten iti santuario ket Makita idiay Baro a Tulag:

"Ket pudno a daydi immuna a tulag adda met dagiti pagalagadanna iti panagserbi iti Dios, ken iti santuariona a naidagaan…. Daydi immune a paggianan ti kandelero, ken ti lamisaan, ti tinapay a sidadaya; isu a managan ti santo a disso. Ket iti labes ti maikadua nga abbong adda daydi tabernakulo a managan ti kasasantoan dagiti nasantoan a disso; A naggianan daydi incensario a balitok ken ti lakasa ti tulag, a nakalupkupan amin nga aglikmot iti balitok, a naggianan daydi banga a balitok a a nakaikkan daydi mana, ken daydi nagsabong a sarukod ni Aaron, ken dagiti taptapi ti tulag; Ken iti rabawna, dagiti querubin a nadayag, a manglinlinung idi tugaw ti asi."--Hebreo 9:1-5.

Ti santuario ket adda dua a kuartona, ti nasantoan a lugar ken ti kasantoan unay a lugar. Ti patio a solar ket naikabil iti sangoanan iti templo. Idiay patio ket adda idiay ti altar a tanso a pagidatdatonan dagiti padi dagiti daton, ken ti palanggana a pagbugbuguanda.

Dagiti sakrifisio a maidatdaton idiay altar a tanso ket sumimsimbolo kenni Jesus, a babaen iti pannakatayna idiay krus ket nagblain a "Kordero ti Dios, a mangik-ikkat iti basol ti lubong" (Juan 1:29). No ti agbabbabawi a managbasol ket mapan idiay altar a tugotna ti datonna ket ipudnona dagiti basolna, isu ket makaawat iti pannakapakawan ken pannakalinis. Iti kasta met laeng a pamayan, ti managbasol ita a tiempo ket makagun-od iti pannakapakawan ken pannakalinis babaen iti dara ni Jesus (1 Juan 1:9).

Iti umuna a kuarto wenno idiay Nasantoan a Lugar, ti pito iti sangana a kandelero ket agtultuloy a sumsumged, itaktakderanna ni Jesus a kas ti saan a maiddep a "lawag ti lubong" (Juan 8:12). Ti lamisaan iti naidaton a tinapay ket simbaloanna ti panangbussogna kadagiti pisikal ken naespiritualan a panagbisintayo kas ti kanayon nga adda a "Tinapay iti Biag" (Juan 6:35). Ti nabalitokan nga altar iti insienso ket itakderanna ti managkararag a ministerio ni Jesus agpaay kadatayo idiay Mismo a sangoanan ti Dios (Apocalipsis 8:3, 4).

Ti maikadua a kuarto, wenno Kasasantoan a Lugar ket linaonna ti nabalitokan a lakasa iti tulag. Simboloanna daytoy ti trono ti Dios. Ti mangsubbot a kalubna, wenno ti tugaw ti kaasi, ket itakderanna ti panangiballaet ni Cristo, a Nangato a Paditayo, a mangibalballaet agpaay kadagiti napno iti basol a tattao a nangdadael iti moral a paglintegan ti Dios. Ti dua a tapyas ti bato a nangsuratan ti Dios kadagiti Sangapulo a Bilin ket addada iti siruk iti tugaw ti kaasi. Dagiti balitok a kerubin iti dayag ket addada iti rabaw iti tugaw ti kaasi iti agsinnumbangir a murdong iti lakasa. Ti nagloriaan a lawag ket aglawlawag iti nagbaetan dagitoy dua a kerubin, simbolo iti presensia Mismo iti Dios.

Ti kurtina ket lengdanna ti nasantoan a lugar manipud iti pannakakita dagiti tao kas dagiti padi agserserbida kadakuada iti patio. Ti maikadua a a kurtina iti sangoanan iti nasantoan unay a lugar ket serraanna daytoy makin-uneg a kuarto manipud kadagiti padi a sumsumrek iti umuna a kuarto iti santuario.

Idi ni Jesus ket natay idiay krus, ania iti naaramid idiay kurtina?

"Ket adtoy ti abbong ti Templo napigis a nagkaddua nanipud ngato agingga iti baba."--Mateo 27:51.

Ti Kasasantoan a Lugar ket naluktan idi ni Jesus ket natay. Kalpasan iti pannakatay ni Jesus, awanen iti kurtina a bumallaet iti nagbaetan iti nasanto a Dios ken ti napudno a mammati; ni Jesus a Nanagato a Paditayo ket iyasidegnatayo idiay mismo sangoanan iti Dios (Hebreo 10:19-22). Mabalintayon iti makaasideg iti trono iti langit gaputa ni Jesus a Nangato a Paditayo ket adda idiay makanawan nga ima ti Dios. Pinagbalin ni Jesus a makaasidegtayon idiay sangoanan iti Dios-idiay naayat a puso ti Ama. Isu a "mapantayo nga umasideg."

4. TI PANNAKAIPAKAAMMO KENNI CRISTO A MATMATAY TAPNO ISALAKANNATAYO

No kas ti naidagaan a santuario ket nagserbi a kas maysa a bassit a ladawan a mangipadakkel iti nailangitan a santuario a pagserserbian ita ni Jesus agpaay kadatayo, dagiti met serbisio a maar-aramid ditoy naidagaan a santuario ket "kopya ken anniniwan iti no ania iti adda idiay langit" (Hebreio 8:5). Ngem adda iti dakkel a naggidiatanda: Dagiti padi a nagserbi idiay templo ditoy daga ket saanda a mabalin iti mangpakawan iti basol, ngem idiay krus ni Jesus ket "nagpakita a naminsan agpaay kadagiti amin iti panaggibus iti panawen tapno ikkatenna iti basol babaen iti panangidatonna iti bagina met laeng" (Hebreo 9:26).

Ti libro ti Levitico ti Daan a Tulag, ket iladawanna a detalyado dagiti serbisio a maar-aramid idiay santuario. Dagti seremonia a ritos ket nagudua iti dua a paset: dagiti inaldaw a serbisio ken dagiti tinawen a serbisio. (Ti Guide 13 ket ipalawagna dagiti tinawen a serbisio).

Iti inaldaw a serbisio, dagti padi ket indatonda dagiti sakrifisio nga agpaay iti tunggal tao ken agpaay ti entiro a kongregasion. No ti tao ket nagbasol, isu ket mangipan iti awan pakapilawana nga animal kas daton agpaay iti basol,"ipatayna ti imana iti ulo iti daton nga agpaay iti basol ken ti panangipatay kadagiti ima. Daytoy ket itakderanna ti panangala ni Cristo kadagiti basoltayo idiay kalbario; ti maysa nga awan basolna ket nagbalin a "basol agpaay kadatayo" (2 Corinto 5:21). Ti naidaton nga animal ket masapul a mapapatay ket ti darana ket maibukbok agsipudta itudona daytoy iti masangoanan ti nangina unay a dusa a sinagaba ni Cristo idiay krus.

5. APAY A TI DARA?

"Ket no awan ti dara a maiparukpok, awan ti pannakasubbot" (Hebreo 9:22).

No ania iti napasamak iti santuario iti Daan a Tulag ket itudtudona iti masangoanan ti maysa a dakkel a panangisalakan nga inaramid ni Cristo. Agsipud ta Isu ket natay agpaay kadagiti basoltayo, Isu ket simrek iti nasantoan a luglugar "naminsan agpaay iti amin babaen iti bukodna a dara, kasdi met laeng a nagun-odna ti agnanayon a pannakasubbot" agpaay kadatayo (bersikulo 12). Idi ti dara ni Jesus ket naibukbok idiay krus agpaay kadagiti basoltayo, "ti kurtina ti templo (idiay Jerusalem) ket napisang a nagudua manipud ngato inggana iti baba" (Mateo 27:51). Gapu iti sakrifisio ni Jesus idiay krus, dagiti daton nga an-animal ket saanen a masapul.

Idi imbukbok ni Jesus ti darana manipud idiay krus, ket idatdatonna ti naan-anay a natulnog a biagna kas kasukat nga agpaay kadagiti kinakapuytayo. Idi ti Ama ken ti Anak ket nagsinada idiay kalbario, ti Ama ket timmallikod nga immadayo gapu a silaladingit, ket ti Anak ket natay gapu iti pannakauppapay. Ti Dios Anak ket simrek ditoy pakasaritaan tapno alaenna iti Bagina dagiti naan-anay a resulta iti basol ken tapno ipakitana no kasano a pudno a nakabutbuteng iti agaramid iti dakes. Mabalinnan a pakawanen dagiti managbasol a saannan nga ikkan iti gated iti basol. Ni Cristo ket nagaramid iti "talna babaen iti pannakaibukbuok ti darana idiay krus" (Colosas 1:20).

6. TI PANNAKAIPAKAAMMO KENNI JESUS A SIBIBIAG TAPNO ISALAKANNATAYO

Ania iti inaldaw a trabaho ni Jesus idiay nailangitan a templo?

"Gapuna, mabalinna met nga isalakan agingga iti awan pagkuranganna dagiti umasideg iti Dios gapu kenkuana, ta isu agbiag nga agnanayon tapno ibabaetna ida."--Hebreo 7:25.

Ni Jesus ket "sibibiag" ita tapno ipresentana ti darana, ti sakrifisiona, agpaay kadatayo. Isu ket nagaget nga agar-aramid ita tapno isalakanna ti tunggal tao manipud iti resulta iti basol. Dagiti dadduma ket kamali iti panangipagarupda a, ni Jesus kas Mangiballaet, ket adda idiay langit nga agpakpakaasi iti sangoanan iti Dios a mangpakawan kadatayo. Ti kinapudnona, ti Dios Mismo iti siraragsak nga immawat iti sakrifisio ti Anakna agpaay kadatayo.

Kas Nangato a Paditayo idiay langit, ni Cristo ket agpakpakaasi met kadagiti tao. Isu ket agar-aramid tapno tulunganna dagti saan a mangikaskaso tapno kitaenda iti maikadua ti parabur, tapno tulunganna dagiti managbasol nga awatenda ti namnama ti ebanghelio, ken tapno tulunganna dagiti mammati a makasarakda iti ad-adu pay a kinabaknang iti Sao ti Dios ken ad-adu pay a pannakabalin iti kararag. Ni Jesus ket damdamilienna dagiti biagtayo a maiyannurot iti bilbilin ti Dios ken tumulong kadatayo a parang-ayen dagiti kababalintayo a makatakder kadagiti suot ti tiempo.

Inted ti Dios ti biagna agpaay iti tunggal tao a nagbiag ditoy lubong. Ket ita, kas Nangato a Padi wenno Mangibabaet, "Isu ket kanayon a sibibiag" tapno idalanna dagiti tao nga awatenda ti pannakatayna agpaay kadagiti basolda. Nupay pinakipagkapiana ti entiro a nagbasol a lubong Kenkuana idiay krus, ket saannatayo pay laeng a maisalakan no saantayo nga awaten ti paraburna. Dagiti tao ket mapukawda, saan a gapu ta managbasolda, no diket gaputa saanda nga inawat ti pammakawan nga idasdasar ni Jesus.

Dinadael ti basol ti nadikket a relasion a ragragsaken idi ni Adan ken ni Eva kenni Apo Dios. Ngem ni Jesus, kas Kordero ti Dios ket natay tapno ibulosna ti amin a tao manipud iti basol ken tapno isublina daytoy a napukaw a relasion. Nadiskobrem kadin Isu a kas Nangato a Padim, ti maysa a sibibiag nga agnanayon tapno taginayonenna dayta a relasion a nadikket ken naregta?

Ti nasakrifisio a pannakatay ni Jesus ket pudno a naisangsangayan unay. Ti nailangitan a ministerio ni Jesus ket saan a maparisan. Ni laeng Cristo iti makaiyasideg iti Dios ditoy sibaytayo. Ni Cristo laeng iti makaaramid a possible a ti Espiritu Santo ket pudno a makapagtaeng ditoy pusotayo. Pinaatiananna ti Bagina tapno maaramidnatayo a napunno. Pakaikarianna met iti kasta met laeng a panangipateg manipud kadatayo. Awatentayo Isu a naan-anay a kas Mangisalakantayo ken Apo dagiti biagtayo.