Maysa a Plano Agpaay iti Biagmo

Kalpasan a ti maysa a ministro ket nagsarita iti maysa a topiko, "Apay a Mamatiak ken Jesus," ti nasayaat ti panagkawesna nga agtutubo a lalaki a nakitariknong iti panagadal ket insawangna, "Ti inyadalmo ita a rabii ket nakaay-ayo, ngem amin nga imbagam maipapan ken Cristo ket naggapu iti Bibliam. Ibagam kaniak, no ni Jesus ket nagbiag iti daga, apay a saan nga ibaga ti pakasaritaan?"

"Dayta ket nasayaat a saludsod," insungbat ti ministro bayat a nangala kadagiti sumagmamano a liblibro. "Ngem iti kinapudnona, ti pakasaritaan ket ibagbagada ni Jesu-Cristo."

"Dayta ti kayatko a makita," insungbat ti baro.

"Ngarud adda daytoy Surat 97 iti Libro 10 iti Letters of Pling the Younger, ti Romano proconsul idiay Britania, maysa a provincia ti daan nga Asia Minor. Nagsurat ni Pling iti Emperor iti Roma, Trajan, ibagbagana kenkuana maipapan dagiti pasamak iti provinciana. Ditoy, isu ket dumawdawat iti pammagbaga no kasanona nga ipataray ti baro a sekta, dagiti Cristiano. Ibagana ti alisto a panagaduda ken no kasanoda nga agkankanta kadagiti himno a naaramid agpaay iti panguloenda. Impatulod ni Pliny ti suratna idi mapan A.D. 110. Ti surat ni Pliny ket mangipaay iti historical a pammaneknek iti tao ni Cristo, ken ti panagwara iti pammatina iti al-aldaw dagiti adipenna."

Masdaawaak, imbaga ti baro, "Isaritam pay kaniak iti ad-adu!"

Bayat ti ministro alaenna ti sabali pay a libro, innayonna, "Maysa pay nga estoriador, kaddua met laeng ni Pliny, ni Tacitus. Iti librona nga Annals (Book 15, chapter 44) ibagana ti unget ni Nero, ken panangusig, kadagiti Cristiano iti panawen iti panagpuor ti Roma. Ni Tacitus ipalawagna a ti sao a `Cristiano' ket naggapu manipud iti nagan a `Cristo.' Imbagana a ni Jesu-Cristo ti nangyuna iti Cristiano a relihion, ket pinapatay ni Pontius Pilato. Amin dagitoy nga indetalye ni Tacitus ket mangted kadatayo iti eksakto a panagpada dagiti pasamak, nagnagan ken luglugar a naisurat iti Biblia."

"Pastor, mandiak ammo dagita a banag a naisurat iti nailubungan a pakasaritaan!" insawang ti bisita.

Innayon ti ministro, "kayatko a paliiwem nga agpapan idi 180 ni Celsus insuratna ti libro a lumablaban kadagiti Cristiano, itudtudona a ti Cristianismo iti dayta a panawen ket nagbalin a puwersa iti panangokom.

"No agduduaka pay laeng, laglagipem a ti uppat nga Ebanghelio ket estoriada kas kadagitoy nainlubongan a liblibro."

Idin daytoy a baro ket nautobna a ti agpadpada a naimbibliaan ken nainlubungan a pakasaritaan ket agtunosda nga ibagbaga a ni Jesus ket pudno a nagbiag a kas tao ditoy daga, pimmanaw a nakumbinsi a ni Jesu-Cristo ket pudno, naestoriaan a figura.

1. NI CRISTO KET ADDAN SAKBAY PAY IDI PUNGANAY

Ni Jesus ket saan laeng a naimbag a tao. Isuna ket Dios pay. Ania ti ibagbaga ni Jesus maipapan Kenkuana a maiyanurrot iti kina-Diosna?

"No nailasindak koma, nailasinyo met koma ni Amak, manipud ita isu ammoyo ket nakitayo…. Ti nakakita kaniak, nakitana ni Ama, Apay-apay a kunaem: Ipakitam kadakami ti Ama?"--Juan 14:7-9.

No kayatmo a maammoan ti sungbat dagitoy a saludsod, "Sinno ti Dios? Ania a klase a Dios?" kitaen laeng ni Jesus a nangibunannag.

"Siak ken ti Ama maymaysakami."--Juan 10:30.

Ti Dios Ama ken ni Jesus nga Anak ket addadan nga agpada manipud pay sakbay idi punganay (Hebreo 1:8). Awan iti uray maysa a kanito a ni Jesus ket saanna a kaddua ti Ama. Ti Ama ibingayna ti agpadpada nga ayat ken panangasikaso iti tunggal tao nga impakita ni Jesus idi nagbalin a tao ditoy daga.

2. NI CRISTO, TI PUSO TI PAKASARITAAN KEN PADTO

Gapu ta ti estoria ti biag ni Cristo ket panagtungpal iti padto, ti estoria ti Biagna ket naisuraten sakbay pay iti pannakaiyanakna. Dagiti padto ti Daan a Tulag iparangda ti nalawag a sukog ti biag ni Cristo, pannakatayna, ken panagungarna a naiyuna. Ti Baro a Tulag ket ti estoria ti Biagna a naibaga a pannakatungpalna.

Ti panagbiag manipud 500 inggana 1,500 a tawtawen sakbay ti pannakaiyanak ni Cristo, dagiti mammadto ti Daan a Tulag nagaramidda iti puntos ti nainaganan a padpadto maipapan ti biag ti Mesias. Ken iti rugi ti panagministro ni Cristo ditoy daga kas ti panangidilig dagiti tao ti Biagna kadagiti padto ti Daan a Tulag, ania ti ibagbagada?

"Nasarakanmi daydi insurat ni Moises iti linteg, ken dagiti mammadto: Ni Jesus, a taga Nazaret nga anak ni Jose."--Juan 1:45.

Ti Mannubbot nagsao kadagiti natungpal a padto tapno ipasdekda no sinno Isu:

"Ket idinto a rinugianna manipud ken Moises ken dagiti isuamin a mammadto, impalawagna kadakuada dagiti amin a sursurat a mangsarita iti maipapan kenkuana."--Lucas 24:25-27.

Dagiti natungpal a padpadto mangipaay iti makapaawis a pammaneknek a ni Jesus ti naikari a Mesias.

3. TI BIAG NI CRISTO TI PANNAKATUNGPAL TI PADTO

Kitaentayo iti sumagmamano kadagitoy nainpadtoan a sasao manipud ti Daan a Tulag--ken ti pannakatungpalda iti pakasaritaan ti Baro a Tulag.

TI LUGAR TI NAKAYANAKANNA
Ti Padto ti Daan a Tulag:
"Ngem sika, BELEN Efrata, sika a bassitka kadagiti rinibribu ti Juda, kenka rumuarto ti maysa nga umay kaniak nga agbalin nga agturay iti Israel, a dagiti iruruarna nanipudda idi ugma, nanipud iti kinaagnanayon."--Mikias 5:2.
Ti Pannakatungpal ti Baro a Tulag:
"Idi ta nayanak ngaruden ni Jesus idiay BETHLEHEM sadi Judea."--Mateo 2:1.

TI PANNAKAIYANAKNA BABAEN ITI VIRGEN
Ti Padto ti Daan a Tulag:
"Adtoy, a maysa a VIRGEN agsikogto, ken mangipasngayto iti maysa nga anak a lalaki, ket maigaladto iti naganna nga Emmanuel."--Isaias 7:14.
Ti Pannakatungpal ti Baro a Tulag:
"Jose, anak ni David, dika aduadua nga umawat ken Maria nga asawam; TA TI NABUKEL KENKUANA, ARAMID ITI ESPIRITU SANTO. Ket aganakto iti maysa a lalaki; ket panaganamto iti Jesus; ta isu isalakannanto ti ilina kadagiti basbasolna."--Mateo 1:20-23.

TI NAGGAPPUANNA MANIPUD TI TRIBU NI JUDA
Ti Padto ti Daan a Tulag:
"DINTO UMADAYO TI CETRO KEN JUDA…. Agingga iti di umay ni Mamagkakappia."--Genesis 49:10.
Ti Pannakatungpal ti Baro a Tulad:
"Ta nalawag a NI APOTAYO NAGTAUD ITI JUDA."--Hebreo 7:14.

TI PANNAKAILAKSIDNA
Ti Padto ti Daan a Tulag:
"Isu nauy-uyaw, ken BINAYBAY-AN dagiti tao."--Isaias 53:3.
Ti Pannakatungpal ti Baro a Tulag:
"Immay kadagiti kukuana, ket DAGITI TAONA ISU SAANDA NGA INAWAT."--Juan 1:11.

TI PANNAKALIPUT KENKUANA KEN TI BAYAD A NAIBAYAD ITI NANGTRAIDOR KENKUANA
Ti Padto ti Daan a Tulag:
"Wen, TI PAY KAINGONGOTKO UNAY A GAYYEM, a nagtalkak, isu a nakikaan iti kanek, inkugtarna ti mukodna kaniak."--Salmo 41:9.
"Ket kinunak kadakuada, No dakayo panunotenyo a naimbag, itdenyo kaniak ti tangdanko; ket no saan baybay-anyo. Iti kasta kinatida ti tangdanko iti TALLOPULO A KAPISI A PIRAK."--Zacarias 11:12.
Ti Pannakatungpal ti Baro a Tulag:
"Idin, ti maysa kadagiti sangapulo ket dua, daydi managan ti Judas Iscariote, napan kadagiti turayen dagiti papadi. Ket kinunana: Ania ti kayatyo nga ited kaniak, tapno isu iyawatko kadakayo? Ket indiayada kenkuana ti TALLO PULO A BIAG TI PIRAK."--Mateo 26:14, 15.

TI PANNAKATAYNA IDIAY KRUS
Ti Padto ti Daan a Tulag:
"SINALPUTDA DAGI IM-IMAK ken saksakak."--Salmo 22:16.
Ti Pannakatungpal ti Baro a Tulag:
"Ket idi makagtengda iti disso a managan ti Bangabanga, ISU INLANSADA idiay iti krus."--Lucas 23:33. (Kitaen pay ti Juan 20:25.)

TI PANAGPANAWNA MANIPUD TI TANEM
Ti Padto ti Daan a Tulag:
"Ta SAANMONTO A BAYBAY-AN TOY KARARUAK ITI TANEM: saanmonto met nga ipalubos a ti santom makitana ti panagrupsa."--Salmo 16:10.
Ti Pannakatungpal ti Baro a Tulag:
"Isu, idinto a nakitana a sigud, nagsao iti maipapan iti panangungar ni Cristo, A SAAN MET A NABAYBAY-AN NGA AGTAENG IDIAY HADES, ket ti lasagna saan met a nayawat iti panagrupsa. Daytoy a Jesus pinagungar ti Dios, isu a masaksianmi amin." --Aramid 2:31, 32.

Ti pammaneknek ket napigsa a ni Jesus ket saan laeng a napasamak tapno maitunos kadagiti dadduma a padpadto. Ti pakasaritaanna ket pudno a naisuraten sakbay pay babaen iti nainlangitan a pamuspusan. Pudno, ni Jesus ti Anak ti Dios.

Kalpasan a kitaen dagiti pammaneknek, masapul a mangaramid iti nainkararagan a decision maipapan no sinno ti apan iti Apo iti biagtayo. No saanmo pay naaramid, ikabilmo kadi ti biagmo kadagiti ima ni Jesus?

4. TI NAPLANO A BIAG TI DIOS

Ni Jesus nagbiag iti naplano a biag, maysa a nasukog a rinibu a tawtawen sakbay ti pannakaiyanakna. Kanayon a panunoten daytoy a kinapudno. Nagtalinaed a sensitibo iti panangiyuna ti Dios. Imbaga ni Cristo:

"Ken awan ti aramidek a sisiak; no di ket kas iti insuro kaniak ni Ama, dagitoy ti saoek… nga aramidek dagiti makaay-ayo kenkuana."--Juan 8:28, 29.

Plinano ti Dios ti nataoan a biag ni Jesus, sakbay ti pannakaiyanakna, ken ti Dios ket addaan iti plano iti tunggal tao. Iti nauneg a pagayatan ket biroken ti nawadwad a biag.

Ni Ray ket saan a kanayon a sigurado no kayatna nga ited ti biagna iti plano ti Dios. Ngem idin nakasango iti narigat a desision maipapan no sadinno ti pagadalanna iti kolehio, nagdesision iti umuna a gundaway iti biagna tapno birokenna ti nadiosan a panangidalan maipapan iti daytoy. Nagkararag iti sumagmamano nga al-aldaw ken pinadasna ti agdengngeg iti sumagmamano a sungbat. Kalpasanna kasla makaal-ala iti nalawag a rasrason no apay a masapul a pilienna ti Option B: basbassit ti bayadan ngem dakkel ken impersonal a unibersidad. Iti mabiit kalpasan iti panangrugi dagiti klase naam-ammona dagiti sumagmamano a nakaskasdaaw a Cristiano a kabilang ti Campus Crusade for Christ. Ti kapadasanna kadakuada iti sumaruno a dua a tawen ket nangbalbaliw ti biagna.

No lagipen ni Ray itatta, ibagana a ti tunggal kanito a makisango iti naririgat a panagdesision ken dawatenna ti nailangitan a panangirutong, "Ti Dios nanglukat iti buo a baro a lugar iti biagko."

Kasanom a maammaon ti plano ti Dios iti biagmo? Ti Dios mangaywan iti sumagmamano a pamayan:
(1) TI BIBLIA.
Iti Salmista, ania ti Mangaywan a libro ti biag?
"Ti saom pagsilawan kadagiti saksakak, ket silaw iti danak."--Salmo 119:105.
Ti Sao ti Dios pabaroenna dagiti panunot ken mangted kadatayo iti panagkita (Roma 12:2; Salmo 119:99). Ti kanayon a panawen a panagadal a nainkararagan kadagiti Sursurat ket isu ti kasayaatan a pamayan a maala dagiti nangruna nga ar-aramidtayo a nasayaat.
(2) DAGITI NAINLANGITAN A PASPASAMAK.
Ti Dios ket iturturungnatayo pay babaen iti nailangitan-naiturong a paspasamak. Ti Salmo 23 iladawanna Isu kas Naimbag a Pastor. Ti pastor iturongna dagiti karnerona kadagiti naruot a turturod ken kasta pay kadagiti nabatbato a garangugong. Mabalinna a tulungan kadagiti pagkurkuranganda ken makaadal manipud iti tunggal kapadasan. Addaantayo iti Pastor a kanayon nga adda iti sibaytayo.
(3) TI DIREKTA A PANNAKISAO TI DIOS ITI PUSO.
Ti Dios idalannatayo pay babaen iti panagsao iti konsensiatayo. Ti Espiritu mabalinna a lawagan "dagiti mata iti pusom" (Efeso 1:18). Iti kanayon a pannakisasao iti Dios, nakarkaro pay nga iturongnatayo. Damilienna ti agpadpada ti adda iti uneg nga impresion ken ti panagrasontayo ken panangipatpato tapno makitatayo a nalawag ti sumaruno nga addang a masapultayo a papanan.

5. TI PANANGITURONG KET MASAPUL ITI PANAGTUNOS

Posible, ngarud, nga ipapanmo a sika ket agbibiag iti turong ti Dios ngem ketdi sursurotem dagiti pagayatam ken rikriknam (Proverbio 16:25). Dagiti riknatayo masapul nga agtunos iti sursuro ti Biblia. Saan a natalged nga ibaga a ti Dios idaldalannatayo malaksid a dagiti tallo agtutunosda.

Kas kenni Jake, kas pangarigan. Addaan isu ti naayat nga asawa ken dua nga annak ngem addaan iti relasion iti sabali a babai. Imbagana kadagiti gagayemna: "Ikararagko daytoy ket mariknak a pagayatan ti Dios."

Dagiti emosion ni Jake ken "dagiti adda iti unegna nga impresion" nalawag nga isuda ti nangibaon kenkuana a mapan iti mali a dalan. Panpanunotenna a pagayatan daytoy ti Dios a maam-ammona daytoy sabali a babai ket saan a nagsanud tapno kitaenna dagiti bilin ti Biblia maipapan iti kinaabig. Ken ti Biblia, "ti linteg ken ti pammaneknek," isu ti addaan iti akem a mangidalan a libro, ti maudi nga okom agpaay iti panangammo iti pudno nga aramid (Isaias 8:20). Saantayo a palubusan ti uray ania nga impresion wenno kas nalawag a pagayatan ti langit a mangiturungkadatayo nga umadayo iti prinsipio iti Biblia.

6. PANAGPASAKUP ITI PLANO TI DIOS

Idin immay ti Diablo a mangsulisog ken Jesus idiay let-ang, insingasingna, "No laeng panawam dagiti nasasakit a sakrifisio nga inplano ti Dios kenka, Itedko ti lubong iti dakulap ti imam--nga addaan tan-ok, gasat, ken narang-ay a biag." Ni Satanas ket nangala pay iti paspaset iti Sursurat iti panggepna tapno maallilawna ni Jesus. Ngem tunggal tiempo labananna isu ni Jesus iti sasao, a "Naisurat" (Mateo 4:1-11).

Maysa a napigsa a liksion a maadaltayo iti biag ni Jesus ket ti panangipasakup iti pagayatan ti Ama. Uray pay iti tengnga ti nakabutbuteng a leddaang idiay Getsemane, Insangitna, "Ket magna pay bassit iti masangoanan, ket inruknoyna ti rupana ket nagkararag a kunkunana: Ama, no mabalin lumabas koma kaniak daytoy a kopa; ngem saan a kas iti kayatko, no di kas iti kayatna" (Mateo 26:39). Kalpasan ti tallo a tawen iti ministeriona, agbibiag iti inaldaw a makituntunos iti plano ti Ama, ti matmatay a sasao ni Cristo ket: "Nalpasen" (Juan 19:30). Ti pudno nga ibagbaga ni Cristo ket, "Ti biagko a plinano ti Dios ket itan nalpasen ken natungpalen."

Bayat iti panangrugiyo a denggen ti timek ti Dios nga agsasao a kanayon babaen iti Saona, dagiti nainlangitan a tiempo ken direkta nga impresion, mabalinmo a masursuro nga awaten ti panangiturongna iti naan-anay iti puso. Mabalinmo met a mabirok ti ragsak iti plano ti Dios ken ti panangiturong ti Dios iti biag.

Dagiti naggapuan dagiti adda iti ngato a historical material ken ti nadetalyado pay nga estoria a naiparang kadagiti sumaganad a liblibro: Documents of the Christian Chruch, selected and edited by Henry Bettenson (London, Oxford Univesity Press): Joseph Gullen Ayer, A Source Book for Ancient Church History (New York, Charles Scribner's Sons, 1931, 1941); Origen: Contra Celsum, translated by Henry Chadwick (Cambridge: University Press, 1965); F. F. Bruce, The New Testament Documents: Are They Reliable? 5th edition, revised (Grand Rapids: William B. Eerdmans Publishing Company, 1960; ken R. T. France. The Evidence for Jesus (Downers Grove, Illinois: InterVarsity Press, 1986). Ti maudi a dua a libro ket naggapu iti saan a nangina a paperback editions ket makita iti adu a religious bookstors. No dagiti immuna a tallo a libro ket saan a makita iti lokal a librariayo, dagiti adda idiay Estados Unidos ket mabalin a saludsodenda ti librarian nga iyorderandakayo babaen iti inter-library loan.