Ti Nakaskasdaaw A Pannakabalin ti Biagko

Idi 1929 ni Frank Morris ket naglugan iti bapor nga agturong idiay Switzerland. Medio nabayagnan a segseggaan daytoy a panagbiahe. Ngem daytoy ket nagbalin a nakababain a kapadasan. Ti maysa a tagaaaywan a naibatang kenkuana ket ipuppupokna ni Frank idiay kuartona iti tunggal rabii. Kalpasan iti napardas a pammigat, ni Frank ket maka-ehersisio bassit, ngem mariknana a kalokoan diay isu ket maawis idiay ayan dagiti kama, kas man la animal nga adda talina. Sa pinagtugaw ti taga-aywan ni Frank iti tugaw a pagidadangan. No makasabat isu iti mannakigaggyem a pasahero a mangawis kenkuana nga agpasiar, ti taga-aywan ket madi, nga ibagana masapul a kanayon isu a nakabantay kenkuana.

Ni Frank ket nataenganen nga addaan iti normal a panagayat ken panagkalikagum iti maysa a nataengan. Ngem isu ket bulag met. Ipagarup ti taga-aywan a saanna a kabaelan nga aywanan ti bagina. Ni Frank ket natrato a kasla maysa a kahon a masapul nga aw-awiten a kanayon.
Ngem idiay Switzerland, ti biag ni Frank ket nadrama a nabaliwan. Kabayatan iti kinaaddana idiay, naammoanna iti maipapan kadagiti aso a nasursuroan tapno idalanda dagiti bulag. Idi nagsulbi isu idiay America, nangitugot isu iti German shepherd nga aso a managan Buddy, ket ni Frank ket nangrugin a makakita iti mata, nga itatta ket maysa a panglubungan nga organisasion.

Itattan, ni Frank kaduana ni Buddy idiay sibayna ket makapanen iti uray adinno, aniaman a tiempo, a kakuyog ti uray sinno. Ti udina ket waya-waya met laengen isu. Kabayatan iti maysa a demonstrasion kadagiti maysa a grupo dagiti reporter idiay maysa a kalsada a pagballasiwan nga adu iti agtataray a luglugan idiay ciudad ti New York, ni Buddy ket indalanna a nalaing ti amona iti panagballasiwna manipud maysa a linia nga apan iti bangir bayat a bumanesbes dagiti lugan. Gapu ta nagtalkanna ni Buddy, ni Frank ket nalaka laeng a nakaballasiw. Dagiti nakakita a reporter ket marigatanda pay; ti maysa ket naglugan pay iti taxi tapno makaballasiw.
Idiay sumaruno a sumagmamano a panid ket maadaltayo ti maipapan iti Espiritu Santo, maysa a mangidalan a kalikagumna nga ikabiltayo dagiti biagtayo iti im-imana. Amintayo ket adda sakitna babaen iti isu met laeng a kababalin ti tao, ti isu met laeng a pannakabulsek maipapan idiay no ania iti pudno a napateg unay. Ti biag ket lablabasannatayo iti napardas a panagtaray a masansan a masarakantayo dagti bagitayo nga agkakapsut imbes a mapan idiay uray adinno. Laeng, datayo agmadmadi tapno italektayo dagiti biagtayo a naan-anay Kenkuana a mangidalan kadatayo. Ngem ti pannakadiskobre nga agur-uray tunggal maysa kadatayo ket daytoy: masarakantayo ti pudno a pannakawayawaya ken pannakabalin babaen iti panagdependetayo iti Espiritu Santo a mangidalan kadatayo ti entiro a panagbiagtayo.

1. REPRESENTANTE NI CRISTO DITOY LUBONG

Idi ni Cristo ket ngan-nganin umuli idiay langit, inikkanna iti kari dagiti adalanna iti sagut nga awan iti kantidadna:

"Nupay kasta ibagak kadakayo ti pudno: Maipaay kadakayo a mapanak: ta no diak mapan, ti MANANGLIWLIWA dinto umay kadakayo: ngem no mapanak, ibaonkonto kadakayo…. Ngem, inton umay daydiay, ti ESPIRITU TI KINAPUDNO: IDALANNAKAYTO iti amin a kinapudno…. ISU IDAYDAYAWNAKTO, Ta mangalanto iti kukuak, ket ipakaammonanto kadakayo."--Juan 16:7, 13, 14.

Idiay nailangitan a plano, maapul ni Jesus iti agsubli diay langit kas representantetayo idiay sangoanan ti Dios (Hebreo 9:24). Nupay ti nailansa nga Apotayo ket irepresentarnatayo idiay langit, addaantayo pay iti Espiritu Santo kas tagabalakadtayo ken mangidalan kadatayo ditoy daga mismo. Isu iti direkta a representante ni Jesus.

Kabayatan iti kinaaddana ditoy, ni Jesus ket nagserbi idiay inggana iti maaramid ti bagi ti tao, ket saan a mabalin nga adda isu iti amin a lugar. Ngem ti Espiritu Santo ket awan iti kasdiay a limitasionna; mabalinna iti agserbi kas personal a taga balakad ken mangidalan kadagiti saan a mabilang a tattao iti adu a luglugar nga aggigiddan. Sungsungbatan ni Jesus dagiti kasapulantayo babaen iti Espiritu Santo.

2. SINNO KADI TI ESPIRITU SANTO?

Kaaduanna kadatayo ket makisarita iti Dios Ama no mapanunottayo ti kaimbagan nga agtaraken ken mangaywan a nagannak nga ammotayo. Ket nailadawantayo ni Jesus nga Anak, gaputa nakipagtaeng Isu kadatayo kas maysa a tao, ngem ti Espiritu Santo ket narigrigat nga iladawan ken pakikaduaan. Awan iti tao a nalakatayo a pangiparisan. Ti Biblia ket nangted kadatayo iti nalawag nga imformasion maipapan iti Espiritu Santo.

Maysa a Personalidad. Intudo ni Jesus ti Espiritu Santo a kas maysa a persona, maysa a miembro iti Kadiosan, a kadua ti Dios Ama ken ti Dios Anak:

"Inkayo ngarud, ket pagblainenyo nga ad-adalan dagiti amin a nasion, a bautisaranyo ida iti nagan ni Ama, ken ti Anak, ken ti Espiritu Santo."--Mateo 28:19.

Ti Espiritu Santo ket addaan iti personal a kababalin: adda panunotna (Roma 8:27); kinasirib (1 Corinto 2:20); rikna nga agayat kadatayo (Roma 15:30); rikna nga agladingit no agbasbasoltayo (Efeso 4:30); adda abilidadna a mangisuro kadatayo (Nehemias 9:20); ken pannakabalin a mangidalan kadatayo.

Pannakiramanna iti Panamarsua. Ti Espiritu Santo ket nakipaset iti pannakaforma daytoy lubongtayo a kadua ti Ama ken ti Anak.

"Idi punganay ti Dios pinarsuana dagiti langlangit ken ti daga…. Ket ti ESPIRITU TI DIOS nagtignay iti rabaw dagiti dandanum."--Genesis 1:1, 2.

3. DAGTI ARAMID TI ESPIRITU SANTO

(1) Mangbaliw iti puso ti tao. Iti pannakisangona kenni Nicodemo, inyunay-unay ni Jesus ti paset ti Espriitu Santo iti panangbaliw ti puso ti tao:

"Pudno, pudno, kunak kenka, no ti maysa saan a MAYANAK iti danum ken iti ESPIRITU, saanna a mabalin ti sumek iti pagarian ti Dios."--Juan 3:5.

Tapno "maiyanak iti Espiritu" kayatna a saoen ket ti Espiritu Santo ket mangted kadatayo iti baro a panangrugi. Daytoy ket nasursurok ngem ti panangbaliwna bassit kadagiti kababalintayo. Ti Espiritu Santo ket balbaliwannatayo manipud iti uneg sa agturong iti ruar, a tungpalenna ti kari nga: "Ikkankayto met ti maysa a baro a puso, ket maysa a baro nga espiritu isaadkonto ti unegyo; ket ikkatekto ti bimmato a puso iti lasagyo, ket ikkankayto iti maysa a puso a lasag" (Ezequiel 36:26).

(2) Aramidenna nga ammotayo dagiti dakes nga ar-aramidtayo ken ikkannatayo iti panagkalikagum nga agsanto:

"Ket isu [Espiritu], inton umay, BABALAWENANNTO ti lubong ti maipapan iti basol, ken ti kinalinteg ken ti panangokom."--Juan 16:8.

No mangngegmo ti nadrama nga estoria iti maysa a tao a timmallikod manipud iti dakes nga estilo iti panagbiag ket nagturong iti Dios ket nagbalin a matalek nga asawa ken managtaraken a nagannak, laglagipen a ti tunggal addang nga agturong iti panagimbag ket naggapu kas resulta iti panangawis iti Espiritu Santo.

(3) Idaldalannatayo iti Nacristianoan a panagbiag. Ni Cristo ket agsarsarita kadatayo a direkta babaen iti "natalna a bassit a timek" ti Espiritu Santo.

"Ket dagiti lapayagmo makangngegdanto iti maysa a sao iti likudam, a kunana, Isu daytoy ti dalan, magnakayo kenkuana; intono agbaw-ingkayo iti makanawan, ken intono agbaw-ingkay iti makatigid."--Isaias 30:21.

Babaen iti satellite transmission, dagiti TV tayo ket kanayon a mangiyeg kadagiti ladladawan ken ruprupa manipud kadagiti adayo a kontinente ditoy uneg dagiti kuartotayo., Ti Espiriu Santo ket agar-aramid a kasla satellite ti Dios, naiyegna ti presensia ni Cristo ditoy daga manipud langit, nga aramidenna Isu nga asideg no masapultayo unay Isu (Juan 14:15-20).

(4) Tultulunganna ti managkararag a biagtayo.
"Ta ditay ammo no kasano ti panagkararagtayo a kas maiparbeng; ngem ti ESPIRITU MET LAENG IBABAETNATAYO, a buyugen dagiti un-unnoy a dimayebkas… kas iti pagayatan ti Dios."--Roma 8:26, 27.

No marigrigatantayo a masarakan dagiti sao, ti Espiritu Santo ket agkarkararag agpaay kadatayo. No maup-uppapaytayo ket mabalintayo laeng iti agasug agturong iti Dios, ti Espiritu Santo ket papigsaena a palawagen dagiti nakapuy nga ar-ararawtayo a dumawdawat iti tulong nga agbalin a mannakabalin a kararag ti sangoanan mismo iti trono ti Dios a pagserserbian ita ni Jesus.

(5) Parparang-ayenna dagiti kababalin ken ug-ugali dagiti Cristiano. Ti Espiritu Santo ket ar-aramidenna dagiti saan nga agbungbunga iti Espiritu a tattao a nataba a kas iti kayo nga agbungbunga iti amin a kita iti bunga:

"NGEM TI BUNGA TI ESPIRITU ayat, rag-o, talna, mabayag a panagitured, kinaanus, kinalaing, kinamanagtalek, kinaemma, panagteppel: awan linteg a maibusor kadagitoy a banag."--Galacia 5:22-23.

No addaantayo iti bunga ti Espiritu ket mangipakita a datayo ket naikapet iti pudno a puon ti ubas, ni Jesus (Juan 15:5). Ni Jesus ket pudno a maibiagna ti naruay a biagna kadatayo babaen iti pannakabalin ti Espiritu Santo.

(6) Isagsagananatayo a kas saksi. Inkari ni Jesus:
"Ngem UMAWATKAYTO TI PANNAKABALIN, inton umay kadakayo ti ESPIRITU SANTO; ket dakayto TI SAKSIK sadi Jerusalem, ken iti isuamin a Juda, ken Samaria, ken agingga iti ungto ti daga."--Aramid 1:8.

Amin a mayat ket mabalin a maar-aramid a saksi babaen iti Espiritu. Mabalin nga awan kadatayo dagiti amin a sungbat, ngem ti Espiritu Santo ket mabalinnatayo nga ikkan iti estoria a mabalintayo nga ibaga a magntignay kadagiti puso ken panpanunot dagiti tao. Dagiti apostol, sakbay iti Pentecoste ket marigrigatanda nga agsarita, ngem kalpasna a ti Espiritu Santo ket dimteng kadakuada ket ipakdaarda ni Cristo a napno iti pannakabalin nga uray la a "binallikidna ti lubong" (Aramid 17:6).

4. DAGITI SAGUT TI ESPIRITU

Ti Biblia ket nangaramid iti nagdumaan dagiti sagut ti Dios maipapan iti Espiritu Santo kadagiti tunggal mammati nga agpaay iti naballigi a Nacristianoan a panagbiag, ken dagiti saba-sabali a sagut ti Espiritu Santo a naited kadagiti mammati nga agpaay iti epektibo a panagserbi idiay nadumaduma a pampamayan.

"Idi nga immuli [Cristo] idi ngato, impana a kinayawan tipannakakayaw, ket INIKKANNA TI RANGRANGKAP dagiti tattao.'… Ket dagiti DADDUMA inkabilna nga APOSTOL; ket dagiti dadduma MAMMADTO; ket dagiti dadduma EBANGHELISTA; ket dagiti sabsabali, PAPASTOR ken MANNURSURO; a maipaay iti pannakapaan-anay dagiti sasanto a maipaay iti aramid ti panagserbi."--Efeso 4:8, 11-12.

Ti tunggal Cristiano ket saanna a maawat amin dagti sagut, dagiti dadduma ket mabalin a makaawat iti ad-adu a sagut ngem dagiti dadduma; ti Espiritu Santo ket "itedna dagitoy iti tunggal maysa, kas iti pagayatanna" (1 Corinto 12:11). Ti Espiritu ket armasanna ti tunggal mamati agpaay iti naisangsangayan a pasetda iti plano ti Dios. Ammo ti Dios no inton kaano ken no adino iti panangitedna dagiti sagut a nangbendision a nalaing iti ilina ken ti iglesiana.

Ti sabali pay a listaan dagiti naespirituan a sagut a masarakan idiay 1 Corinto 12:8-10 ket iramanna ti kinasirib, pannakaammo, pammati, pannakaimbag, padto, panagsrita iti nadumaduma a kita iti pagsasao, ken ti panangipalawag kadagiti sao (bersikulo 8-10).

Pilpilitennatayo ni Pablo a "saitentayo a kalikaguman dagiti natantan-ok a sagsagut," sana innayon, "ket ita ipakitak kadakayo ti kalaingan unay a pamayan" (1 Corinto 12:31). Ti kapitulo ti ayat (1 Coritno 13) a simmaruno ditoy a bersikulo ket iyunay-unayna a "ti kalaingan unay a pamayan" ket ti dalan ti ayat. Ket ti ayat ket bunga ti Espiritu Santo (Galacia 5:22).

Ti seggatayo ket ti birokentayo ti bunga ti espiritu ket satayo ipalubos a ti Espiritu iti mangiwaras kadagiti sagutna kadatayo kas "iti pagayatana" (1 Corinto 12:11).

5. TI KINAAN-ANAY TI ESPIRITU IDI PENTECOSTES

Idi aldaw ti Pentecostes, ti Espiritu Santo ket naibukbok iti awan patinggana a sukat, tinungpalna ti kari ni Jesus:

"Ngem umawatkayto ti pannakabalin, inton umay kadakayo ti Espiritu Santo: ket dakayto ti saksik…ken agingga iti ungto ti daga."--Aramid 1:8.

Idiay Pentecostes ket inaramid ti Espiritu Santo dagti apostol a maisaritada ti ebanghelio a nalawag iti pagsasao dagiti tao "manipud iti tunggal nasion ditoy siruk ti langit" (Aramid 2:3-6).

Dagiti dadduma nga eskolar ti Biblia ket inyarigda ti iyuumay ti Espiritu Santo idiay panagtinnag dagiti bulbulong ti nasapa ken maudi a tudo iti panagtutubo/panagsasaringit idiay Palestina (Joel 2:23). Ti panagtinnag ti Espiritu Santo iti Pentecostes ket kasla "ti nasapa a tudo" iti panagtitinnag dagiti bulbulong a mangaramid kadagiti bukbukel nga agtubo ken mangted iti napateg a sustansia agpaay iti iglesia Cristiano idi kinaubingna.

6. TI MAUDI A TUDO TI ESPIRITU SANTO

Ibagbaga dagiti padto ti Biblia a dumteng ti aldaw a ti Espiritu ti Dios ket maibukbok a kasla arbis idiay iglesia, tapno papigsaenna dagiti miembro ti iglesia kas saksi (Joel 2:28, 29). Naglabasen dagiti siglo ken ti estoria iti pannakaisalakan ket naiwarasen iti kaadduanna a paset it lubong. Panawenen iti pannakaibukbok ti "maudi a tudo" tapno paluomenna dagiti irik, ket maisaganan a maani.

Kas ti pakasaritaan ket umasidegen idiay panagleppasna sakbay laeng iti iyuumay a maikadua ni Jesus, ket isagana ti Dios ti tunggal nasaet a mammati nga agpaay idiay langit babaen iti naruay a pannakaibukbok ti Espirituna. Mapadpadasam kadin ti "nasapa a tudo" a mangisagsagana iti iglesia agpaay iti "maudi a tudo" iti Espiritu Santo? Agbibiagka kadi iti biag a napno iti Espiritu? Kas iti pannakapapigsam babaen iti Espiritu Santo, ipalubosmo kadi nga usarennaka ti Dios tapno isaritam dagiit mensahe iti saan a nakapapati nga ayatna ken ti asidegen a panagsublina?

7. DAGITI KONDISION AGPAAY ITI PANANGAWAT ITI ESPIRITU SANTO

Idiay Pentecostes ket tinignay ti Espiritu Santo dagiti nakangngeg iti ebanghelio tapno isangitda iti, "kakabsat, ania iti aramidenmi?" (Aramid 2:37).

"Ket ni Pedro kinunana kadakuada: 'AGBABAWIKAYO, KEN MABAUTISARAN ti tunggal maysa kadakayo iti nagan ni Jesu-Cristo a maipaay iti pannakaikkat dagiti basbasolyo; KET AWATENYONTO TI PARANGKAP TI ESPIRITU SANTO.'"--Aramid 2:38.

Ti panagbabawi-panagtallikod manipud iti napno iti basol a pamayan iti biag ket agturong a mapan kenni Jesus-ket maysa a kondision iti panangawat ti sagut iti Espiritu Santo. Tapno maibukbok kadatayo ti Espiritu Santo, ket agbabawitayo nga umuna ken ikomittayo dagiit biagtayo kenni Cristo. Inyunay-unay met ni Jesus a ti panagduyos a sumurot Kenkuana ken agtulnog Kenkuana ket maysa met a kondision nga agpaay iti panangawat ti sagut iti Espiritu Santo (Juan 14:15-17).

8. TI BIAG A NAPNO ITI ESPIRITU

Sakbay a pinanawan ni Jesus ti lubong, ket binilinna dagiti adipenna:

"Binilinna ida a dida pumanaw sadi Jerusalem, no di ket urayenda pay ti kari ti Ama… A ni Juan pudno a NANGBAUTISAR ITI DANUM ngem dakayo mabautisarankayto iti ESPRITU SANTO."--Aramid 1:4, 5.

Kanayon a ti Biblia ket imbagana a ti Cristiano ket masapul a "napno iti Espiritu Santo" (Aramid 2:4; 4:8; 4:31; 6:3, 6:5; 7:55; 9:17; 13:9, 52; 19:6.) Ti Espiritu Santo ket ar-aramidenna ti biag ti Cristiano a makapnek ken napintas agsipud ta ti biag a napno iti Espiritu ket maabotna ti modelo nga inted ni Cristo kadatayo.

Kabayatan nga iladladawan ni Pablo ti Nacristianoan a panagbiag a napno iti espiritu, ket indasarna daytoy a kararag nga agpaay iti tunggal mamati:

"Tapno, ipaayna koma kadakayo kas iti kinabaknang ti dayagna A MAKAPIGSAKAYO ITI PANNAKABALIN, ITI TAO A MAKIN-UNEG; GAPU ITI ESPIRITUNA. Tapno agnaed koma ni Cristo kadagiti puspusoyo, gapu iti pamati…. Ket iti daydiay mannakabalin nga agaramid iti di matukod nga ad-adu ngem iti dagup ti isu-amin a mabalntayo a dawaten, wenno panunoten, KAS ITI PANNAKABALIN NGA AGARAMID KADATAYO."--Efeso 3:16, 17, 20.

Kasla kenni Frank Morris a kaduana ti matalek nga asona a mangidalan kenkuana-ni Buddy, ket kabaelantayo met no a dda ditoy unegtayo ti Espiritu Santo a mangidalan kadatayo, nga aramiden dagiti nakarkaro a saan a marukod nga ar-aamid ngem idi. Agdipud ta addaantayon dagiti baro a panagkalikagum ken baro nga abilidad, datayo ket napapigsa nga agkuti nga agtuloy a simamatalek imbes nga agipampamuspusantayo laeng a kanayon dagiti parikut ti biag.

Daytoy napno iti Espiritu a kapadasan ket mabalbaliwan iti inaldaw babaen iti panagkararag ken panagadal iti Biblia. Ti kararag ket taginayonennatayo a nakadekket kenni Cristo, ket ti panagadal iti Sao ti Dios ket mangtaginayon kadatayo a nakaperreng kadagiti kinabaknangna. Ribbaenda dagiti pader a nakaballaet kadatayo kenni Cristo a mabalin a manglaped Kenkuana iti panangibukbokna kadagiti awan gatadna a sagut iti Espiritu Santo. Daytoy iti pamayan no kasanotayo a rumang-ay ken masukatan dagiti dakes a kababalin ken ug-ugali kadagiti nasalun-at a kababalin.

Ti Roma 8 ket mangted iti nakaliwliwa a panangiladawan iti biag a napno iti Espiritu Santo. Basaen daytoy no kabaelam, ket tandaan no kasano kaadu nga ulit nga intudo ni Pabo ti "Espiritu" a kas ti pannakabalin nga adda idiay likod iti Nacristianoan a panagbiag.

Naaramidmo kadi ti nakaskasdaaw a pannakadiskobre iti biag a napno iti Espiritu? Mapupuotam kadi ti presensia ti Espiritu Santo dita biagmo? Mapadpadasam kadi ti pannakabalinna a mangted iti biag? Lukatam dayta biagmo idiay kadakkelan a puersa ditoy sangalubungan.