Ti Maikadua A Tiansa ti Biag

Kalpasanna nga inusar ti adu a tawen iti biagna kas maysa a Buddhista, ti maysa a lakay a tao idiay Singapore a nagbalin a Cristiano ket nasaludsod. "Mr. Lim, ania iti nakitam a nagdumaan iti maysa a Buddhista ken ti maysa a Cristiano?"

"Nalaka laeng," kunana. "Manipud idi nasarakak ni Jesus kas Manangisalakanko, naaddaanak iti kastoy a talna ditoy pusok."

Kasta iti maaramid no isentrotayo dagiti biagtayo kenni Cristo.

"Aywanamto a natalna unay daydiay a ti panunotna agtalinaed kenka [Dios]; agsipud ta agtalek kenka."--Isaias 26:3.

Ti panagbiag iti Nacristianoan a biag ket agresulta iti naan-anay a talna--ti naan-anay a rikna iti talged ken naimbag a kinatao.

Dagiti nakaaramid iti daytoy a pannakadiskobre ket nasarakanda ti maymaysa a dalan nga agruong iti maikadua a gundaway iti biag--ni Jesus!

1. ANIA TI KAIPAPANAN ITI MAISALAKAN AGPAAY KADAGITI NAPUKAW

Posible agpaay iti pisikal a biag a tao a manarimaan nga aggungun-od iti maawag dagiti dadduma a naimbag a tiempo, ngem isu ket natay--dayta ket natay iti espiritu.

"KET PINAGBIAGNAKAYO IDINTO A NATAYKAYON GAPU KADAGITI PANANGSALUNGASING KEN BASBASOL, a nagnaanyo idi naminsan kas iti ugali daytoy lubong, kas mayannurot iti panguloen ti pannakabalin ti angin, TI ESPIRITU [DAKES] NGA ITA AGARAMID kadagiti annak ti kinasukir."--Efeso 2:1, 2.

Ni Satanas ket iturturongna ti tao a natay iti espirituna iti agpasalog a puersa ti basol ken panagsalungasing. Ngem ti nakaskasdaaw a kinapudno iti ebanghelio ket ay-ayaten ti Dios dagitoy a naokoman a tattao. Ay-ayatenna ida kabayatan nga isuda ket natay iti basbasolda, ket idasdasaranna ida iti naan-anay ken awan bayadna a pannakaisalakan manipud kadagiti narigat a kasasaad ti biagda.

"Ngem ti Dios, idinto a nabaknang iti kaasi, gapu iti dakkel nga ayatna a pinangayatna kadatayo, URAY PAY NATAYTAYON IDI GAPU KADAGITI BASBASOLTAYO, PINAGBIAGNATAYO A NAIRANUD KEN CRISTO.... [tapno] iparangarangna ti naindaklan a kinabaknang ti paraburna ti kinaimbag kadatayo ken Cristo Jesus."--Efeso 2:4-7.

Ay-ayatennatayo ti Dios uray awan iti aniaman a banag a nakaay-ayat maipapan kadatayo. Ti paraburna ket nangparsua ditoy unegtayo iti baro a biag ken Cristo. Saantayo a mabaliwan dagiti bagitayo, ngem kabaelan iti Dios. No mapantayo Kenkuana a sipapammati ken agpasakup, ikkannatayo iti maikadua a gundaway ti biag kas awan bayadna a sagut.

2. MANIPUD ITI ANIA A DATAYO KET MASAPUL A MAISALAKAN?

(1) Masapultayo iti maisalakan manipud iti basol.
"Ta isuda amin nagbasolda ket agkurangda iti dayag ti Dios."--Roma 3:23.

Tapno maikabil daytoy iti diretso: ket saantayo nga agbibiag iti ammotayo a naimbag. Ti maysa a nagannak a madagdagsenan ket mabalinna a bittaken ken sugatan ti rikna ti maysa nga ubing. Ti maysa a tao ket mabalin a makaunget iti maysa a driver ket nganngani makaaramid iti aksidente. Ti maysa nga estudiante ket mabalin a dumakkel nga addaan unget ken agdaydayamudom iti dakes a banbanag maipapan iti sabali nga estudiante. Ti maysa a negosiante ket mabalinna a "lipatan" ti maipapan iti sigurado a paggapuan iti pagkakitaan no tiempo iti panagbabayad iti buwis. "Amin ket nagbasol;" kayta iti kasasaad iti tao.

Kasano nga ipalawag ti Biblia ti basol?

"Isu-amin a kinakillo basol."--1 Juan 5:17.

Masapultayo iti maisalakan manipud kadagiti amin a kita iti saan a nasalun-at a kababalin ken panangpuwersa: kinaulbod, nakaro nga unget, derrep, sakit ti nakem, tapno mainaganan dagiti sumagmamano.

"Isu-amin a makaaramid iti basol, aramidenna met ti maisalungasing iti linteg."--1 Juan 3:4.

Isu a masapultayo iti maisalakan manipud iti basol--panangsalungasing kadagiti bilin ti Dios.

(2) Masapultayo iti maisalakan manipud iti nadadael a relasiontayo iti Dios.
"Ngem dagiti kinadangkestayo namagsinada kadakayo ken iti Diosyo, ket dagiti basbasolyo inlemmengda ti rupana kadakayo, iti kasta dinto mangipangag."--Isaias 59:2.

Dagiti saan a napakawan a basbasol ket mangputed iti relasiontayo iti Dios. Ni Cristo ket immay tapno isublina ti panagtalektayo iti Dios, a dinadael ni Satanas.

(3) Masapultayo iti maisalakan manipud iti pannakatay nga awan patinggana--dusa iti basol.
"Gapuna, no kasano ti iseserrek ti basol ditoy lubong gapu iti maymaysa a tao, ken ti ipapatay gapu iti basol ket iti kasta ti ipapatay immay kadagiti isu-amin a tattao, agsipud ta isuda nagbasolda amin."--Roma 5:12.

(4) Masapultayo iti maisalakan manipud iti biag a napno iti basol, naliday, ken kawaw.
Agpaay iti managbasol, ti biag ket maysa a kalsada nga awan iti pagruaranna.

(5) Masapultayo iti maisalakan manipud ditoy lubong a napno iti basol.
Masapul a maisalakantayo manipud ditoy lubong a napno iti basol ken kadagiti bungana--rigat, sakit ti nakem, ladingit, gubat, saksakit, ken patay!

3. SINNO ITI MANGISALAKAN KADATAYO?

Ni laeng Jesus iti makaisalakan kadatayao.

(1) Maisalakannatayo ni Jesus manipud basol.
"Ket aganakto iti maysa a lalaki; ket panaganamto iti Jesus, ta isu isalakannanto ti ilina kadagiti basbasolna."--Mateo 1:21.

Imbaga ti maysa a Hindu iti maysa a gayyemna a Cristiano, "Adu a banbanag iti nasarakak iti Hinduismo a saan a masarakan iti Cristianismo. Ngem adda maysa a banag nga adda iti Cristianismo nga awan iti Hinduismo--ti maysa a Mangisalakan." Ti Cristianismo laeng iti relihion ditoy lubong a mangidasdasar kadagiti tao iti Mangisalakan.

(2) Ni Jesus ket maisalakannatayo manipud iti nadadael a relasiontayo iti Dios.
"Idi a tiempo nga awankay pay ken Cristo… nga awan ti inanamayo ket addakay ditoy lubong nga awanan Dios. Ngem ita, ken Cristo Jesus, dakayo nga idi adayukayo iti Dios, naiyasidegkayo kenkuana, gapu iti dara ni Cristo."--Efeso 2:12, 13.

Ni Jesus iti naan-anay a gayyem a mabalintayo a ragsaken iti makipagrelasion. Kayatna a paruaren ti kaimbagan manipud ditoy unegtayo. "Babaen iti dara ni Cristo" dagiti napalabas a panagbiagtayo iti basol ket napakawanen, ket iti inaldaw ket it-itedna kadatayo ti panangawatna, pannakabalin nga abaken ti basol, ken ti naan-anay a biagna. Ammotayo nga adda Isu idiay tapno itakdernatayo nga ibangon kada tiempo a mapatiklebtayo. Ti ayattayo met Kenkuana ket mangted iti panagkalikagum nga agbiag iti pamayan a nakaliwliwa Kenkuana.

(3) Ni Jesus ket maisalakannatayo manipud iti awan patinggana a pannakatay, pannakadusa iti basol.
"Ta dagiti supapak ti basol isu ni patay; ngem ti naparabur a sagut ti Dios isu ti biag nga agnanayon, ken Jesu-Cristo nga Apotayo."--Roma 6:23.

Datayo ket managsalungasing iti linteg a nasentensiaan a matay. Ti dusa iti basol ket patay. Isalakannatayo ni Jesus manipud patay nga awan patinggana ket ikkannatayo iti biag nga agnanayon.

"Ngem ti Dios ipatalgedna ti ayatna kadatayo, agsipud ta idinto a managbasoltayo pay laeng, ni Cristo natay gapu kadatayo."--Roma 5:8.

Gapu iti naballigi nga ayatna, ni Jesus ket "natay agpaay kadatayo." Ket agsipud ta Isu ket natay agpaay kadatayo ken sinagabana dagiti naan-anay a resulta iti basol, ket mabalinen ita a mapakawan ken awaten iti Dios dagiti managbasol a saannan a pategan iti basol.

(4) Ni Jesus ket maisalakannatayo manipud iti napno iti basol ken naladinget a biag.
"Gapuna no ti maysa adda ken Cristo, isu baro a parsua: dagiti banag a daan napalabasadan, adtoy nagbalinda a baro."--2 Corinto 5:17.

Saantayo a maisalakan dagiti bagitayo manipud iti basol wenno baliwantayo dagiti kababalintayo a bukbukodtayo a nakarkaro ngem iti leon a nagdesision nga agbalin a kordero (Roma 7:18). Ti basol ket pudno laeng a napigpigsa ngem iti puwersa iti panunottayo. Ngem ni Cristo ket "kabaelanna a papigsaennatayo babaen iti Espirituna iti kaunegan a kinataotayo" (Efeso 3:16). Isu ket agar-aramid tapno sukatanna dagiti makadadael a kababalintayo kadagiti nasalun-at a kababalinna: ayat, talna, ragsak, singpet, panagteppel iti bagi (Galacia 5:22, 23). Ni Jesus ket agbibiag kadatayo, ket maawattayo ti naespirituan a pannakaimbag, pannakaisubli, ken baro a biag.

Ni Harold Hughes ket naawananen iti namnama nga isu ket makapagbaliw pay. Impamuspusanna a siuuppapay nga isardeng ti panaginomna iti adu a tiempo. Ammona laeng a nalaing a ti pannakigubalna iti bote ket nangikabil kenni baketna ken dagiti dua a babbalasanga iti imfierno iti uneg iti sangapulo a tawen. Isu a napan isu timmapog iti pagdigdigusanna a batya iti maysa a nalamiis nga agsapa ket sana insubo ti murdong iti paltogna. Ngem sakbay a kalbitenna ti paltog, nagdesision isu a nasaysayaat nga ipalawagna dagiti parikutna iti Dios. Daydiay a kararag ket nagbalin nga atiddog, nga adda sangitna a pakaasi iti Dios a dumawdawat iti tulong.

Ket ti Dios ket immay. Ni Harold Hughes ket nangaramid iti kari ken Cristo ket nasarakanan a ti naespirituan a pigsa ket agtultuloy. Insardengna iti aginom agpaay iti pagimbagan, nagbalin a naayat, ken mapagtalkan nga asawa ken ama, ket nagtuloy isu a nagbalin a Senador iti America. Nadiskobre ni Harold Hughes ti kapigsaan a mangbaliw a puwersa ditoy lubong--ni Jesus!

(5) Ni Jesus ket maisalakannatayo manipud ditoy napno iti basol a lubong.
Dagiti sumaruno nga uppat a DISCOVER a mangidalan ket ipalawagna no kasano.

4. MAISALAKANTAYO BABAEN ITI PANANGARAMID KADAGITI TALLO A SIMPLI NGA ADDANG

Addang 1. Dawaten kenni Cristo a sangoenna dagiti basol nga adda dita biagmo.
Ania iti pasettayo iti panangikkat iti napno iti basol a biagtayo?

"AGBABAWIKAYO ngarud, ket agsublikayo tapno mapunas dagiti basbasolyo."--Aramid 3:19.

Ania iti mangidalan iti maysa a tao tapno agbabawi?

"TI KINAIMBAG TI DIOS ITURONGNAKA ITI PANAGBABAWI."--Roma 2:4.

"GAPU TA NAGLADINGITKAYO ITI MAIPAAY ITI PANAGBABAWI."--2 Corinto 7:9.

Ti panagbabawi ket simpli laeng a pagladingitan dagiti napalabasen a panagbiag iti basol, ken adaywanen dagiti basbasoltayon, makisinan kadagiti daan a kababalin, ar-aramid, ken ug-ugali. Saan a panagladingit gapu ta kabutengtayo iti madusa, no diket sungbattayo iti "kinaanus iti Dios" a nangiturong kenni Jesus tapno idiay lugartayo gapu kadagiti kinadalustayo. Ilaksidtayo ti basol agsipud ta daytoy ket makasakit iti Dios.

No mapadasantayo ti baro a biag ken Cristo, masapultayo a no mabalin ket itamatayo dagiti dakes a naglabas (Ezequiel 33:14-16).

Ania iti paset it Dios idiay panangikkat iti daan a managbasol a biag?

Agpada a ti panagbababawi ken pannakapakawan ket sagut kadatayo a naggapu iti Dios.

"Isu intan-ok ti Dios iti makanawanna a kas maysa a Prinsipe ken MANANGISALAKAN, tapno itdenna iti Israel ti PANAGBABAWI, ken ti PANANGIKKAT DAGITI BASBASOL."--Aramaid 5:31.

Ket no agbabawitayo, ti naayat a Mangisalakan ket pakawanenna dagiti basoltayo, linisennatayo manipud iti basol, ket ibellengna dagitoy iti kaunegan iti taaw.

"NO IPUDNOTAYO dagiti basbasoltayo, Isu ti mapagtalkan ken nalinteg a MAMAKAWAN kadagiti basbasoltayo, ken MANGUGAS KADATAYO iti amin a kinakillo."--1 Juan 1:9. (Kitaen pay ti Mikias 7:18, 19.)

Awan iti basol a dakkel unay a ti Mangisalakan a natay agpaay kadatayo idiay krus ti kalbario ket saanna a mapakawan. Ti tao nga agtaltalek kenni Jesus ket masapulna laeng a dawaten Kenkuana ti pammakawanna. Ti pannakatay ni Cristo agpaay kadatayo ket saannatayo a mapakawan no saantayo a dawaten ti pannakapakawan. Maysa a nakaladladingit a kinapudno a dagiti basoltayo ket timmulong a nangilansa kadagiti imana ken saksakana iti krus. Nupay kasta, ni Jesus ket naregget unay a nasursurok ngem iti mapanunottayo tapno awatentayo ti sagutna a pammakawan ken panagkapia.

Nakadanon iti agtutubo a pimmanaw iti pagtaenganda ti damag ni inangna ket agbugbugsoten. Ti damag ket nangpunno kenkuana iti panagbabawi gapu iti narakrak a relasionda. Nagapura isu a nagawid, diridiretso isu idiay kuarto nga ayan ni inangna, ket nagparintumeng isu idiay abay iti idda ni inangna. Idiay adu a lulua, dinawatna kenni inangna a pakawanenna isu.

Ginuyudna isu nga inyasideg ket inyarasaasna kenkuana, "Anak, nabayag koman a pinakawanka no idi pay ket dimmawatkan iti pakawan."

No sika ket immadayo manipud iti Dios wenno saanmo pay Isu a naam-ammo--panunotem koma no kasano kasaet ti naayat nga Amam idiay langit nga awatennaka iti pagtaenganna. Kalikagumna a nakarkaro pay ngem iti aniaman a banag nga awatem ti idasdasarna a pammakawan. Isu a sungbatam ti naparabur nga awisna nga agbabawika. Ipudnom dagiti basolmo. Patiem laeng a pinakawannakan iti Dios. Agtalekka Kenkuana! Agtalekka kadagiti karina.

Addang 2. Awatem ti baro a biag manipud ken Jesus.
Ti pasetmo iti panangawatmo iti baro a biag manipud kenni Jesus ket patiem a ni Jesus ket pudno nga insalakannaka. Awitem nga awan duadua ti kinapudno a pinakawannakan ken nilinisna ken, inikkatnan ti daan a biagmo iti basol, ket inikkannakan iti naan-anay a baro ken nabaliwan a biag.

"Ngem kadagiti amin nga immawat kenkuana, inikkanna ida ti kalintegan nga agbalin nga anak ti Dios kadagidiay a mamati iti naganna."--Juan 1:12.

Kas maysa nga anak ti Dios, addaanka "iti paglintegan" nga umawat iti baro a biag manipud kenni Cristo. Kas iti naibagatayon, saanmo daytoy a maala a bukbudkodmo--daytoy ket maysa a sagut manipud iti nailangitan nga Ama! Inted ni Jesus daytoy a nabukel a kari tapno maikkat dagiti kinaawan talgedtayo ken panagduadua.

Ania iti paset ti Dios iti panangitedna kadatayo iti baro a biag?

"Ni Jesus, ket kinunana kenkuana: Pudno, pudno kunak kenka, no ti maysa a tao saan a mayanak a mabaliwan, saanna a mabalin a kitaen ti pagarian ti Dios."--Juan 3:3.

Kuna ni Jesus, ti mamati, agbabbabawi a managbasol ket ti kinapudnona ket pudno a naiyanak isu iti baro a biag. Daytoy ket maysa a milagro a ti Dios laeng iti makaaramid ditoy. Inkarina:

"Ikkankayto met ti maysa a BARO A PUSO, ket maysa a BARO NGA ESPIRITU isaadkonto iti unegyo; ket ikkatekto ti bimmato a puso iti lasagyo, ket ikkankayto iti maysa a puso a lasag."--Ezequiel 36:26.

Balbaliwan ni Jesus dagiti pusotayo--dagiti riknatayo ken kababalin--ken agtaeng "kadatayo" (Colosas 1:27). Daytoy a baro a biag ket saan laeng a napintas a naespirituan a kapanunotan; daytoy ket natangken, nabukel a kinapudno, maysa a panagungar manipud iti naespirituan a pannakatay agturong iti naan-anay a baro a biag ken panagbiag.

Addang 3. Agbiagka iti inaldaw agpaay kenni Jesus.
Ti Nacristianoan a panagbiag ket karamanna ti inaldaw nga iyaadayo manipud kinaimot, ken makisiglot kenni Jesus kas naayat a gayyemtayo. Rumang-aytayo kenni Jesus. Kayatna a saoen ket mangusar iti napateg a tiempo a kaduatayo Isu, a mangaramid iti pudno ken silulukat a pannakikasarita. Inikkannatayo ti Dios iti lima a nasantoan a tulong agpaay iti naespirituan a panagrang-ay: Panagadal iti Biblia, panagkararag, panagpanunot, pannakitipon a kadua dagiti dadduma a Cristiano, ken panangibingaytayo kadagiti kapkapadasantayo kadagiti dadduma.

Ti panagbiag ken Cristo ket saan a kayatna a saoen ket saantayo--kaanoman a makaaramid iti panagkamali; ngem no maitibkoltayo gapu iti basol, ket matagikuatayo ti pammakawan ni Cristo, ket makapagtuluytayo. Agturturongtayo iti sigurado a direksion, ken ammotayo a ni Cristo ket agtultuloy a sibibiag a paresensia ditoy pusotayo.

5. TI RAGSAK TI MAIKADUA A TIANSA

Ni Harold Hughes ket nakaawat iti adu a padayaw kabayatan iti mabigbig a tarigagayna kas maysa a Senador iti America, ngem ti maysa a kapategan kenkuana ket dimteng iti saan a nabayag kalpasan laeng iti panagkarina kenni Cristo.

Ni Harold ket agad-adal iti Bibliana iti maysa a rabii iti kuartona idi mariknana nga adda nangkalbit kenkuana iti takiagna. Timmalliaw isu. Nakitana dagiti dua nga annakna a babbalasitang a natalnada a nakatakder a suotda dagiti badoda a pangturong. Pinerrengna ida iti apagbiit; adun iti nagbaliwandan, saanna unay a nakita ida kabayatan iti tiempo a pannakidangadangna kadagiti bote iti arak, ket kailiwna unay ida.

Ket ni Carol, ti ub-ubing ket nagkuna, "Daddy, immaykami tapno ungngoendaka iti naimbag a rabii."

Ket nagarubus dagiti luluana. Nabayagen a tiempo a dagiti annakna ket immayda a nagpaarakup kenkuana. Ket ita dagiti napintas a nalinaw a matmatada ket kasla awanen iti butengda. Ni amada ket nakaawid met laengen.

Ni Jesus ket pudno nga ikkanna dagiti tao iti maikadua a tiansa. Alaenna dagiti kaskaso a talaga a ngan-nganin awan namnamana ket mangparsua iti baro a panangirugi.

Ti Manangisalakan ket il-iliwenna a ti tunggal maysa kadatayo ket makaawiden. Inawatmo kadin ti naayat nga imbitasion ni Cristo? Ti panangawatmo iti pammakawan ken pananglinis iti Dios ket simpli laeng ken nauneg kas iti panangiyukradmo kadagita takkiagmo nga agpaay iti panangarakup iti anakmo.

No saanmo pay a pinagtalkan ni Cristo kas personal a Mangisalakanmo, mabalinmo nga aramiden ita babaen iti panagkararagmo iti kastoy:
Ama, pagladladingitak ti lakay a biagko iti basol. Agyamanak agsipud ta imbaonmo ti Anakmo ditoy lubong tapno matay iti lugarko. Jesus, pakawanem kadi dagiti basbasolko ket umayka ditoy biagko ket isalakannak. Kalikagumak iti maikadua a tiansa iti biag--kayatko iti maiyanak manen. Aglalo pay, kayatko iti mangitakder iti inaldaw-aldaw a relasion Kenka. Agyamanak gapu ta inaramidmo daytoy a milagro kaniak. Iti nagan ni Jesus, Amen."

Aramidem daytoy nakaskasdaaw a panangdiskobre: No aramidentayo iti mapan, ni Jesus ket aramidenna iti mangisalakan.

KASANOTAYO ITI MAKAAWAT ITI BARO A BIAG MANIPUD KEN CRISTO
1. Mamatitayo Kenkuana ken awatentayo Isu a kas Mangisalakan ken Apo.
2. Mangibangontayo iti relasion Kenkuana. (Ti kanayon a tiempo iti panagkararag ken panagadal iti Biblia ket napateg.)
3. Ni Cristo ket agar-aramid babaen iti Espirituna tapno masukatan dagiti dakes a kababalintayo kadagiti naimbag a kababalinna.