Inton Umay ni Jesus Agpaay Kenka

Kalpasan iti adu a tawtawen a pannakaparigat, ni Armando Valladares ket nagbalin a maysa a nakuttong, nalugpi nga aniniwan iti dati a bagina. Isu ket pagserserbianna ti 30 a tawen a sentensiana iti maysa kadagiti pagpupukan ni Castro gapu iti panagkararagna iti uneg ti maysa nga iglesia idi maysa nga Aldaw ti Paskua. Dagiti ofisial iti pagbaludan ket saanda isu a pinakan, pinarigatda, ken imbabainda daytoy a tao, ngem saanna nga insuko ti pammatina.

Adda maysa a banag a nangpatibker iti nakemna tapno makapagtuloy isu: ti maysa a kari nga inaramidna iti maysa a balasang a managan Martha. Nagam-ammoda ken naginnayatda kabayatan nga isu ket adda idiay pagbaludan. Ti balasang ket naanus a pirmi gapu iti narubrub a pammatina. Saan a nagbayag kalpasan iti kasarda a sibil idiay solar iti pagbaludan, ni Martha ket napilitan nga immalis a napan idiay Miami.

Ti panagsinada ket nasakit unay. Ngem ni Armando ket naaramidna a nakalibas a nakaited iti kari kenni asawana. Idiay bassit a pidaso iti nagelgel a papel, insuratna ti karina: "Umayak kenka. Dagiti bayoneta iti pagpatinggaan iti langit ken ti daga iti bangir iti likodak ket saanen a napateg." Daytoy a balud ket determinado a ti saan a mabayag, isu ken ni Martha ket makasarda iti simbaan idiay sangoanan iti Dios. Idiay masangoanan iti aldaw, ti panagtiponda ket maan-anayto. Kanayonka a kaduak," kinunana kenkuana.

Ti kari ni Armando ket timmulong kenkuana a nagtultuloy iti adu a tawtawen iti pannakaparigat a mabalin a mangdadael iti nakem iti kaaduanna a lallaki: ket daytoy ti timmulong met kenni Martha a nagtultuloy. Nagaramid isu nga awan pannakabannogna tapno maipanna ti atension iti publiko ti kasasaad ni lakayna. Saan isu kaanoman a naawanan iti namnama.

1. TI KARI

No maminsan ket mabalin a masulisogtayo a masdaaw, ni ngata Cristo ket pudno a bumaba iti maysa nga aldaw manipud ditoy asul a tangatang dita ngatotayo nga agpaay iti nakaskasdaaw a panagkikita manen? Nabayagen a nagsisinatayo. Ti kastoy a naragsak a panaggibus iti atiddog ken nakaal-alinget a pakasaritaan ti daga ket rumuar a kasla naimbag a kinapudno. Ngem adda maysa a banag a mangtaginayon a ti namnama ket sibibiag ditoy pusotayo. Dayta ket ti kari ni Cristo a panagsubli. Sakbay a panawanna dagiti adalanna a mapan langit, inted ni Jesus daytoy a kari:

"Saan koma nga agpulkok ti pusoyo; mamatikayo iti Dios, mamatikayo met kaniak. Idiay balay ni Amak adda adu a pagianan: no koma no saan a kasta, kinunak koma kadakayo, ta innak isaganaankayo ti pagianan. Ket no innak koma ket isaganaankayto ti pagianan, UMAYAKTO MANEN, ket ikuyogkayto kaniak met laeng: tapno no adinto ti yanko, addakay met koma."--Juan 14:1-3.

Sakbay a ni Jesus ket immuli idiay langit, impasigurona kadagiti adipenna nga "AGSUBLIAK!" Nagkari Isu nga agsubli ken umayna alaen amin dagiti nagtalek Kenkuana tapno ipanna ida idiay naisangsangayan a lugar nga insaganana agpaay kadatayo. Dagiti Kasuratan ket nagsao iti nganngani 2,500 nga ulit maipapan iti maikadua nga iyuumayna. Ti kinapudno a ni Jesus ket umay ditoy lubong iti maikadua a tiempo ket pudno a kas ti kinapudno nga Isu ket immay nagbiag ditoy daga idi, dua a ribu a tawtawenen iti napalabas.

Nabayagen idi ti Dios ket nagkari a ti Mesias ket umay, kas maysa a Mangisalakan nga awitenna ti bagina dagiti kinadakestayo ken mangted iti pannakapakawan agpaay kadagiti basol iti tao. Daydiay a kari ket kasla naimbag unay a kinapudno kadagiti adu iti daan a lubong a makidangdangadang kadagiti biagda--ngem ni Jesus ket immay a natay idiay krus. Ti kari ket pudno a dimteng a naramrambak ngem iti posible a panpanunoten dagiti tao. Ti karina nga agsubli ket pudno a dumtengto. Mabalintayo iti agtalek iti maysa nga agay-ayat kadatayo, nga umay agsubli tapno urnongenna nga ipangato dagiti immayna binayadan iti nangina unay a bayad.

Iti uneg iti tiempo ti pannakaipupokan, ni Armando ket intultuloyna iti nangilibas a nagipatulod iti daniw, mensahe, ken ladladawan kenni Martha. Ket ni Martha ket naaramidna iti nangipablaak kadagiti dadduma kadagitoy a sursurat. Ti kinalaingda ket nakaawis ti atension ti lubong. Dagiti govierno ket nirugianda a puersaen ni Casto nga ibulosna dagiti balud iti konsensia. Ti presidente iti Francia ket nangiballaet ket ti udina idi Octubre 1982 ni Armando ket inluganda iti maysa nga eroplano nga agturong idiay Paris.

Nganngani saanna a mapati nga isu ket waya-wayan--uray pay idi ti eroplano ket nakadisson. Ket idi, kalpasan iti dua a pulo a tawen a panagsagaba ken panagiliw, ken panaguray, ni Armando ket nagapura a napay idiay taktakkiag ni Martha.

Kalpasan iti mano a bulan, dagitoy naragsak nga agasawa ket nakatakderda iti simbaan iti St. Kieran, idiay Miami, ket inulitda dagiti karida. Iti udina ti panagtiponda ket nakumpleto. Ti kari ket natungpal: "Umayak kenka."

Mabalinmo kadi a panunoten no kasano a nakaskasdaaw iti pagbalinanna daydiay a panagtitipon manen inton ti udina ket mabalintayon a makita ni Jesus iti rupan-rupa? Ti napno iti dayag a panagpakitana ket tilmonenna amin dagiti ladingittayo ken pannakauppapaytayo, punasenna amin dagiti saksakit nga inlemmengtayo kadagiti pusotayo.

Ti panagsubli ni Jesus iti mangtungpal kadagiti nauneg ken "makaliwliwa unay a panagnamnamatayo. Ket mapantayo agbiahe iti awan patinggana a nadikket a pannakimaymaysa iti kapintasan a personalidad ditoy sangalubungan. Ni Jesus ket ngannganin umay! Nasaetka kadi a sumabat Kenkuana?

2. KASANO ITI IYUUMAY NI JESUS?

(1) Nalimed kadi iti iyuumay ni Jesus?
"Adtoy, siak imbagak nga impakpakauna kadakayo. No kunaendanto ngarud kadakayo: Adtoy, adda ditoy let-ang; dikay mapmapan; wenno: Adtoy kadagiti kaunegan a silsiled; dikay patien. Ta kas iti kimat a rummuar iti daya, ket makita a sumilap agingga iti laud, KASTANTO MET TI YAAY TI ANAK TI TAO."--Mateo 24:25-27.

Ti kimat ket agkilap a makita a nalaing uray ti adayo, kasta met ti iyuumay ni Jesus ket saan a nalimed wenno pasamak a maaramid laeng iti panunot.

(2) Ni Jesus ket umay kadi a kas pudno a tao?
"Ket idi a kitkitaenda ti langit bayat ti ingangatona adtoy dagiti dua a lallaki a nagtakder iti dinnada a nagkawes ti puraw; Isuda a nagkuna met: Lallaki a taga Galilea, apay-apay agtatakderdkayo a kumitkita iti langit? DAYTOY A JESUS A NAIPANGATO SADI LANGIT NANIPUD KADAKAYO, KASTA MET UMAYTO A KAS TI PANNAKAKITAYO NGA IPAPANNA SADI LANGIT."--Aramid 1:10-11.

Iti aldaw iti ipapanawna manipud ditoy lubongtayo, dagiti anghel ket impasiguroda kadagiti adalanna nga "Isu met laeng a Jesus" nga immuli idiay langit--saan a sabali pay--ket agsubli a persona kas Ari dagiti ar-ari. Ti Isu met laeng a Jesus a nangpaimbag kadagiti masakit ken nanglukat kadagiti mata dagiti bulsek. Ti Isu met laeng a Jesus a nalumanay a nagsao iti babai a natiliw a nakiabig. Ti Isu met laeng a Jesus a nangpunas kadagiti lulua dagiti agladladingit ken nagsaklot kadagiti ubbing. Ti Isu met laeng a Jesus a natay idiay krus ti kalbario, naginana iti tanem, ket nagungar manipud patay idi maikatlo nga aldaw.

(3) Ni Jesus ket umay kadi tapno makitatayo Isu?
"Adtoy isu umay a buyugen dagiti ul-ulep ket MAKITANTO DAGITI ISUAMIN A MATMATA."--Apocalipsis 1:7 (umuna a paset).

Amin a sibibiag inton umay manen ni Jesus, dagiti nalinteg ken dagiti dakes, ket masaksianda ti panagsublina.

Kasano kaadu ti kinuna ni Jesus Mismo a makakita iti panagsublina?

"Ket iti kasta agparangto ti pagilasinan ti Anak ti tao iti langit; ket agdung-awto ti AMIN A TRIBU TI DAGA, ket MAKITADANTO ti Anak ti tao nga umay iti rabaw dagiti ulep ti langit, nga adda pannakabalin ken dakkel a gloriana."--Mateo 24:30.

Tunggal sibibiag a tao ditoy lubongtayo, ket makitada ti panagsubli ni Jesus.

(4) Sinno iti mangkuyog kenni Jesus inton umay?
"Ngem intono ti Anak ti tao umayto agraman ti dayagna, ken amin dagiti anghel maikuyog kenkuana, isu ti panagtugawnanto iti trono ti gloriana."--Mateo 25:31.

Panunoten no ania iti pagbalinanna inton agsubli ni Jesus idiay entiro a dayagna a napalikmotan "dagiti amin nga anghel."

(5) Mapugtoantayo kadi ti eksakto a tiempo ti iyuumay ni Jesus"
"Ngem ti maipapan iti dayta nga aldaw ken horas, awan ti makaammo no kaanunto uray pay dagiti anghel ti langit, uray pay met toy Anak, no di laeng ni Ama. Gapuna addakay met koma a sisasagana; ta inton horas a dikay ipagpagarup toy anak ti tao umayto."--Mateo 24:36, 44.

Tunggal maysa ket makakita iti nadayagan nga isasangpet ni Jesus, ngem adu dagiti saan a nakasagana agpaay ditoy. Personalka kadi a nakasagana iti iyuumay ni Jesus?

3. ANIA TI ARAMIDEN NI JESUS INTON ISU KET UMAY MANEN?

(1) Urnongen ni Jesus amin dagiti maisalakan (dagiti napili).
"Ket ibaonnanto dagiti anghelna a buyugan ti napigsa nga uni ti trumpeta, ket urnongendanto dagiti pinilina, kadagiti uppat nga angin, manipud iti maysa nga ungto ti langit agingga iti bangir."--Mateo 24:31.

(2) Ibangon ni Jesus dagiti natay a nalinteg
"Ta ti Apo met laeng aggapunto sadi langit a buyugen ti ariwawa, ti timek ti arkangel ken ti trumpeta ti Dios, KET DAGITI NATAY KEN CRISTO BUMANGONDANTO NGA UMUNA."--1 Tesalonia 4:16.

Ni Jesus ket bumaba manipud langit nga addaan iti pukkaw. Ti napigsa a timekna ket mangngeg iti entiro a lubong. Luktanna dagiti tanem iti tunggal tanem ket pagungarenna dagiti riwriw a tattao nga immawat kenni Jesus iti amin a panawen. Anian a nagrambak nga aldaw iti pagbalinannanto.

(3) Ni Jesus ket baliwannanto amin dagiti nalinteg iti iyuumayna--saan laeng a dagiti natay a nalinteg, no diket kasta met dagiti sibibiag a nalinteg.
"Kalpasanna, datayo a sibibiag, datayo a mabati, MAITAYABTAYO A MAIKUYOG KADAKUADA kadagiti ul-ulep, a sumabet iti Apo, iti tangatang; ket iti kasta kankanayon nga addatayto iti Apo."--Bersikulo 17.

Tapno isagananatayo nga agpaay iti agnanayon, ni Cristo ket baliwanna dagiti mortal a bagitayo a nakasagana a matay iti napintas a saanen a matay a bagbagi.

"Adtoy, ibagak kadakayo ti maysa a palimed: Saantaytoy a maturog amin, ngem MABALIWANTAYO AMIN--iti maysa a kanito, iti paagdarikmat ITI KAMAUDIANAN A TRUMPETA: ta aguninto ti trumpeta, ket DAGITI NATAY AGUNGARDANTO A DI AGRUPSA, ket MABALIWANTAYTO. Ta masapul a daytoy bagi nga agrupsa, agkawes iti saan a panagrupsa, ket daytoy bagi a matay, agkawes iti saan nga ipapatay."--1 Corinto 15:51-53.

Inton umay ni Cristo "datayo amin ket mabaliwan." Basta panunotem: awanen iti rayuma, paralitiko, wenno kanser. Maiserran dagiti hospital ken puneraria. Dimtengen ni Jesus!

(4) Alaen amin ni Jesus dagiti nalinteg a tattao nga ipanna idiay langit.
Ni Jesus Mismo iti nagkari, "agsubliak tapno alaenkayo a makikadua kaniak "idiay balay ni Amak" (kitaen ti Juan 14:1-3). Ni Pedro ket nagsarita maipapan iti tawid dagiti nasubbot a "maaywanan idiay langit agpaay kadatayo" (1 Pedro 1:4). Mabalintayo iti mangnamnama tapno intayo tan-awan dagiti nakasidsiddaaw iti ciudad ti Dios, ti Baro nga Jerusalem, ken ammoentayo a nalaing ti nailangitan nga Amatayo.

(5) Paksiaten Jesus ti dakes ken panagsagaba iti amin a panawen.
Dagiti managdakes--dagiti nagtultuloy a nangilaksid dagiti amin a panangidasar ni Jesus iti kaasina--ti kinapudnona ket sinentensiaandan dagiti bagida. Kas iti inda panangperreng iti rupa ni Jesus a sumangsangpet nga agturong kadakuada manipud iti ul-ulep, ti dagus a pannakalagipda kadagiti basolda ket mangpaneknek a nasakit unay tapno anusanda; agtarayda a mapan agsangit kadagiti banbantay tapno dawatenda kadagiti batbato a "Ket kinunada kadagiti banbantay ken kadagiti batbato: Agtinnagkayo kadakami ket ilemmengdakami iti imatang daydiay agtugtugaw iti trono, ket iti pungtot daydiay Cordero" (Apocalipsis 6:16). Pilienda iti matau iti sangoanan dagiti makitana-amin a mata ni Jesus.

Ammoda a ti timek nga ita ket kasla gurruod manipud langit ket idi ket alumanay nga agsarsarita kadakuada nga awatenda ti nailangitan a parabur. Dagiti nakapukaw kadagiti bagbagida iti panagdakamatda nga agbirok iti kuarta, wenno liwliwa, wenno akem ket maammoandan ita a naliwayanda ti kakaisuna a pudno a napateg a banag ditoy a biag.

Daytoy ket makarumek a pannakaammo. Kalpasan iti amin, ket awan iti uray maysa kadakuada iti masapul a mapukaw. Ti Dios Mismo ket "saan a maragsakan iti pannakatay iti managdakes" (Ezequiel 33:11). Saanna "a kayat a ti siasinoman ket mapukaw, no diket ti tunggal maysa ket umay nga agbabawi" (2 Pedro 3:0). Ni Jesus ket agpakpakaasi kadatayo. "Umaykayto kaniak dakayo amin nga agrigrigat ken madagdagsenan ta paginanaenkayto" (Mateo 11:28). Ngem saan a nakapapati, dagiti dadduma ket tinallikodanda ti naparabur nga imbitasionna.

4. NAKASAGANAKA KADIN AGPAAY ITI IYUUMAY NI JESUS?

Dakkel a kantidad iti binayadan ni Jesus tapno magarantiaannatayo iti nadayagan a masangoanan a kaduana "iti balay ni Amana." Biagna iti imbayadna!

"Kasta met ni Cristo, idinto a naidaton iti naminan tapno awitenna dagiti basbasol dagiti adu, ti maikadua agparangto saan a gapu iti basol, no di ket maipaay iti pannakaisalakan dagiti agur-uray kenkuana" (Hebreo 9:28).

Ti Mangisalakan a natay idiay krus tapno ikkatenna dagiti basolmo ket agpakita "iti maikadua," ken "umay mangyeg iti pannakaisalakan kadagiti agur-uray Kenkuana." Insakrifisio ni Cristo ti Bagina tapno mangidasar iti pannakasialakan iti tunggal maysa kadatayo. Ngem no awan ti maikadua nga iyuumay, ti krus ket agbalin nga awan serbina. Kalikagum ni Cristo nga ikkannatayo iti agnanayon a natalged a pagtaengan a kaduana. Tapno maaramid dayta, masapul nga ipalubostayo nga Isu iti agturay kadagiti pusotayo kas Mangisalakan ken Apotayo itattan.

Idi agsapa iti Agosto 16, 1945, ti maysa nga ubing a lalaki ket timmaray a simrek iti solar iti Shantung, North China, nga ipukpukkawna a nakakita isu iti eroplano idiay tangatang. Amin dagiti napigsa pay iti bagina a nakapupok ket timmarayda a rimuar ken timmangadda. Dagitoy a lallaki ken babbai ket nagsagabadan iti adu a tawtawen iti pannakaisina, pannakaikkat iti gundawayda, ken pannakariribuk, impupok dagiti Hapon kas umili dagiti kabusor a nasion. Kadagiti adu kadakuada, maysa laeng a banag iti nangtaginayon kadakuada a sibibiag iti espirituda: ti namnama a maysa kadagitoy nga aldaw iti mabiit a masangoanan, ti gubat ket agleppas.

Ti ayos ti koriente ket kasla naipuruak iti tingnga daytoy a pangen iti 1,500 a sibibiag a balud kas ti namnamada ket daytoy nga eroplano ket mabalin nga immay agpaay kadakuada. Kas ti ungor ti eroplano ket pumigpigsa, "kitaenyo" kuna ti maysa, ti Bandera ti America ket nakapintura idiay igidna!" Idi kuan ti saan a makapapati a pannakaulaw, dagiti timek ket nagririawda, "Kitaenyo, agpaypayapayda kadatayo! Ammoda no sinnotayo. Immayda tapno umaydatayo alaen."

Ditoy a punto, ti ragsakda ket nalablabes ngem ti kabaelan a laonen daytoy narusanger, nabannog, mail-iliwen a natidda a sibibiag. Nakiburkiburdan. Dagiti tao ket agtatarayda nga agpalikmot, agririawda iti uray langa, ipaypayapayda dagiti im-imada ken agsasangitda.

Bigla a daytoy a pangen ket simmardengda nga immanges ket natalnada nga agbuybuya. Ti siruk iti eroplano ket bigla a naglukat ket nakitada dagiti lallaki a nagtatapuak ket nangrugidan a tumayab babaen iti parachutes idiay ngato nga agin-inayadda nga agpabpababa. Dagiti mangisalakanda ket saanda laeng nga umay iti masangoanan; no diket immaydan ita nga aldaw, itattan tapno mapanda idiay tingngada!

Ti pangen ket dimmarupda nga agturong idiay ruangan ti solar. Awan iti simmardeng a nagpanunot kadagidiay paltog a nakapaturong kadakuada manipud iti tortorre. Kalpasan iti adu a tawen iti pannakauppapay ken panagladingit, dinarupda ti ruangan a rimuarda a napan iti pagdisoan dagiti nakaparachutes.

Saan a nagbayag daytoy pangen iti tattao ket nagsublida idiay kampo--nga awit-awitda dagiti soldado. Ti kumander iti kampo ket simmuko nga awan pannakilaban. Ti gubat ket pudno a nalpasen. Dimtengen ti waya-waya. Ti lubong ket baro manen.

Iti mabiit ti Diostayo, Mangisalakantayo, ket bumaba manipud langit tapno isalaknnatayo. Ti atiddog a nakabutbuteng nga estoria iti kinaranggas iti tao iti padana a tao ket ti udina ket sumardengen. Addanto iti panagraragsak idiay nga aldaw, dagiti pukkaw iti ragsak kas iti udina ket maawatantayo: "Isu ket umas-asideg nga umay; makitkitak dagiti anghel nga agpuypuyot kadagiti trumpetada." Ti ungor ket pumigpigsa, ti ulep iti dayagna ket lumawlawag, inggana ngannganitayon saan a maibturan daytoy. Ngem saantayo a makasardeng a kumitkita kas iti pannakabigbigtayo: "Makitkitanak. Ammona no sinnoak." Maammoantayo iti saan a mailadawan a ragsak: "Adtoy ti Diosko. Isu ket immay agpaay kaniak, saan a sabali, no di ket ita nga aldaw, itatta mismo!"

Nakasaganaka kadin nga umawat iti Ari idiay amin a dayagna? No saan, awisem ni Jesus a personal dita biagmo itattan. No kasano a ti iyuumay ni Jesus ditoy lubongtayo ket mangresolba kadagiti parikut ti lubong, kasta met a ti iyuumayna dita pusom ket tumulong kenka a sangoem dagiti madama a parikutmo iti inaldaw. Ti natan-ok a tagaresolba iti parikut ket makaisalakan kenka manipud iti basol ken dagsenna ket ikkannaka iti biag nga agnanayon.

Ti iyuumay ni Jesus idiay maysa a biag ket agnanayon a baliwanna daytoy kas met iti iyuumay ni Jesus ditoy lubongtayo ket baliwanna daytoy. Makapagtalekka kenni Jesus. Isagananaka iti iyuumayna ken itedna kenka ti nakaskasdaaw a talged iti biag iti agnanayon a ragsak.