Ti Pagtaengan idiay Langit

Idi ni Marco Polo ket nagsubli idiay nakaiyanakanna nga ili iti Venice kalpasan iti adu a tawtawen ditoy Daya, dagiti gagayyemna ket impagarupda a ti nawatiwat a panagbibiahena ket nangaramid kenkuana a balla. Addaan isu iti adu a saan a nakapapati nga estoria nga ibagana.

Ni Marco ket nakapanen idiay maysa a ciudad a napno iti pirak ken balitok. Nakakita isun iti nangisit a bato a sumged, ngem awan pay iti uray maysa a nakakita iti karbon. Nakakita isun iti lupot a saan a mapuoran uray no ipalladawmo iti apuy, ngem awan pay iti uray maysa a nakangngeg iti asbestos. Saritaenna dagiti dadakkel nga ul-uleg a ti kaatiddogna ket sangapulo nga askaw, nga addaan iti ngiwat a nalalawa nga umanay a mangalimon iti maysa a tao, mani a kasingdakkel iti ulo ti tao ken gatas a puraw iti unegna, ken ti banag nga agpugsit manipud iti daga a pudno a mangpasged kadagiti pagsilawan. Ngem awan pay iti uray maysa a nakakita kadagiti buwaya, bunga iti inyog, wenno krudo a langis. Katkatawaanda laeng dagitoy nga estoria. Kalpasan iti sumagmamano a tawen, idi ni Marco ket ngannganin matay, ti maysa a deboto a tao nga adda iti sikiganna ket pilipilitenna isu nga ibabawina amin dagiti kalokoan a parparbo nga inyestoriana kadakuada. Ngem ni Marco ket nagmadi: "Amin dagitoy ket pudno-tunggal maysa kadagitoy. Ti kinapudnona, saanko pay a naibaga ti uray kagudua ti innak nakita."

Dagiti nagsurat iti Biblia a nangted kadatayo kadagiti apagbiit a pannakakitada maipapan iti langit ket kasla ibagbagada ti adda a rikna ni Marco Polo. Iti sirmata ket agbirbirokda iti lugar a narambak, saan a nakapapati unay, a kabaelanda laeng nga iladawan ti bassit laeng a paset iti nakitada. Ket masangotayo ti karit a kapareho kadagiti gagayyem ni Marco Polo. Padasentayo a panunoten "dagiti buwaya ken bungbunga iti inyog" a saantayo kaanoman a nakita, agsipudta dagiti talgiap a naalatayo iti Biblia ket mangipakia kadatayo a ti langit ket adayo a nakarkaro pay ngem ti nakatugawka iti ulep nga agay-ay-ayam kadagiti arpa.

1. TI LANGIT KADI KET PUDNO A LUGAR?

Ni Jesus ket mangisagsagana iti pudno a lugar agpaay kadatayo itatta iti pudno unay a langit.

"Saan koma nga agpulkok ti pusoyo; mamatikayo iti Dios, mamatikayo met kaniak [Jesus]. Idiay balay ni Amak adda adu a pagianan: no koma no saan a kasta, kinunak koma kadakayo, TA INNAK ISAGANAANKAYO TI PAGIANAN. Ket no innak koma ket isaganaankayto ti pagianan, UMAYAKTO MANEN, ket ikuyogkayto kaniak met laeng: tapno no adino ti yanko, addakay met koma."--Juan 14:1-3.

Ni Jesus ket umay ditoy lubongtayo iti maikadua a tiempo tapno alaennatayo nga ipan idiay inaramidna a mansion idiay nailangitan a ciudad a naramrambak ngem iti kabaelantayo nga arapaapen: ti Baro nga Jerusalem.

Kalpasan a nakapagnaedtayo idiay iti sangaribu a tawen, ni Cristo ket intensionna nga ipan daytoy nailangitan a pagtaengan ditoy planeta a Daga.
Kas ti Baro a Jerusalem ket bumabbaba, ti apuy ket maibukbok tapno linisenna ti entiro a lubong. Daytoy napabaron a planetatayo ket isu iti agbalin nga agnanayon a pagtaengan dagiti maisalakan. (Apocalipsis 20:7-15. Ad-adu pay maipapan ditoy idiay Guide 22.)

Ania iti insaruno nga inladawan ni Juan a nagsurat iti Apocalipsis kalpasan daytoy?

"Ket nakitak ti maysa a langit a baro ken maysa a daga a baro; ta daydi immuna a langit ken daydi immune a daga napalabasdan, ket ti baybay awanen. Ket nakitak ti santo a ciudad ti baro a Jerusalem, a bimmaba, manipud langit nga aggapu iti Dios, a naisagana a kas la maysa a novia a naarkosan a maipaay iti noviona. Ket nangngegko ti maysa a dakkel a timek a naggapu iti trono nga agkunkuna: Adtoy ti tabernakulo ti Dios adda kadagiti tao, ket isu makipagnaedto kadakuada, ket isudanto dagiti tattaona, ket ti Dios met laeng addanto kadakuada, a Dios da."--Apocalipsis 21:1-3.

Kalpasan ti pannakabaliw daytoy babaen iti apuy, sinno iti inkari ni Jesus nga agian ditoy baro a daga?

"Nagasat dagiti naemma; ta tawidendanto ti daga."--Mateo 5:5. (Kitaen pay ti Apocalipsis 21:7.)

Inkari ni Jesus nga isublina daytoy iti un-unana ken naan-anay a lubong iti orihinal a pintas iti Eden, ket dagiti naemma ket "tawidendanto ti daga."

2. MAADDAANTAYO KADI ITI PUDNO A BAGI IDIAY LANGIT?

Idi ni Jesus ket nagpakita kadagiti adalanna idiay nagungar ken nagloriaan a bagina, kasanona daytoy nga inladawan?

"Kitaenyo dagiti ima ken sakak, ta siak met laeng; arikapendak ket kitaenyo: ta ti espiritu awan ti lasag ken tulangna, a kas makitayo nga adda kaniak."--Lucas 24:39.

Ni Jesus ket addaan iti pudno a bagi; inawisna ni Tomas a sagidenna isu (Juan 20:27). Iti daytoy nga okasion, ni Jesus ket nagna idiay uneg iti pudno a balay, nakisarita kadagiti pudno a tattao, ken nangan iti pudno a taraon (Lucas 24:43).

Ti langit ket saan a pagigianan dagiti al-alia, no di ket dagiti pudno a tattao a ragragsakenda ti naespirituan a biag, ken addaan iti "nagloriaan a bagi."

"Ta ti panakipagilitayo adda sadi langit: ket manipud idiay urayentayo met ti Manangisalakan, ni Apo Jesu-Cristo: Isu pabaroennanto daytoy nanumo a bagitayo, tapno mayasping iti nadayag a bagina, kas mayalubog iti pannakabalinna met a mangpatulnog a maipaay kenkuana met laeng kadagiti isu-amin a banbanag."--Filipos 3:20, 21.

Datayo ket mapatalgedan a dagiti nailangitan a bagitayo ket nabukel ken pudno kas iti nagungar a bagi ni Jesus.

Mabigbigtayo ngata dagiti familiatayo ken gagayyemtayo idiay langit?

"Ta ita kumitatayo a sikukudrep babaen ti maya a sarming, ngem intono kuan, rupanrupanton; ita ammok ti dadduma a paset, ngem intono kuan naan-anayton ti pannakaammok, a kas met ti pannakaammona kaniak."--1 Corinto 13:12.

Idiay langit ket "maammoantayo a naan-anay." Maawatantayo ken mapagyamanan ti maysa ken maysa iti nakarkaro ngem iti napadastayo ditoy madama a lubong. Dagiti adalan ni Jesus ket nabigbigda Isu idiay nailangitan a bagina, nalawag gapu iti kadawyan nga ammoda a langana (Lucas 24:36-43). Nabigbig Isu ni Maria idiay ayan iti tanemna gapu ta ammona ti timekna idi inawaganna ti naganna (Juan 20:14-16). Dagidiay dua nga adalan idiay Emmaus ket nagbigbigda Isu gapu iti sigurado nga ammoda a kutkutina. Idi nakitada ti pamayan a ti bisitada ket benindisionanna ti taraon, ket nabigbigda Isu a kas ti Apo babaen iti ugalina. (Lucas 24:13-35).

Dagiti nasubbot ket pudno a mapadasandanto ti nakaliwliwa a rupan-rupa a panagtitipon idiay langit.

Panunoten ti ragsak gapu ta mabigbigmo ti naisangsangayan nga isem ni asawam, wenno ti kadawyan nga ayab ti ubing nga inka impaidda nga aginana iti nabayagen a tiempo, weno ti naayatan a kutkuti dagiti dadduma nga ay-ayatem a gayyem. Maaddaantayo iti awan patinggana a tiempo tapno paunegentayo pay dagiti napateg a panagkakadua iti biag ken tapno parang-ayen dagiti nadikket a panaggagayyem kadagiti nakaay-ayo a personalidad iti sangalubungan.

3. ANIA ITI ARAMIDENTAYO IDIAY LANGIT?

Adu dagiti aramidentayo idiay langit. Kasano ngata no plannoem ti ar-arapaapem a balay?

"Ta, adtoy, mamarsuaak kadagiti baro a langlangit ken baro a daga…. Ngem agragsakkayo keg agrag-okayo iti agnanayon iti daydiay a parsuaek; ta adtoy, a parsuaek ti Jerusalem a maysa a pagrag-oan, ken ti umili kenkuana a maysa a ragsak…. Ket isuda bangonendanto dagiti balbalay, ken agtaengdanto kadakuada; ket agmuladanto kadagiti kaubasan, ken kanendanto ti bungada…. Ket dagiti pinilik agragsakdanto iti mabayag iti aramid dagiti im-imada."--Isaias 65:17-22.

Ni Jesus ket mangisagsagana iti pangpersonal wenno pangmaysaan a pagtaengan agpaay kadatayo idiay nasantoan a ciudad, ti baro nga Jerusalem (Juan 14:1-3; Apocalipsis 21). Dagitoy a bersikulo ket mangisingasing a datayo ket agdesenio met ken agaramid kadagiti dadduma pay a balbalay-mabalin a napipintas a taltalon-a mulaantayo ida iti napipintas a saba-sabali a mulmula idiay langit. Ket sinno iti makaaammo no ania dagiti nangangato a teknolohia a panagpasiar iti agur-uray kadatayo idiay narangrang-ay a sibilisasion ti Dios? Dagiti madama a gappuanan iti siensia ken panagsukimat iti tangatang ket kasla ay-ayam laeng iti ubing inton rugiantayon nga agsukisok iti "balay ni Amatayo."

Ay-ayatem kadi ti pintas dagiti dumaranudor a derraas iti danum, natalna a kataltalonan, naruay a kakaykayoan, ken narasi a sabsabong?

"Ta ni JEHOVA liniwliwana ti Sion, isu liniwliwana dagiti amin a dissona a nalangalang, ken inaramidna dagiti let-angna a kas la Eden, ken ti kadaratan a tay-akna a kas minuyungan ni JEHOVA; RAG-O KEN RAGSAK MASARAKANTO IDIAY, PANAGYAMAN KEN TI TIMEK TI KANTA."--Isaias 51:3.

Ti Dios ket pagbalinenna daytoy daga a napintas a Minuyungan iti Eden. Awanen iti langis a maibelleng wenno panagtuyot; dagiti kulos ket agtalinaedda a nalitnaw, dagiti kayo ket nadayag, ken dagiti rangkis dagiti bantay ket saan a kullo-kullong.

Saan laeng a dagiti pintas iti lubong, no diket kasta met dagiti kapasidadtayo a mangdayaw kadakuada ket kumaro a pirmi. Kas manla ti umuna nga aldawmo a makaruar a makapasiar kalpasan iti atiddog ken nabayag a panagsakit. Ket ti umuna a "biente minutos a kinapudno" ket umatiddog nga agbalin a kas agnanayon.

Ragragsakem kadi iti makapadas iti baro a banbanag? Panagadal? Panagparsua?

"Idiay, dagiti saan a matay a panpanunot ket kitaenda a nalaing nga addaan iti saan a kumupas a liwliwa dagiti nakaskasdaaw a pannakabalin nga agparsua, dagiti misterio iti manangsubbot nga ayat…. Ti tunggal abilidad ket maparang-ay, tunggal kapasidad ket mapaadu. Ti panagurnong iti pannakaamo ket saanna a bannogen ti panunot wenno ibusen dagiti pigsa. Idiay ket ti kadakkelan a proyekto ket mabalin a maituloy a malpas, dagiti katan-okan a kalikagumtayo ket maabot, dagiti kangatoan nga ambision ket maala; ken adda pay laeng iti bumangon a baro nga uulien, baro a pagsiddaawan a dayawen, baro a kinapudno a pagadalan, baro a banbanag a mangawis kadagiti puersa iti panunot ken kararua, ken bagi. Amin dagiti kinabaknang iti sangalubungan ket malukatan iti panagadal dagiti sinubbot ti Dios."-Ellen G. White, The Great Controversy (Nampa, Idaho: Pacific Press Publishing Association, 1950), p. 677.

4. TI DAKES KADI KET IPANGTANANTO MANEN TI LANGIT?

"Ket saanto a sumrek kenkuana uray kaano ti aniaman a narugit, wenno uray siasino nga agaramid ti makarimon wenno ulbod; no di laeng dagidiay adda a naisurat iti pagbasaan ti biag a kukua ti Cordero."--Apocalipsis 21:27.

Agnanayon a pukawenen ti Dios ti basol ken dagiti nakabutbuteng a bungana; saanda kaanoman a rumuar manen. Inton ni Jesus ket a gparang, "agbalintayonto a kas Kenkuana" (1 Juan 3:2). Imbes a labanantayo dagiti napiga nga awis iti rikna tapno pumatay, agtakaw, agulbod, wenno mangrape, ket maaddanto kadatayo dagiti parabur ti langit.

"Ket punasennanto ti amin a lulua kadagiti matada; ket awanton ni patay; ket awanto metten ti sasaibbek, wenno sangsangit, wenno rigrigat; ta dagidi immuna a banbanag napalabasdan."--Apocalipsis 21:4.

Uray pay ti kamaudianan a kabusor, ti patay, ket mapukawto. Idiay nailangitan a daga iti agnanayon a kinaagtutubo dagiti nasubbot ket "awan pannakatayda" (1 Corinto 15:53); awan kadagiti agtataeng idiay iti agsagaba kadagiti panangdadael iti kinalakay.

Ti langit ket saanna laeng dadaelen dagti bunga ti basol, no diket ballikidenna ida. Panunotem no ania iti pagbalinanna kadagiti nakidangadang iti entiro a biagda.

"Iti kasta maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto; ta iti let-ang pumsuakto dagiti dandanum, ken barbaresbes iti tay-ak a langalang."--Isaias 35:5, 6.

5. ANIA ITI KADAKKELAN A MAKAAY-AYO IDIAY LANGIT?

Panunotem ta makitam ti Apo iti sangalubungan a rupan-rupa.

"Ket nangnegko ti maysa a dakkel a timek a naggapu iti trono nga agkunkuna: Adtoy ti tabernakulo ti Dios adda kadagiti tattao, ket isu makipagnaedto kadakuada, ket isudanto dagiti tattaona, ket ti Dios met laeng addanto kadakuada a Diso da."--Apocalipsis 21:3.

Ti Mannakabalin-amin a Dios ket nagkari nga agbalin a kaduatayo ken mangisuro kadatayo. Anian a ragsak iti agtugaw idi ayan dagiti sakana! Panunotem no ania iti mabalin nga ited iti maysa a musikero tapno laeng maaddaan isu iti uray bassit a kanito a makaduana ni Beethoven wenno ni Mozart. Panunotem no kasano a pategan ti maysa a pisiko ti gundaway a makatugaw a kadua ni Albert Einstein, wenno kasano kapateg agpaay iti maysa a pintor a makasaritana ni Michelangelo wenno ni Rembrandt.
Panunotemman, ta dagiti nasubbot ket maaddaanda iti dakdakkel nga adayo a pribilihio. Makasaritada ti nagaramid kadagiti amin a musika, siensia, ken arte. Maaddaandanto iti nadikket a relasion idiay katan-okan a panunot ken puso iti sangalubungan. Ket daytoy a relasion ket agayos nga agtinnag iti panagdayaw.

"Ket maaramidto, a manipud iti maysa a lutuad agingga iti sabali, ket manipud iti maysa nga aldaw a panaginana agingga ti sabali, amin a lasag umayto agkararag iti sangoanak, kuna ni Jehova."--Isaias 66:23.

Iti sentro iti nailangitan a ciudad ket nakatakder ti dakkel a puraw a trono ti Dios. Napalikmotan iti bumerde-berde a bullalayaw. Ti rupana ket aglawlawag a kasla sumsumged nga init. Idiay baba iti saksakana ket kasla sarming a baybay nga umabut iti amin a direksion. Ditoy kristal a narambak a buya a mangipakita iti dayag ti Dios, dagiti nasubbot ket aguurnongda tapno ipukkawda ti naragsak a panagdayawda.

"Ket dagiti sinubbot ni Jehova agsublidanto, ken umayda idiay Sion a mabuyogan iti kankanta; ket agnanayon a rag-o ti agtaengto iti rabaw dagiti oloda: magun-oddanto ti ragsak ken rag-o, ket ti ladingit ken sasainnek agtalawdanto."--Isaias 35:10.

Adtoy ti maysa a ti kinaimbagna ket saan a kaanoman nga agmintis. Ti kinamatalekna ken ti anusna ken ti kaasina ket agtultuloy nga agtultulid. Dayawen ti nasantoan a naganna!

6. MASAPUL NGA ADDATAYO IDIAY!

Il-iliwen ni Jesus daydiay a panagkikita iti rupan-rupa. Isu a nagduyos Isu tapno isalakannaka manpud iti basol uray iti kasdiay a nginana. Masapul a personalmo nga awaten daytoy a sagut. Masapulmo iti agaramid iti kari kenni Criso a kas Apom ken Mangisalakanmo. Masapulmo ti pannakapakawan nga idasdasar iti krus gaputa:

"Ket saanto a sumrek kenkuana uray kaano ti aniaman a narugit, wenno uray siasino nga agaramid ti makarimon wenno ulbod; no laeng dagidiay adda a naisurat iti pagbasaan ti biag a kukua ti Cordero, iti trono ti Dios ken iti Cordero, ket agayus."--Apocalipsis 21:27.

Insalakannatayo ni Jesus manipud iti basol, saan nga idiay basol. Masapultayo iti mapan Kenkuana babaen iti pannakabalinna ditoy unegtayo ken suminatayo manipud iti kinarugit ken kinadakes. Ni Jesus iti passwordtayo mangisindi kadatayo idiay mabiiten nga umay a pagarianna.

Ket dayta a pagarian ket mabalinen a amangrugi dita pusom ita. Idi insalakannatayo ni Jesus manipud iti basol, Isu ket mangparsua iti langit-langitan ditoy pusotayo. Matulungannatayo a lumabn iti panagdukot, pungtot, derrep, buteng ken ti basol a mangsalsalot kadatayo. Ti namnama iti langit ket saan pannakabulos manipud kadagiti parikut iti biag; daytoy ket nakarkaro a tumulong a mangparsua iti langit ditoy daga. Ti nabiit pay a naaramid a panagboto ket nangipakita a "dagiti mamati nga adda iti biag idiay bangir iti patay ket naragragsak iti panagbiagda ken panagtalekda kadagiti tao ngem kadagiti saan a mamati."

Awan iti nakarkaro a makaited iti ragsak iti biagmo ita ngem ti managtalek a relasionmo kenni Cristo Jesus. Denggem no kasano nga inladawna ni Pedro ti pigsa iti sibibiag a pammati:

"Isu nga uray no dikay nakita, ayatenyo; ket uray no ita dikay makita, patienyo ket agrag-okayo iti DI MAYEBKAS A RAG-O KEN NAPNO ITI DAYAG. Nga awatenyo ti pagbanagan ti pammatiyo, ti pannakaisalakan dagiti kararuayo."--1 Pedro 1:8, 9.

Amin dagitoy-ken kasta met ti langit. Nadiskobrem kadin ti ita ti nawadwad a biag a kalikagum ni Cristo a mapadasam? Saanmo koma a tallikudan nga adaywan ti naparabur nga awisna.

"Ket daydi Espiritu ken daydi novia kunada: Umayka! Ket ti dumngeg, kunaenna koma: Umayka! Ket ti mawaw, umay koma. Ket ti mayat, awatenna ti danum ti biag, nga awan baybayadna."--Apocalipsis 22:17.

Ni Jesus ket adda kenkan ita, agsarsarita dita pusom kas iti inka panagbasa kadagitoy a linia. Aw-awisennaka nga "Umay!" "Umay!" "Umay!" Nakaro iti saetna, nakaro iti pakaasina. No saanmo pay a naaramid daytoy, daytoyen iti kanito, awanen iti sabali a panawen tapno birokem ti idasdasarna.

Apay a saanmo nga ibaga Kenkuana nga inawatmon ti naparabur a sagutna ken kalikagummo iti makikaddua Kenkuana iti agnanayon? Ibagam Kenkuana nga ay-ayatem Isu. Pagyamanam Isu kadagiti amin nga inaramidna agpaay kenka ken dagiti amin a planplanoenna pay nga aramiden agpaay kenka. No adda banag a nakaballaet idiay nagbaetam ken ti Dios, dawatem Kenkuana nga ikkatenna daytoy. Ita, kabayatan a mangmangngegmo ti timekna, kabayatan a ti pusom ket sumungsungbat, itedmon ti bagim Kenkuana nga awan iti reserbasion. Agdumogkan ita a kanito ket saoem, "Jesus, Apo Diosko, umayak Kenka. It-itedko amin nga adda kaniak Kenka. Kukuanakon iti agnanayon."